1-2. (a) Ligongo chichi ndumetume Paulo jwasasile kuti chinonyelo chili ‘chakupunda pa yosope’? (b) Ana chitukambilane yiwusyo yapi?

 NDUMETUME Paulo pajwasalaga ya chikulupi, chembecheyo soni chinonyelo, jwamalisisye mwakuŵecheta kuti, “chakupunda pa [ndamo syosopesi] chili chinonyelo.” (1 Akoli. 13:13) Paulo jwaŵechete yeleyi ligongo kusogoloku ngasitusosekwasoni kola chikulupi pa yilanga yasasile Mlungu. Nambosoni ngasitukola chembecheyo kuti yindu yeleyi yikwanilichikwe ligongo yichiŵa yili yikwanilichikwe kala. Nambo tuchisosekwa kupitilisya kumnonyela Yehofa nambosoni kwanonyela achalongo achimjetu. Kusala yisyene, chinonyelo chetu kwa jemanjaji chichipitilisya kukula.

² Ligongo lyakuti ndaŵi syosope tuchisosekwa kunonyelana, nganiji chijijanje yiwusyo yitatu ayi: Chandanda, ligongo chichi tukusasosekwa kunonyelana? Chaŵili, ana mpaka tunonyelaneje m’matala gapi? Chatatu, ana mpaka tutende chichi kuti ndaŵi syosope tunonyelaneje mnope?

3. Ana ni magongo gapi gagakusatutendekasya kunonyelana?

³ Ligongo chichi kunonyelana kuli kwakusosekwa mnope? Patukunonyelana tukusalosya kuti tuli Aklistu ŵasyesyene. Yesu ŵasalile ŵandumetume ŵakwe kuti, “Wosope chachimanyilila kuti mli ŵakulijiganya ŵangu naga mkunonyelana.” (Yoh. 13:35) Nambosoni kunonyelana kukusatukamuchisya kuti tukamulaneje mnope. Paulo jwasasile kuti chinonyelo “ni chachili chakwakamulanya ŵandu chambone mnope.” (Akolo. 3:14) Nambo panasoni ligongo line lyakusosekwa mnope lyalikusatutendekasya kunonyelana. Ndumetume Yohane jwalembele Aklistu achimjakwe kuti,  “Jwalijose jwakusamnonyela Mlungu akusosekwasoni kumnonyela mlongo mjakwe.” (1 Yoh. 4:21) Myoyo patukunonyelana tukusalosyasoni kuti tukusamnonyela Mlungu.

4-5. Alondesye kukamulana kwakupali pasikati pa kumnonyela Mlungu ni kwanonyela achalongo achimjetu.

⁴ Ana kumnonyela kwetu Mlungu kukusakamulana chamtuli ni kwanonyela abale ni alongo ŵetu? Kuti tupikanichisye yeleyi kwende tuganichisye kukamulana kwakupali pasikati pa mtima wetu ni yiŵalo yine ya chilu chetu. Dokotala mpaka amanyilile naga mtima wetu ukukamula chenene masengo mwakulinga kawutuche ka myasi pamkono petu. Ana yeleyi yikukamulana chamtuli ni ngani ja chinonyelo?

⁵ Mpela mwayikusaŵela kuti dokotala mpaka amanyilile mwawukukamulila masengo mtima wetu mwakulinga kajende ka myasi, m’wejisoni mpaka tumanyilile mwachiŵelele chinonyelo chetu pa Mlungu mwakulola yatukusati pakwanonyela ŵane. Naga tumanyilile kuti chinonyelo chetu pa ŵandu ŵane chitandite kunandipa, welewo mpaka uŵe umboni wakuti chinonyelo chetu pa Mlungu chitandite kunandipasoni. Nambo naga ndaŵi syosope tukusitwanonyela abale ni alongo, welewo mpaka uŵe umboni wakulosya kuti tukusamnonyela mnope Mlungu.

6. Ligongo chichi tukusasosekwa kulitendela chanasa naga chinonyelo chetu pa abale ni alongo chitandite kunandipa? (1 Yohane 4:​7-9, 11)

⁶ Tulitendeleje chanasa naga tuyikopochele kuti chinonyelo chetu pa abale ni alongo chitandite kunandipa. Ligongo yeleyi mpaka yilosye kuti unasi wetu ni Yehofa utandite konasika. Ndumetume Yohane jwasasile mfundoji mwakupikanika chenene pajwaŵechete kuti, “Mundu jwangamnonyela mlongo mjakwe jwakusamwona, nganaŵa amnonyele Mlungu jwanganamwoneje.” (1 Yoh. 4:20) Ana pelepa tukulijiganya chichi? Yehofa akusasangalala mnope ni m’weji ‘patukunonyelana.’—Aŵalanje 1 Yohane 4:​7-9, 11.

7-8. Ana mpaka tulosye kunonyelana m’matala gane gapi?

⁷ Mwakuwilisyawilisya m’Maloŵe ga Mlungu tukusapata lilamusi lyakuti ‘tunonyelaneje.’ (Yoh. 15:​12, 17; Alo. 13:8; 1 Ates. 4:9; 1 Pet. 1:22; 1 Yoh. 4:11) Nambope, chinonyelo jili ndamo jajikusaŵa mumtima mwamti pangali mundu jwalijose jwampaka alole yayili mumtima mwetu. Sambano, ana mpaka tutende yamtuli kuti chinonyelo chetu chiwonecheleje kwa ŵane? Mpaka tutende yeleyi kupitila mu yindu yatukusaŵecheta soni kutenda.

⁸ Mpaka tulosye kunonyelana m’matala gejinji. Gakuyichisyaga gali gane mwa matala gelega: “Mŵecheteje yakuwona kwa jwine ni mjakwe.” (Sak. 8:16) “Mtameje mwamtendele ni ŵane.” (Maliko 9:50) “Mŵeje ŵandanda pakwachimbichisya ŵane.” (Alo. 12:10) “Mpochelaneje chenene.” (Alo. 15:7) “Mpitilisye . . . kululuchilana.” (Akolo. 3:13) “Mpitilisye kunyakulilana yakusitopesya.” (Agal. 6:2) “Mpitilisye kulimbikasyana.” (1 Ates. 4:18) “Mpitilisye . . . kukamusyangana.” (1 Ates. 5:11) “Mpopelelaneje.”—Yak. 5:16.

9. Ligongo chichi kwalimbikasya ŵane lili litala lyambone mnope lyakulosya kuti tukusitwanonyela? (Alole chiwulili.)

⁹ Kwende tukambilane litala limo lyampaka lilosye kuti tukwanonyela ŵane lyalikolasile mu ndime jipiteji. Paulo jwatite, “Mpitilisye kulimbikasyana.” Ligongo chichi kwalimbikasya ŵane lili litala lyambone mnope lyakulosya kuti tukwanonyela ŵane? Mwakamulana ni buku jine jakulondesya ya Baibulo, maloŵe gaŵakamulichisye masengo Paulo gakuti “kulimbikasyana” gakusagopolela “kuŵa ni mundu pakusaka kumkamuchisya pandaŵi jakusimana ni yakusawusya.” Myoyo, patukumlimbikasya mundu jwakusimana ni yakusawusya, yikusaŵa kuti tukumkamuchisya kuti apitilisye kumtumichila Yehofa  mwakulupichika. Mwamti ndaŵi jilijose patukumlimbikasya Mklistu mjetu tukusalosya kuti tukusamnonyela mnope.—2 Akoli. 7:​6, 7, 13.

10. Ana pana kukamulana kwamtuli pasikati pa kwatendela ŵane chanasa soni kwalimbikasya?

¹⁰ Kwatendela ŵane chanasa soni kwalimbikasya yili yakamulana. Ana yikusakamulana m’matala gapi? Mundu jwakwatendela chanasa ŵane, akusakola mtima wakusaka kwalimbikasya soni kwakamuchisya. Myoyo, chandanda tukusasosekwa kwatendela ŵane chanasa kaneko ni kwalimbikasya. Paulo jwasasile kuti Yehofa akusiŵatendela chanasa ŵandu yayikusamtendekasyaga kuti ŵalimbikasyeje. Paulo jwasasilesoni kuti Yehofa ali “Mlungu jwakusatutendela chanasa soni jwakusatulimbisya mu yosope.” (2 Akoli. 1:3) Pelepa Paulo jwakamulichisye masengo maloŵe gakuti “chanasa” pakusaka kulondesya mwakusapikanila mundu jwayimkwayiye mumtima ligongo lya yakusawusya yakusimana nayo ŵane. Myoyo, Mlungu ali jwachanasa chekulungwa ligongo lyakuti yikusamkwaya mnope ŵandu pakusimana ni yakusawusya. Mwamti chanasa chelechi chikusamtendekasya jwalakwe ‘kutulimbisya mu yakusawusya yetu yosope.’ (2 Akoli. 1:4) Mpela mwayikusaŵela kuti mesi gakusisima gakusatamika pasi mitima ja ŵandu ŵajakwete njota, Yehofa akusiŵatamikasoni pasi mtima ŵandu ŵakusimana ni yakusawusya soni kwalimbikasya. Ana mpaka tumsyasye chamtuli Yehofa pangani jakwatendela ŵane chanasa soni kwalimbikasya? Litala limo lyampaka litukamuchisye lili kola ndamo syampaka situkamuchisye kuti twatendeleje ŵane chanasa soni twalimbikasyeje. Ana sine mwa ndamo syelesi sili syapi?

11. Mwakamulana ni Akolose 3:12 soni 1 Petulo 3:​8, ana ni ndamo sine syapi syampaka situkamuchisye kuti twanonyeleje ŵane soni kwalimbikasya?

¹¹ Ana chichi champaka chitukamuchisye kuti tunonyelaneje mnope ni chakulinga chakuti “tupitilisye kulimbikasyana” lisiku lililyose? Kuti tukombole kutenda yeleyi tukusosekwa kola mtima wakwaganichisya ŵane, kunonyelana soni umbone mtima. (Aŵalanje Akolose 3:12; 1 Petulo 3:8.) Ana ndamo syelesi mpaka situkamuchisye chamtuli? Naga tukwete ndamo syelesi mumtima mwetu, tuchikombola kwakamuchisya abale ni alongo ŵetu pandaŵi jasimene ni yakusawusya. Yesu jwasasile kuti, “Pakamwa pakusaŵecheta yayigumbele mumtima. Mundu jwambone akusakoposya yindu yambone kutyochela m’chipanje chakwe chambone.” (Mat. 12:​34, 35) Myoyo, kwalimbikasya abale ni alongo ŵetu pandaŵi jakusimana ni yakusawusya lili litala limo lyambone mnope lyakulosya kuti tukusitwanonyela jemanjaji.

12. (a) Ligongo chichi tukusosekwa kuŵa ŵakusamala kuti tukaleka kwanonyela ŵane? (b) Ana chitukambilane yiwusyo yapi?

¹² Wosopewe tukusasaka ‘kupitilisya kunonyelana.’ (1 Yoh. 4:7) Nambope, mpaka tutende chenene kukumbuchilaga maloŵe ga Yesu gakutukalamusya gakuti “chinonyelo cha ŵandu ŵajinji chichinandipa.” (Mat. 24:12) Pelepa Yesu nganagopolelaga kuti ŵakulijiganya ŵakwe ŵajinji chachileka kwanonyela ŵane. Mmalomwakwe tukusosekwa kuŵa ŵakusamala kuti tukajigalila msimu wangali chinonyelo wawuwandile pachilambopa. Patukuganichisya yeleyi, kwende tukambilane chiwusyo chakusosekwachi: Ana chichi champaka chitukamuchisye kumanyilila naga tukusitwanonyela yisyesyene abale ni alongo ŵetu?

13. Ana chichi champaka chisokonasye chinonyelo chetu?

¹³ Litala limo lyakutukamuchisya kumanyilila mwachiŵelele chinonyelo chetu lili kulola mwatukusatendela yindu yine paumi wetu. (2 Akoli. 8:8) Chimo mwa yindu yeleyi, ŵachikolasile ndumetume Petulo. Jwalakwe jwatite, “Kupunda pa yosope, mŵeje ŵakunonyelana mnope, ligongo kunonyelana kukusasiŵa yakulemwa yejinji.”  (1 Pet. 4:8) Myoyo, yatukusatendaga abale ni alongo ŵetu patuleŵele mpaka yilosye naga tukusitwanonyela mnope jemanjaji.

14. Mwakamulana ni 1 Petulo 4:​8, ana twanonyeleje ŵane mwamtuli? Apeleche chisyasyo.

¹⁴ Kwende tukambilane panandi ya maloŵe ga Petuloga. Mbali jandanda ja ndime 8 jikulondesya kuti ‘tunonyelaneje mnope.’ Maloŵe gaŵakamulichisye masengo Petulo pelepa gakuti “mnope” gakugopolela “kutambasukula.” Mbali jaŵili ja lilembali jikusasala umbone wampaka upagwe patukunonyelana mnope. Kwanonyela mnope abale ni alongo ŵetu mpaka kusiŵe yakulemwa yejinji. Kuti tupikanichisye yeleyi kwende tuganichisye ayi: Tuwanichisye kuti akwete tebulo jajikwete tumadondo twenyalaye penani pakwe. Atamose yili myoyo, mpaka akombole kujigala nguwo ni kutandika penani patebulojo kuti jisiŵe tumadondo tula. Mwakulandana ni yeleyi, naga tukusitwanonyela mnope abale ni alongo ŵetu tuchisiŵa kapena kuti tuchakululuchila jemanjajo, ngaŵa chakulemwa chimope, yiŵilipe, nambo “yakulemwa yejinji.”

15. Ana tuchikombola kutenda chichi patukwanonyela mnope abale ni alongo ŵetu? (Akolose 3:13)

¹⁵ Tukusasosekwa kwanonyelaga mnope abale ni alongo ŵetu kuti tukombole kwakululuchila yakulemwa yawo atamose yili mkuwoneka kuti  kutenda yeleyo kuli kwakusawusya. (Aŵalanje Akolose 3:13.) Patukombwele kwakululuchila ŵane, tukusalosya kuti tukusitwanonyela mnope jemanjajo, soni yikusalosya kuti tukusaka kumsangalasya Yehofa. Ana ni chindu chine chapi champaka chitukamuchisye kuti twakululuchileje achalongo achimjetu soni kuŵambala kutumbila pa yindu yatulemwechesye?

16-17. Ana ni chindu chine chapi champaka chitukamuchisye kuti twakululuchileje ŵane? Apeleche chisyasyo. (Alole chiwulili.)

¹⁶ Tuganichisyeje yindu yambone yakusatenda abale ni alongo ŵetu ngaŵaga yakulepela yawo. Kuti tupikanichisye yeleyi, tuwanichisye kuti ali pa gulu ja abale ni alongo. Kaneko alinganyisye yakuti ajambule chiwulili cha ŵandu wosope ŵali nawowo. Kaneko akwambulasoni yiwulili yine yiŵili kutendela kuti mwine chiwulili chandanda chila nganichiŵa chiwoneche chenene. Sambano nikuti ajambwile yiwulili yitatu. Nambo kaneko akuyikopochela kuti chiwulili chimo m’bale jwine nganawoneka chenene soni ngakumwetulila. Ana mpaka atende chichi ni chiwulili chelechi? Mpaka achityosye ni kusunga yiwulili yine yiŵiliyo yele jwalijose kupwatikapo m’balejo akuwoneka chenene soni akumwetulila.

¹⁷ Kwende tuwanichisye yiwulili yatusunjileyi ni yindu yatukusasunga munganisyo mwetu. Ndaŵi syejinji tukusakumbuchila yindu yambone yayatendekwe pandaŵi jatwakungulukaga ni abale ni alongo ŵetu. Nambo tuwanichisye kuti pandaŵi jine jatwakungulukaga, m’bale kapena mlongo jwine jwaŵechete yindu yele nganiyitusangalasya, mwamti pane tukusayikumbuchilaga.  Ana mpaka tutende chichi pelepa? Mpaka tutende chenene kutyosya munganisyo mwetu nganisyo syakulemwechekasyo mpela mwampaka tutendele pakutyosya chiwulili changawoneka chenene chila mu foni jetu. (Mis. 19:11; Aef. 4:32) Mpaka tukombole kutyosya kapena kuti kuyiliŵalila yakulemwecheka yamwana yaŵatulemwechesye m’bale kapena mlongo mjetu ligongo lyakuti pana yindu yejinji yambone yaŵatutendele mundujo yatukusayikumbuchila. Yindu yeleyo ni yatukusosekwa kuyisunga munganisyo mwetu.

18. Ana munganiji tukambilene mfundo syapi syakwamba chinonyelo?

¹⁸ Ligongo chichi tukusasosekwa kunonyelanaga mnope? Mpela mwatuyiwonele munganiji, patukwanonyela abale ni alongo ŵetu, tukusalosyasoni kuti tukusamnonyela Yehofa. Nambo ana mpaka tulosye chamtuli kuti tukusitwanonyela Aklistu achimjetu? Litala limo lili kwalimbikasya jemanjaji. Mwamti ‘tuchipitilisya kulimbikasyana’ naga tukutendelana chanasa. Nambo ana mpaka tutende chichi kuti tunonyelaneje mnope? Mpaka tukombole kutenda yeleyi mwakwakululuchila ŵane patulemwechesye.

19. Ligongo chichi masiku agano yili yakusosekwa mnope kuti tunonyelaneje?

¹⁹ Ligongo chichi masiku agano tukusasosekwa kunonyelanaga mnope? Alole magongo gajwasasile Petulo. Jwalakwe jwatite, “Mbesi ja yindu yosope jiŵandichile. Myoyo . . . mŵeje ŵakunonyelana mnope.” (1 Pet. 4:​7, 8) Ana tukusosekwa kwembecheya chichi mbesi ja chilambo chakusakalachi pajikuŵandichila? Pakwamba ya ŵakumkuya ŵakwe, Yesu jwasasile kuti, “Mitundu josope jichiŵengana ni jemanja ligongo lya lina lyangu.” (Mat. 24:9) Myoyo, tukusosekwa kupitilisya kuŵa ŵakamulana kuti tukombole kupitilisya kumtumichila Yehofa ŵandu pakutuŵenga. Patukutenda yeleyi, nikuti Satana chachilepela kutulekanganya. Yeleyi yichikomboleka ligongo lya chinonyelo chatukwete chachili “chakwakamulanya ŵandu chambone mnope.”—Akolo. 3:14; Afil. 2:​1, 2.