Fan̈ampiny fitorian̈a isaka tran̈o, Vavolombelon̈o Jehovah koa mampiasa tablo mety ateky feno boky momba Baiboly itorian̈a amy tany maro olo.

Izioty karazan̈a fitorian̈a io ten̈a nankamafisin̈y. Tamy Novambra 2011, nisy Vavolombelon̈o Jehovah vitsivitsy ta New York tan̈y voanalohany nampiasa tablo mety ateky feno boky momba Baiboly io. Nahomby izio, ke izioty efa tany maro koa an̈anovan̈a izio.

Tamy Marsy 2015, efa nisy 165390 tablo mety ateky nirasain̈y tamy fiangonan̈a Vavolombelon̈o Jehovah erantany. Standy, latabatra ndreky kiosky andrivony koa nirasain̈y.

Vavolombelon̈o Jehovah mbala mitory isaka tran̈o fo man̈ambara aminolo ny marin̈y momba Baiboly. Fa ndray zen̈y ndraiky, mahomby koa fampiasan̈a tablo mety ateky io. Ty misy ohatra.

Misy lelahy zay ta Peroa tan̈y, Raoul an̈arany, nan̈aton̈o iro Vavolombelon̈o Jehovah nampiasa tablo mety ateky io. Nivolan̈iny: “Taia fo ma anaro ela jiaby zay? Efa telo taon̈o nitadiavako Vavolombelon̈o Jehovah io! Ke zaho koa fa nahita tablonaro io, zaho nan̈ano mersy Zan̈ahary e!”

Tany misy lelahy io matetiky andalovany Vavolombelon̈o Jehovah, fa izy tsiary tatra antran̈o na andavanandra na farany herin̈iandra. Nazavainy fa izy taloha nianatra Baiboly tamy Vavolombelon̈o Jehovah, ke mbala tiany hanohy fianaran̈a io. Nan̈ano fotoan̈a amy zay iro nanohizan̈a fianaran̈anany.

Nisy olo fivadiany mbala tanora zay koa ta Bolgaria tan̈y nangala boky Ny Tsiambaratelon’ny Fahasambaram-pianakaviana. Herin̈iandranizin̈y iro nimpody, nangala boky aroe koa: Boky Misy Tantara Boaka amy Baiboly ndreky Mianara Amin’ilay Mpampianatra Lehibe. Lelahy pitory io nan̈ontany firy isany zanakandro. Iro nivolan̈a: “Zahay mbala tsendriky misy, fa tianay fo lera zahay misy an̈y, iro hampianarinay raha momba Zan̈ahary. Efa boky aby ty edy raha ilainay amy zen̈y.”

Nisy lelahy araiky koa nan̈ano lambany maramila, nan̈aton̈o iro Vavolombelon̈o Jehovah aby io ta Ukraine tan̈y. Izy nivolan̈a: “Anaro tsaiky aby io, ambarà zaho ombian̈a ma Haramagedona io avy.” Nisy ady ta Ukraine tan̈y tsy ela talohany nifanojoandro io, ke izy mba an̈isany niady tamizio. Ke izy koa fa nandiniky fivoandraha erantany, izy nivolan̈a fa Haramagedona io efa tokony ho avy, kanefa tsy nazava taminany fo nan̈ino Zan̈ahary mbala tsendriky man̈ano raha. Iro pitory aby io amy zay nan̈azava taminany nan̈ino Zan̈ahary mbala tsendriky man̈ano raha izioty, baka io iro nivolan̈a koa fa efa tsy ho ela izy han̈adoso olo jiaby ratsy fan̈ahy. Lelahy io nangala gazety Ny Tilikambo Fiambenana ndreky Mifohaza!, baka io boky Y a-t-il un Créateur qui se soucie de vous?

Ta Macédoine tan̈y koa, nisy tsaiky lelahy araiky nan̈aton̈o iro Vavolombelon̈o Jehovah aby io nivolan̈a fa izy efa zatra mamaky gazetindro, fa izy fo nangataka boky Ino ma Raha Ten̈a Ampianariny Baiboly? Izy baka tio nandeha tamy biblioteky narikitry tio namaky boky io.

Kadiriny lera aroe tafaranizen̈y, tsaiky lelahy io nimpody. Izy nivolan̈a fa efa nisy 79 pazy zen̈y voavakiny tamy boky io! “Ten̈a man̈ova fiain̈ananolo boky ty!”, hoizy. “Haiko tamizio fa kaiky diso raha ninoako taloha aby in̈y. Hitako fa marin̈y ankitin̈y raha jiaby hazavainy boky ty. Nan̈ova fiain̈ananaka izio!”