ZƐŊ-LƐƐI 01

Ŋala-kɔlɔi A Pɔri Kpɔnii Leŋ Ya?

ŊƆPÊLE KƐ

Ku kelee kwa ŋwɛlii kumɛni tamaa kɔlɔŋ e pilaŋ kɛ-ɣeniɛ, mɔ̃lɛ-laa, saa da tinaa-tuɛ-pere ma. Kulii a ŋɔnɔ pɔri sɛlɛni a pa berei ma kwa pɔri kapa tamaa sɔlɔ ɓoi la a gɛɛ ku kukpiŋ mɛi kaa da berei kukaayɔɔi a pɔri kɛi la lii-nɛ̃ɛ sui. Nua tamaa daa gaa a gɛɛ Ŋala-kɔlɔi fa kpɔŋ maa tɛɛ nɔ dipɔ a gɛɛ e dimare-kɛ kpaya-kpaya-ŋai su kula, kɛɛ a lia-woo lɛlɛɛ-ŋa tɛɛ dipɔ a pa berei ma da pɔri dikɛ-ɣeniɛi kɛi la. I laai la Ŋala-kɔlɔi a pɔri kpɔŋ maa tɛɛi nuu kelee pɔ?

1. Mare-kɛɛ-ŋai Ŋala-kɔlɔi a zukulai, taŋa ɓa le?

Ŋala-kɔlɔi a mare-kɛɛ mɛni kpanaŋɔɔ-ŋai ŋi sukula: Fulu-laa kɔɔ e pilaŋ leŋ? Ɣala e fulu-laa kpɛtɛ le mɛni ma? Nua da mɔ̃lɛ le mɛni ma? Nuu a saa, le ɓe a kɛ a nyaa? A kɛ nuu kelee a ŋwɛlii a lii-see, le mɛni ɓe kɔ mɛni tamaai lai? Le ɓe pai kɛi a nɔii tinaa-tuɛ-pere? Ŋala-kɔlɔi a ku fɔrɔ a gɛɛ ku mare-kɛɛ-ŋai ŋi sukulai kɔri, nyaŋ nuu ŋɔmiliyɔŋ tamaa daa gaa a gɛɛ mare-kɛɛ-ŋai ŋi sukulai aa dilii laa.

2. Ŋala-kɔlɔi a pɔri kpɔnii leŋ kua a gɛɛ ku kukɛ-ɣeniɛi ŋaa-nɛ̃ɛ kula?

Ŋala-kɔlɔi a lia-woo lɛlɛɛ-ŋa tɛɛ kupɔ. Gɔɔŋ-maa ɓa, a berei lɛ kaayɔɔ-ŋa da pɔri lii-nɛ̃ɛ kpɔɔi sɔlɔ ɓoi lai. A mɛnii lɛ kwa pɔri gɛi kwa kɛ lii-too-polu su da berei kwa pɔri kutii ŋaa-nɛ̃ɛ kulai la. Ya pai mɛnii maa-kɔrii Ŋala-kɔlɔi e mo e pilaŋ mɛni-ŋuŋ-ŋai ŋi dia da dakpɛni-ŋa kwa kɛ gɔlɔi ŋi maa-kɔrii gie ma. Ya pai laai la a gɛɛ ‘Ŋala-kɔlɔi kelee [mɛnii kelee Ŋala-kɔlɔi sui] . . . lɛlɛɛi.’—2 Temete 3:16.

Gɔlɔi ŋi fe Ŋala-kɔlɔi pɔɔ-ŋa siɣei. Kɛlɛ a I fɔrɔi a gɛɛ I tãi siɣe I Ŋala-kɔlɔi maa-kɔri ikpɔɔ yee ma. Mɛni ma, kwa ŋwɛlii a gɛɛ I Ŋala-kɔlɔ-kpua-ŋai lono nyii gaa zɛŋ-lɛɛi kelee sui, I dikɔɔŋ mɛni-ŋai dia ya maa-kɔrii.

MƐNI TAMAA MAA-KƆRI

Berei kaa Ŋala-kɔlɔi aa kpɔŋ maa tɛɛ la nua pɔi, berei ya pɔri nonoɔ ŋaa-nɛ̃ɛ kulai la da mɛnii nɛlɛɛi la a gɛɛ ku kpɔŋ maa sɔlɔ ɓo a gɛɛ ku ŋa kaa ma.

3. Ŋala-kɔlɔi a kuteniŋ tɔɔ

Ŋala-kɔlɔi kaa yɛɛ lɛi kpaa kwaa ponoɔɔ. Ŋala-kɔlɔi a kuteniŋ tɔɔ a gɛɛ ku mɛni-kpɛtɛɛ lɛlɛɛ-ŋa kɛ, nyaŋ a mɛni-ŋai pai kɛi tinaa-tuɛ-perei, ɓo kua.

Ŋule-wooi 119:105 lono, gɛ ni ka lono e pilaŋ mare-kɛɛ-ŋai ŋi dia:

Ŋule-woo kɔlɔi ŋi pɔ̃yɛ-nuu ŋɔkili-ŋa-siai e kɛ leŋ e pilaŋ Ŋala-kɔlɔi ma?
Ikili-ŋa-siai ɓa le e pilaŋ Ŋala-kɔlɔi ma?

4. Ŋala-kɔlɔi a pɔri kumare-kɛɛ-ŋai sukulai

Nɛni tɔnɔ e gaa a gɛɛ Ŋala-kɔlɔi e ŋɔmare-kɛɛ-ŋai sukula nyii a wɔlɔ tua gili-ŋa siai ma a koraŋ tamaai. VILOI su kaa, gɛ ni ka lono e pilaŋ mare-kɛɛ-ŋai ŋi dia.

VILOI: Ife Wɔlɔ Nɛɛ Naa Ikili-kɛ-zui Su E Saa! (1:48)

Viloi su, mare-kɛɛ-ŋa kɛɛ leŋ ɓe kɛ nɛnii ŋi kili-ŋa?
Ŋala-kɔlɔi maa-kɔriɛ e kpɔŋ maa tɛɛ leŋ bɔ?

Ŋala-kɔlɔi a ku fɔrɔi a gɛɛ ku mare-kɛɛ-ŋa kɛ. Maafiu 7:7 lono, gɛ ni ka lono e pilaŋ mare-kɛɛ ŋi ma:

Mare-kɛɛ-ŋa kɛɛ leŋ ɓe ikili-ŋa nyii Ŋala-kɔlɔi a pɔri zukulai?

5. Ya pɔri Ŋala-kɔlɔi lonoɔ ŋaa-nɛ̃ɛ kulai

Nua tamaa da Ŋala-kɔlɔi lonoɔ ŋaa-nɛ̃ɛ kula, nyaŋ da mɛni lɛlɛɛ sɔlɔ ɓoi zu. VILOI su kaa, gɛ ni ka lono e pilaŋ mare-kɛɛ-ŋai ŋi dia.

VILOI: Ŋala-kɔlɔi Lonoɔ (2:05)

Viloi su, nuu-tɔɔ-ŋai dikili-ŋa-siai e kɛ leŋ e pilaŋ kɔlɔ lonoɔ ma?
Berei maŋ kɔlɔ lonoɔ wɛli fe la diai, le mɛni ɓe Ŋala-kɔlɔi lonoɔ wɛli kaa la diai?

Ŋala-kɔlɔi e mo a gɛɛ a pɔri lia-woo tɛɛi kupɔ nyii a kuŋa-nɛnɛ, e kili-kɛ-zu tɛɛ kupɔ. Lomaŋ 15:4 lono, gɛ ni ka lono e pilaŋ mare-kɛɛ ŋi ma:

Mɛnii Ŋala-kɔlɔi e mo e pilaŋ ŋaa-nɛnɛ da kili-kɛ-zu mai, a ilii kula?

6. Nua da pɔri kpɔŋ maa tɛɛi kupɔ a gɛɛ ku Ŋala-kɔlɔi ŋa kaa ma

E tee Ŋala-kɔlɔi lonoɔ ma dikpɔɔ yee ma, nua tamaa daa gaa a gɛɛ da mɛni lɛlɛɛ sɔlɔ ɓo da maa-kɔri gie ma a nua takpɛni-ŋa. Dikɛ-mɛni-ŋai 8:26-31 (NWT) lono, gɛ ni ka lono e pilaŋ mare-kɛɛ ŋi ma:

Kwa pɔri Ŋala-kɔlɔi ŋa kaai leŋ?—Ŋoo-kpua-kpua 30 da 31 kaa..

Itiopia naloŋ e kɛ ŋwɛlii a kpɔŋ maa a gɛɛ e Ŋala-kɔlɔi ŋa kaa ma. Saa, nua tamaa daa gaa a gɛɛ da mɛni lɛlɛɛ sɔlɔ ɓo da Ŋala-kɔlɔi maa-kɔri gie ma a nua takpɛni-ŋa

NUA TAŊA DA MO DIYƐƐI: “Ŋala-kɔlɔi maa-kɔriɛ kaa nɔ kpɛni-kpɛni.”