Zaho tombo ta Warialda, tanàna hely a Nouvelle-Gales Atsimo. Mamboly, avio mitarimy ondrikondriky ndreky aomby asanolo an̈y. Mangin̈y tanàna io, tsy maro dahalo an̈y.

Zaho talan̈olo aminay folo mianadahy. Ke rango zaho 13 taon̈o, zaho efa niasa han̈ampian̈a ry olobeko. Zaho tsy dia nahita fianaran̈a, ke zaho niasa tamy tany fitarimian̈a biby. Tamy zaho 15 taon̈o, asanaka mamolaka sevaly.

Misy maha tsara izy miasa amy tany fitarimian̈a biby io, sady misy maha ratsy izy koa. Tamy lafiny araiky, tiako oe asanaka ndreky toeran̈a nisy zaho. Izikoa fa alin̈y, zaho nipetraka marikitry motro tio, mizaha fanjava ndreky lakintan̈a maro amy lan̈itry arỳ, sady mangala tsitsiko lera arivariva. Tadidiko zaho navy nivolan̈a, tsy maintsy misy olo niasa fo raha tsarabe aby io. Fa tamy lafiny araiky koa, tamy toeran̈a io tao nisy naman̈a ratsy. Matetiky zaho maharen̈y asaha, avio mora fo koa tao nazahoan̈a sigarety zen̈y. Ke tsy ela, zaho loso zatra nifima ndreky nan̈asaha koa.

Nandeha nipetraka ta Sydney zaho izikoa fa 18 taon̈o. Zaho tseky han̈ano maramila, fa nohony zaho tsy dia nahita fianaran̈a, zaho tsy nalaindro. Nahita asa zaho, ke zaho nidôko tan̈y taon̈o araiky. Tamy zen̈y nifanojiako voanalohany tamy Vavolombelon̈o Jehovah. Zaho nan̈eky handeha han̈aton̈o araiky tamy fivorian̈andro. Fa zaho koa fa navy tan̈y, direkty hitako fa marin̈y raha ampianarindro.

Fa tsy ela tafaranizen̈y, zaho nanapakevitry himpody tambanivolo tan̈y. Zaho nipetraka ta Goondiwindi, a Queensland. Zaho nahita asa, avio nanambady. Fa ny mampalahelo fo, zaho nanjary pigiaka toaka koa.

Niteraka aroe lahy zahay. Ke tamy zen̈y zaho nanomboko nieritreritry han̈ano akory eky hiafarany fiain̈ananaka. Tsaroako raha ren̈iko tamy fivorian̈any Vavolombelon̈o Jehovah ta Sydney tan̈y, ke zaho tapakevitry han̈ano raha.

Zaho nahita gazety Tilikambo Fiambesan̈a efa kay zay. Tamizio tao nisy adiresiny birôny sampan̈any Vavolombelon̈o Jehovah ta Australie. Zaho nanoratra taratasy tamindro, ke nisy Vavolombelon̈o Jehovah araiky zay nampaviandro taminaka tan̈y. Izy tsara fan̈ahy sady be fitiavan̈a oe. Tsy ela, zaho nianatra Baiboly taminany.

Izikoa zaho fa nianatra Baiboly in̈y, hitako fa zaho tsy maintsy nan̈ano fan̈ovoan̈a maventy tamy fiain̈ananaka. Andininteny ten̈a nisy vokany mare taminaka, 2 Korintianina 7:1. Izio mandrisiky atsika “han̈adio ain̈intsika, baka atsika ho afaka amy raha jiaby mandoto nofotro ndreky sain̈y.”

Zaho tapakevitry tsy hifima ndreky tsy higiaka toaka eky. Efa ela zaho zatra izio, ke tsy nora taminaka foeky hiala izio. Fa zaho fo efa tapakevitry mare han̈ano raha mamparavoravo Zan̈ahary. Ten̈a nan̈ampy zaho fan̈arehan̈a toro lalan̈a amy Romanina 12:2 ty: “Aza man̈eky hibolibolainy donia ty eky, fa man̈ovoà ke avaoza sain̈inaro.” Hitako fa izikoa tiako hiala amy fahazaran̈a ratsinaka io, mila ivoako toetsain̈inaka. Amy Jehovah, mifima ndreky migiaka toaka zen̈y raha ratsy, ke tokotro karaha zen̈y koa fahitako izio. Nampiany Jehovah zaho ke vitako niala tamizio.

Ten̈a tsy nora taminaka koa tsy han̈asaha. Haiko raha volan̈iny Baiboly aminy Efesianina 4:29: “Irarian̈a tsy ho hisy volandraty hiboaka amy vavanaro.” Fa zaho tsy nahavita nan̈ano zen̈y tiô ny iô. Ten̈a hitako nan̈ampy zaho nisaintsain̈y raha koran̈iny Isaia 40:26. Karaha ty raha volan̈inizio momba lan̈itry feno lakintan̈a: “Misan̈andrà lan̈itry baka anaro! Azovy niasa raha aby io? Araiky pitariky tafiky in̈y! Izy mibeko iro io eraka isakandro, ndreky mikaiky iro aminy an̈arandro tsiaraikiaraiky. Ten̈a mahery ndreky matanjaka ankitin̈y izy niasa iro io, ke tsisy manky iro io nata araiky.” Ke ho zaho tan̈atiny jeriko tan̈y, matoa Zan̈ahary manan̈a angovo hamoron̈ana lan̈itry maventy be tiako tazan̈iny io, zaho matoky fa vitany tsarabe koa man̈ampy zaho hiova baka hahavita hamparavoravo izy. Zaho nivavaka mare salakady nifen̈y mare koa. Ke izikoa fa nandeha fotoan̈a, vitako fo tsy nan̈asaha eky.

Tamy zaho mbala pamolaka sevaly, zaho tsy dia nafaka nikoran̈a taminolo. Fotony baka, tsy dia nisy olo loatra narikitry tany niasako io. Fa tamy fivorian̈any Vavolombelon̈o Jehovah, zaho nahazo fampiofan̈ana, ke loso haiko nan̈aboaka hevitrinaka. Fampiofan̈ana aby io koa nan̈ampy zaho hahavita hikoran̈a aminolo vaovao tsara momba Fanjakan̈any Zan̈ahary.​—Matio 6:9, 10; 24:14.

Efa taon̈o maromaro zay, zaho antipan̈ahy. Aminaka, ten̈a tombontsoa maventy afaka man̈ano zay vitako, han̈ampian̈a piaramanompo aminaka. Fa mandilatra zen̈y, zaho ndreky vadiko, avio iro zanakanay aby in̈y izioty miaraka manompo Jehovah.

Zaho olo tsy nahita fianaran̈a firy, kanefa zaho man̈ano mersy Jehovah, fotony izy von̈ono hampianatra zaho. (Isaia 54:13) Ten̈a ikeko raha koran̈iny Ohabolana 10:22 ty: “Fitahian̈a baka amy Jehovah mampapan̈arivo.” Efa tsy din̈inay mianakavy aby hianatra raha maro momba Jehovah ndreky hanompo izy mandrakizay.