LUJUCI lukusakombola kutula palipose mwangasawusya. Ana lukusatenda wuli yeleyi?

Aganicisye ayi: Kuti lujuci lutule cenene lukusasosekwa kunandiyaga kawutuce kakwe panandipanandi mpaka kwika pakwima kwene. Yeleyi yikusakomboleka ligongo lya yindu yiŵili. Candanda, lukusakombola kumanyilila kawutuce kakwe, soni caŵili, pakamulicisya masengo meso, lukusakombola kumanyilila lutando lwalupali kuti lukayice pakutula. Nambope, tulombo twine twejinji ngaŵa mkombola kutenda yeleyi ni tumeso twakwe.

Meso ga lujuci gakusalola mwakulekangana ni ga ŵandu. Yikuwoneka kuti lujuci palukuŵandicila cindu lukusatanda kuciwona kuŵa cekulungwa. Palukuŵandicila mnope, cinduco cikusakulagasoni mnope. Ŵakuwungunya pa koleji jine ku Australia ŵapatile kuti, lujuci paluguluka lukusanandiya kawutuce kakwe paluyiweni kuti pacindu palukusaka kutulapo ngapakucenga ukulu wakwe. Pakwikaga pamalopo, lukusatula cenene ligongo lukusaŵa luli lunandiye kawutuce.

Nyusipepala jine ja sayansi jatite, “Yalukusatenda lujuci pakutula . . . mpaka yikamucisye ŵasayansi kupanganya yindu yakombola kutula mpela lujucilu yampaka ayitumisyeje kuja kwakulupusya ŵandu pangosi.”

Wawojo akuganisya wuli? Ana yagambile kutendekwa jika kuti lujuci lukomboleje kutula m’yiyi? Kapena apali juŵalupanganyisye?