ჩქი, მუჭოთ იეჰოვაშ მოწმეეფ, ვოცადუთ, ქრისტიანულ ცხოვრებაშ შარას თეშ გივაჸუნათ, მუჭოთ თეს იესო ოგურუანდჷ დო მუჭოთ თიშ მოციქულეფ ორთუდეს. თე სტატიას მოკლეთ რე ენწყუმილ იეჰოვაშ მოწმეეფიშ ძირითად გურაფეფ.

1.   ღორონთ. ჩქი თაყვანს ფცენთ ხვალე ართ ჭეშმარიტ დო ირფელიშ შემალებე ღორონც, გუმაჭყაფალს, ნამუშ სახელ რე იეჰოვა (ფსალმუნი 83:18; გამოცხადება 4:11). თინა რე აბრაამიშ, მოსეშ დო იესოშ ღორონთ (გამოსვლა 3:6; 32:11; იოანე 20:17).

2.   ბიბლია. ჩქი ბწანა, ნამდა ბიბლია ღორონთშე შთაგონებულ წიგნი რე დო თექ მოჩამილ ინფორმაცია ადამიანეფშო რე ჭარილ (იოანე 17:17; 2 ტიმოთე 3:16). ჩქინ რწმენა გერსხილ რე ბიბლიაშ 66 წიგნიშა, ნამდგაშა მიშურს, მუჭოთ „ჯვეშ აღთქმა“, თეშ „ახალ აღთქმა“ ხოლო. პროფესორ ჯეისონ ბედიუნიქ მუშ წიგნის ჭარჷ: „[იეჰოვაშ მოწმეეფიშ] გურაფეფ თიშა რე გერსხილ, მუდგას სინამდვილეს ბიბლია იჩიებ დო თინეფ კილ-კილშა მეჸუნა თექ ენოჭარილს; თინეფ ვაცადნა, მუნფიშ მოხუჯურო ენწყან ბიბლიურ გურაფეფ დო წინასწარ ვეგნოჭყვიდნა, მუნეფიშ აზრით მუ ოკო ენოჭარდას თე წიგნის“. a

    მართალ რე, ჩქი მთელ ბიბლიაშ ბწანა, მარა თენა ვა ნიშნენს, ნამდა ფუნდამენტალისტეფ ვორეთ. ჩქი ვაღიარენთ, ნამდა ბიბლიაშ ნამთინე მონაკვეთის სიმბოლურ მნიშვნელობა უღჷ დო პირდაპირ გაგებათ ოკო ვემიბღათ (გამოცხადება 1:1).

3.   იესო. ჩქი მეპჸუნთ იესო ქრისტეშ გურაფეფს, თიშ დოტებულ მაგალითის დო განვადიდენთ თის, მუჭოთ ჩქინ მარსხებელს დო ღორონთიშ სქუას (მათე 20:28; საქმეები 5:31). თეგვარო, ჩქი ქრისტიანეფ ვორეთ (საქმეები 11:26). თეშ უმკუჯინუო, ბიბლიაშე მიჩქნა, ნამდა იესო ვა რე ირფელიშ შემალებე ღორონთ დო სამებაშ გურაფა ბიბლიაშა ვა რე გერსხილ (იოანე 14:28).

4.   ღორონთიშ სამეფო. თენა რე რეალურ ხელისუფლება ზეცას დო ვართ ხოლო ქრისტიანეფიშ გურიშ მდგომარეობა. თე სამეფო დოთირანს არძა ადამიანურ მართველობეფს დო შეასრულენს ღორონთიშ განზრახვას დედამიწაწკუმა დაკავშირებით (დანიელი 2:44; მათე 6:9, 10). თე სამეფო მალას დიჭყანს მოქმედებას, მუშენდა, მუჭოთ ბიბლიურ წინასწარმეტყველება ოძირანს, ჩქი „ბოლო დღალეფს“ ფცხოვრენთ (2 ტიმოთე 3:1—5; მათე 24:3—14).

    იესო ზეცას ღორონთიშ სამეფოშ მეფე რე. თიქ 1914 წანას დიჭყჷ მართველობა (გამოცხადება 11:15).

5.   რსხება. ცოდა დო ღურაშე დარსხება შეიოლებერ რე იესოშ კეთებულ გიშაჸიდირალიშ ჭყოლოფათ (მათე 20:28; საქმეები 4:12). თე მსხვერპლიქ ხალხიშ საჯგირობუოთ ქიმოქმედასინ, ვა რე დასაბაღ ხვალე იესო წანდან. თინეფქ ოკო დითირან ცხოვრებაშ წეს დო დინათან (მათე 28:19, 20; იოანე 3:16; საქმეები 3:19, 20). ადამიანეფიშ საქმეეფ ოძირანს, ქორენ დოვარ თინეფიშ რწმენა ცოცხალი (იაკობი 2:24, 26). მარა ჩქი იშენით ვადმამსახურებენა რსხება, მუშენდა თენა „ღორონთიშ ჭყოლოფა რე“ (გალატელები 2:16, 21).

6.   ზეცა. იეჰოვა ღორონთ, იესო ქრისტე დო ართგურ ანგელოზეფ სულიერ სამყაროს, ზეცას კვირდენა  b (ფსალმუნი 103:19—21; საქმეები 7:55). ადამიანეფიშ შედარებით ჭიჭე ჯგუფ, ნამუშ რიცხვ 144 000 რე, ზეცას იცხოვრენს, მუშენდა იესოწკუმა ართო იმეფან ღორონთიშ სამეფოს (დანიელი 7:27; 2 ტიმოთე 2:12; გამოცხადება 5:9, 10; 14:1, 3).

7.   დედამიწა. ღორონთიქ თი მიზანით გაჭყჷ დედამიწა, ნამდა თექ ადამიანეფს მარადიულო უცხოვრებდესკო (ფსალმუნები 104:5; 115:16; ეკლესიასტე 1:4). ღორონთ აკურთხენს მორჩილ ადამიანეფს — თინეფს სრულყოფილ ჯამრთელობა აღვენუნა დო მარადიულო იცხოვრენა სამოთხეს დედამიწას (ფსალმუნი 37:11, 34).

8.   უბადობა დო ტანჯება. უბადობაქ თიშ უკულ გორჩქინდჷ, მუთ ღორონთიშ ართ-ართ ანგელოზიქ ღორონთიშ წინააღმდეგ მიდართჷ (იოანე 8:44). თე ანგელოზიქ, ნამდგას თე ირფელიშ უკულ „სატანა“ დო „ეშმაკიქ“ ქიგიადვჷ, ქეიჸუნუ პირველ ადამიანეფ, ადამ დო ევა, დო ღორონთიშ წინააღმდეგ მიდართეს; სანარღოთ, თინეფიშ გამნარყის ამდღა გლახა მდგომარეობა უღჷ (დაბადება 3:1—6; რომაელები 5:12). სატანაშ წუმოჭკირილ საკამათო საკითხეფ გეგნოჭკირედკო, ღორონთიქ დუშვჷ უბადობა დო ადამიანეფიშ ტანჯება, მარა თის ვაკო, ნამდა თექ სამუდამოთ გეგრძელას.

9.   ღურა. თინეფ, მით ღურნა, სოთინ ვაგრძელენა არსებობას (ფსალმუნი 146:4; ეკლესიასტე 9:5, 10). ღურაშ უკულ ადამიანეფ ვეტანჯებნა ჯოჯოხეთის დო ვართ ოწამებელ ადგილს.

    ღორონთ მილიარდობით კოჩის გათელენს (საქმეები 24:15). თეშ უმკუჯინუო, თინეფ, მით ვემიკორინუანა ღორონთიშ დო თიშ ნებაშ გაჩინებაფას, მარადიულო გენადგურებნა დო დღას ვეღედგინებნა (გამოცხადება 20:14, 15).

10.   ოჯახი. ჩქი იფცვენთ თი ნორმეფს, ნამუთ ღორონთიქ დადგინ ოჯახწკუმა დაკავშირებით; ართიანიშ ჩახთია ხვალე თი შემთხვევას რე დაშვებულ, მუჟამსით ართ მეუღლე მაჟიას ღალატენს (მათე 19:4—9). ჩქი ბჯერა, ნამდა ოჯახეფ ღორონთიშ სიტყვას მოჩამილ სიბრძნეს ქიმიაჸუნუნა-და, ბედნერეფ იჸუაფნა (ეფესოელები 5:22—6:1).

11.   ჩქინ თაყვანიშმცემლობა. ჩქი თაყვანს ვა ფცენთ ვართ ჯვარს დო ვართ შხვა გამოსახულებას (კანონი 4:15—19; 1 იოანე 5:21). ჩქინ თაყვანიშმცემლობაშ ნაწინლ რე:

    •   ლოცვა (ფილიპელები 4:6).

    •   ბიბლიაშ კითხირ დო გურაფა (ფსალმუნი 1:1—3).

    •   ბიბლიაშე მეღებულ ინფორმაციაშე ფიქრი (ფსალმუნი 77:12).

    •   ართო შაყარუა თი მიზანით, ნამდა ართო ქიბლოცათ, ბიბლია ქიდიბგურუათ, ღორონთიშ ოდიდებელ ობირეშეფ იბიბრათ, ჩქინ რწმენა არძაშ წოხოლე გეგმოფხანტათ, თანამორწმუნეეფს დო შხვეფს გურშა ელვუკინათ (კოლოსელები 3:16; ებრაელები 10:23—25).

    •   „სამეფოშ გურშენ“ სახიოლო ამბეშ ქადაგება (მათე 24:14).

    •   შხვეფიშ ელარნა (იაკობი 2:14—17).

    •   სამეფო დარბაზეფიშ დო შხვა შენობეფიშ შენება დო რემონტი, ნამუთ მსოფლიო ბიბლიურ საგანმანათლებლო საქმეს უკინენს ხუც (ფსალმუნი 127:1).

    •   სტიქიურ უბედრობეფით დაზარალებულეფიშ მოხვარა (საქმეები 11:27—30).

12.   ჩქინ ორგანიზაცია. ჩქი ორგანიზებულ კრებეფ მიღნა დო თე კრებეფს ართო ფცენთ ღორონც თაყვანს. თითოულ კრებას ზედამხედველენს უხუცესეფიშ საბჭო. უხუცესეფ ვა რენა სამღვდელოებაშ წარმომადგენელეფ დო ვართ ხელფასის ეთმოჭოფნა (მათე 10:8; 23:8). ჩქი ვა ბგაფულენთ ნავითარს დო შეხვალამეფიშ დროს ფარას ხოლო ვა ფშაყარანთ (2 კორინთელები 9:7). ჩქინ საქმიანობა ანონიმურო კეთებულ ნებაყოფლობით შესაწირავეფით იფინანსებ.

     ხემძღვანელ საბჭო რე მოწიფულ ქრისტიანეფიშ ჭიჭე ჯგუფ, ნამუთ მთავარ სამმართველოს მსახურენს. თინა ხემძღვანელენს იეჰოვაშ მოწმეეფს მთელ მსოფლიოს (მათე 24:45).

13.   ჩქინ ართობა. ჩქი არძას ართ რწმენა მიღნა (1 კორინთელები 1:10). თეს გეძინელ, ირფელს ვორთუთ, ნამდა ჩქინ შკას ნაციონალიზმიშ, რასობრივ ვარდა ეთნიკურ დისკრიმინაციაშ მუთუნნერ კვალ ვა რდას დო ვართ შხვადოშხვა ფენეფო ფრთუნთ ხალხის (საქმეები 10:34, 35; იაკობი 2:4). მარა ჩქინ ართობა ვა მოცილნა, პირადო გინოპჭყვიდათ შხვადოშხვა საკითხეფ. თითოულ მოწმეს შეულებ ბიბლიათ ნაგურეფ სინდისით მიღას გადაწყვეტილებეფ (რომაელები 14:1—4; ებრაელები 5:14).

14.   ჩქინ საქციელი. ჩქი ვოცადუთ, ირფელ მუდგას ვორთუთ, ნამდვილ ჸოროფათ ვაკეთათ (იოანე 13:34, 35). ჩქი დუც ვურიდანთ თიცალ მოქმედებეფს, მუთ ღორონც ვა მოწონს, მაგალთო, ზისხირიშ არასწორო გიმორნაფას ვარდა თიშ გინობუნას (საქმეები 15:28, 29; გალატელები 5:19—21). ჩქი მშვიდობაშმოჸოროფეეფ ვორეთ დო მონაწილებას ვა ბღებულენთ ჩხუპეფს (მათე 5:9; ესაია 2:4). ჩქი პატის ფცენთ თი ქიანაშ მთავრობას, სოდეთ ფცხოვრენთ დო ვომორჩილუთ თინეფიშ დოდგინელ კანონეფს, მუჟამსით თენა ღორონთიშ კანონეფს ვაწინააღმდეგ (მათე 22:21; საქმეები 5:29).

15.   შხვეფწკუმა ჩქინ ურთიერთობა. იესოქ თეცალ მცნება მუჩეს: „სქან დუდცალო გიჸორდას მოყვას“. თეს გეძინელ, თიქ თქუ, ნამდა ქრისტიანეფ „ვა რენა ქვეყნიერებაშ ნაწილ“ (მათე 22:39; იოანე 17:16). ათეშენ, ვოცადუთ, „არძას ჯგირობუა ვუკეთათ“, მარა თეწკუმა ართო, ვემშურთ პოლიტიკაშა დო მტკიცაშე იფცვენთ ნეიტრალიტეტის. თეს გეძინელ, ვართ შხვა რელიგიეფწკუმა ფთანამშრომლენთ (გალატელები 6:10; 2 კორინთელები 6:14). თეშ უმკუჯინუო, პატის ფცენთ შხვეფიშ არჩევანს (რომაელები 14:12).

 იეჰოვაშ მოწმეეფიშ რწმენაშ გურშენ მეტიშ გაგება ქუგოკონან-და, შეილებნა გემშართათ ჩქინ ვებ-გვერდიშა, დეკავშირათ ართ-ართ ჩქინ ფილიალს ვარდა ოფისის, დესწრათ კრებაშ შეხვალამეფს თქვანო უხოლაშ სამეფო დარბაზის ვარდა ქუდურაგადუათ თქვან ხოლოს მახორუ ართ-ართ იეჰოვაშ მოწმეს.