Nisy lelahy pan̈arivo araiky, Josefa an̈arany, nangataka fatiny Jesosy tamy Pilato. Nifon̈osiny lamba lalainy ten̈a tsara ndreky nisy raha man̈itry faty io, baka io naleviny tamy fasan̈a mbala vao. Nasiany vato maventy koa tamy varavaran̈a fasan̈a io. Ho sefondro pisoron̈o aby io tamy Pilato: ‘Zahay mavozo tsao avy pianatra Jesosy aby io hangala faty io, ke iro hivolan̈a fa efa velon̈o izy.’ Ho Pilato: ‘Aza misy himboan̈a man̈etsiketsiky vato be amy fasan̈a io foeky, baka io asiava piambin̈y!’

Nafaka telo andra, nisy man̈angy nandeha tamy fasan̈a tan̈y, maraindrain̈y be. Hitandro fa efa tsy tamy pilasiny vato be in̈y. Tan̈aty fasan̈a tao, nisy anjely nivolan̈a tamindro: ‘Aza mavozo, fa Jesosy in̈y efa velon̈o. Iraha zahany pianatranany a Galilia an̈y izy.’

Nilomoay nalaky nandeha tamy Petera ndreky Jaona tan̈y Maria Magdalena. Hoizy tamindro: ‘Nisy olo nangala fatiny Jesosy!’ Nilomoay nandeha tampasan̈a tan̈y iro. Efa tsy tao marin̈y faty io. Iro baka tio nody.

Nimpody tamy fasan̈a tan̈y ndraiky Maria. Nahita anjely aroe izy tao, ke ho Maria tamindro: ‘Tsy haiko foeky aia nataonolo tomponaka.’ Nahita lelahy araiky zay izy baka tio. Izy nieritreritry fa olo io pan̈amboatra zaridain̈y, ke ho Maria: ‘Volàn̈a aminaka azafady nataonao aia izy e!’ Ho lelahy io: “Maria!” Azony onon̈o direkty fa Jesosy olo io, ke ho Maria: “Papianatra!”, baka io nitolon̈iny izy. Jesosy nivolan̈a: ‘Mindao volàn̈a amy rahalahiko an̈y fa anao nahita zaho.’ Nilomoay nandeha tamy pianatra aby io tan̈y Maria.

Nisy pianatra aroe nandeha ta Emaosy taminandra io. Nisy lelahy fanojy iro tamy lalan̈a, ke niaraka tamindro. Lelahy io nan̈ontany iro ino raha koran̈indro. Ho iro: ‘Tsy ren̈inao ma vaovao? Nirahiny sefony pisoron̈o aby io nivonen̈a kony Jesosy, efa telo andra zay. Kanefa nisy man̈angy nivolan̈a fa efa velon̈o izy.’ Ho lelahy io: ‘Anaro  ma tsy mino volan̈a paminan̈y man̈ambara fa hofoaty Kristy, baka io ho velon̈o ndraiky?’ Ke nazavainy tamindro Soratra Masin̈y. Iro koa fa navy ta Emaosy in̈y, nikahindro tantran̈o lelahy io. Lelahy io koa fa nivavaka hihina in̈y, haindro fa kaiky Jesosy izio. Tsy hita direkty izy baka tio.

Nilomoay nandeha tamy tran̈o nivoriandro apostoly aby io ta Jerosalema tan̈y pianatra aroe in̈y, baka io nitantaraindro raha jiaby nandalo. Iro mbala nikoran̈a fo niboaka tamindro tio Jesosy. Tamy voanalohany, iro seky tsy nino. Fa ho Jesosy: ‘Zahava baka tan̈anaka, ke tosia. Efa nambara kony fa Kristy himpody velon̈o ndraiky e!’