KALAKALA, ŵandu ŵa m’cilambo ca Kazakhstan nganatamilicikaga pamalo gamo pakusaka mopo wa yilango yawo. Atamose lelojino, ŵakucinga yilango ŵane akusatenda yeleyi mwakamulana ni mwajiŵelele nyengo.

Masiku agano, ŵandu ŵane ŵamtunduwu akusatama m’matawuni, nambope ndamo syawo, yakulya yawo, soni yindu yejinji yakusapanganya payala, ŵajigalile kwa acinangolo ŵawo ŵaŵatamaga umi wakusamasama. Ŵandu ŵa m’cilamboci akusasangalala ni yindu yakala ya acinangolo ŵawo mpela ngani sya adisi, ndakatulo, yitagu, soni nyimbo syakusajimba pakamulicisya masengo yida yacikala.

Kalakala ŵanduŵa ŵanonyelaga kutama mtumajumba twampela kacilindo. Mundu pakutama mkajumba keleka, yalosyaga kuti jwasamalilaga cenene yindu yakupanganyikwa. Yaliji m’yoyo ligongo lyakuti nganajonangaga yitela  soni yindu yine yejinji pakutaŵa kanyumbako. Mpaka lelojino ŵakucinga yilango ŵane m’mikuli jakumisi akusanonyela kutama mtumajumba mpela tweletu nambo twakusataŵa mtawuni, akusatukamulicisya masengo muyakutendekwa yine yapajika. Nambosoni kupocelela acalendo ŵayice kukulola yindu m’cilambomo. Mkati mwatumajumbatu mukusawoneka mwakusalala ligongo lya yindu yakusapanganya acakongwe mpela yakupetapeta, yakuluka soni yakutandika m’nyumba (makapeti).

Maŵasa gejinji gakumisi ga m’cilambo ca Kazakhstan, gakusanonyela kulanga mahaci. Pana mena ciŵandika 21 gakusakamulicisya masengo pakusala ya haci. Lina lililyose likwete ngopolelo jakwe. Nambosoni pana mena gakupunda 30, gakusala ya mitundu jakulekanganalekanga ja lipende lya haci. Ŵandu ŵajinji m’cilamboci akusayamicila mnope naga apocela haci mpela mtuka. Ŵacinyamata ŵajinji ŵakumisi, akusalijiganya kwendesya haci kutandila ali ŵacinandipile.

Ndaŵi syejinji ŵandu ŵa m’cilamboci akusanonyela kulya nyama jangawanganya ni yakununjilisya soni yindu yine. Soni akusanonyela cakumwa cakolanjidwa kuti koumiss, cakusacilinganya kutyocela ku mkaka wa haci soni akuti cili cakamucisya mnope m’cilu. Nambosoni akusanonyela cakumwa cakolanjidwa kuti Shubat cakusacilinganya kutyocela ku mkaka wa ngamila.

Nyambi ja Mboni sya Yehofa m’cilamboci jili mumsinda wa Almaty. Kweleku, akusapocela cenene acalendo ŵakusayika kukulola malogo.