Mu mbili josope ja ŵandu, ciwa ca Yesu ciŵele cakusosekwa kwejinji. Yesu ŵawile ni cakulinga cakuwucisya umi wa ŵandu kuti uŵe mpela mwaŵasacilaga Mlungu pandanda. Mlungu nganampanganya mundu kuti atendeje yakusakala, kuti alwaleje, kapena kuti aweje. (Genesis 1:31) Nambo ulemwa wayice pacilambo capasi kupitila mwa mundu jwandanda, Adamu. Yesu ŵapelece umi wakwe kuti atukulupusye ku ulemwa ni ciwa.—Aŵalanje Matayo 20:28; Aloma 6:23.

Mlungu ŵalosisye cinonyelo cekulungwa pakumtumisya Mwanagwe pacilambo capasi kuti catuwile. (1 Yohane 4:9, 10) Yesu ŵasalile ŵakumkuya ŵakwe kuti akumbucileje ciwa cakweci pakamulicisya masengo mkate ni finyo. Patukutenda yeleyi caka cilicose, tukusalosya kuti tukuyamicila mnope cinonyelo ciŵalosisye Mlungu, soni Yesu.—Aŵalanje Luka 22:19, 20.

Yesu paŵasalilaga pandanda ŵakumkuya ŵakwe kuti akumbucileje ciwa cakwe, ŵasasilesoni ya cilangano. (Matayo 26:26-28) Cilanganoci capelece cembeceyo cakuti ŵakumkuya ŵakweŵa soni ŵane ŵamnono akaŵe mayimwene ni ŵambopesi kwinani yimpepe ni Yesu. Atamose kuti ŵandu mamiliyoni gamajinji akusakumbucila ciwa ca Yesu, nambo ŵakusalya mkate ni kumwa finyo ali awo pewo ŵali m’cilanganoci.—Aŵalanje Ciunukuko 5:10.

Kwa yaka ciŵandika 2,000, Yehofa aŵele ali mkusagula ŵandu ŵacaciŵa mayimwene. (Luka 12:32) Jemanjaji ali ŵamnono pakwalandanya ni ŵandu ŵacacitamaga pacilambo capasi mpaka kalakala.—Aŵalanje Ciunukuko 7:4, 9, 17.