Vaovao Tsara Nisoratin’i Lioka 2:1-52
2 Tamy fotoan̈a zen̈y, Aogosto Kaisara nan̈aboaka didy fa olo jiaby amy tany io* tsy maintsy misoratra an̈aran̈a.
2 (Tamy fanoratan̈a an̈aran̈a voanalohany io, Kyrenio governeran’i Syria.)
3 Ke olo jiaby nandeha nisoratra an̈aran̈a tamy tanàna faviandrô.
4 Josefa koa fa nanonga baka ta Nazareta, a Galilia, izy nandeha ta Betlehema a Jodia, tamy tanànan’i Davida, fôtony izy mbala an̈isan’ny taranakan’i Davida sady fianakavian̈anany.
5 Izy nandeha nisoratra an̈aran̈a tan̈y niaraka tamy Maria. Irô tamy zen̈y efa fivadiany eraka raha efa nifan̈ikiandrô. Maria tamy zen̈y efa tsy ela hiteraka.
6 Irô mbala tan̈y fo, navy fotoan̈a hitirahany.
7 Izy niteraka zanany lelahy. Io talan̈olonany. Tsaiky io nifon̈ôsiny lamba baka iô nampandriny tan̈atin’ny raha fampinanan̈a biby, fôtony efa tsisy efitry malalaka nety nifondroendrô eky tamy tran̈om-bahiny.*
8 Tamy faritry io, nisy tsiman̈aja nidôko tan-kiaka tan̈y niambin̈y ôndrikôndrikindrô, tamin’ny alin̈y.
9 Tiô fo nisy anjelin’i Jehovah nitsangana nan̈oloan̈a irô. Voninahitrin’i Jehovah nangilangilatra nan̈odidin̈y irô, ke irô navozo mare.
10 Kanefa ho anjely io tamindrô: “Anarô aza mavozo, fôtony zaho han̈ambara vaovao tsara aminarô. Izio vaovao tsara hitondra haravoan̈a maventy amin’olo jiaby.
11 Niany ty, misy mpamonjy* teraka amy tanànan’i Davida ao. Izio Kristy Tômpo.
12 Ke ty famantaran̈a hamezan̈a anarô: Anarô hahita tsaiky menamena avoafôn̈o lamba, mandry an̈atin’ny raha fampinanan̈a biby.”
13 Tiô fo, nisy anjely marobe* niaraka tamin’ny anjely in̈y, nidera Zan̈ahary karaha ty:
14 “Voninahitry nin’ny Zan̈ahary amy farany an̈abo an̈y, aviô fiadanan̈a* nin’olo ankasitrahany ambony tany atỳ!”
15 Irô anjely aby io koa fa nimpody tan-dan̈itry, irô tsiman̈aja aby io nifampikoran̈a karaha ty: “Alô atsika handeha a Betlehema an̈y, misy hahitantsika raha nambaran’i Jehovah atsika zen̈y.”
16 Irô lôso malaky, ke irô nahita Maria ndreky Josefa, aviô tsaiky menamena io hitandrô nandry tan̈atin’ny raha fampinanan̈a biby.
17 Irô koa fa nahita raha zen̈y, nitantaraindrô raha jiaby nambara irô momba tsaiky io.
18 Lany fan̈ahy olo jiaby naharen̈y raha nambarandrô tsiman̈aja aby io.
19 Fa Maria ndraiky nangala onon̈o volan̈a jiaby zen̈y, sady nisaintsain̈y momba dikan’ny raha aby zen̈y tan̈atin’ny fônany tan̈y.
20 Baka iô lôso irô tsiman̈aja aby io nandeha, ke irô nan̈amia voninahitry ndreky nidera Zan̈ahary tamy raha jiaby ren̈indrô ndreky hitandrô, eraka raha nambara irô.
21 Navy fotoan̈a hamosiran̈a tsaiky io, izy koa fa feno valo andra. Natao Jesosy an̈aran̈anany, eraka an̈aran̈a efa nambaran’ny anjely in̈y, talohan’izy nifôron̈o tan̈atin’ny kibo.
22 Izikoa fa navy fotoan̈a fanasan̈a ain̈y, eraka raha takin’ny Lalàn̈an’i Mosesy, nindesindrô nanonga ta Jerosalema tan̈y tsaiky io baka hatolotro amy Jehovah,
23 karaha efa voasoratra amy Lalàn̈an’i Jehovah ty: “Zanaka talan̈olo lelahy jiaby tsy maintsy hataokan̈a* nin’i Jehovah.”
24 Ke irô nanolotro fan̈atitry eraka raha voakoran̈an’ny Lalàn̈an’i Jehovah: “Domohin̈y aroe na zanaka pizon aroe.”
25 Nisy lelahy zay ta Jerosalema, Simeona an̈arany. Izio olo marin̈y sady mpivavaka be. Izy niambin̈y fotoan̈a hankahirezan̈a Israely. Fan̈ahy masin̈y nitariky izy.
26 Nampiasa fan̈ahy masin̈y koa Zan̈ahary han̈ambaran̈a taminany fa izy tsy ho foaty izikoa tsy efa mahita Kristin’i Jehovah.
27 Nitaritin’ny fan̈ahy masin̈y izy, ke niditry tamy tempoly tao. Tamy zen̈y tsarabe Jesosy* nindesin-dry olobeny tan̈aty tao, han̈ano fomba mahazatra nitakin’ny Lalàn̈a.
28 Ke tsaiky io ninjoniny, baka iô izy nidera Zan̈ahary karaha ty:
29 “A Tômpo Farany An̈abo, ambelanao handeha am-piadanan̈a* amizay mpanomponao, eraka raha efa nivolan̈inao,
30 fôtony masonaka efa nahita fomba handeha hamonjianao olombelon̈o.
31 Izio efa noman̈inao tamason’ny firenena jiaby;
32 izio hazavan̈a handeha han̈adoso raha manakotro mason’ny firenena jiaby sady voninahitrin’Israely vahoakanao.”
33 Lany fan̈ahy baban’ny tsaiky io ndreky reniny izikoa fa naharen̈y raha nivolan̈in’olo momba tsaiky io.
34 Aviô Simeona nitso-drano irô, baka iô ho izy tamy Maria renin’ny tsaiky io: “Hitanao, baka amy tsaiky ty hahavy olo maro amin’Israely ho lavo ndreky ho tafitsangana ndraiky. Hanjary famantaran̈a tsy hasian’olo fôtiny koa izy
35 (ia, anao ho voatrebiky sabatra lava lela), baka hiboely raha iritriretin’olo maro an̈atin’ny fôndrô an̈y.”
36 Nisy mpaminan̈ivavy zay baka amy fokon’i Asera. Izio Ana zanakan’i Fanoela. Efa matoe mare man̈angy io. Tafaran’ny mariazindrô,* irô roen’ny vadiny niaraka niain̈y tan̈atin’ny fito taon̈o.
37 Efa maty vady izio, baka iô izy efa 84 taon̈o. Izy tsiary nanky nandeha tamy tempoly tao nan̈ano fanompoan̈a masin̈y matsan̈a alin̈y sady nifady hanin̈y* aviô niangavy tam-bavaka.
38 Tamy lera zen̈y tsarabe, izy nan̈aton̈o marikitry irô, baka iô izy nan̈ano mersy Zan̈ahary. Aviô izy nikoran̈a raha momba tsaiky io tamin’olo jiaby niambin̈y fan̈avaotan̈a Jerosalema.
39 Irô koa fa baka nan̈ano raha jiaby nitakin’ny Lalàn̈an’i Jehovah, irô nimpody tamy tanànandrô ta Nazareta, ta Galilia tan̈y.
40 Ke tsaiky io nahaibe sady nahainatanjaka fo, aviô izy nitombo fahendrena ndreky nankasitrahan’ny Zan̈ahary fo.
41 Isaka taon̈o, ry olobeny efa zatra nanonga ta Jerosalema izikoa fa fetin’ny Pasky.
42 Ke tamin’izy 12 taon̈o, irô nanonga tan̈y, karaha efa fataondrô izikoa fa fety.
43 Izikoa fa tapitry fety, irô nody. Fa Jesosy ndraiky nidôko ta Jerosalema tan̈y. Kanefa tsy azon-dry olobeny onon̈o foeky raha zen̈y.
44 Irô baka nieritreritry fa izy efa niaraka tamin’olo dia araiky tamindrô. Irô efa nahavita lalan̈a andra araiky, iô irô vo nitady izy tamin-dry havandrô ndreky olo haindrô.
45 Kanefa izy tsy hitandrô. Ke irô nimpody ta Jerosalema, baka iô irô nitsakaraka izy eraka tany jiaby.
46 Izikoa fa afaka telo andra, izy hitandrô tamy tempoly tao, nipetraka tan̈ivondrô mpampianatra aby io sady nitandren̈y irô aviô nan̈ontany raha irô.
47 Kanefa zay olo nitandren̈y izy lany fan̈ahy aby tamy fahaizan̈anany ndreky tamy valin-teninany.
48 Ry olobeny koa fa nahita izy, irô lany fan̈ahy, ke ho mamany taminany: “A zanako, nan̈ino ma zahay ataonao karaha io? Zahay roen’ny babanao efa matin’ny asaloha nitsakaraka anao eraka tany jiaby.”
49 Fa ho izy tamindrô: “Nan̈ino ma anarô mitady zaho? Tsy hainarô ma fa zaho tsy maintsy amy tran̈on’ny Babako ato?”
50 Ndray izy man̈ano zen̈y, tsy nazava tamindrô foeky raha nivolan̈iny tamindrô.
51 Ke lôso izy nimpody ta Nazareta niaraka tamindrô, aviô izy tsy vôly nan̈araka volan̈andrô. Nakajin’ny mamany tan̈atin’ny fônany tao tsarabe koa volan̈a aby zen̈y.
52 Nahainitombo fo fahendrenan’i Jesosy, baka iô izy nahaibe, aviô izy nahazo sitraka tamy Zan̈ahary ndreky tamin’olo.
Lamariky amy Pazy Ambany
^ Abt: “amy tany jiaby misy olo.”
^ Na: “lôtely.”
^ Na: “mpanonjy anarô.”
^ Abt: “nisy tafikin’ny lan̈itry.”
^ Na: “fihavanan̈a.”
^ Abt: “ho masin̈y.”
^ Abt: “Jesosy zazamena.”
^ Na: “ho foaty.”
^ Abt: “naha virjiny izy.”
^ Na: “nifehy.”
