Vaovao Tsara Nisoratin’i Matio 20:1-34
20 “Fanjakan̈an’ny lan̈itry io mety hampiran̈iny amy lelahy araiky nanan̈a tany fambolian̈a rezain. Maraindrain̈y mbala bônera izy efa lôso nitady olo hiasa amy tanin’ny rezainany.
2 Izy koa fa baka nifan̈araka tamindrô mpiasa aby io fa denaria araiky karamandrô an̈atin’ny andra araiky, irô nalefany tamy tanin’ny rezainany tan̈y.
3 Niboaka ndraiky koa izy izikoa fa kadiriny nevera,* ke nahita olo hafa tsisy asa izy ta bazary tan̈y.
4 Ho izy tamindrô: ‘Mindao koa anarô mandeha miasa amy tanin’ny rezainaka an̈y, fa hamezako anarô karama tôkony ho azonarô.’
5 Ke lôso irô nandeha tan̈y. Nimpody ta bazary tan̈y ndraiky koa lelahy io kadiriny midỳ* ndreky troazera folakandra,* ke mbala karaha nataony in̈y fo koa nataony.
6 Farany, izikoa fa kadiriny sainkera hariva,* lôso ndraiky koa izy nandeha niboaka, ke izy nahita olo hafa. Ho izy tamindrô: ‘Nan̈ino ma anarô tsy niasa fa nidôko teto fo rango maraindrain̈y?’
7 Ho irô taminany: ‘Fôtony tsisy olo nangala zahay hiasa.’ Ke ho izy tamindrô: ‘Izikoa zen̈y basy, mindao koa anarô mandeha miasa amy tanin’ny rezainaka an̈y.’
8 “Andra koa fa hariva, karaha ty ho izy tamy lelahy miandraikitry mpiasa aby io: ‘Mindao kahia irô mpiasa aby io, baka iô ameza irô karamandrô. Irô navy farany antsendriky ameza aloha, baka iô asesinao firaka amindrô navy voanalohany.’
9 Izikoa fa navy irô lelahy niasa nanomboko sainkera hariva* aby in̈y, irô samby nahazo denaria araiky.
10 Ke izikoa fa navy irô mpiasa navy voanalohany aby in̈y, irô nan̈anten̈a hahazo karama bebe, kanefa mbala denaria araiky fo koa namezan̈a irô.
11 Vola io koa fa nazondrô, irô nitretre tamy lelahy tômpin’ny tanin’ny rezain in̈y.
12 Ke ho irô: ‘Irô navy farany aby io kony niasa lera araiky fo ay, kanefa karamanay nampitovisinao fo! Zahay amy zen̈y niasa rango maraindrain̈y nanôfotro andra, taniandra jiaby in̈y taminay!’
13 Kanefa, karaha ty ho izy tamin’ny araiky tamindrô: ‘Zaho tsy nan̈ano raha tsy rariny taminao. Tsy denaria araiky ma nifan̈arahantsika?
14 Alaiva karamanao, baka iô mindao anao mandeha. Irô farany aby io tiako hamezan̈a karama miran̈a amy ninao.
15 Zaho ma tsy mety man̈ano zay raha tiako amy volanaka? Sa anao be fô* fôtony zaho tsara fan̈ahy* tamindrô?’
16 Karaha zen̈y mahavy olo farany hanjary voanalohany, fa ny voanalohany ndraiky ho farany.”
17 Jesosy koa fa nanonga ta Jerosalema, somary nindesiny nihataka hely irô mpianatranany 12 aby io tamin’irô mbala tan-dalan̈a, ke ho izy tamindrô:
18 “Hitanarô, atsika iziô handeha a Jerosalema, ke hisy olo hanolotro Zanak’olo amindrô lohandohan’ny mpisôron̈o ndreky amindrô mpanoratra lalàn̈a aby io. Irô hivolan̈a fa izy tsy maintsy vonen̈a;
19 hatolotrondrô amin’olo hafa firenena aby io izy, ke irô olo aby io han̈adroadro izy, hamango karavasy izy, baka iô izy hahanton̈ondrô* amy pôtô kakazo. Fa afaka telo andra,* izy hatsangana.”
20 Tafaran’izen̈y, maman’ny zanakan’i Zebedio nan̈aton̈o izy. Niaraka taminany zanany aroe mirahalahy. Man̈angy io nankôhoko nan̈oloan̈a izy fôtony izy tihangataka raha taminany.
21 Ho izy tamy man̈angy io: “Ino raha tadiavinao?” Ho man̈angy io taminany: “Izikoa anao efa avy amy Fanjakan̈anao, mba hapitraha ankilanao kony zanako aroe lahy aby ty, ke araiky ataova ankavanan̈anao aviô araiky ataova ankavianao.”
22 Ho Jesosy: “Tsy hainarô raha angatahanarô. Ho vitanarô ma higiaka amy kôpy handeha higiahako?” Ho irô taminany: “Ia, vitanay.”
23 Ho izy tamindrô: “Higiaka amy kôpinaka ankitin̈y anarô, fa izy fo, tsy andraikitrinaka hanendry olo hipetraka ankavanan̈anaka ndreky ankavianaka, fa zay olo nifidin’ny Babako fo hahazo plasy aby zen̈y.”
24 Izikoa fa ren̈indrô folo lahy aby io raha zen̈y, irô neloko tamindrô roe mirahalahy.
25 Ke irô nikahian’i Jesosy han̈aton̈o izy, aviô ho izy: “Hainarô fa irô mpitondra aby io manjikiziky amy firenena indesindrô, aviô olo an̈abo mitôron̈o fahifan̈andrô.
26 Fa anarô ndraiky tsy tôkony han̈ano karaha zen̈y; zay olo tiho be aminarô tsy maintsy manompo anarô,
27 aviô zay olo tiho voanalohany aminarô tsy maintsy manompo anarô.
28 Tsisy ny hafa amy zen̈y Zanak’olo: Izy navy, tsy handeha hitompoen̈a fa hanompo, ndreky han̈amia ain̈inany hatao vidim-pan̈avaotan̈a hatao takalon’olo maro.”
29 Irô koa fa niala ta Jerikô, nisy olo marobe nan̈araka izy.
30 Nisy olo gila aroe lahy nipetraka tamôron-dalan̈a. Izikoa fa ren̈indrô fa Jesosy nandalo, irô nandronton̈o karaha ty: “Mamindrà fô aminay, Tômpo Zanakan’i Davida e!”
31 Kanefa nisiahandrô vahoaka aby io irô sady nirahandrô nangin̈y. Fa irô nahainandronton̈o mare fo: “Mamindrà fô aminay, Tômpo Zanakan’i Davida e!”
32 Ke Jesosy nidôko, aviô irô nikahiany; ho izy tamindrô: “Ino ma raha tianarô hataoko aminarô?”
33 Ho irô taminany: “A Tômpo, mba ataova mahita kony masonay e!”
34 Jesosy nahinakinaka irô, nikasihiny masondrô, ke irô direkty nahita. Irô baka iô nan̈araka izy.
Lamariky amy Pazy Ambany
^ Abt: “tamy lera fahatelo.”
^ Abt: “tamy lera fahatsiota.”
^ Abt: “tamy lera fahasivy.”
^ Abt: “tamy lera faha-11.”
^ Abt: “tamy lera faha-11.”
^ Abt: “Sa masonao ratsy.”
^ Na: “tsy natity; nahatariky.”
^ Na: “hivonendrô.”
^ Abt: “Fa amin’ny andra fahatelo.”
