Zaho teraka taminy 1948, tamy tanàna hely atsimoandrefany Nizeria. Tamy fotoan̈a zen̈y, vita batisa Moustapha zandriny papako ndreky Wahabi zokibenay, ke iro nanjary Vavolombelon̈o Jehovah. Naty papako tamy zaho sivy taon̈o. Nalahelo mare zaho. Nivolan̈iny Wahabi taminaka fa zahay mbala afaka hifankahita amy papanay ndraiky lera izy hatsangana amy maty. Raha zen̈y nandrisiky zaho hianatra Baiboly. Vita batisa zaho taminy 1963. Nisy rahalahiko telo koa natao batisa.

Taminy 1965, zaho niaraka tamy Wilson zokiko ta Lagos. Tan̈y zaho nafaka niaraka tamy pisava lalan̈a tamy fiangonan̈a Igbobi. Nanjary tihan̈ano pisava lalan̈a koa zaho izikoa fa nahita haravoan̈andro ndreky fazotoan̈andro. Ke tamy Zanvie 1968, zaho nan̈ano pisava lalan̈a.

Albert Olugbebi, rahalahy baka tamy Betela, nan̈ano fivorian̈a manokan̈a niaraka taminay tanora fotony izy tihivolan̈a taminay fa ten̈a nila pisava lalan̈a manokan̈a tavaratra Nizeria tan̈y. Ten̈a nafana fô Rahalahy Olugbebi, avio mbala tsaroako fo raha nivolan̈iny ty: “Anaro mbala tanora ke afaka mampiasa tsarabe fotoan̈anaro ndreky angovonaro hanompoan̈a Jehovah. Maro raha mety ataonaro!” Zaho tihan̈ano karaha Isaia ke handeha amy  zay tany han̈irahany Jehovah zaho. Zen̈y nahavy zaho nan̈ano fangatahan̈a han̈ano asany pisava lalan̈a manokan̈a.​—Isaia 6:8.

Tamy May 1968, zaho navoatendry pisava lalan̈a manokan̈a tamy tanànany Kano, tavaratra Nizeria tan̈y. Nisy ady nafana mare ta Biafra tamy fotoan̈a zen̈y (1967-1970). Maro olo nijaly ndreky naty tan̈y. Fa baka tio, nanjary takany ady io koa taminy ilany antin̈ianany Nizeria. Nisy rahalahy zay nitady handresy lahatra zaho tsy handeha tan̈y tsao zaho maty. Fa ho zaho taminany: “Mersy anao ndraiky miasaloha aminaka fa izikoa an̈y tany tiany Jehovah han̈irahan̈a zaho, zaho matoky tsarabe fa izy hiaraka aminaka.”

Nampalahelo mare fiain̈ana ta Kano tan̈y. Potipotiky tanàna maventy be io azony ady antran̈o nisy tan̈y. Ndraikindraiky lera zahay nandeha nitory in̈y, zahay nahita fatinolo naty taminy ady io. Maromaro fiangonan̈a ta Kano, fa ankamarozandro rahalahy aby io fo nilefa. Tsy ampy 15 aby pitory tavela tao sady iro aminio navozo avio kivy. Tsiota zahay pisava lalan̈a manokan̈a navy tan̈y. Ravoravo mare iro rahalahy ndreky ranabavy aby io zahay koa fa navy. Nimpody nahazo angovo ndraiky iro izikoa fa nankahirezinay. Iro nampianay baka himpody han̈ano fivorian̈a, handeha hitory, han̈ampody tatitry ndreky han̈afatra boky ndreky gazety baka amy sampan̈a ndraiky.

Zahay pisava lalan̈a manokan̈a nanomboko nianatra volan̈a haoussa. Maro taminolo tantanàna tiô nitandren̈y zahay izikoa fa naharen̈y hafatra momba Fanjakan̈any Zan̈ahary io tamy volan̈andro. Fa tsy tiandro pikamban̈a tamy fivavahan̈a maventy ta Kano tao nahita zahay nitory, ke zahay tsy maintsy nitandrin̈y mare. Tandraraiky, zahay roeny namako nihian̈iny lelahy zay tamy mesobe. Nakiry izy fo, zahay marere lomoay tozay izy ke tsy takany foeky. Ndray tio raha nampavozo aby in̈y, zahay nampiany Jehovah fo baka “tsy hiasaloha” avio nanomboko nahainaro fo pitory tamy tanàna io. (Sal. 4:8) Amy zioty efa misy fiangonan̈a 11 a Kano, avio mandilatra 500 pitory an̈y.

Fanjava vitsivitsy fo zaho nidoko ta Kano. Avio taminy Aoty 1968, zaho ndreky pisava lalan̈a manokan̈a aroe nalefa ta Niamey, kapitaliny Repoblikiny Niger. Tsy ela, hitanay fa Niger, amy faritry Andrefany Afriky, an̈isany tany ten̈a mafana ambony tany. Sosoko hafanan̈a be io, zahay koa tsy maintsy nianatra teny fransay fotony izio teny ofisialy tan̈y. Ndray tio raha sarotro aby io zahay natoky Jehovah, avio nanomboko nitory tamy tanàna io niaraka tamindro pitory vitsivitsy tan̈y. Tan̈aty fotoan̈a fohiky fo, efa presky olo nahay namaky teny jiaby ta Niamey tan̈y nahazo boky fianaran̈a Baiboly Ny Fahamarinana Izay Mitarika ho Amin’ny Fiainana Mandrakizay. Nisy taminolo aby io aby nitady tany nisy zahay fotony tihahazo boky.

Tsy ela, hitanay fa manampahifan̈a tsy tia Vavolombelon̈o Jehovah. Tamy Zie 1969, ohatra, zahay nan̈ano fivoriambeny faritry voanalohany tamy tany io. Kadiriny 20 fo pan̈atriky tamizio. Efa tsy din̈inay han̈anaovan̈a batisa pitory vaovao aroe. Kanefa taminy andra voanalohany tamy fivoriambe io, nisy polisy navy nampijanon̈o fandaharan̈a. Pisava lalan̈a manokan̈a ndreky piandraikitry faritry nindesindro tamy birony polisy. Zahay koa fa baka nan̈anaovandro ankety, zahay nasaindro nimpody amarainizin̈y. Zahay efa man̈iman̈y tsao ho ratsy raha, ke kabarony batisa nataonay tantran̈onolo avio iro olo hatao batisa aby io nataonay batisa mangingin̈y tamy ten̈arano.

Herin̈iandra vitsivitsy tafara tatỳ, zaho ndreky pisava lalan̈a manokan̈a dimy hafa niroasiny fanjakan̈a niala ta Niger. Namiandro andra aroe zahay hialan̈a amy tany io, sady zahay fo nila nan̈ano fomba nialanay tao. Narehanay volan̈andro ke zahay direkty nandeha tamy birony sampan̈any Nizeria. Nahazo fanendrena vaovao zahay koa fa navy tan̈y.

Zaho navoatendry tambanivolony Nizeria, tamy tanàna heliny Orisunbare. Ravoravo zaho tan̈y nitory ndreky nampianatra Baiboly olo niaraka tamindro pitory vitsivitsy nipetraka tan̈y. Fa nafaka tsiota fanjava, zaho nirahiny birony sampan̈a nimpody ta Niger. Ndray gaga sady navozo zaho tamy voanalohany, efa tsy din̈iko foeky himpody hifankahita ndraiky tamindro rahalahy ta Niger tan̈y!

Zaho nimpody ta Niamey. Amarainy andra naviako tan̈y, nisy lelahy zay nahita zaho. Hainy fa zaho Vavolombelon̈o Jehovah ke zaho nan̈ontaniany raha momba Baiboly. Zahay niaraka nianatra Baiboly, avio izy tsy nifima eky sady tsy nigiaka toaka be eky. Baka io, izy nan̈ano batisa. Ravoravo zaho niaraka nitory tamy piaramanompo tamy faritry samihafa ta Niger. Ravoravo koa zaho nahita fa nahainitombo fo olo nan̈araka fahamarin̈ana. Mbala 31 fo Vavolombelon̈o Jehovah tan̈y tamy zaho vo navy, fa tamy zaho niala tan̈y iro efa 69.

Nimpody ta Nizeria zaho tamy Desambra 1977. Nisy fiofan̈ana tsy maintsy nataoko tan̈y. Fiofan̈ana  io naharitry telo herin̈iandra. Izikoa fa tapitry izio, nisy taratasy baka tamy sampan̈any Sierra Leone nirahiny Malcolm Vigo, pandrindra Komitiny Sampan̈a, nivakiko. Iro rahalahy tan̈y nitady rahalahy pisava lalan̈a matanjaka tsara sady tsy manambady, mahay teny angiley ndreky fransay ke afaka han̈ano asany faritry a Guinée. Rahalahy Vigo nivolan̈a taminaka fa momba fanendrena io fiofan̈ana nazoko in̈y. Nazavainy tsarabe taminaka fa ten̈a tsy mora fanendrena araiky io, ke ho izy taminaka: “Mandiniha tsarabe antsendriky anao alohany han̈eky izio.” Fa zaho direkty namaly karaha ty: “Jehovah man̈iraka zaho an̈y ke zaho handeha.”

Zaho nandeha ta Sierra Leone, avio zaho nifanojy tamindro rahalahy tamy birony sampan̈a. Nisy rahalahy araiky an̈isany Komitiny Sampan̈a nivolan̈a karaha ty taminaka: “Tsy hainay akory nanindro piaramanompo a Guinée an̈y.” Iro rahalahy amy sampan̈any Sierra Leone miandraikitry asa fitorian̈a a Guinée. Fa ndray zen̈y, iro tsy nafaka nifandray tamy pitory tan̈y fotony nisy korontan̈a. Efa impirimpiry koa iro nan̈andran̈a nandefa rahalahy araiky hitsidiky iro piaramanompo ta Guinée tan̈y fa tsy nety nahomby. Ke zaho nirahin̈y nandeha ta Conakry, kapitaliny Guinée, nangataka lalan̈a tamy fanjakan̈a hidoko amy tany io.

Zaho koa fa navy ta Conakry, zaho nandeha taminy ambasadiny Nizeria. Tao zaho nifanojy taminy ambasadera. Nivolan̈iko taminany fa zaho man̈iry hitory a Guinée. Fa zaho nivolan̈iny mare tsy hidokodoko an̈y izikoa tsy tiho voasambotro na ho voa raha ratsiratsiny zen̈y. Ho izy taminaka: “Mimpodiana a Nizeria an̈y. Mindao mitory an̈y.” Fa ho zaho taminany: “Zaho efa tapakevitry hidoko atỳ fo.” Ke izy nanoratra tamy ministrany atitaniny Guinée baka han̈ampy zaho. Ke ministra io nan̈ampy zaho.

Tsy ela hely tafaranizen̈y, zaho nimpody tamy birony sampan̈a ta Sierra Leone ke nan̈ambara fanapahankevitriny ministra io tamindro rahalahy aby io. Haravoan̈a ma nindro koa fa naharen̈y fomba nitahiany Jehovah dianaka in̈y! Zaho nambelany fanjakan̈a hidoko ta Guinée.

Rango taminy 1978 firaka 1989, zaho nan̈ano asany faritry ta Guinée, ta Sierra Leone tan̈y, avio zaho nan̈ano piandraikitry faritry pisolo toeran̈a ta Liberia. Natetiky narary zaho tamy voanalohany, sady ndraikindraiky tamy faritry mitokan̈a oe. Fa iro rahalahy aby io niezaka nitondra zaho ta lopitaly.

Tandraraiky, zaho narary mare fotony voany tazomoko ndreky nisy ankana. Zaho koa fa janga, ren̈iko fa iro rahalahy aby io efa nieritreritry zaho hofoaty ke iro efa nikorokoran̈a momba tany handiven̈ana zaho. Ten̈a nampavozo mare raha nandalo aby io. Fa ndray zen̈y, zaho tsiary nieritreritry hiala tamy fanendrena nazoko io. Zaho ten̈a natoky fa efa Zan̈ahary zaraiky fo afaka miaro atsika tsarabe, fotony nata atsika maty mbala vitany fo mamelon̈o atsika ndraiky.

Nifanojy tamy Dorcas zaho taminy 1988. Izy ranabavy pisava lalan̈a farandraha tia Jehovah eky sady ten̈a nanetry ten̈a. Nan̈ano mariazy zahay, avio izy niaraka taminaka nan̈ano asany faritry.  Dorcas vady be fitiavan̈a sady mahafoe ten̈a. Mandeha 25 kilometara dia vity nataonay koa fa nitsidiky fiangonan̈a. Zahay aminio sady mbala nitondra entan̈anay koa. Fa izikoa ndraiky zahay fa nandeha nitsidiky fiangonan̈a lavitry, zahay niondran̈a zay raha nisy tiô ke nandeha tamy lalan̈a magodra sady feno lavadavaka.

Dorcas koa ten̈a nisy korazy. Natetiky, ohatra, zahay tsy maintsy nitsaka ten̈arano feno voay. Tandraraiky zahay tsy maintsy nan̈ano dia dimy andra, avio zahay nitenginy lakana nitsaka ten̈arano zay fotony tapaka pô kakazo tamizio. Dorcas koa fa nitsangana hiala tan̈aty lakana tao, izy latsaka tan̈aty rano lalin̈y be. Zahay roe aminio samby tsisy nahay nilomaon̈o salakady tamy ten̈arano io nisy voay. Nakiry izy, nisy tsaiky lelahy sasany nahavita nilomaon̈o nan̈avotro izy. Nata ndraikindraiky zahay nan̈inofy ratsy momba raha nandalo io, zahay mbala nanohy nan̈ano asany faritry fo.

Tamy voanalohandohany taon̈o 1992, tsy nampoizinay nahay fa Dorcas navesatra. Ke zahay tsy maintsy nanapakevitry asa zahay mbala hanohy han̈ano pisava lalan̈a manokan̈a. Ty raha nataonay tan̈aty jerinay: “Atsika namezany Jehovah kado!” Zen̈y nahavy an̈arany zanakanay nataonay Jahgift (amy teny angiley dikanizio “Kado baka amy Jah”). Koa fa efatra taon̈o Jahgift, teraka koa Eric anadahiny. Zanakanay aroe io ten̈a kado baka amy Jehovah. Nisy fotoan̈a Jahgift nanompo tamy birony fandikanteny mitokan̈a ta Conakry, fa Eric ndraiky pikarakara fiangonan̈a.

Nata Dorcas tsy maintsy niala pisava lalan̈a manokan̈a, izy mbala nanohy nan̈ano pisava lalan̈a maharitry fo ndray nitaiza. Jehovah nan̈ampy zaho ke vitako fo nanohy nan̈ano fanompoan̈a manontolo andra. Izikoa fa be zanakanay, afaka nimpody nan̈ano pisava lalan̈a manokan̈a ndraiky Dorcas. Zahay roe amy zioty misionera a Conakry.

Zay tany nan̈irahany Jehovah zaho nandihanako fo. Zahay roeny vadiko matetiky mahatsapa fa Jehovah miaro ndreky mitahy zahay. Jehovah fo natokisanay fa tsy harian̈a, ke zahay nanjary voaro tamy problemo ndreky asaloha maro. Hitanay roeny Dorcas tamy raha niain̈anay fa Jehovah, ‘Zan̈ahary pamonjy atsika’ io, Loharanony ten̈a fiarovan̈a. (1 Tan. 16:35) Zaho matoky fa ‘Jehovah hiaro’ lan̈iany olo matoky izy ‘ke mira fon̈osiny an̈atiny saka in̈y fahin̈anandro.’​—1 Sam. 25:29.