Ya nɛi-looi káai votôoi ŋí su?—Nalôŋ tɔnɔ da káa kɛ ma Zɛfetɛ, ǹóŋ káa ŋí. Ŋâla-kɔlɔi fé nɛi-looi ŋí láa lɛ́ ní kûa, kɛ́lɛ e mò kûa à gɛ́ɛ e ǹâŋ da Ziova lii nɛ̃ɛ mɛni kɛ. Kwa nâa m̀ɛnii maa-kɔ́ri da ǹâŋ Zɛfetɛ di gɛi.

Zɛfetɛ e kɛ a núu sɔŋ-lɛ́lɛɛ, nyaŋ a káa Ziova maa mɛni lɛ́ ǹóŋ ma. E kɛ ŋɔ́nɔ a wala-wala-nuu da núu laa-tuɛ-nuu lɛ́lɛɛ. Mɛni ma, Izuɛ-lônii di mò mà à gɛ́ɛ e tɔ́ɔ ditúɛ di kɔ́ díkpɔara-ɓelai pɔ́.

Zɛfetɛ e Ɣâla-fɛli à gɛ́ɛ e kpɔŋ maa tɛɛ dípɔ di díkpɔara-ɓelai yée mɛi ɣale. E gono-tee à gɛ́ɛ à kɛ̀ gɔ́i a nɛ̃ɛ mà, e díkpɔara-ɓelai yée mɛi ɣale, a pa pôlu ŋɔpɛ́rɛi la, ǹúui pa pai dúɛ-tɔɔi fulɔi, a pai maa-nuui tɛɛi Ziova pɔ́. Ǹúui kpîŋ a pai kɛi Ziova ŋɔpɛ́rɛi mu e  tíi kɛ Ziova mì wɔlɔ-wɔlɔ da wɔlɔ-wɔlɔ. Nya ɓe, níiɛ gɔ́i mai, gɔ́i e nɛ̃ɛ m̀a! Tãi Zɛfetɛ e pa la pôlu ŋɔpɛ́rɛi lai, I nuui kɔ́lɔŋ lí dúɛ-tɔɔi fulɔi?—

Ôoei, Zɛfetɛ ǹóŋ nɛnî ɓe! Nya tɔnɔ nɔ́ ɓe kɛ a Zɛfetɛ ǹóŋ, nyaŋ, e kɛ pai naa dɛɛi Ziova pɔ́. Nyíŋi e malôŋ támaa too mà. Kɛ́lɛ, e lɛ́ɛ íkili-ŋa à gɛ́ɛ Zɛfetɛ e kono-tee kɛ. Nya ɓe ǹóŋ-nɛnîi e m̀o mà ŋâma nyɛɛi: ‘Ńâŋ, I íkono-tee Ziova yéeì, fɛ̂ɛ nɔ́ I ŋa-see kɛ.’

Zɛfetɛ ǹóŋ-nɛnîi nya máŋ níi e tóo pôlu; kpɛ́ni fêi, e kɛ a gɔ́lɔŋɔ à gɛ́ɛ à kɛ́ Ɣâla ŋɔpɛ́rɛi la, vé pai surɔ̂ŋ kulai kpaa máŋ e lóŋ káa. Kɛ́lɛ nyaŋ, e kɛ ŋwɛ̂lii à gɛ́ɛ e ńâŋ ŋɔkono-teei ŋa-see kɛ à gɛ́ɛ e Ziova lii nɛ̃ɛ. Nyíŋi e kɛ a gbanaŋɔ mà e tɛɛ la surɔ̂ŋ kulaa da lóŋ káa mà. Mɛni mà, e lí Ziova ŋɔpɛ́rɛi mu à gɛ́ɛ e kɛ́ naa wɔlɔ-wɔlɔ da wɔlɔ-wɔlɔ.

Ílaai la m̀ɛnii e gɛi e ǹâŋ da Ziova lii nɛ̃ɛ?— Ôoei, e gɛ̀ tí! Ɓíaŋ máŋ, à kɛ̀ ya Ziova wóo mɛni I ǹĩ̂a-mɛni kɛ, ya pai kɛi yɛ̂ɛ Zɛfetɛ ǹóŋ-nɛnîi. Ya máŋ, ya pai gɛi íkáa-ɓela da Ziova dílíi e nɛ̃ɛ.