Taon̈o araiky tafara tatỳ, nisy filazan̈a natao tamy fianakavian̈any Betela. Nivolan̈a izio fa nitady piasa antsitrapo fan̈ampiny iro tamy sampan̈any Afriky Atsimo, fotony iro nahazo masìny vaovao fan̈anaovan̈a pirinty. Ke lan̈iany olo von̈ono, mety nifindra tan̈y. Ke zaho nisoratra an̈aran̈a. Haravoan̈a ma ninaka, fotony zaho an̈isanolo navoafidy. Nisy Betelita telo baka ta Kanada koa navoafidy: I Dennis Leech, Bill McLellan avio i Ken Nordin. Nambarandro taminay fa mety ho elaela zahay hidôko an Afriky Atsimo, ke billet handihanan̈a an̈y fo namezan̈a zahay.

Direkty zaho nitelefaony mamanay. Ho zaho taminany: “Ren̈inao Mama, misy vaovao. Zaho handeha Afriky Atsimo!” Mamako io olo tsy maro volan̈a, fa izy ten̈a nanan̈a finoan̈a sady nifandray tsara tamy Jehovah. Izy taminio tsy naro koran̈a fa, haiko fa tiany fanapahankevitrinaka. Ndray papako mba nan̈eky zaho handeha. Ndray zen̈y, nalahelo hely iro fotony lavitry mare tany hifindrako io.

Tan̈atiny telo fanjava, zahay nampiofanin̈y hampiasa masìny manokan̈a fan̈anaovan̈a pirinty. Tamy Betelany Brooklyn zahay niofan̈a. Koa fa vita fiofanan̈anay, zahay niondran̈a sambo pitondra entan̈a nandeha ta Le Cap, an Afriky Atsimo. Vo feno 20 taon̈o fo zaho tamy zen̈y. Zahay koa fa navy tan̈y, nandeha train zahay firaka ta Johannesburg. Hariva be zahay navy tan̈y, ary mbala ho lava koa dia. Nijanon̈o hely ta Karoo zahay. Vo kiaka andra tamy zen̈y. Io tanàna voanalohany nidokoany train niarahanay. Hiaka be tanàna io sady paiky, mafana, avio laposiera manjôfo mare. Nitsidiky baka tamy lafenaitrany train io zahay efadahy sady lany fan̈ahy. Sambanay nahita tany karaha zen̈y. Nimpody tan̈y ndraiky zahay tafara tatỳ, ke hitanay tsara mare tanàna io avio fiain̈ana an̈y milamin̈y tsara.

Nampiasa masìny Linotype asanaka tan̈atiny taon̈o vitsivitsy. Hafa hely masìny io, sady maro garamidany. Izio nampiasain̈a koa fa handahatra soratra hatao pirinty, ke anjaranaka nan̈ano zen̈y izikoa fa han̈ano pirinty Tilikambo Fiambesan̈a ndreky Mifohaza! Birôny sampan̈a nan̈ano pirinty gazetintsika tamy volan̈a maro fampiasain̈a tan Afriky Atsimo ndreky tamy firenena maro hafa tan Afriky koa. Ten̈a ravoravo zahay fotony niasa mare masìny vaovao io. Ary efa zen̈y edy navianay tan̈y.

Sampandraharaha araiky fo niandraikitry asa natao tamy fan̈anaovan̈a pirinty, fandifasan̈a entan̈a avio fandikanteny. Tamy sampandraharaha io zaho niasa koa fa nandeha fotoan̈a. Maro asa tamy zen̈y kanefa zaho ten̈a afapô!

Tamy taon̈o 1968 zahay roeny Laura Bowen nan̈ano mariazy. Pisava lalan̈a izy, avio nipetraka marikitry Betela. Panoratra amy masìny tamy Sampandraharahany Fandikanteny tamy Betela koa izy. Fa tamy zen̈y, lan̈iany Betelita manambady tsy nidôko tamy Betela fa nahazo fanendrena hafa. Ke zahay voatendry han̈ano pisava lalan̈a manokan̈a. Navozo hely zaho. Efa 10 taon̈o nampa Betelita zaho. Tamy zaho tamy Betela, zaho tsy nila nan̈efa fôndrony tran̈o sady tsy nila nivanga hanin̈y. Ke niasaloha zaho tsao tsy ho ampy zahay vola fan̈ampian̈a nazonay. Marin̈y ndraiky fa samby mahazo vola fan̈ampian̈a hely zahay roe fivadiany isaka fanjava. Kanefa tsy nahazo izio zahay izikoa tsy mahatakatra lera nitakian̈a taminay, fitsidihan̈a tokony hataonay avio isakany boky ndreky gazety tokony hapetrakanay. Vola fan̈ampian̈a io fo nampiasainay nan̈ifan̈a fôndrony tran̈o, nivangan̈a hanin̈y, nan̈ifan̈a bisy, nivangan̈a aody lera zahay marary, avio nivanganay raha hafa nilainay.

Zahay navoatendry taminy antokopitory tsy lavitry tanànany Durban, amy sisindranomasin̈iny Océan Indien. Feno Karàny tan̈y, fotony maro Karàny baka tan Inde nifindra tan̈y, kadiriny taminy 1875. Iro niasa tan̈aty alampariny lozìny pan̈amboatra siramamy. Taranakandro aby ankamarozany Karàny hitanay tan̈y, fa iro fo efa nan̈ano asa hafa. Iro ndraiky mbala man̈araka fombany Karàny fo, avio fomba fandokisandro mbala tsy niova. An̈isany raha tiandro, ohatra, mandoky laoko miaraka episy isankarazany. Ao ny mafanafana fa sasany ndraiky man̈itry mare. Iro koa nahay teny angiley, ke tsy sahiran̈a foeky zahay nikoran̈a tamindro.

Tamy leranizen̈y, 150 lera nitakian̈a tamy pisava lalan̈a manokan̈a. Taminy andra voanalohany, zahay roeny Laura nieritreritry hitory tsiota lera. Kanefa nafana mare andra. Zahay taminio salakady tsisy fiverenana mitsidiky, tsisy fampianaran̈a Baiboly, fa raha nitory isaka tran̈o fo. Zahay donko vo nanampôno hely nitory, zaho efa nizaha lera edy. Kanefa, mbala 40 minity fo vitanay. Ho zaho tamy jeriko tan̈y: ‘Raha mba ho vitanay edy izity va?’

Tsy ela tafaranizen̈y, niezaka zahay nandamin̈y programonay. Isanandra, nataonay pare môfo hoaninay, avio nan̈amboatra lasopy na kafe zahay. Izin̈y amy zay nataonay tan̈atiny termaosy. Zahay koa fa nila nangala kajo, nadôkonay tamy vodindraha zay tomôbilinay. Ndraikindraiky, feno zanakandro Karàny aby io man̈odidin̈y zahay. Nampatsaratsara nahita iro. Saovasaova baka iro nahita zahay, fotony zahay tsy mitovy tamindro. Izikoa fa nafaka andra vitsivitsy, an̈atiny lera araiky na lera aroe voanalohany nitorianay in̈y, hitanay nandeha mare fotoan̈a.

Ravoravo zahay nan̈ambara ny marin̈y amy Baiboly ao taminolo tamy faritaninay io. Iro Karàny aby io ten̈a mahay mandray vahiny, avio iro man̈aja olo, mahalala fomba sady tia Zan̈ahary. Maro tamindro io nan̈araka fivavahan̈a hindou, fa zahay koa fa nitory tamindro, iro ten̈a nitandren̈y. Ravoravo koa iro nianatra raha momba Jehovah, Jesosy, Baiboly, donia vaovao hanjakany fiadanan̈a, avio fitsanganan̈a amy maty. Taon̈o araiky tafara tatỳ, 20 isakanolo nampianarinay Baiboly. Isanandra, zahay nihina matsan̈a taminy araiky tamy fianakavian̈a nampianarinay Baiboly aby io. Ravoravo mare zahay!

Nahazo fanendrena vaovao ndraiky zahay tsy ela tafaranizen̈y. Navoatendry piandraikitriny faritry zaho, ke fiangonan̈a tamy sisindranomasin̈iny Océan Indien tany nitsidihiko. Tsara plasy io! Nampahery iro pitory tamy fiangonan̈a nitsidihinay raha ten̈a nataonay isaka herin̈iandra, avio zahay niaraka nanompo tamindro. Zahay nilasy tamy fianakavian̈a araiky. Ravoravo zahay niaraka tamindro ndreky zanakandro, ndreky nisaoma niaraka tamy biby nitarimiandro. Tianay mare nan̈ano asany faritry. Fa taon̈o aroe tafara, nitelefaony zahay iro tamy birôny sampan̈a. Tsy nampoizinay foeky raha zen̈y. Karaha ty ho rahalahy nikaiky zahay io: “Tianay himpody amy Betela atỳ anaro.” Ho zaho: “Efa tamàna zahay atỳ.” Ndray zen̈y, von̈ono fo zahay nandeha tamy tany jiaby nanendrena zahay.

Voatendry hiasa tamy Sampandraharahany Fanompoan̈a zaho koa fa navy tamy Betela. Ravoravo zaho niaraka niasa tamy rahalahy matotro ndreky efa zadraharaha. Tamy fotoan̈anizen̈y, iro piandraikitriny faritry aby io nandefa tatitry tamy birôny sampan̈a, isaka iro baka nitsidiky fiangonan̈a araiky. Birôny Fanompoan̈a amy zay nandefa taratasy tamy fiangonan̈a io, arakarakany tatitry nazondro. Taratasy aby io natao hankahirezan̈a iro fiangonan̈a aby io ndreky han̈amezan̈a toromariky nilain̈a. Tsy  mahagaga izikoa maro asandro sekretera aby tao. Tsy maintsy nadikandro tamy teny angiley tatitry jiaby nazondro tamy teny xhosa [kôsà], ndreky zolò, avio tamy teny afrikain hafa. Birôny sampan̈a ndraiky koa fa namaly, taratasy tamy teny angiley io nadikandro tamy teny afrikain aby io. Ke zaho ten̈a mankasitraka iro pandika teny aby io fotony mafy asandro. Nanjary nazava taminaka ino aby problemondro rahalahy ndreky ranabavy afrikain joby aby io.

Tamy leranizen̈y, fanjakan̈a tan Afriky Atsimo tan̈y farandraha nan̈avakavaka eky. Samby amy tany pitrahany aby olo fotsy ndreky olo joby. Iro tsy afaka nifan̈ôsihôsy foeky. Hafa koa volan̈a ampiasainy piaramanompo joby, ke iro koa fa nitory ndreky nivory, iro nampiasa fivolan̈anandro.

Teky koa, zaho efa tamy fiangonan̈a miteny angiley fo, ke vitsy piaramanompo afrikain jôby haiko. Fa zaho koa fa nimpody tamy Betela, nanjary maro raha haiko momba iro rahalahy aby io, an̈isanizen̈y fombandro, raha fataondro, raha ninoandro, ndreky problemo niaretandro nohony iro tsy nan̈araka fombanolo man̈odidin̈y. Iro baka tsy nan̈eky han̈araka fombafomba mifanohitry amy raha ampianariny Soratra Masin̈y na misy ifandraisany amy demony. Tsy nora tamindro raha zen̈y fotony nanohitry iro mare havandro ndreky olo tanàna araiky tamindro. Kanefa iro ten̈a nisy korazy! Ny raha hitako koa, masikiny sady tsy dia nandia lekoly ankamarozanolo nipetraka tambanivolo, kanefa iro nan̈aja Baiboly.

Nan̈ampy tamy resaka fitsaran̈a koa zaho tamy zen̈y, fotony nila narovan̈a zontsika han̈araka fivavahan̈antsika ndreky atsika tsy an̈isany donia ty. Ohatra iziô, nisy zanaka Vavolombelon̈o Jehovah voataora baka ta lekoly, fotony iro tsy nan̈eky niaraka nivavaka tamy tsaiky hafa sady tsy nan̈ano hirampivavahan̈a. Ten̈a tsy nivadiky ndreky nisy korazy iro, ke nankafatatra finoan̈anaka mare raha zen̈y.

Nisy problemo hafa koa iro piaramanompo amintsika aby ta Eswatini, firenena hely an Afriky an̈y. Soàzilandy nikahian̈a firenena io tamy zen̈y. Izikoa fa naty panjaka Sobhuza II, nirahin̈y nan̈ano fombafomba fisaonan̈a aby olo jiaby. Lelahy nirahin̈y nipìla, avio man̈angy nirahin̈y nanapaka fan̈eva fôhiky hely. Ke maro piaramanompo ninjehin̈y, fotony iro tsy nan̈eky nan̈ano fombafomba nifandray tamy fanompoan̈a razan̈a. Ten̈a nanohin̈y fônay nahita iro tsy nivadiky tamy Jehovah. Zahay koa fa nandiniky raha nataondro piaramanompo aby tan Afriky aby in̈y, ten̈a maro raha nianaranay, an̈isanizen̈y momba tsy fivadihan̈a ndreky faharetan̈a. Ke ten̈a nankafatatra finoan̈anay raha zen̈y.

Taminy 1981, zaho nimpody voatendry tamy fan̈anaovan̈a pirinty ndraiky. Nanomboko nampiasa ordinatera baka Betela koa fa nan̈ano pirinty. Ten̈a namparavoravo tamy zen̈y fotony niova be fan̈anaovan̈a pirinty. Nisy pivarotro masìny fandaminan̈a soratra zay nan̈amia masìny araiky han̈anaovany Betela testy. Tsisy raha nifain̈a. Ke nisoloan̈a masìny vaovao dimy, iro masìny Linotype sivy nampiasanay aby in̈y. Nasian̈a masìny vaovao fan̈anaovan̈a pirinty koa tamy Betela tao. Ke nahaimaro fo raha natao pirinty!

Zahay tamy fan̈anaovan̈a pirinty koa fa nanomboko nampiasa ordinatera, zahay nanjary nahavita namôron̈o logiciel vaovao na programo vaovao fampiasain̈a aminy ordinatera, handaminan̈a soratra ndreky sary tamy pazy. MEPS an̈arany logiciel io. * Nivoatra mare teknôlôzỳ nampiasain̈a amy fan̈anaovan̈a pirinty rango navianay efatra mirahalahy tan Afriky Atsimo. (Isaia 60:17) Zahay iziô efa samby manambady. Pisava lalan̈a maharitry sady ten̈a tia Jehovah aby vadinay. Zahay roeny Rahalahy Bill tamy zen̈y samby mbala nanompo tamy Betela. I Kenn ndreky Dennis ndraiky efa samby niteraka, fa iro fo nipetraka tsy lavitry Betela.

Nitombo mare asa natao tamy sampan̈a, fotony iro bokintsika aby io nadika tamy volan̈a maro be. Boky aby io baka tio koa fa vita pirinty, nalefa tamy sampan̈a hafa. Nahainaro fo tran̈o vaovao nilainy Betela. Ke iro rahalahy aby io nan̈amboatra tran̈o aby zen̈y tamy faritry tsara mare tandrefany Johannesburg tan̈y. Taminy 1987 natao fitokanan̈a iro tran̈o aby io. Ravoravo zaho mba nandray anjara tamy fan̈itaran̈a be zen̈y, ndreky an̈isany Komitiny Sampan̈a tan Afriky Atsimo tan̈y tan̈atiny taon̈o maro.

Voakaiky hanompo ta Etazonỳ teto zahay tamy 2001. Lany fan̈ahy zahay! Tamy taon̈o io baka teto vo nisy Komitiny Sampan̈a, ke voatendry ho an̈isanizio zaho. Somary nalahelo hely zahay niala asanay tan Afriky Atsimo tan̈y ndreky nisaraka tamy namanay. Kanefa, ravoravo mare zahay fotony hanomboko fiain̈ana vaovao miaraka amy fianakavian̈any Betelany Etazonỳ.

Niasaloha hely ndraiky zahay, fotony mamany Laura efa nahainatoe kanefa zahay handeha lavitry. Voafetra baka raha mety ho vitanay han̈ampian̈a izy, zahay koa fa avy a New York. Nahatsara izy fo, telo aby rahavaviny Laura, ke iro io samby von̈ono hikarakara mamandro ndreky hampahery izy, avio hiantoko raha ilainy. Karaha ty ho iro taminay: “Zahay efa tsy afaka manompo manontolo andra. Ke mba anjaranay mikarakara raha ilainy Mama, amy zen̈y anaro afaka manohy fanompoan̈anaro.” Ten̈a mankasitraka iro telo mirahavavy zahay.

Karaha zen̈y koa nataony rahalahiko ndreky vadiny. Iro nipetraka ta Toronto, a Kanada. Iro roe fivadiany fo nikarakara mamanay. Efa naty baka papanay. Efa mandilatra 20 taon̈o nipitrahany mamanay tamindro. Ten̈a mankasitraka iro roe fivadiany zahay fotony iro ten̈a tia mamanay. Nikarakaraindro fo izy firaka izy naty, tafara heliny navianay ta New York teto. Ravoravo zahay fotony fianakavian̈anay ten̈a nan̈ampy zahay, intsaka eky tamy fikarakaran̈a iro raimandreninay efa matoe aby io. Von̈ono fo iro nan̈ano fan̈ovoan̈a tamy fiain̈anandro, ndray tsy nora tamindro raha zen̈y ndraikindraiky.

Somilany naviako tamy Betelany Etazonỳ, zaho niasa tamy fan̈anaovan̈a pirinty. Nahaimôderny fo fomba fan̈anaovan̈a asa io, avio nahaitsotra fo. Zaho iziô miasa amy Sampandraharahany Fivangan̈a Entan̈a. Vo tsy ela nifindrako tao. Efa 20 taon̈o navianay tamy Betela maventy be ty zay. Kadiriny 5 000 olo an̈isany fianakavian̈any Betela atỳ, avio kadiriny 2 000 iô piasa antsitrapo. Ravoravo zaho an̈isany fianakavian̈a io.

Tsy tan̈atiny jeriko foeky fa han̈ano karaha ty fiain̈ananaka 60 taon̈o loso zay. Tan̈atiny fotoan̈a jiaby zen̈y, vadiko ten̈a nan̈ampy zaho tamy fônany jiaby. Tiako mare fiain̈ananaka! Tianay aby fanendrena jiaby nazonay, avio tianay mare koa olo niaraka niasa taminay. An̈isanizen̈y iro piaramanompo hitanay tamy sampan̈a maro nitsidihinay. Nahen̈y asanaka fotony zaho iziô efa 80 taon̈o mandilatra. Efa maro koa rahalahy tanora ten̈a mahay asa io.

Karaha ty nisoratiny panoratra salamo: “Sambatra firenena manan̈a Jehovah Zan̈aharinany.” (Sal. 33:12) Ary raha zen̈y marin̈y. Mahatsiaro sambatra zaho manompo Jehovah miaraka amy vahoakanany.