Nirahin̈y han̈amia ampahafolo a iro Israelita taloha tan̈y, tsy ino zen̈y fa ampahafolony vokatra nazony isaka taon̈o hanohanan̈a fivavahan̈a marin̈y. Volan̈iny Zan̈ahary tamindro: “Anao tsy maintsy man̈amia ampahafolony vokatra jiaby baka amy raha nafafinao, lan̈iany vokatra baka tamy tsabonao isaka taon̈o.”​—Deoteronomia 14:22.

 An̈isany Lalàn̈any Mosesy, namezany Zan̈ahary iro Israelita taloha tan̈y, iro tokony han̈amia ampahafolo io. Tsy takin̈y amy Kristianin̈y eky izio fotony iro efa tsy mitandrin̈y Lalàn̈any Mosesy eky. (Kolosianina 2:13, 14) Kristianin̈y tsiaraikiaraiky tokony han̈amia zay vola tindriny “eraka fanapahankevitrinany tan̈aty fônany, tsy an̈atiny alahelo sady tsy niforsen̈a, fotony Zan̈ahary tia olo pan̈amia ankaravoan̈a.”​—2 Korintianina 9:7.

•  Ampahafolo amy “Testamenta Taloha”

•  Ampahafolo amy “Testamenta Vaovao”

 Voakoran̈a matetiky amy Testamenta taloha ampahafolo io. Nisy koran̈a hely momba izio talohany nazahoan̈a Israelita aby io Lalàn̈any Mosesy. Fa tafarany zen̈y izio vo ten̈a nikoran̈iny.

Talohany Lalàn̈any Mosesy

 Abrama (Abrahama) olo voanalohany nan̈amia ampahafolo io. (Genesisy 14:18-20; Hebreo 7:4) Izio mety fan̈amezan̈a indraiky nataony tamy panjakany Salema. Baiboly tsy mikoran̈a fa mbala nan̈amia ampahafolo io ndraiky Abrahama na zanany.

 Jakoba zafiny Abrahama olo faharoe koran̈iny Baiboly nan̈amia ampahafolo. Jakoba nan̈ano vava tamy Zan̈ahary fa izikoa Zan̈ahary mitahy izy, hamiany Zan̈ahary “ampahafolony raha jiaby” azony. (Genesisy 28:20-22) Manampahizan̈a sasany momba Baiboly mivolan̈a fa Jakoba io mety nan̈ano soron̈o biby taminizy nan̈amia ampahafolo io. Izy nitana vava nataony, fa izy tsy niforse fianakavian̈anany han̈amia ampahafolo.

Tamy faha Lalàn̈any Mosesy

 Iro Israelita taloha tan̈y nirahiny Zan̈ahary nan̈amia ampahafolo, hanohan̈ana fivavahan̈a aminany.

•   Iro nanompo manontolo andra tamy tempoly tao namian̈a ampahafolo io. Levita ikahian̈a iro io, ke an̈atinizen̈y iro pisoron̈o aby io. Namian̈a ampahafolo iro, fotony iro tsisy anjarany tany hitsaboan̈a. (Nomery 18:20, 21) Iro Levita tsy pisoron̈o nahazo ampahafolo tamy vahoaka, avio iro io nan̈amia ampahafolonizio iro pisoron̈o aby io.​—Nomery 18:26-29.

•   Fa mety nisy ampahafolo hafa koa nila namiandro, indraiky isaka taon̈o. Na Levita na tsy Levita, samy nahazo hatsaran̈a baka tamizio. (Deoteronomia 14:22, 23) Izio nampiasainy fianakavian̈a israelita, izikoa fa nisy fety manokan̈a nataondro, avio izio koa nirasain̈a taminolo masikiny, indraiky isaka telo taon̈o.​—Deoteronomia 14:28, 29; 26:12.

 Karakory ma nikonten̈a ampahafolo io? Iro Israelita aby io nanokan̈a ampahafolony vokatrany tanindro. (Levitikosy 27:30) Fa izikoa ndraiky izio tsy vokatra fa vola, tokony hampiandro ampahadiminy. (Levitikosy 27:31) Avio koa iro nirahin̈y nan̈amia “ampahafolony biby fitarimian̈a.”​—Levitikosy 27:32.

 Akory nahaizandro Israelita aby io ampahafolony biby tarimiandro? Natokanandro lan̈iany biby fahafolo niboaka baka tan̈aty variondro. Lalàn̈a ndraiky mivolan̈a fa iro tsy nila nijery eky na tsara biby io na ratsy, avio izio tsy mahazo atakalo. (Levitikosy 27:32, 33) Ampahafolo nampiasain̈a tamy fety fatao isaka taon̈o in̈y fo nahazo navadiky vola. Sasany tamindro Israelita aby io tsy maintsy nan̈ano dia lavitry koa fa nandeha nan̈aton̈o fety io, ke vola ten̈a nety tamindro.​—Deoteronomia 14:25, 26.

 Lera karakory ma Israelita aby io nan̈amia ampahafolo io? Isaka taon̈o. (Deoteronomia 14:22) Fa kanefa tamy taon̈o fahafito, niavaka hely fomba nan̈anaovan̈a izio. Sabata baka taminio, ke tsy nitsabo raha iro Israelita aby io fotony tamizio taon̈o fangalan̈a kajo. (Levitikosy 25:4, 5) Ke izikoa fa navy fotoan̈a fangalan̈a vokatra, iro tsy nirahin̈y nan̈amia ampahafolo. Fa ampahafolo araiky hafa in̈y ndraiky nirasaindro taminolo masikiny ndreky tamindro Levita aby io, tamy taon̈o fahatelo ndreky fahatsiota, talohany taon̈o Sabata io.​—Deoteronomia 14:28, 29.

 Izikoa nisy olo tsy navoaefa ampahafolo, nisazin̈a ma izy? Lalàn̈y Mosesy tsy nivolan̈a fa nisazin̈a lan̈iany olo tsy nan̈amia ampahafolo. Fa Israelita aby io fo samy nahay fa adidindro tsiaraikiaraiky man̈ano izio. Iro tsy maintsy nivolan̈a tamy Zan̈ahary fa efa voaefandro ampahafolondro, avio iro nangataka Zan̈ahary hitahy iro. (Deoteronomia 26:12-15) Nira nangalatra tamy Zan̈ahary iro koa tsy nan̈efa ampahafolo io tamy zen̈y.​—Malakia 3:8, 9.

 Sarotro tamindro Israelita aby io ma nan̈efa ampahafolo io? Aha. Zan̈ahary nivolan̈a tamindro fa iro koa man̈efa izio, ho maro hatsaran̈a hamiany Zan̈ahary iro, avio tsy hisy raha hampijaly iro. (Malakia 3:10) Fa firenena io koa tsy nan̈efa ampahafolo, nijaly edy iro. Iro pisoron̈o ndreky Levita aby io koa tsy nahazo ampahafolo, tsy nahavita nan̈ampy iro Israelita aby io hanompo Zan̈ahary edy iro.​—Nehemia 13:10; Malakia 3:7.

 Tamy Jesosy tambony tany teto, mbala nirahin̈y nan̈amia ampahafolo lan̈iany olo nanompo Zan̈ahary. Fa tafarany nifatesany Jesosy, efa tsy nirahin̈y nan̈amia ampahafolo eky olo.

Tamy Jesosy tambony tany teto

 Mahazatra olo Testamenta Vaovao zen̈y. Koran̈inizio ao fa tamy Jesosy tambony tany teto, iro Israelita aby io mbala nan̈amia ampahafolo. Nata Jesosy mbala nan̈eky fa ampahafolo io tsy maintsy nifain̈a. Nidisoviny iro pitondra fivavahan̈a sasany fotony iro nan̈amia ampahafolo, kanefa tsy nijirendro foeky raha farany “valera amy Lalàn̈a ao, karaha ataony man̈ano ny rariny ndreky mamindra fô avio tsy mivadiky.”​—Matio 23:23.

Tafarany nifatesany Jesosy

 Jesosy koa fa naty, efa tsy nirahin̈y nan̈efa ampahafolo eky olo. Efa naty taminy hazofijalian̈a baka Jesosy, ke efa tsy niasa eky Lalàn̈any Mosesy. An̈isany didy nifoan̈ana koa ‘famorian̈a ampahafolo.’​—Hebreo 7:5, 18; Efesianina 2:13-15; Kolosianina 2:13, 14.