UMBONE WAKWE

Ŵandu ŵane akusasala kuti kwika pamalo mkanijikwane ndaŵi jakutendela yindu yikusamkamucisya mundu kuti akalagaga nganisyo. Kusunga ndaŵi kukusalimbikasya ndamo syambone. Mwatuli?

Kusunga ndaŵi kukusalosya kuti akusakutenda cenene yindu. Kutenda yindu pandaŵi jakwe, kukusalosya kuti akusalinjilila kulamulila yakusaka kutenda paumi wawo mmalo mwakuti yindu yangasosekwa yalepelekasye kutenda yindu yine yakusaka.

Kusunga ndaŵi kukusalosya ali mundu jwakulupicika. Ŵandu akusayamicila ŵakusalingalinga kwanilisya yilanga yawo m’mikuli jele ŵandu ŵajinji akusalepela kwanilisya yilanga yawo. Ŵandu ŵakulupicika akusapocela ucimbicimbi kutyocela kwa acimjawo soni ŵacinasi. Mabwana gakusiŵawonaga ŵandu ŵakusayika kumasengo pandaŵi jakwe soni kumalisya pandaŵi jakwe kuŵa ŵakusosekwa. Ŵamasengo ŵakulupicikaŵa mpaka ŵape mbote mwakwajonjecesya malipilo kapena kwapa maukumu gane.

YAJIKUSASALA BAIBULO

M’malemba mwana ngani sine syakusala ya kusunga ndaŵi. Mwambone, Baibulo jikusati, “Nambo yindu yosope yitendekweje mwakuŵajilwa soni mwakulondeka.” (1 Akolinto 14:40) Naga ŵandu akamulene kuti akasimane pa malo ganegakwe soni pandaŵi jakamulene, mpaka yiŵe yakuŵajilwa kwa wosopewo kusunga ndaŵi. Baibulo jikusati, “Cilicose cikwete ndaŵi jakwe, soni cilicose cakutendekwa pacilambo capasi cikwete ndaŵi jakwe.” (Mlaliki 3:1) Pa ngani ja ndaŵi jijiji, Baibulo jikusati pana “ndaŵi jakupanda soni jakucuŵa.” (Mlaliki 3:2) Namalima akusapanda mbeju syakwe pandaŵi jakwe ni cakulinga cakuti cagowole yakulya yejinji.

Baibulo jikusasala ligongo lyekulungwa lyatukusosecela kusunga ndaŵi. Ligongoli lili lyakuti, kusunga ndaŵi kukusalosya kuti tukusiŵacimbicisya ŵandu soni ndaŵi jawo. (Afilipi 2:3, 4) Mwakulekangana ni yeleyi, ŵandu ŵakusanonyela kucelewa palangene ni acimjawo nikuti akusiŵajiŵilaga ndaŵi acimjawowo.

“Akaganicisyaga yakusaka yawope, nambo aganicisyejesoni yakusaka ya ŵane.”—Afilipi 2:4.

YAJIKUSASALA BAIBULO

Baibulo jikusatulimbikasya kuti tukoseceleje kutenda yindu mkanipaŵe. (Miyambo 21:5) Naga akuyiwona kuti palangene ni mundu akusacelewaga kopocela pa malo galangenego, komboleka kuti akusakola yakutenda yejinji. Naga yili m’yoyo, uli ngagamba kuleka kutenda yindu yine yangasosekwa? Akoleje ndaŵi jakwanila jakwawulila ku malo kwalangene ni mjawo ni cakulinga cakuti akayice mwacitema. Yeleyi mpaka yakamucisye pasimene ni yindu yakwasokonasya.

Baibulo jikusatulimbikasyasoni kuti tuŵeje ŵandu ŵakulinandiya. (Miyambo 11:2) Yeleyi yikugopolela kuti amanyilileje yindu yanganaŵa ayikombwele. Mkanalangane ni mjawo akusosekwa aganicisyeje kaje mwayiŵelele yindu. Kwamba kwiticisya kuti ciwutende yiliyose soni kuliwunjicila yakutenda yejinji yamsogolo mpaka yatendekasye wawojo ni acimjawo kulaga nganisyo soni kutenguka.

Baibulo jikusasalasoni kuti tukusosekwa kamulicisya masengo ndaŵi jetu mwakuŵajilwa. (Aefeso 5:15, 16) Atandeje kutenda yindu yakusosekwa mnope. (Afilipi 1:10) Mwambone, pakwesile basi kapena pakwajembeceya ŵandu ŵane mpaka atende cenene kamulicisya masengo ndaŵi jelejo kuŵalangaga kapena kosecela yindu yine.

“Yakulinga ya mundu jwamtawu yikusakamucisya.”—Miyambo 21:5.