Miomàn̈a Hiatriky Problemo

“Zanakanay koa teraka, zaho nanapakevitry ho voly sigarety. Tantran̈onay tao nasiako soratra karaha ty ‘Tsy Mahazo Mifima Sigarety.’ Mbala vo lera araiky fo efa tsy din̈iko edy, fotony vatan̈anaka tao ten̈a nila nikotiny.”—Yoshimitsu, Japon.

HITANTSIKA baka amy zen̈y fa tsy mora miala amy sigarety. Misy fikarohan̈a natao fa 90 isanjatonolo niala tamy sigarety kanefa mbala tafimpody, nanjary pifima ndraiky koa. Ke anao koa mioman̈a tsarabe amy problemo mety handalo, azo antoko fa ho vitanao hiala sigarety. Ino aby fioman̈ana mila hatao?

Vatan̈a mitady nikotiny: Amy telo andra voanalohany izio ten̈a tsy mora, baka io mahaimihen̈y izio koa fa kadiriny afaka aroe herin̈iandra. Karaha ty ho lelahy araiky navy nifima taloha: ‘Miaho fan̈irian̈a tihifima an̈atiny fotoan̈a io salakady tampoko koa faviany.’ Mety handalo aminao koa raha zen̈y, ndray efa taon̈o maro afara atỳ. Ndray zen̈y, aza malaky mifima! Hiala fo fan̈irian̈a io izikoa fa afaka dimy minity.

Tsy mahazo jery: Tihoandry fo, tsy mahavita mifantoko, baka io amy voanalohany mora maventy olo miala amy sigarety. Mety hahatsiaro mangotsokotsoko, mangidingidy, na sempotro baka io hikohaka koa anao. Fihetsehampo koa mety hiovaova ke mety hanjary tsy hanampaharetan̈a, mora meloko na kivy foeky anao. Mety ho voly ankamarozandro raha jiaby zen̈y afaka kadiriny fanjava araiky na aroe.

Ty misy sosokevitry han̈ampy anao koa fa an̈atiny fotoan̈a io:

● Mila mandry elaela.

● Migiaka rano na jus naturel be. Mihinàn̈a hanin̈y mahasalama.

● Man̈ano fan̈atanjahanten̈a leralerany.

● Man̈antsory tsiko mare baka io mangala sary antsain̈y tsiko madio mameno poumon nao.

Misy raha mety hahavy anao tihifima: Mety raha efa nahazatra anao izio na fihetsehampo. Ohatra, nifima antsendriky anao alohany anao higiaka raha araiky. Ke anao koa fa migiaka raha io, aza ambela ela fa direkty giaha malaky. Mety amy man̈araka anao hahavita hankafy izio tsarabe.

Mety tihifima koa anao lera man̈ano raha sasany. Ho afaka fo izio fa mety miambin̈y elaela fo, ndray anao efa tsy mifima. Karaha ty ho Torben, araiky nikoran̈intsika taloha tio in̈y: “Efa 19 taon̈o zaho voly sigarety, kanefa mbala tihifima fo izikoa lera mba mangala kajo hely migiaka kafe in̈y.” Fa miala tsihelihely izio koa fa mandeha fotoan̈a.

Izikoa anao zatra nifima lera migiaka toaka, akory hatao? Anao mety mila fady toaka na miala lavitry tany mety ahitan̈a toaka, izikoa tianao ho tafiala amy sigarety. Maro olo tafimpody ndraiky mifima lera iro migiaka toaka. Fotony nan̈ino?

● Efa mampitombo ambiansy azo baka amy nikotiny ndray toaka hely fo.

● Olo koa fa miaraka migiagiaka, iro matetiky mifima sigarety fo.

● Toaka io mahavy anao tsy hisain̈y tsara ndreky hasakisaky han̈ano raha ratsy. Marin̈y ankitin̈y raha koran̈iny Baiboly ty: ‘Divain io man̈adoso fan̈irian̈a han̈ano ny tsara.’—Hosea 4:11.

Naman̈a: Mahaiza mifidy naman̈a. Izikoa mbala mety atao, aza miaraka amy namana mifima na amy naman̈a mety handrisiky anao hifima. Ialà koa olo mety hampakivy anao na mety hikotran̈a anao.

Fihetsehampo: Misy fan̈adihadian̈a natao ke hita fa ankamarozanolo tafimpody amy sigarety, olo niasaloha mare, na neloko talohanizy nifima. Izikoa fa hitanao fa anao efa tihifima baka amy fihetsehamponao, tsara anao mangala tsitsiko hely. Migiaha rano na mihinàna silgomy na mitsangatsangàna hely. Mifen̈a baka hieritreritry raha tsara. Mivavaha mare na koa mamakia pazy vitsivitsy amy Baiboly.—Salamo 19:14.

Aza Man̈amarinten̈a

● Zaho raha zisty mitsentritry indraiky fo!

Ny ten̈a marin̈y aminany: Tsy ela antsasaka selily pangala nikotiny io amy betro ao loso velombelon̈o an̈atiny telo lera koa fa mahazo setroko sigarety indraiky fo. Matetiky loso mifima ndraiky koa olo io.

● Man̈ampy zaho hiatriky problemo sigarety io.

Ny ten̈a marin̈y aminany: Izikoa anao mitsentritry indraiky amy sigarety, koran̈indro pikaroko aby io fa efa mampitombo hormony mitondra asaloha nikotiny io. Marin̈y fa karaha sambatra fahitanao anao lera baka mifima, kanefa karaha ty ny raha ten̈a misy: Elaela vo tsapanao jaly baka amy fialan̈a amy sigarety io.

● Zaho efa tsy afaka aminany ty.

Ny ten̈a marin̈y aminany: Anao koa mizaha lafiratsindraha fo, zen̈y man̈ambara fa anao tsy von̈ono hiala sigarety. Karaha ty volan̈iny Baiboly: “Izikoa an̈atiny fotoan̈a sarotro anao kivy, hihen̈y edy angovonao.” (Ohabolana 24:10) Ke aza rivan̈a! Ho vitanao fo hiala sigarety izikoa anao ten̈a von̈ono ndreky man̈araka iro toro lalan̈a maro tsara hitanao ato.

● Tsy din̈iko foeky tsy hifima.

Ny ten̈a marin̈y aminany: Marin̈y fa tsy mora aminao miaritry raha sasany anao koa fa mifen̈y miala amy sigarety, kanefa hiala tsihelihely fo iro io afaka herin̈iandra vitsivitsy. Ke korazy fo. Koa fa mandeha fotoan̈a, mbala mety tihifima fo anao anao ndray efa afaka fanjava maromaro fa tsy mahadin̈y ela fan̈irian̈a io, izikoa anao tsy mandrehitry sigarety.

● Anao kony marary sain̈y e!

Ny ten̈a marin̈y aminany: Anao mety mivolan̈a amy dokoteranao baka izy han̈ampy anao hiala amy sigarety izikoa anao misy aretintsain̈y, karaha ataony hakivian̈a. Azo antoko fa von̈ono han̈ampy anao ndreky han̈aramaso fitahan̈a anao izy.

● Tsisy raha mety ilan̈a zaho eky izikoa zaho tsy mifima ndraiky.

Ny ten̈a marin̈y aminany: Izikoa anao efa nifen̈y niala sigarety kanefa mbala tafimpody fo, zen̈y tsy mivolan̈a fa efa tsisy hevitry eky. Miangàn̈a fo fotony anao lavo karaha olo jiaby fo, koa mbala tafimpody amy sigarety. Marin̈y fa mampakivy koa lavo, kanefa zen̈y tsy mivolan̈a fa efa tsisy hevitry eky. Anao koa tsy miangana, ho resy anao. Fa aza kivy fa ho vitanao fo handresy.

Efa tan̈atiny 26 taon̈o Romualdo nifima sigarety, fa 30 taon̈o mandilatra izy vo nafaka tamizio. Karaha ty ho izy: “Efa tsy azoko onon̈o eky efa impiry zaho tafimpody nifima. Kivy mare zaho isaka zaho tafifima ndraiky, ke karaha efa tsisy hevitry eky raha momba zaho. Kanefa zaho koa fa ten̈a tapakevitry hifandray tsarabe tamy Jehovah ndreky niangavy izy mare, vitako fo niala sigarety.”

Amy lahatsoratra man̈araka misy torohevitry han̈ampy anao hiala tanteraka amy sigarety.

[Efajoro/​Sary]

DAHALO IO MAHAFATY

Raviny lobaka io ampiasainolo amy raha maro. Sasany amindro io alafo amindro pivarotro aody gasy na farmasy gasy. Mivolan̈a Fikambanan̈a Iraisampirenena Momba Fahasalaman̈a fa “mahafaty aby koa fa sigarety na lobaka.” Mety hamono koa iro aretin̈y azo baka amindro io, karaha ataony kansera ndreky aretimpo. Mety hamparary tsaiky an̈aty kibo koa olo mifima sigarety ankilandro io. Ino aby karazan̈a sigarety fohitantsika?

Sigarety hely namboarin̈y tamy tan̈ana: An Asie an̈y ten̈a ahitan̈a izio. Ten̈a maro mandilatrany sigarety tsotra godron ndreky nikotiny baka io gazy misy poazon an̈atinizio.

Sigarety be ndreky sigarety tsotra: Sigarety be io lobaka fon̈osin̈y ravindraha na taratasy ke vita baka amy raviny lobaka izio. Fa sigarety tsotra ndraiky, taratasy fo amon̈osan̈a izy. Direkty miditry baka ambava nikotiny amy sigarety be io ndray mbala tsy mirehitry.

Sigaretiny jirofo: Mandilatra antsasany raviny lobaka fa lambiny ndraiky raviny jirofo. Be lavitry mandilatra sigarety tsotra godron ndreky nikotiny an̈atinizio, baka io gazy mahafaty misy poazon aboakany.

Pipa: Mandrobaka ain̈y mira olo mifima sigarety fo olo mifima pipa io. Mitovy fo kansera ndreky aretin̈y azo baka amindro io.

Lobaka: An̈isanizio raviny lobaka hotain̈y, na tsintsefin̈y aminy oron̈o ndreky gutkha man̈itry. An Asie atsimo antin̈iana an̈y ten̈a misy iro io. Miditry baka ambava nikotiny aminany io, baka io miditry amy lalandio. Mamparary karaha sigarety hafa koa iro io.

Tuyau fitsintsefan̈a: Alohany hitsentsitry izy, ampandalovin̈y rano antsendriky setrokonany baka tsy hihen̈y habezany poazon aminany. Avy firaka amy poumon iro poazon aby io ke mety hanjary kansera.

[Efajoro/​Sary]

AMPIA KOA OLO HIALA AMY SIGARETY

● Aza mankaratsy olo. Sitrany midera ndreky man̈amia kadô tozay masiaka na mivolambolan̈a iro. Ten̈a malaka amindro ohatra volan̈a karaha ty: “Ho vitanao fo io izikoa anao mifen̈y ndraiky”, fa tsy tokony hivolan̈a karaha ty: “Efa voa koa e!”

● Mahaiza mamela heloko. Mandifera fo izikoa meloko na mahinihiny aminao olo tihiala amy sigarety. Mifen̈a fo ho tsara fan̈ahy aminany. Volàn̈a aminany karaha ty: “Ten̈a mafy raha mahazo anao io kanefa mamparavoravo zaho mahita anao mifen̈y fo.” Tandrema tsao mivolan̈a karaha ty: “Sitrany fo anao nifima e!”

● Mifen̈a baka ho naman̈a tsara. Volan̈iny Baiboly: “Olo ten̈a naman̈a zen̈y mira rahalahy von̈ono han̈ampy amy fotoan̈a jiaby, indraka eky amy fotoan̈a isiany raha mampiory.” (Ohabolana 17:17) Mifen̈a fo hanan̈a faharetan̈a aminolo mifen̈y miala amy sigarety, ho ‘tia izy amy fotoan̈a jiaby.’ Ataova fo zen̈y na karakory na karakory fihetsehamponany.