Nombe M’bale Nicolas ni ŵamkwakwe lina lyawo Céline ŵalasile ligongo lyakusamila dela jine. Ofesi ja nyambi ja ku France jasalile jemanjaji kuti asamile mumpingo wine. Jemanjaji ŵatite, “Pandanda twasangalalaga mnope ligongo lya kusamaku, nambo kaneko twatandite kwasoŵa achimjetu. Pandaŵi jelejo twaliji mkanitutande kusyoŵekana ni abale ni alongo ŵa mumpingo wasambanowo.” a Pakuŵapo kusama kuli kwakusawusya, ana chichi champaka chitukamuchisye kuti tusangalaleje patusamile mumpingo wine? Ana ŵane mpaka ŵakamuchisye chamti uli ŵandu ŵasamile mumpingo wine? Soni ana ŵandu ŵasamile mumpingo wine mpaka alimbikasyane ni achimjawo ŵa mumpingo wasambanowo mmatala gapi?

YINDU MCHECHE YAMPAKA YAKAMUCHISYE KUTI ASANGALALEJE

1. Amdalileje mnope Yehofa. (Sal. 37:​5, NWT.) Mlongo Kazumi jwakusatama ku Japan jwasamile mpingo wajwasongene kwa yaka 20 ligongo lyakuti ŵamkwakwe ŵasosekwaga kuja kamula masengo kudela jine. Ana jwalakwe jwakundile chamti uli “kuti Yehofa amlongolele”? Jwalakwe jwatite, “Namsalilaga Yehofa yindu yosope yayandagasyaga nganisyo mpela kutenda lipowo soni yindu yine. Mwamti ndaŵi jilijose janamŵendile jwalakwe kuti angamuchisye jwambaga machili.”

Ana mpaka atende uli kuti amdalileje mnope Yehofa? Mpela mwayikusaŵela kuti mbeju jikusasosekwa mesi soni chajila chambone kuti jikule chenene, nombe chikulupi chetu kuti chiŵe chakulimba chikusasosekwa mesi soni chajila chakuwanichisya. M’bale Nicolas jwatumkolasile jula, jwapatile kuti kuganichisya yisyasyo ya ŵandu ŵaŵalijimile yine yakwe pakusaka kumtumichila Mlungu, mpela Yesu, Abulahamu soni Paulo, kwamkamuchisye kuti amdalileje mnope  Yehofa. Kulijiganya Baibulo ndaŵi syosope, kuchakamuchisya kuti akombole kusyoŵelela kuchengako, nambosoni chachipata mfundo syampaka syakamuchisye pakwalimbikasya ŵane.

2. Aŵambaleje kulandanya yindu. (Jwak. 7:10) M’bale Jules pajwasamile ku Benin ni kwawula ku United States, jwasosekwaga kusyoŵelela ndamo jine. Jwalakwe jwatite, “Nasosekwaga kuti namsalileje mundu jwalijose jwasimene najo yindu yosope yakwamba mbili jangu.” Ligongo lyakuti m’baleju nganasyoŵelela yakwasalila ŵane yakwamba mbili jakwe, jwatandite kwaŵambala abale ni alongo. Nambo kaneko ali amanyigene chenene ni abale ni alongo, jwachenjile kaganisye kakwe. Jwalakwe jwatite, “Apano ngusakulupilila kuti chinga tukusatama kwapi pachilambopa, ŵandu wosopewe tuli ŵakulandana. Chachikusalekangana chigambile kuŵa kaŵechete soni katende ka yindu. Mwamti tukusasosekwa kwawonaga mwakuŵajilwa ŵandu wosope.” Myoyo, aŵambaleje kulandanya yakutendekwa ya mumpingo wawo wasambano ni yakutendekwa ya mumpingo wawo wakala. Mlongo jwine jwakutenda upayiniya lina lyakwe Anne-Lise jwatite, “Nganinganichisyaga mnope ya yindu yanayilesile, nambo naganichisyaga mnope yindu yasambano yampaka nalijiganye.”

Nombe achakulungwa ŵa mumpingo akusasosekwa kuŵambala kulandanya yakutendekwa ya mumpingo wawo wasambano ni wakala. Naga katende ka yindu ka abale ŵa mumpingo wawo wasambano kakulekangana ni katende ka abale ŵa mumpingo wawo wakala, yangagopolelaga kuti jemanjajo akulemwa pakatende kawoko. Mwamti yikusaŵa yakamuchisya kumanyilila kaje chenene mwayikusaŵela yindu kudelajo mkanasagule yakutenda. (Jwak. 7:10) Yikusaŵa yakamuchisya kwajiganya abale kupitila mu chisyasyo chawo chambone, mmalo mwakwakanganichisya kutenda yindu mwakuyiwonela wawojo.—2 Akoli. 1:24.

3. Akoleje yakutenda yejinji mumpingo wawo wasambano. (Afil. 1:27) Kusama kukusasaka ndaŵi soni machili. Nambope mpaka atende chenene kusimanikwaga nawo pamisongano ja mpingo kutandila pagambile kukopochela ku delajo. Nambo naga wawojo ŵangasimanikwaga pamisongano mwakutamilichika, ana abale ni alongo mpaka ŵakamuchisye chamti uli? Mlongo Lucinda juŵasamile pampepe ni ŵanache ŵakwe ŵaŵili ŵachakongwe kwawula mumsinda wekulungwa ku South Africa, jwatite, “Achimjangu ŵasalile kuti ngakamulaneje mnope ni abale ni alongo ŵa mumpingo wangu wasambano, kulalichila nawo yimpepe, soni kujigala nawo mbali pandili pamisongano. Nambosoni twasalile abale kuti mpaka atendeleje misongano jakosechela utumiki panyumba jetu.”

Kuŵa “ŵakamulana” ni Aklistu achimjawo pakumtumichila Yehofa mumpingo wawo wasambano, lili litala lyambone mnope lyakulimbikasyana ni achimjawo. Achakulungwa ŵa mumpingo wajwasonganaga Mlongo Anne-Lise ŵamlimbikasisye jwalakwe kuti alalichileje ni jwalijose. Ana yakuyichisya yakwe yaliji yamtuli? Mlongoju jwatite, “Mwachitema nayiweni kuti yaŵasalile achakulungwayi yaliji yakamuchisya mnope.” Konjechesya pelepa, wawojo pakukamuchisya nawo pamasengo gakuswejesya soni kulinganya pa Nyumba ja Uchimwene, abale ni alongo akusatanda kuyiwona kuti wawojo akuyiwona kuti ali mbali ja mpingowo. Pakujigala nawo mbali mu yakutendekwa  yejinji ya pampingopo, ngasiyajigalila ndaŵi jelewu kuti atande kamulana mnope ni Aklistu achimjawo.

4. Apateje achimjawo ŵasambano. (2 Akoli. 6:​11-13) Kukola chidwi ni ŵane kukusakamuchisya kuti apate achimjawo mwangasawusya. Myoyo, mpaka atende chenene kukungulukaga ni ŵane kuti amanyigane nawo misongano mkanijitande kapena panyuma pakuti jimasile. Atendeje yakomboleka kuti amanyilileje mena gawo. Naga akusakumbuchila mena ga abale ni alongo ŵa mumpingo wawo wasambano soni kuŵa mundu jwakunguluchika, yikusiyatendekasya jemanjajo kuŵa ŵagopoka, mwamti mpaka akole achimjawo ŵajinji.

Akachengaga katende ka yindu pakwamba kusaka kuti ŵane ŵanonyeleje. Mmalomwakwe atendeje yindu yakusatendaga ndaŵi syosope soni mwaŵelele wawojo. Kujigalila chisyasyo cha Mlongo Lucinda mpaka kwakamuchisye mnope. Jwalakwe jwatite, “Apano tukwete achimjetu ŵajinji ligongo lyakuti twaŵilanjilaga ŵane kunyumba jetu.”

“MPOCHELANEJE CHENENE”

Ŵandu ŵane akusatenda woga kwinjila m’Nyumba ja Uchimwene mwamusongene ŵandu ŵangakwamanyilila. Ana wawojo mpaka atende yamti uli pakwakamuchisya achalendo ŵayiche mumpingo mwawo? Ndumetume Paulo jwasasile kuti, “mpochelaneje chenene mpela muŵatupochelelesoni Klistu.” (Alo. 15:7) Achakulungwa ŵa mumpingo pakumsyasya Yesu, akusiŵakamuchisya ŵandu ŵachasambano kuŵa ŵagopoka payiche pamisongano. (Alole libokosi lyakuti “ Yampaka Yakamuchisye Ŵandu Ŵasamile Kwawula Mumpingo Wine.”) Nambope, jwalijose mumpingo kupwatikapo ŵanache akwete udindo wakwakamuchisya achalendo kuŵa ŵagopoka soni ŵakusangalala.

Yisyene kuti kwapochela chenene ŵane kukusapwatikapo kwaŵilanjila ku nyumba jetu, nambo mpaka kupwaticheposoni kwakamuchisya mmatala gane. Mwachisyasyo, mlongo jwine pakusaka kumkamuchisya mlongo juŵasamile kwika mumpingo mwakwe, jwalinganyisye yakuja kumlosya mtawuni soni kumlondechesya kwampaka apate yakwela pali paulendo. Yeleyi yamkamuchisye mlongo jwachilendojo kuŵa jwagopoka soni kusyoŵelela mwachitema ndamo ja kumaloko.

 APITILISYEJE KUKULA MWAUSIMU

Chitete pachikukula soni mkanichitande kuguluka, chilu chakwe chikusagwagukaga kwa maulendo gejinji. Mwakulandana ni yeleyi, pasamile kwawula mumpingo wasambano, akusasosekwa kuligwagula kapena kuti kutyosya yiliyose yampaka yalepelekasye kuguluka chenene pakumtumichila Yehofa. M’bale Nicolas ni ŵamkwakwe lina lyawo Céline ŵatite, “Kusamila mpingo wine kukusakujiganya yejinji. Kusyoŵekana ni ŵandu ŵasambano soni kusyoŵelela dela jasambano kwatujiganyisye ndamo syasambano.” M’bale Jean-Charles jwatumkolasile kundanda jula jwasasile umbone walyapatile liŵasa lyakwe ligongo lya kusama. Jwalakwe jwatite, “Kusama kwatendekasisye kuti ŵanache ŵetu ŵaŵili ajawule pasogolo mwausimu soni kuŵa paunasi wambone ni Yehofa. Tuli tugambile kutama kwa myesi jakuŵalanjikape, mwanache jwetu jwamkongwe jwatandite kujigala nawo mbali pamisongano jamkati mwa wiki, nombe mwanache jwetu jwamlume jwaŵele jwakulalichila jwangabatisidwa.”

Nambi uli naga nganaŵa akombwele kusamila kudela kwakukusosechela ŵakulalichila ŵajinji? Naga yili myoyo, mpaka akamulichisye masengo mfundo syatukambilene munganiji kuti asangalaleje soni kola achimjawo ŵajinji mumpingo mwawo pemo. Pakulingalinga kumdalila mnope Yehofa, akusosekwasoni kupitilisya kutendelaga yindu yimpepe ni mpingo wawo, kulalichilaga ni Aklistu achimjawo soni kungulukaga nawo. Kombolekasoni mpaka alinganye yakwakamuchisya ŵachasambano kapena ŵakusosechela chikamuchisyo. Ligongo lyakuti chinonyelo chikusichamanyikasya Aklistu ŵasyesyene, kutenda yeleyi kuchakamuchisya kuti aŵe paunasi wambone ni Yehofa. (Yoh. 13:35) Mwamti akulupilileje kuti “Mlungu akusasangalala ni mbopesi syelesi.”—Aheb. 13:16.

Atamose kuti pakusaŵa yakusawusya yejinji, nambope Aklistu ŵajinji ŵasamile kwawula mumpingo wine yindu yikusiyajendela chenene, mwamti nombe wawojo mpaka yajendele chenenesoni. Mlongo Anne-Lise jwatite, “Kusamila mumpingo wine kwangamuchisye kuti mbugule chenene mtima wangu. Mlongo Kazumi jwajitichisye kuti kusama “kukusamkamuchisya mundu kuyiwona yakusati Yehofa pakwakamuchisya ŵakutumichila ŵakwe.” Nambi uli pakwamba ya M’bale Jules? Jwalakwe jwatite, “Achimjangu ŵangwete apano akusandendekasya kulipikana mpela ndili kumpingo wetu wakala. Mwamti apano mpaka yimbweteche mnope ndili samile.”