Anao Afaka Handresy

HAN̈ANO raha amy zay anao iziô, ke “korazy fo”! (1 Tantara 28:10) Ino raha farany tokony hataonao baka ho azo antoko fa anao hahavita hiala sigarety?

Ifera daty. Mivolan̈a Ministerany Fahasalaman̈a Ndreky Fan̈asoavan̈a Vahoaka a Etazonỳ an̈y fa anao koa fa tapakevitry hiala amy sigarety, tsara izikoa an̈atiny herin̈iandra aroe nahatapakevitry anao in̈y anao miala. Mbala von̈ono tsarabe anao an̈atiny fotoan̈a io. Apitraha amy kalandrienao daty io, avio volàn̈a koa ry namanao, baka io aza ivoan̈a eky daty io na ino raha mandalo.

Man̈anova “karty hely.” Mety soratinao ao raha aby ty, ndreky raha hafa handrisiky anao hiala amy sigarety:

● Antony mahavy anao tihiala

● Nimerony telefony mety kahianao lera anao tihifima

● Hevitry han̈ampy anao hiala. Mety andininy amy Baiboly zen̈y, karaha ataony Galatianina 5:22, 23

Indesa man̈araka anao fo karty hely io baka io vakia matetiky isanandra. Vakia fo izio isaka anao tihifima ndray anao efa nafaka amy sigarety.

Ialà tsihelihely fahazaranao mifima. Diany mbala tsy avy daty io, efa ataova sandra raha zen̈y. Ohatra iziô anao koa fa zatra mifima isaka anao vo mifoha, atikia lera araiky raha zen̈y. Aza mifima eky izikoa fa mihina na baka mihina, izikoa fa zatra nan̈ano zen̈y anao taloha. Ialà lavitry tany misy olo mifima sigarety. Anao koa mitokana in̈y, ampodipodiana mare karaha ty: “Mersy fa efa tsy mifima eky zaho iziô e.” Raha jiaby zen̈y han̈ampy anao ho von̈ono hiala amy sigarety salakady hampatsiaro anao fa tsy ho ela anao ho afaka amy sigarety.

Miomàn̈a. Ataova pare raha mety oanin̈y karaha ataony karoty, silgomy, pistasy izikoa fa mahaimarikitry daty io. Ampatsiarova ry namanao ndreky ry havanao daty io. Koràn̈a amindro raha mety ataondro han̈ampian̈a anao. Aminy andra alohany daty io, adosoa raha fasian̈a labotiny sigarety, brike ndreky raha jiaby mety hitsapa jery anao, karaha ataony sigarety antran̈o ao na an̈aty tomobily na an̈aty pôso na ampiasan̈a an̈y. Mora aminao baka hangala iro io tozay han̈iraka naman̈a na handeha hividy izio. Aza voly mangataka fan̈ampian̈a amy Zan̈ahary, indraka eky afarany anao nifima farany in̈y.—Lioka 11:13.

Maro olo nahavita niala sigarety, naman̈a sandoko io. Mety man̈ano karaha zen̈y koa anao. Ho salama vatan̈a anao amy zen̈y sady hahatsiaro hahivankivan̈a koa.

[Sary]

Indesa man̈araka anao fo karty hely in̈y baka io vakia matetiky isanandra