Naga ŵalume ni ŵakongwe mwiŵasa akutendela yindu pampepe, akusaŵa mpela mundu jwakwendesya ndege ni jwakumkamuchisya jwakwe ŵakutenda yindu mwakamulana. Ŵalombaneŵa pasimene ni yakusawusya, wosope akusatenda yindu mwakamulana mpela liŵasa.

MFUNDO JA M’BAIBULO: “Nganaŵasoni ŵaŵili, nambo chilu chimpepe.”—Mateyu 19:6.

Christopher jwatite, “Ŵalume ni ŵakongwe akusosekwa kutendelaga yindu pampepe kuti ulombela wawo ujendeje chenene.”

Ŵalume ni ŵakongwe ŵangakusatenda yindu mwakamulana pasimene ni yakusawusya, akusatanda kututilana, m’malo mwakumasya yakusawusyayo. Yeleyi yikusatendekasya kuti yakusawusya yamwanamwana yiwonecheje mpela yekulungwa.

Jwamkongwe jwine lina lyakwe Alexandra jwatite, “Kuti ulombela ujendeje chenene pakusasosekwa kuŵa ŵakamulana. Naga une ni ŵamkwangu ngatukutenda yindu mwakamulana yikusaŵa mpela ŵandu ŵakutama nyumba jimo ŵanganaŵa paulombela. Yeleyi yikusaŵa yakusawusya pa ndaŵi jakutenda yisagula yekulungwa.”

ALIWUNGUNYE

• Ana ngusasiwona mbiya syangusapochela kuŵa “syangu jikape”?

• Ana ngusagopoka mnope pandili jika ngaŵaga pandili ni ŵamkwangu?

• Ana ngusaŵengana ni ŵachibale ŵa ŵamkwangu?

AKAMBILANEJE NI ŴAMKWAWO

• Ana ni yindu yapi yatukusatenda mwakamulana?

• Ana ni yindu yapi yatukusosekwa kongolela?

• Ana tukusosekwa kutenda chichi kuti tujendelechele kutenda yindu mwakamulana?

ALINJE KUTENDA AYI

• Ŵandu pakuchesa bawu, jwine akusaŵa mbali jine, jwine mbali jine. Mwakulekangana ni yeleyi, ana akusosekwa kutenda chichi kuti akamulaneje ni ŵamkwawo kuti aŵe kumbali jimo?

• M’malo mwaganisya kuti, ‘Ana ndende chichi kuti mbunde’ akusosekwa ganisya kuti ‘Ana tukusosekwa kutenda chichi kuti tupunde?’

Ethan jwatite, “Ngakusosekwa kututilana kuti awoneche jwalemwisye. Kututilanaku kwangayikasya mkamulano mu ulombela.”

MFUNDO JA M’BAIBULO: “Mkagambaga kuganichisya yakusaka yenupe basi, nambo mganichisyejesoni yakusaka ya ŵane.”—Afilipi 2:3, 4.