ANA AKUSASAGULA YINDU MWALUNDA KUTI CHAKOLE SOGOLO JAMBONE? Ŵandu ŵane akusakulupilila kuti Mlungu ŵalembile chilepe yayikusatendekwa paumi wetu. Myoyo naga alepele kukwanilisya yakulinga yawo akusagamba kuyileka. Jemanjaji akusati, “Mlungu ŵalembile kuti chinjilepela.”

Ŵandu ŵane akusatenguka ni yangalwe soni yindu yangali chilungamo yayikutendekwa pachilambopa. Akusalingalinga kuti akole umi wambone, nambo ndaŵi syejinji mapulani gawo gakusasokonechela ligongo lya ngondo, yangalwe, ngosi sya m’chipago, soni yilwele. Ni akusaliwusya kuti, ‘Ana ligongo chichi ngusimanasoni ni yindu yeleyi?’

Yili yisyene kuti yakutendekwa ya m’chilambochi mpaka yisokonasye mapulani getu. (Mlaliki 9:11) Nambope kuti chitukole sogolo jangamala, tukusosekwa kusagula mwalunda apano. Ni ligongo lyakwe Baibulo jikusalosya kuti sogolo jetu jikwegamila pa chisagula yetu. Kwende tulole yajikusasala.

Ayisalayeli ali asigele panandi kwinjila m’Chilambo Chelaguchisye, Mose, juŵalongolelaga pa ndaŵiji ŵasalile kuti, “Mbisile umi soni chiwa, majali soni malweso pameso penu. Mkusosekwa kusagula umi kuti mtameje ni umi, jemanja ni mbagwilo syenu, mwakumnonyela Yehofa Mlungu jwenu, mwakupikanila maloŵe gakwe, soni mwakum’nyambatila jwalakwe.”—Detulonomo 30:15, 19, 20.

“Mbisile umi soni chiwa, majali soni malweso pameso penu. Mkusosekwa kusagula umi.”—Detulonomo 30:19

Yisyene kuti Mlungu ŵakopwesye Ayisalayeli ku ukapolo ku Iguputo ni kwapa chembecheyo chakuja kutama ni umi wambone soni wakusangalala m’Chilambo Chelaguchisye. Nambope Ayisalayeli ŵasosekwaga kutendapo kandu. Kuti jemanjaji akapate majaliga ŵasosekwaga “kusagula umi.” Mwamtuli? ‘Mwakumnonyela Mlungu, mwakupikanila maloŵe gakwe soni mwakum’nyambatila jwalakwe.’

Lelojinosoni tukusasosekwa kutenda chisagula mpela chelechi, soni yampaka tusagule yikusakwaya mwajichiŵela sogolo jetu. Mpaka tusagule umi wangamala m’chilambo chapasi cha paladaiso, mwakumnonyela Mlungu, kupikanila maloŵe gakwe, soni kum’nyambatila jwalakwe. Nambo ana mbali syelesi sikusapwatikapo chichi?

Ndamo jakusosekwa mnope ja Mlungu jili chinonyelo. Mwakusalilidwa ni Mlungu ndumetume Yohane jwalembile kuti, “Mlungu ali chinonyelo.” (1 Yohane 4:8) Ni ligongo lyakwe Yesu pakumjanga mundu jwine ya lilamusi lyekulungwa jwatite, “Mumnonyeleje Yehofa Mlungu jwenu ni mtima wenu wosope, ni umi wenu wosope soni ni nganisyo syenu syosope.” (Mateyu 22:37) Kuti tuŵe paunasi usyesyene ni Mlungu tukusosekwa kumnonyela yisyesyene ngaŵape kwamba kumjogopa soni kumpikanila mwamwambo. Nambo ana ligongo chichi tukusosekwa kumnonyela jwalakwe?

Yehofa akusatunonyela ŵanduwe mpela mwakusatendela achinangolo pakwanonyela ŵanache ŵawo. Atamose kuti achinangolo ali ŵangali umlama, nambope mwachinonyelo akusiŵajiganya, kwalimbikasya, kwakamuchisya, soni kwajamuka ŵanache ŵawo ligongo akusasaka kuti yindu yajendeleje chenene. Ana achinangolo akusajembecheyaga yamtuli kwa ŵanache ŵawo? Akusasaka kuti ŵanachewo ŵanonyeleje achinangolowo soni kuti akamulichisyeje masengo yaŵajiganyisyeyo. Myoyosoni Atati ŵetu ŵakwinani, akusajembecheya kuti ŵanduwe twanonyeleje ligongo lya yindu yosope yambone yakusatutendela.

M’yiŵecheto yakala yaŵakamulichisye masengo pakulemba Baibulo, maloŵe gakuti “kupikanila” ndaŵi syejinji gakusagopolelasoni “kukuya.” Mwambone patukumsalila mwanache kuti, “Mwapikanileje achinangolo ŵenu,” tukusagopolela kuti akuyeje yakusamsalila. Myoyosoni kupikanila maloŵe ga Mlungu kukusagopolela kulijiganya soni kukamulichisya masengo yakusatusalila jwalakwe. Tukusapikanila Mlungu mwakuŵalanga Baibulo soni kukamulichisya masengo yatuŵalasileyo.—1 Yohane 5:3.

Pakulosya kusosekwa kwakupikanila Maloŵe ga Mlungu, Yesu pachakutendekwa chine jwatite, “Mundu ngaŵa mkutama ni umi ni chakulyape, nambo ni maloŵe gosope gakutyochela mkamwa mwa Yehofa.” (Mateyu 4:4) Chakulya chili chakusosekwa kwa m’weji, nambope kupata lunda lwakutyochela kwa Mlungu kuli kwakusosekwa mnope kupunda chakulya. Ligongo chichi? Mwenye jwalunda Solomoni jwasasile kuti, “Lunda lukusatuchenjela mpela mwasikusatendela mbiya pakutuchenjela, nambo umbone wakumanyilila yindu uli wakuti lunda lukusasunga umi wa msyene lundalo.” (Mlaliki 7:12) Umanyilisi soni lunda lwakutyochela kwa Mlungu mpaka yituchenjele soni kutukamuchisya kutenda yakusagula yalunda yampaka yitulongolele kuti chitupate umi wangamala.

M’chiwanichisyo cha Yesu cha mu ngani jipite jila, jwalakwe jwatite, “Mlango wakanganika soni msewu wamwana ukwawula ku umi, mwamti ŵele ŵakuwupata ali ŵakuŵalanjika.” (Mateyu 7:13, 14) Kuti tukombole kwenda mu litala lyeleli ni kuja kupata umi wangamala, tukusosekwa kuŵandikana mnope ni jwakumanyilila chenene litalali. Myoyo luli lunda kumŵandichila Mlungu. (Salimo 16:8) Ana mpaka tutende chamtuli yeleyi?

Lisiku lililyose tukusakola yakutenda yejinji. Yindu yeleyi mpaka yitutendekasye kupela mnope soni kutusokonasya kuti tukapataga ndaŵi jaganichisya yakusasaka Yehofa kuti tutendeje. Ni ligongo lyakwe Baibulo jikusasala kuti, ‘Myoyo asamale mnope kuti kajende kawo kakaŵa mpela ŵandu ŵangali lunda, nambo ŵalunda, mwakamulichisya masengo chenene ndaŵi jawo ligongo masikuga gali gakusakala.’ (Aefeso 5:15, 16) Naga ndaŵi syosope tukusawuwona unasi wetu ni Mlungu kuŵa wakusosekwa mnope, yichitukamuchisya kuti tumŵandichileje jwalakwe.—Mateyu 6:33.

Atamose kuti nganituŵa tukombwele kuchenga yatwatesile munyuma, nambope mpaka tukombole kutenda yindu yampaka yitukamuchisye m’weji, soni ŵakunonyelwa ŵetu kola sogolo jambone. Baibulo jikusasala kuti Atati ŵetu ŵakwinani, Yehofa Mlungu, akusatunonyela mnope soni akusatusalila yatukusosekwa kutenda. Alole maloŵe ga jwakulochesya Mika:

“Jwalakwe ŵamsalile m’mwejo yindu yayili yambone. Ana Yehofa akusaka chichi kwa m’mwejo? Akusaka kuti mtendeje yindu mwachilungamo, mŵeje ŵakulupichika, soni mjendeje mwakulinandiya ni Mlungu jwenu.”—Mika 6:8.

Yehofa akwaŵenda kuti atendeje yakusasaka jwalakwe kuti chasangalale ni majali gangamala. Ana wawojo chakunde kutenda yeleyi? Chisagula chili m’miyala mwawo.