ANDRA tamy zen̈y efa harivariva, Rebeka varian̈a mizaha raha man̈odidin̈y izy. Tany nisy irô io be vatovato salakady hiaka. Efa herin̈iandra vitsivitsy irô tamy lalan̈a, ke izy efa nanjary zatra adoladolan’ny shamô mitondra izy. Efa lavitry iziô tany misy Harana, tany nahatombo izy. An-jatony kilômetara avaratrantin̈ianan’ny tany misy irô tanàna io. Asa mbala hifanôjo amy lafaminany edy izy andra araiky an̈y! Hely tavela tsy aviandrô amy tany himboandrô, ke azo antoko fa izy mahaitafieritreritry han̈ano akôry fiain̈ananany.

Irô nandalo ta Kanana ndreky tamy faritry paiky be ta Negeba tan̈y. (Genesisy 24:62) Rebeka mety nahita ôndrikôndriky tamy lalan̈a. Paiky mare toeran̈a io ke tsy dia tsara hitarimian̈a raha ndreky hambolen̈a. Fa ndray zen̈y, nisy ahitry ampy hoaniny biby tan̈y. Matoelahy efa zatra be toeran̈a io nitariky irô tamy lalan̈a. Efa tsy din̈iny avian̈a an̈y han̈ambara vaovao tsara ty amy tômponany: Rebeka nan̈eky hanjary vadin’i Isaka. Fa Rebeka ndraiky tsy maintsy niasaloha hely nandiniky han̈ano akôry fiain̈ananany koa fa avy an̈y, aviô olo karakôry ma Isaka, lelahy hanjary vadiny zen̈y an̈y. Irô baka mbala tsiary nifankahita. Asa raha mba ho tiany edy Rebeka? Asa ho tian’i Rebeka koa edy izy?

Amy tany maro, fan̈ambadian̈a amboarin̈y zen̈y tsy mahazatra loatra. Fa amy tany sasany ndraiky raha zen̈y tsy mampan̈ino. Fa ndray ino ndray ino fomba amy tany misy anao, anao mety han̈eky fa man̈angy misy korazy salakady nanam-pinoan̈a ankitin̈y Rebeka. Izy handeha hanambady olo tsy hainy foeky sady amy toeran̈a mbala tsiary nimboany. Izikoa misy fiovan̈a koa amy fiain̈anantsika, atsika mila misy korazy ndreky finoan̈a karaha Rebeka. Fa izy mbala nisy toetry tsara maro hafa koa sady vitsy olo manan̈a.

Niova tampoko fiain̈ananan’i Rebeka. Kanefa izy tamin’ny io nan̈ano raha fataony andavan’andra fo. Rebeka tombo ta Harana na tamy tanàna araiky narikitry tan̈y. Harana io tanàna ta Mezopotamia tan̈y. Ry olobeny tsy niran̈a ankamarozan’olo tamy tanàna io, fôtony irô nanompo Jehovah fa tsy nanompo Sîn zan̈ahary fanjava.​—Genesisy 24:50.

Zatovo mare Rebeka koa fa be, kanefa izy tsy be zesty. Izy man̈angy navitribitriky, nazoto niasa sady tsara fitondran-ten̈a. Mpan̈arivo koa fianakavian̈andrô, ke naro ampiasandrô. Fa izy tsy nampangotian̈a na natao karaha mpanjakavavy, fa nampianarin̈y hiasa mare. Karaha man̈angy jiaby, Rebeka tsy maintsy nan̈ano asa an-tran̈o isan-karazany, an̈isan’izen̈y nantsaka rano. Izikoa fa harivariva andra, nataony tamy sôrokonany sajoa baka iô lôso izy nandeha nantsaka.​—Genesisy 24:11, 15, 16.

Tandraraiky, harivariva andra tamy zen̈y, izy koa fa baka nameno sajoanany, nisy matoelahy nilomoay nan̈aton̈o izy. Ho izy tamy Rebeka: ‘Azafady kony, mba ameza rano hely baka amy sajoanao kony zaho higiako.’ Tsy be raha nangatahiny sady nahalala fomba tsara izy nangataka izio. Hitan’i Rebeka fa izy baka nan̈ano dia lavitry ke najotsony malaky sajoanany baka iô izy nasainy nigiaka. Tsy rano hely fo namezany izy fa rano nahampy nahafaka sakara sady nampanintsinintsy izy. Hitan’i Rebeka koa fa nisy shamô folo nipetrapetraka tiô kanefa tsisy rano higiahandrô tan̈atin’ny laokalaoka tiô. Hitany matoelahy io tsara fan̈ahy nizaha izy ke izy nifen̈y koa ho tsara fan̈ahy taminany. Ke ho Rebeka taminany: ‘Zaho hantsaka rano igiahan’ny shamônao aby io firaka irô jiaby tafigiaka.’​—Genesisy 24:17-19.

Rebeka tsy zisty nivolan̈a han̈amia rano shamô folo aby io fo fa han̈amia rano irô firaka irô jiaby afaka sakara. Shamô araiky koa sakara tsarabe mahalany rano mandilatran’ny 95 litara. Dikan’izen̈y shamô folo aby io izikoa samby sakara, mare asa niambin̈y Rebeka sady mety lera maro vo vita. Kanefa hay be fa misaora sakara ankitin̈y shamô aby io. a Tsy efa hain’i Rebeka ma zen̈y tamin’izy nivolan̈a han̈amia rano biby aby io? Ehe. Fa izy vôn̈ono hiasa mare ndreky nazoto, fôtony izy tihan̈ampy matoelahy io. Ke lelahy io nan̈eky hampiany. Rikian̈a mare izy nizaha Rebeka nivezivezy nameno laokalaoka.​—Genesisy 24:20, 21.

Ohatra tsara amintsika Rebeka. Ankamarozan’olo amy ziôty baka tia ten̈a. Baiboly lastiô efa nivolan̈a fa olo “ho tia ten̈a” ke tsy tia man̈ampy olo. (2 Timoty 3:1-5) Ke izikoa antsika tsy tiantsika hanjary karaha zen̈y, atsika mila mandiniky raha nataon’ny tsaiky viavy io. Izy nazoto nan̈ampy olo ke nivezivezy nantsaka rano tamy vôvo.

Hay be fa mety hitan’i Rebeka matoelahy io nandiniky izy. Lelahy io tsy naloto jery fa izy rikian̈a sady lany fan̈ahy aviô ravoravo nahita raha nataon’i Rebeka. Izikoa fa vitany asa io, izy namezan’ny matoelahy io kadô ravaka maro tsara. Baka iô matoelahy io nan̈ontany izy karaha ty: ‘Ho zaho, anao ma zanakanjôvy? Misy tany mety andrianay amy tran̈on’ny babanao an̈y?’ Nahairavoravo fo lelahy io koa fa nivolan̈an’i Rebeka raha momba fianakavian̈anany. Mety nafana fô mare Rebeka nivolan̈a karaha ty: ‘Aminay ao misy mololo ndreky karazan̈a hanin̈in’ny biby hafa koa sady misy tany mety handrian̈a.’ Zen̈y raha ten̈a nilain’ny lelahy io ndreky olo niaraka taminany. Rebeka nandeha talohandrô salakady nilomoay nitantara raha jiaby tamy mamany.​—Genesisy 24:22-28, 32.

Hita baka amy zen̈y fa Rebeka efa nampianarin’iry olobeny ho tia mandray vahiny. Efa sasatra olo karaha zen̈y amy ziôty. Ke atsika tôkony hanam-pinoan̈a mare karaha man̈angy tsara fan̈ahy io. Izikoa baka atsika mino Zan̈ahary, atsika ho tia mandray vahiny. Jehovah farandraha tsara fan̈ahy eky fôtony izy mahatariky amin’olo jiaby, ke tiany han̈ano karaha zen̈y koa olo mivavaka aminany. Ho ravoravo mare Babantsika an-dan̈itry an̈y izikoa atsika tia mandray vahiny, ndray irô mety tsy hahavaly raha nataontsika tamindrô.​—Matio 5:44-46; 1 Petera 4:9.

Azôvy ma matoelahy nikoran̈a tamin’i Rebeka io? Izio mpanompon’i Abrahama, rahalahin’ny dadilahin’i Rebeka. Ke voaray tsara izy tan-tran̈on’i Betoela, baban’i Rebeka tao. Mety Eliezera an̈aran’ny mpanompo io. b Izy namezandrô hanin̈y, fa izy tsy nety nihina izikoa tsy efa nambarany irô anton-dianany. (Genesisy 24:31-33) Misaora endrakendraka mare izy nitantara porofo fa Jehovah Zan̈ahary nitahy izy tamin’ny iraka nampanaovin̈y izy io.

Miniminia hely Eliezera mitantara raha zen̈y amin’i Betoela baban’i Rebeka ndreky amin’i Labana anadahiny. Lany fan̈ahy irô mitandren̈y izy. Eliezera nivolan̈a fa Jehovah nitahy Abrahama, ta Kanana. Abrahama ndreky Saraha niteraka lelahy. Isaka an̈aranany, ke izy handova fanan̈anan’ny babany jiaby. Mpanompo io nirahin’i Abrahama nandeha tamindry havany ta Harana, hitady man̈angy hatao vadin’Isaka. Matomboko mare raha nan̈irahan’i Abrahama izy zen̈y.​—Genesisy 24:34-38.

Eliezera nirahin’i Abrahama nifanta fa tsy hangala viavy kananita hatao vadin’i Isaka. Nan̈ino? Fôtony kananita aby io tsy nan̈aja Jehovah sady tsy nanompo izy. Efa hain’i Abrahama koa fa ho avy fotoan̈a Jehovah han̈asazy irô fôtony irô zatra nan̈ano raha ratsy. Ke Isaka tsy tian’i Abrahama hifan̈ôsihôsy amin’olo ratsy fitondran-ten̈a aby io foeky. Fôtony hainy koa fa zanany io handeha hampiasain’ny Zan̈ahary han̈atantirahan̈a fampan̈antinan̈anany.​—Genesisy 15:16; 17:19; 24:2-4.

Nitantarain’i Eliezera tamin’iry Betoela fa izikoa izy fa navy tamy vôvo narikitry Harana tiô, izy nivavaka tamy Jehovah. Tiany baka izikoa Jehovah foeky mifidy viavy tiany ho vadin’i Isaka. Amy fomba akôry? Karaha ty raha nangatahiny tamy vavaka: Ataova avy amy vôvo eto man̈angy io. Hamezany rano Eliezera koa fa mangataka rano aminany, baka iô hamiany rano koa shamônany. (Genesisy 24:12-14) Ke azôvy navy tiô salakady nan̈ano raha aby zen̈y? Rebeka. Miniminia hely baka akôry tsapan’i Rebeka koa fa naharen̈y raha jiaby nitantarain’i Eliezera tamy fianakavian̈anany zen̈y!

Betoela ndreky Labana nan̈eky fa Jehovah ankitin̈y nan̈ampy Eliezera. Ho irô: ‘Jehovah nahavy zen̈y!’ Ke nataondrô fomba fatao tamy fotoan̈a zen̈y aviô Rebeka namezandrô izy ho vadin’i Isaka. (Genesisy 24:50-54) Dikan’izen̈y ma Rebeka tsy afaka nivolan̈a hevitrinany foeky?

Herin̈iandra maromaro talohan’io, Eliezera efa nan̈ontany Abrahama karaha ty: ‘Akôry izikoa man̈angy io tsy tihandeha hiaraka aminaka?’ Ke ho Abrahama: ‘Izikoa zen̈y, anao afaka madiodio amy vava nataonao.’ (Genesisy 24:39, 41) Ravoravo loatra Eliezera nahita man̈angy hatao vadin’i Isaka, ke kiaka andran’izin̈y fo izy efa nan̈ontany asa Rebeka efa mety hindesiny a Kanana. Kanefa Rebeka mbala tiandry havany hidôkodôko hely miaraka amindrô an̈atin’ny folo andra fara fahaheliny. Tian’iry Betoela ho ren̈y hevitrin’i Rebeka, ke nikahiandrô izy ‘han̈ontanian̈a hevitrinany.’​—Genesisy 24:57.

Anjaran’i Rebeka iziô mangala fanapahan-kevitry maventy. Asa ino raha handeha hivolan̈iny? Handeha hararaotiny ma fitiavan’i babany ndreky anadahiny izy ke hirahiny irô tsy han̈ambela izy handeha? Efa hain’i Rebeka fa Jehovah nahavy izy nifanôjo iry Eliezera. Ke tombontsoa taminany ma man̈eky hampiasain’i Jehovah hanjary vadin’i Isaka zen̈y? Marin̈y fa tampoko raha jiaby io salakady nampavozo koa. Kanefa hita amy valin-teninany raha ten̈a tan̈atin’ny fônany. Karaha ty ho izy: ‘Zaho vôn̈ono handeha.’​—Genesisy 24:58.

Rebeka ten̈a nisy korazy! Maro leson ianarantsika baka aminany, nata tsy mitovy tamy zen̈y fomban’olo amy ziôty koa fa hanambady. Tsy raha tiany ny ten̈a maventy taminany fa raha tian’i Jehovah. Amy Volan̈an’ny Zan̈ahary ao misy toro lalan̈a maro tsara mikasiky mariazy. Koran̈in’izio ao olo karakôry tsara halain̈a vady, baka iô akôry atao izikoa tiho vady tsara toetry. (2 Korintianina 6:14, 15; Efesianina 5:28-33) Mifen̈a mangala tahaka ohatran’i Rebeka ke aza vôly man̈ano sitrapon’ny Zan̈ahary.

Fianakavian̈an’i Rebeka nitso-drano izy. Baka iô irô roen’i Debora, man̈angy nikarakara izy tamin’izy mbala hely, lôso nan̈araka Eliezera. Niaraka tamindrô koa mpanompovavinany sasany. (Genesisy 24:59-61; 35:8) Tsy ela irô efa lôso lavitry Harana. Kadiriny 800 kilômetara tiô lalan̈a io. Ke fara fahaheliny, nahadin̈y telo herin̈iandra dia nataondrô. Lavitry ay! Misaora kajo mare irô. Shamô biby efa fohitan’i Rebeka, fa zen̈y tsy mivolan̈a fa izy efa zatra nitenginy izio. Baiboly baka mivolan̈a fa fianakavian̈an’iry Rebeka olo mpitarimy ondrikondriky fa tsy mpivaro-mandeha mpitenginy shamô. (Genesisy 29:10) Matetiky olo sambany nitenginy shamô mitarain̈y fôtony mampijaly be mitenginy izio nata tsy ela.

Mety tian’i Rebeka ho hay raha miambin̈y izy lera izy avy, ke izy nan̈ontany Eliezera raha momba Isaka ndreky fianakavian̈anany. Miniminia baka andra harivariva, Rebeka ndreky matoelahy io mikoran̈a ankilan’ny afon-dasy. Nitantarainy tamin’i Rebeka fa Abrahama kamaradin’i Jehovah, ke izy nampan̈anten̈a fa baka amy taranakan’i Abrahama hazahoan’olombelon̈o jiaby fitahian̈a. Ke nanjary hain’i Rebeka fa baka amin’i Isaka, lelahy hanjary vadiny io, han̈atantirahan’i Jehovah fampan̈antinan̈anany. Dikan’izen̈y, izy koa mba handray anjara amy fahatantirahan’izio. Misaora gaga mare izy koa fa naharen̈y koran̈a zen̈y.​—Genesisy 22:15-18.

Navy fo irô tamy farany, erakan’ny hitantsika tamy fanombohan’ny lahatsoratra ty. Efa harivariva andra tamin’irô navy ta Negeba. Rebeka nahita tazan̈a lelahy nandehadeha tamy tanimboly. Rikian̈a lelahy io mizaha ndreky mandiniky irô. Rebeka ‘nijotso malaky baka tamin’ny shamônany.’ Mety direkty nijotso izy fa tsy niambin̈y shamô aby io nipetraka. Ho izy tamy lelahy nitariky lalan̈a io: ‘Azôvy ma lelahy mandehadeha amy tanimboly avy mitsena atsika ry?’ Izikoa fa hain’i Rebeka fa izio Isaka, direkty nisaraon̈an’ny lohanany. (Genesisy 24:62-65) Nan̈ino ma izy nan̈ano zen̈y? Zen̈y fomba an̈aboahan̈a fa izy man̈aja fiansenany. Mety misy olo hivolan̈a fa efa raha nataony io efa tsy lamaody. Kanefa na lelahy atsika na viavy, atsika mila mangala tahaka fanetren-ten̈an’i Rebeka. Azôvy amintsika ma tsy tihanan̈a toetry tsara karaha zen̈y?

Kadiriny efapolo taon̈o tiô Isaka. Izy tamin’io mbala nalahelo mare fôtony kadiriny telo taon̈o nifatesan’i Saraha mamany. Hita baka amy zen̈y fa Isaka olo be fitiavan̈a ndreky tsara fan̈ahy, tia mandray vahiny. Sambatra izy nahazo vady mazoto miasa salakady tia man̈ampy olo aviô manetry ten̈a! Asa raha ifan̈araka tsarabe edy irô roe? Karaha ty fo raha koran̈in’ny Baiboly: ‘Isaka potiky taminany.’​—Genesisy 24:67; 26:8.

Mbala tiantsika fo Rebeka nata efa mandilatran’ny 3 900 taon̈o afara atỳ. Tiantsika toetrinany fôtony izy nisy korazy, nazoto niasa, tia nan̈ampy olo, aviô nanetry ten̈a. Ke na lelahy na man̈angy, na matoe na tanora, aviô na manambady na tsy manambady, atsika jiaby samby mila mangala tahaka finoan̈an’i Rebeka.