Kutenda katangale m’boma kuli kamulicisya masengo macili mwakulemweceka kwa acakulungwakulungwa ŵaboma kuti apatepo cinecakwe. Yeleyi yatandite kalakala. Mwambone, m’Baibulo mwana lilamusi lyakulekasya mundu kupeleka yindu kwa jwakulamula kuti magambo gakamgomela, yayikulosya kuti mtetowu waliji wakumanyika kala atamose yaka 3,500 yipiteyo. (Ekisodo 23:8) Nambo, kutenda katangale kukusagopolela yejinji ngaŵaga kwamba kupocela yindu kuti magambo gakamgomela mundu. Acakulungwakulungwa ŵaboma ŵakatangale ndaŵi sine akusajiŵa yindu, akusajinjilila masengo ga mundu jwine atamose kuti nganakola macili gakutendela yeleyo, kapena kwiŵa mbiya. Ŵanesoni komboleka kamulicisya masengo macili gawo pakwatendela yambone acimjawo kapena ŵacinasi ŵawope.

Atamose kuti m’yiwanja yejinji ya ŵandu mukusatendekwa katangale, nambo m’boma ni mwayitupile mnope. Ciwanja cakuwungunya yilambo yayikutenda katangale mnope ca Transparency International mu 2013 casasile kuti ŵandu pacilambo cosope akusaganisya kuti makuga ga ndale, ŵapolisi, acakulungwakulungwa ŵa m’boma, ŵakulinganya ni kwiticisya malamusi, soni ŵakulamula magambo ni ŵakusatenda katangale mnope. Alole yine mwa yindu yaŵapatile panganiji.

• AFRICA: Mu 2013, acakulungwakulungwa ŵaboma ŵakwana 22,000 ŵa ku South Africa ŵasimene ni magambo gakutenda katangale.

• AMERICAS: Mu 2012, m’cilambo ca Brazil, ŵandu ŵakwana 25 ŵataŵile ligongo lyakamulicisya masengo mbiya sya boma pakamucisya makuga ga ndale. Jumo mwa ŵandu ŵakutaŵigwaŵa ŵaliji jwaŵili kwa jwakulamula cilamboco jwaŵapumwile masengo.

• ASIA: Mu 1995, ŵandu ŵakwana 502 ŵawile nyumba jaŵakamulilagamo masengo jili jagwilile, mu msinda wa Seoul, ku South Korea. Ŵakuwungunya ŵapatile kuti acakulungwakulungwa ŵa mu msindawo ŵapocele katangale kutyocela ku kampani jakutaŵa kuti jikamulicisye masengo yindu yangalimba, yayaliji yangajilana ni malamusi gakuŵambalila ngosi.

• EUROPE: Jwamkulungwa jwine jwa m’ciwanja ca European Commission Home Affairs, Cecilia Malmström ŵatite, “Apanopano [katangale m’yilambo ya ku Europe] atupile mnope.” Ŵatitesoni kuti “ŵandale nganakolasoni lung’wanu lwakuti amasye katangale.”

Ligongo lya kutamilicika kwa katangale m’boma, ŵandu ngakombolasoni kummasya. Namatetule pangani syakumasya katangale, Susan Rose-Ackerman, ŵalembile kuti, kuti yindu yitande kwenda cenene “pakusosekwa kucenga mwajikusatendela yindu boma.” Atamose yikuwoneka mpela kuti yili yakusawusya kumasya katangale, nambo Baibulo jikusalosya kuti yili yakomboleka.