Iro enzeniera aby io man̈amboatra robot ampiasaindro pandidy aby io, baka iro afaka han̈ano fandidian̈a tsarabe, kanefa hely fo tany didian̈a amy vatan̈anolo. Nangala tahaka tan̈antan̈any orita iro han̈amboaran̈a robot io, baka izio mora aforitry.

 Diniha hely baka: Manan̈a tan̈antan̈ana valo mora aforitry ndreky vavarin̈y orita io, baka io afaka mangala raha ndreky mamahan̈a izio, baka io mahavita manery izio mare ndray amy tany maletry oe. Tan̈antan̈ananany io mety ahodikodiny amy zay tany tiany hampimboan̈a izy, baka mety hinjan̈iny lan̈iany tapany tiany hinjan̈iny amindro io.

 Hitandro manampahizan̈a aby io fa ten̈a tsara izikoa misy robot manan̈a tan̈ana mora miforitry ndreky malemy, ke mety ampiasainy dokotera tsarabe lera iro mandidy. Ten̈a mety hahavita fandidian̈a maventy iro, ndray sarotro karakory fandidian̈a io.

 Zahava fa mora aforitry ndreky mora asitriky tan̈antan̈any orita io

 Efa nisy fotoan̈a nan̈amboatra robot karaha tan̈ana in̈y iro manampahizan̈a aby io. Ampiasain̈y izio han̈anovan̈a fandidian̈a sarisariny fo. Misy 13,5 santimetara iô alavasanizio. Mety mampanonga ndreky mitana raha malemy amy vatan̈antsika ao sasany amy tan̈anany kanefa tsy mandrobaka fitaovan̈a io. Fa sasany amy tan̈anany fo man̈ano fandidian̈a. Karaha ty ho Pr. Tommaso Ranzani, an̈isany ekipy nan̈amboatra fitaovan̈a io: “Zaho mino fa mbala fanombohany fo io, fa mbala ho avy fitaovan̈a vaovao salakady tsaratsaranio, baka io mahavita raha maromaronizio afara an̈y.”

 Akory hevitrinao? Baka aminy evolision ma fahaizany tan̈antan̈any orita io sa nisy namoron̈o?