Maro fanjakan̈a amy zioty tsy man̈omba olo mivorivory ndreky man̈iraka olo han̈aja elan̈elan̈a izikoa fa mikoran̈a. Vavolombelon̈o Jehovah tapakevitry han̈araka lalàn̈a aby zen̈y, izikoa iro man̈ano fivorian̈andro. Mampiasa programo Vidéoconférence fiangonan̈a, an̈isanizen̈y Zoom.

 Nikeny Filankevipitantan̈ana hampiasan̈a fan̈amezan̈a, hivangan̈a programo Zoom, baka mitohy fo fivorian̈a fataony fiangonan̈a. Maro baka fiangonan̈a tsy afaka mampiasa izio, fotony 15 ziska 20 dolara (55 000 ariary - 75 000 ariary) na mandilatra zen̈y vidiny konty tsotra fan̈anovan̈a Zoom. Iro taloha nampiasa programo tsy man̈efa, fa tsy olo jiaby tafiditry amizio sady raha io tsy ten̈a azo antoko. Fampiasan̈a konty Zoom niny Fikambanan̈a io ndraiky olo jiaby mahazo hatsaran̈a, fotony tsotra fomba iarovan̈a izy, avio maro koa olo afaka miditry amizio isaka fivorian̈a. Izioty efa fiangonan̈a mandilatra 65 000 mampiasa konty Zoom io, amy firenena mandilatra 170.

 Fiangonan̈a Kaigari a Manado, a Indonezia taloha, nampiasa programo tsy man̈efa. Iro izioty ndraiky efa mampiasa konty Zoom io. Karaha ty ho Rahalahy Hadi Santoso: “Ndray iro rahalahy ndreky ranabavy tsy zatra mampiasa fitaovan̈a elektroniky aby io izioty ravoravo mivory, fotony iro tsy voatery mimpodipody miditry amy konty io mandrapivitany fivorian̈a araiky.”

 Nisy antipan̈ahy araiky zay koa, Lester Jijón, Jr., amy Fiangonan̈a Guayacanes Oeste a Guayaquil nivolan̈a karaha ty: “Tsy manambola ankamarozany rahalahy ndreky ranabavy aby io. Avio koa fiangonan̈a sasany ten̈a tsy afaka hividy permission amy Zoom io baka fiangonan̈andro jiaby afaka miditry amy fivorian̈a io. Izioty ndraiky, fandaminan̈a efa nan̈amia konty Zoom io, ke maro oe olo afaka miditry amy fivorian̈a. Tsy vitanizen̈y fo fa mbala afaka mampiditry olo hafa kahinay miaraka mivory aminay koa zahay, fotony tsy avozoan̈a foeky isanolo ampidirin̈y.”

 Karaha ty ndraiky ho Johnson Mwanza, antipan̈ahy amy Fiangonan̈a Ngwerere Avaratra a Lusaka, a Zambia an̈y: “Fa impirimpiry iro rahalahy ndreky ranabavy aby io mivolan̈a karaha ty: ‘Fivorian̈a amy Zoom io ahitanay fa ten̈a nanjary nahainarikitry piaramanompo aby io fo zahay. Hitanay koa fa Jehovah ten̈a tia ndreky mikarakara zahay.’”

 Vola aby nivangan̈a iro kontiny fikambanan̈a aby io vola baka amy fan̈amezan̈a aminy asa maneran-tany, natokana amy fan̈ampian̈a olo tatrany antambo. Sasany aminany io natao baka tamy donate.isa4310.com. Man̈ano mersy anaro, fotony anaro mazoto man̈ano fan̈amezan̈a. Iro vola aby io baka ampiasaintsika han̈ampian̈a iro namantsika tatrany antambo erantany koa.—2 Korintianina 8:14.