Izikoa anao hitady torohevitry momba raha mety hampahivankivan̈a alahelo zen̈y, anao hahita maro mare. Fotony nan̈ino? Fotony tsy mitovy fomba fan̈aboahanolo alahelo, karaha nikoran̈intsika taloha tio in̈y. Ke torohevitry mety aminolo araiky mety tsy ho mety aminolo hafa.

Ndray izy man̈ano zen̈y, misy torohevitry ty, efa hita fa nety taminolo maro. Baka amy volan̈any manampahizan̈a aby io iro io, avio baka amy boky feno fahendrena efa nisy retry ela, tsy ino zen̈y fa Baiboly.

• Maro manampahizan̈a mivolan̈a fa ten̈a ilain̈a izio, izikoa atsika malahelo. Fa ndraikindraiky, misy fotoan̈a anao tihidoko manokan̈a. Mety ho meloko anao amy zen̈y, izikoa misy olo man̈aton̈o anao. Normaly raha zen̈y.

• Zen̈y tsy mivolan̈a fa mila misy olo fo ankilanao, fa izy fo aza direkty famaran̈a olo koa tihan̈ampy anao. Mbala misy fotoan̈a ilanao iro fo afara an̈y. Koràn̈a amindro ino raha ten̈a ilainao amy fotoan̈a io ndreky raha tsy tianao.

• Baka amy raha jiaby zen̈y mahavy anao mila mahay mandanjalanja fotoan̈a hidokoanao manokan̈a ndreky hiarahanao aminolo.

TORO LALAN̈A: “Tsara aroe toizay araiky, ... Fa izikoa lavo araiky afaka man̈anko izy namany.”​—Mpitoriteny 4:10.

• Ho kirikiry alahelonao izikoa anao mahakarakara fahasalaman̈a. Mihinàna voankazo isankarazany, ndreky legimo ndreky voandraha.

• Migiaha rano be ndreky jus mahasalama.

• Izikoa anao tsy mahalany hanin̈y, mihinàna tsihelihely fo fa ataova matetiky fo. Na koa, anao mety man̈ontany dokotera momba aody mety mahasolo hanin̈y io. a

• Dia vity ndreky fan̈anaovan̈a spaoro aminy antonony mety hampakirikiry alahelonolo. Fan̈anaovanao izio mety hazahoanao angovo indesinao miatriky alahelonao.

TORO LALAN̈A: “Tsisy olo tsy tia ain̈inany tompiny zen̈y, fa izy tsy maintsy tia ndreky mamelon̈o izio.”​—Efesianina 5:29.

• Ten̈a ilain̈a man̈ano ampy toromaso io, sirto aminolo navy naty havan̈a, fotony alahelo io ten̈a mandreraka.

• Tandrema figiahan̈a kafe be loatra ndreky raha misy toaka fa mety hanapatapaka toromasonao.

TORO LALAN̈A: “Sitrasitrany koa fangalan̈a kajo fenony tan̈ana araiky tozay asa mare feno tan̈ana aroe, kanefa mira manambotro tsiko fo.”​—Mpitoriteny 4:6.

• Ikia fa tsy mitovy fomba fan̈aboahanolo alahelo. Ke mila hainao ino torohevitry ten̈a mety aminao.

• Hitanolo sasany fa nahatsara iro mitantara aminolo alahelondro. Fa misy ndraiky olo tsy tia mitantara aminolo raha mampalahelo izy. Izikoa anao tihikoran̈a raha mampalahelo anao aminolo kanefa anao mbala misalasala, mety tsara aminao mikoran̈a izio aminolo ten̈a kamaradinao.

• Olo sasany mivolan̈a fa ilain̈a mitomoan̈y, fotony izio mampahivankivan̈a alahelo, fa sasany ndraiky tsy tia mitomoan̈y.

TORO LALAN̈A: “Fônolo mahatsapa alahelo an̈atinany ao.”​—Ohabolana 14:10.

• Misy olo sasany migiaka toaka na mifima sigarety baka hampakirikiry alahelondro. Mandrobaka ain̈inolo raha karaha zen̈y. Tsy ho lava aviloman̈a olo karaha zen̈y sady maro koa raha mety havoa izy. Mifidiana raha tsy mandrobaka ain̈inao izikoa fa mizaha raha hampahivankivan̈a alahelonao.

TORO LALAN̈A: “Irarian̈a atsika han̈adio ain̈intsika, baka atsika ho afaka amy raha jiaby mandoto.”​—2 Korintianina 7:1.

• Maro olo mahita fa tsara izikoa mba man̈anon̈ano raha fo fa tsy midoko mandiniky raha mampalahelo io fo.

• Tsara izikoa anao manokana fotoan̈a miaraka amy kamarady, mianatra raha vaovao, na mangala diandian̈a miaraka aminolo.

• Izikoa fa mandeha fotoan̈a, mety hiova fahazaran̈a tsaranao io. Mety hahadin̈y ela baka alahelonao, avio anao mety hatetiky hahatsiaro olo naty in̈y. Normaly raha karaha zen̈y.

TORO LALAN̈A: “Raha jiaby samy amy fotoan̈a natokana an̈anovan̈a izy; … misy fotoan̈a itoman̈izan̈a, avio misy fotoan̈a itokizan̈a. Misy fotoan̈a iafatrafaran̈a amy tomoan̈y, avio misy fotoan̈a hitsinjahan̈a.”​—Mpitoriteny 3:1, 4.

• Izikoa mety, direkty mimpodiana amy fiain̈ana mahazatra anao.

• Halaky ho tafimpody amy fiain̈ana mahazatra anao io anao izikoa zatra mandry amy lera, miasa, ndreky man̈ano raha hafa koa.

• Anao koa misy raha atao fo, hahaikirikiry alahelonao.

TORO LALAN̈A: “Fa tsy ten̈a tsapany fa andra iain̈any io mandalo fo, fotony izy ataony Zan̈ahary rikian̈a amy raha mamparavoravo fônany.”​—Mpitoriteny 5:20.

• Maro aminolo nalaky nangala fanapahankevitry maventy nanenin̈y nan̈ano zen̈y.

• Izikoa mety, tsara mba miambin̈y elaela vo mangala fanapahankevitry hifindra, hiova asa, na han̈adoso raha jiaby momba olo naty in̈y.

TORO LALAN̈A: “Olo mazoto mahazo tombony, fotony mandamin̈y tsialohaloha raha hataony, fa hanjary masikiny ndraiky zay olo mekimeky man̈ano raha.”​—Ohabolana 21:5.

• Maro aminolo malahelo mahita fa tsara izikoa iro man̈ano raha hatsiarovandro olo naty io.

• Mety hankahery anao mamory sarinany na man̈ano diary mitantara fotoan̈a jiaby niarahanaro ke mba tianao tsarovan̈a.

• Iro sovenira tsara aby io fo tsarova ndreky zahava, isaka anao ngomangoma iro.

TORO LALAN̈A: “Tsarova iro andra taloha aby in̈y.”​—Deoteronomia 32:7.

• Diniha tsao anao mety man̈ano vakansy.

• Anao koa tsy afaka mandeha lavitry ndreky ela, anao mety tsy mandeha miasa andra araiky na aroe, mba mandeha mitsangatsangana, na misoma bisikilety.

• Anao koa fa miova amy raha fataonao andavanandra efa pare edy.

TORO LALAN̈A: “Alô atsika handeha amy tany mitokana, ke mangalà kajo hely.”​—Marka 6:31.

• Hahatsiaro hahivankivan̈a anao isaka anao baka man̈ampy olo.

• Tsara izikoa komansenao amy kamaradinao navy naty havan̈a karaha anao, fotony olo karaha zen̈y ten̈a mahay raha mahazo anao.

• Anao koa man̈ampy ndreky mankahery olo, ho ravoravo ndraiky koa anao sady tsy hahatsiaro latsatokana.

TORO LALAN̈A: “Man̈amia raha olo ten̈a mampasambatra toizay mahazo raha baka aminolo.”​—Asan’ny Apostoly 20:35.

• Anao mety mizaha ndraiky ino raha tokony ho ten̈a maventy amy fiain̈ananao.

• Diniha akory mety hitondrasanao fiain̈ananao.

• Zahava ino raha ten̈a tokony hivoanao.

TORO LALAN̈A: “Sitrany mandeha amy tran̈o misy fisaon̈ana, tozay mandeha amy tran̈o misy fety, fotony fahafatesan̈a fo iafaranolombelon̈o jiaby, ke tokony hangala onon̈o zen̈y lan̈iany olo mbala velon̈o.​—Mpitoriteny 7:2.

Ny marin̈y aminany, alahelo io tsy ten̈a ho afaka. Fa kanefa, maro olo naty havan̈a nahita fa iro torohevitry aby nikoran̈intsika tio in̈y ten̈a nan̈ampy iro ndreky nankahery iro. Nata iro io tsy jiaby amy raha mety hankafaka alahelo, iro io mety hampakirikiry izio. An̈ohara baka.