Baibulo Mpaka Jitulongolele Chenene

ALOLELE

Pangani jakola ndamo syambone tukajembecheyaga kuti yindu mpaka yitujendele chenene naga tukusagula yinduyo pakujigalila mwatukuyiwonela m’weji soni ŵandu ŵane. Ligongo chichi yili myoyo? Baibulo jikusasala ligongo lyakwe. Jikusatusalilasoni yindu yampaka yitukamuchisye kuti tukomboleje kulekanganya yindu yambone soni yakusakala. Mwamti kumanyilila yeleyi kukusatukamuchisya kuti tuŵeje ŵakusangalala.

TUKUSASOSEKWA MLUNGU KUTI ATULONGOLELEJE

Baibulo jikusatusalila kuti ŵanduwe tukusasosekwa kulongoleledwa ni Yehofa a mmalo mwakulilongolela jika. (Yelemiya 10:23) Ni ligongo lyakwe ŵatupele Baibulo jajikusatukamuchisya kuti tukole ndamo syambone. Mlungu akusiŵanonyela mnope ŵandu soni akusasaka kuti asaguleje yindu mwalunda. Jwalakwe jwangasaka kuti tusimaneje ni yakusawusya soni kuti tulajeje ligongo lyakuti tusagwile yindu mwakulemwecheka. (Detulonomo 5:29; 1 Yohane 4:8) Pakuŵapo Mlungu ni juŵatupanganyisye, jwalakwe ali jwalunda soni akusamanyilila yindu yampaka yitukamuchisye. Ni ligongo lyakwe akusatupa malamusi gambone mnope gakutukamuchisya kukola ndamo syambone. (Salimo 100:3; 104:24) Atamose yili myoyo, Mlungu jwangakanganichisya ŵandu kuti akuyeje malamusi gakwe.

Yehofa ŵampele Adamu ni Hawa chilichose chiŵasosechelaga kuti aŵeje ŵakusangalala. (Genesesi 1:28, 29; 2:8, 15) Jwalakwe ŵapelesoni malamusi gangasawusya mwamti ŵajembecheyaga kuti jemanjaji chagakuyeje. Atamose yaliji myoyo, Mlungu ŵapele ufulu wakusagula kugakuya malamusigo kapena iyayi. (Genesesi 2:9, 16, 17) Nambo yili yakutesya chanasa kuti Adamu ni Hawa ŵasagwile kutenda yindu yiŵayiwonaga jemanjajo kuti yili yambone mmalo mwakupikanila malamusi ga Mlungu. (Genesesi 3:6) Ana yakuyichisya yakwe yaliji yamti uli? Ana ŵandu akusaŵa ŵakusangalala pakutenda yindu yiliyose yakuganisya kuti yili yambone? Ngakusasangalala amta panandi. Kwa yaka yejinji yilosisye kuti ŵandu palesile kukuya malamusi ga Mlungu ngakusakola mtendele soni ngakusasangalala.—Jwakulalichila 8:9.

Yajikusatusalila Baibulo mpaka yitukamuchisye kuti tusaguleje yindu mwalunda mwangajigalila kuti twatyochele kwapi kapena twakulile mu liŵasa lyamti uli. (2 Timoteyo 3:16, 17; alole libokosi lyakuti “ Buku ja Ŵandu Wosope.”) Kwende tulole mwajikusatendela Baibulo yeleyi.

Amanyilile ligongo lyakwe Baibulo jikusakolanjidwa kuti “maloŵe ga Mlungu.”—1 Atesalonika 2:13. Alolele pa jw.org fidiyo jakuti Ana Ŵani Juŵalembile Baibulo?

ŴANDU ŴANE NGAKUSAJIKULUPILILA BAIBULO

Ŵandu ŵane akusayiwona kuti Baibulo nganijiŵa jakamuchisye kuti akole ndamo syambone. Mwamti akusaŵecheta yindu yakuyichisyayi.

Yakusaŵecheta ŵandu: “Ngani sya m’Baibulo sikusasisyana.”

Yisyesyene yakwe: Pandanda mpaka ayiwoneje kuti ngani sine sya m’Baibulo sikusasisyana ni sijakwe. Nambo naga akulijiganya mwaŵajilembele nganijo soni ndaŵi jiŵalembile mpaka amanyilile kuti ngani sya m’Baibulo sili syangasisyana.

Kuti amanyilile ngani sine syele ŵandu akusaganisya kuti sikusasisyana aŵalanje ngani ja Chichewa pa jw.org ja mtwe wakuti “Kodi Nkhani za M’Baibulo Zimatsutsana?”

Yakusaŵecheta ŵandu: “Ŵandu ŵakusamanyika kuti akusakuya yajikusasala Baibulo akusatendasoni yakusakala. Yeleyi yikulosya kuti Baibulo nganijiŵa jimkamuchisye mundu kola ndamo syambone.”

Yisyesyene yakwe: Tukajiwonaga kuti Baibulo jili jangakamuchisya ligongo lyakuti ŵandu akulepela kukuya yajikusajiganya. Ŵandu ŵajinji masiku agano kupwatikapo achimlongola ŵa dini akusaŵecheta kuti akusakuya yajikusalala Baibulo. Nambope Baibulo jasasile kala kuti jemanjaji chachitendaga yakulekangana ni yajikusajiganya. Nambosoni jasasile kuti yakuyichisya yakwe “ŵandu chachiŵechetaga yakunyosya yijiganyo yisyesyene.”—2 Petulo 2:1, 2.

Kuti amanyilile chimo mwa yindu yakusatenda achimlongola ŵa dini, chachilisoni chakutindana ni yajikusasala Baibulo aŵalanje ngani pa jw.org ja mtwe wakuti “Ana Dini Lili Litala Line Lyakupatila Mbiya?”

Yakusaŵecheta ŵandu: “Ŵandu ŵakusakuya yajikusala Baibulo ngakusiŵachimbichisya ŵane.”

Yisyesyene yakwe: Baibulo jikusatulimbikasya kuti twachimbichisyeje ŵandu ŵane. Jikusatusalila kuti. . .

twawoneje ŵandu ŵane kuŵa ŵakutupunda.—Afilipi 2:3.
twachimbichisyeje ŵandu ŵatukulekangana nawo nganisyo kapena yatukusakulupilila.—1 Petulo 2:17.
tukakanganichisyaga ŵandu ŵane kuti akuyeje yatukusaka m’wejo.—Mateyu 10:14.

Baibulo jikusatusalila kuti Mlungu ndaŵi syosope akusiŵatendela ŵandu yindu yambone soni mwachilungamo. Mwamti jwalakwe akusasakasoni kuti m’weji tutendeje myoyo.—Aloma 9:14.

Kuti amanyilile yejinji aŵalanje ngani pa jw.org ja mtwe wakuti “Ana Baibulo Mpaka Jitukamuchisye Chamtuli Pangani Jakuŵa Ŵakupikana ya Ŵane?”

BAIBULO JIKUSATUSALILA YAKUSASAKA MLUNGU KUTI TUTENDEJE

Baibulo jikusatusalila yindu yele Yehofa aŵele ali mkwatendela ŵandu. Yajikusatusalilayi yikusatukamuchisya kumanyilila yindu yakusayiwona Mlungu kuti yili yambone kapena yakusakala. Yikusatukamuchisyasoni kumanyilila yindu yampaka yitukamuchisye kapena kutuwulasya. (Salimo 19:7, 11) Yindu yatukusalijiganya m’Baibulo yikusatukamuchisya kuti ndaŵi syosope tusaguleje yindu mwalunda paumi wetu.

Mwachisyasyo, aganichisye ya malangiso gagakusasimanikwa pa Misyungu 13:20. Lilembali likusati, “Mundu jwakwenda ni ŵandu ŵalunda nombe najo akusaŵa jwalunda nambo jwakwenda ni yisilu nombe najo tachijonasika.” Mpela mwayaŵelele kalako malangisoga gali gakamuchisyasoni masiku agano. Baibulo jigumbele ni malangiso gakamuchisya gelega.—Alole libokosi lyakuti, “ Yajikusasala Baibulo Yili Yakamuchisya Mpaka Lelo.”

Nambo mwine mpaka aliwusyeje kuti, ‘Ana mpaka manyilile wuli kuti yajikusasala Baibulo mpaka yingamuchisye unejo?’ Ngani jakuyichisya chijisale yajitite Baibulo pakwakamuchisya ŵandu ŵane.

a Lina lya Mlungu lili Yehofa.—Ekisodo 3:14; maloŵe ga mwiŵanda mu Buku Jeswela; Ekisodo 6:3.

YAJIKUSASALA BAIBULO YILI YAKAMUCHISYA MPAKA LELO

Yajikusasala Baibulo yili yakamuchisyape mpaka lelo. Yili myoyo atamose kuti ŵamalisisye kujilemba yaka yakupunda 2,000 yipiteyo. Ndaŵi syosope ŵanduwe tukusasaka kola umi wambone soni wakusangalala. (Jwakulalichila 1:9) Myoyo yajikusasala Baibulo mpaka yitukamuchisye kuti tuŵeje ŵakusangalala.

Kutenda Yindu Mwakuwona Mtima

“Tuli ŵakusachilila kutenda yindu yosope mwakuwona mtima.”—Ahebeli 13:18.
“Jwalijose jwawiyi aleche wiyiwo. Mmalomwakwe akamule masengo mwakulimbichila.”—Aefeso 4:28.

Kuŵa Paunasi Wambone ni Ŵane

“Mundu jwalijose akagambaga kulisosela jikape yambone, nambo mnopemnope ŵasoseleje achimjakwe.”—1 Akolinto 10:24.
“Mpitilisye kupikana ya ŵane soni kululuchilana ni mtima wosope.”—Akolose 3:13.

Patukusaka Kusagula Yakutenda

“Mundu jwakuloŵela akusakulupilila chilichose, nambo mundu jwakalamuka akusalolechesya mwakwendela.”—Misyungu 14:15.
“Mundu jwakalamuka pati achiweni chindu chakogoya akusajuŵaga, nambo mundu jwakuloŵela akusagambaga kupelenganya ni kutanda kuligamba panyuma pakwe pati asimene ni yisawusyo.”—Misyungu 22:3.

SANJA JA MLONDA