Vaovao Tsara Nisoratin’i Matio 10:1-42
10 Ke nirahin’i Jesosy nan̈aton̈o izy irô mpianatranany 12 aby io, baka iô irô namezany angôvo* han̈aboaka fan̈ahy maloto* ndreky hampajanga karazan̈a aretin̈y ndreky antsa isan-karazany.
2 Ty aby an̈aran̈andrô apostoly 12 aby io: Simona na koa Petera, baka iô Andrea rahalahiny; Jakoba zanakan’i Zebedio ndreky Jaony rahalahiny;
3 Filipo ndreky Bartolomeo; Tomasy ndreky Matio mpamory hetra; Jakoba zanakan’i Alfeo, ndreky Tadeo;
4 Simona Kananeanin̈y;* baka iô Jodasy Iskariota, araiky namadiky izy tafara tatỳ in̈y.
5 Jesosy koa fa nan̈iraka irô apostoly 12 aby io handeha hitory, ty aby toromariky namezany irô: “Anarô aza mandeha amin’olo tsy Jiosy,* aviô anarô aza miditry amy tanànan’ny Samaritanin̈y foeky.
6 Amin’ny ôndrikôndriky very amy firenenan’ny Israely zaraiky fo tôkony handihananarô.
7 Anarô koa fa mandeha, mitoria karaha ty: ‘Efa marikitry Fanjakan̈an’ny lan̈itry.’
8 Tahà olo marary, vilaoma olo maty, diova olo boka, aviô roasa demony. Anarô koa fa namezan̈a, tsisy raha nitakin̈a taminarô; ke anarô koa fa man̈amia, aza mitaky raha amin’olo.
9 Aza mitondra volamena na volafotsy na varahin̈y,*
10 aviô aza mitondra saka fatao vatsy, na lamba aroe,* na savaty hafa, na tongozo, fôtony mpiasa vain̈y hahazo hanin̈y.
11 “Amy zay tanàna hidiranarô, na be na hely, tsakareha azôvy vain̈y hitandren̈y hafatra hindesinarô. Midokoa amy tran̈onany ao parapialanarô amy tanàna io.
12 Anarô koa fa miditry amy tran̈o araiky, ataova mbalatsara irô olo aby ao.
13 Izikoa irô man̈eky handray anarô, irô hahazo hatsaran̈a.* Fa izikoa irô tsy mandray anarô, hatsaran̈a hindesinarô himpody aminarô.
14 Ndray aia ndray aia tany imboanarô, izikoa misy olo tsy mandray anarô na tsy mitandren̈y volan̈anarô, ahintsàn̈a faotaka amy vitinarô lera anarô miala tran̈onany na tanàna misy izy.
15 Ambarako anarô mazava tsarabe fa, mbala ho kirikiry raha havoa Sodoma ndreky Gomora amin’ny Andra Fitsaran̈a, tozay raha hahazo tanàna zen̈y.
16 “Hitanarô, zaho man̈iraka anarô iziô io miran̈a man̈iraka ôndrikôndriky handeha an̈ivon’ny amboadỳ. Ke aboaha fo fa anarô mitandrin̈y mare karaha bibilava, kanefa tsy manan-tsin̈y karaha pizon.
17 Ke anarô mitandrema fôtony hisy olo hitory anarô amy fitsaran̈a, baka iô anarô handeha hivilezindrô karavasy an̈atin’ny synagoga.
18 Fôtony anarô mpan̈ara-dia zaho, anarô hindesin̈y man̈oloan̈a governera ndreky mpanjaka, amy zen̈y anarô hahavita hikoran̈a raha momba zaho* amindrô ndreky amindrô firenena aby io.
19 Kanefa anarô koa fa hindesindrô an̈y, anarô aza miasaloha amy raha handeha hivolan̈inarô na amy fomba hivolan̈anarô izio, fôtony amy lera zen̈y, hambara anarô raha tôkony hivolan̈inarô.
20 Izio baka tsy raha anarô tômpiny fo hivolan̈a fa, fan̈ahin’ny Babanarô hampivolan̈a anarô.
21 Sôsoko zen̈y koa, lelahy araiky hanolotro rahalahiny amy zen̈y rahalahiny io hivonen̈a, karaha zen̈y koa handeha hataon’ny baba amy zanany; aviô zanaka hanohitry olobendrô ke han̈ano raha hahavy olobendrô hivonen̈a.
22 Anarô ho halan’olo jiaby fôtony anarô mpan̈ara-dia zaho, kanefa zay olo miaritry firaka amy farany fo ho voavonjy.
23 Anarô koa fa hinjehin̈y amy tanàna araiky, milifasa amy tanàna hafa. Ambarako anarô mazava tsarabe fa, tsy ho voatetinarô aby tanàna jiaby an Israely eto parapavian’ny Zanak’olo.
24 “Mpianatra tsy an̈abo mandilatra mpampianatra,* aviô mpanompo tsy an̈abo mandilatra tômpo.*
25 Ty raha tôkony hampoizin̈y: Mitovy amy raha mahazo mpampianatranany fo raha hahazo mpianatra, aviô mitovy amy raha mahazo tômponany fo raha hahazo mpanompo.* Izikoa olo mikaiky tômpin-tran̈o araiky Belzeboba,* matokisa fa ho karaha zen̈y koa hikahiandrô irô olo tran̈o araiky aminany ao.
26 Ke anarô aza mavozo irô io, fôtony tsisy raha hasitriky ke tsy ho hita, aviô tsisy raha sekire ke tsy ho hay.
27 Zay raha volan̈iko aminarô mitaokan̈a,* koràn̈a amin’olo jiaby;* aviô zay raha bisibisiako aminarô, toria amin’olo jiaby.*
28 Anarô aza mavozo irô, fôtony irô ndray mahavita mamono anarô, irô tsy mahavita misakan̈a anarô tsy hahazo fiainan̈a amin’ny hoavy. Sitrany anarô mavozo Zan̈ahary fôtony izy mahavita mandripaka anarô amy Gehena.*
29 Tsy vola madiniky sady ambany valera* araiky ma andafaosan̈a fody aroe? Kanefa ndray araiky amindrô io fo latsaka amy tany, efa hain’ny Babanarô an-dan̈itry an̈y edy.
30 Ary firaka amy fan̈evanarô mbala avoakôntiny fo.
31 Ke anarô aza mavozo, fôtony anarô mbala valera mare mandilatra fody maro.
32 “Lan̈iany olo masaky mivolan̈a amason’olo fa izy mpianatranaka, zaho koa hasaky hivolan̈a amy Babako an-dan̈itry an̈y fa izy mpianatranaka.
33 Fa lan̈iany olo tsy man̈eky zaho amason’olo, zaho koa tsy han̈eky izy man̈oloan̈a Babako an-dan̈itry an̈y.
34 Aza mieritreritry fa zaho io navy hitondra fihavanan̈a ambony tany. Tsy hitondra fihavanan̈a naviako, fa hitondra sabatra.
35 Diako atỳ hampisaraka zanakalahy amy babany, zanaka man̈angy amy reniny, aviô vinantovavy amy rafozambaviny.
36 Ke olo tran̈o araiky aminany fo hanjary fahavalon’olo araiky.
37 Zay olo tia babany na reniny mandilatra zaho, tsy vain̈y hanjary mpianatranaka;* baka iô zay olo tia zanany mandilatra zaho, tsy vain̈y hanjary mpianatranaka.
38 Aviô lan̈iany olo tsy man̈eky hitondra hazofijalian̈anany* ke tsy man̈araka zaho, tsy man̈eva hanjary mpianatranaka.
39 Ho foaty lan̈iany olo mitady fomba han̈avaotany ain̈inany, fa lan̈iany olo mahafoe ain̈inany fôtony izy mpan̈ara-dia zaho, ho avotro.*
40 “Zay olo mandray anarô, mandray zaho; aviô zay olo mandray zaho, mandray Araiky nan̈iraka zaho.
41 Zay olo mandray mpaminan̈y fôtony olo io mpaminan̈y, izy hahazo hatsaran̈a mitovy amy nin’ny mpaminan̈y. Zay olo mandray olo marin̈y fôtony olo io olo marin̈y, izy hahazo hatsaran̈a mitovy amy nin’olo marin̈y.
42 Ambarako anarô mazava tsarabe fa, lan̈iany olo man̈amia rano manintsy, ndray vera araiky fo, higiahan’ny araiky amindrô madiniky aby ty fôtony izy mpianatranaka, hahazo hatsaran̈a ankitin̈y.”
Lamariky amy Pazy Ambany
^ Abt: “fahifan̈a.”
^ Na: “demony.”
^ Na: “araiky mafana fô.”
^ Na: “amin’olo baka amy firenena hafa.”
^ Abt: “volamena na volafotsy na varahin̈y an̈atin’ny saintiry fasianarô vola.”
^ Na: “lamba fan̈ampiny.”
^ Na: “fiadanan̈a.”
^ Abt: “amy zen̈y anarô ho vavolombelon̈onaka.”
^ Abt: “tômponany.”
^ Abt: “mpampianatranany.”
^ Abt: “Efa ampy izikoa mpianatra manjary karaha mpampianatranany, aviô mpanompo manjary karaha tômponany.”
^ Izio an̈aran̈a ikahian̈a Satana; izy andriana na sefondrô demony aby io.
^ Abt: “amy mahiziky.”
^ Abt: “amy mazava.”
^ Abt: “toria baka amy tafon-tran̈o.”
^ Abt: “Tsy asariona.”
^ Abt: “tsy vain̈y zaho.”
^ Zahava
^ Na: “hivilômin̈y ndraiky.”
