მიბრდჷ ფინეთიშ გარეუბანს, ტამპერეს, სოდეთ სიწყნარე დო სქვამ ბუნება რე. ჩქიმ ოჯახ იშენდოიშენ ვა რდუ დაინტერესებულ რელიგიათ, მარა დიდ ყურადღებას აქციენდჷ სქუალეფიშ რდუალა დო განათლებას. დიაჩქიმ გერმანელ რე, ათეშენ ჭიჭენობას ხშირას გილეფშჷ დასავლეთ გერმანიაშა, სოდეთ ჩქიმ ბები დო ბაბუ ცხოვრენდეს.

 სპორტ ბაღანობაშე მიჸორდჷ. დუდშე სპორტიშ არძა სახეობას მეპჸუნდჷ, მარა 14 წანერო გინიფრთინ, მთელ ყურადღება ჩოგბურთშა გეგნიბღჷ. მუჟამსით 16 წანერ ვორდჷ, დღაშე ჟირშა ვარდა სუმშა ვაბრჯიშენდჷ — ვარჯიშიშ სესიეფიშ დროს დო დამოუკიდებელო ონჯუა-ონჯუას. ჩოგბურთ მანგარო მიჸორდჷ. ლაჸაფის ფიზიკურო დო გონებრივო ვორდჷ ჩართულ. მართალ რე, მეგობრეფწკუმა ართო მინშა პივას ფშუნდჷ, მარა ოშუმალშა დო ნარკოტიკეფშა დამოკიდებულ დღას ვა პჸოფექ. ჩქიმ ცხოვრებას პირველ ადგილშა ჩოგბურთ გემირდჷ.

 მუჟამსით 17 წანერ ვორდჷ, პროფესიონალ ჩოგბურთელეფიშ ასოციაციას (ATP) ქიდიბჭყჷ ლაჸაფ. a მუსხირენ წარმატებულ შეჯიბრებაშ უკულ, პოპულარულო გინიფრთჷ. 22 წანერ ვორდინ, მსოფლიოშ არძაშ უჯგუშ ჟარნეჩდოვით ჩოგბურთელ შქას ქუმოფხვად.

 წანეფიშ დინახალე, ბრელ ქიანას ბღებულენდჷ მონაწილებას პროფესიონალურ ჩოგბურთიშ ლაჸაფის. მუსხირენ სარკო სქვამ ადგილ ბძირჷ, მარა თეწკუმა ართო ქობძირ, ნამდა ირდიხას რდუ თიცალ პრობლემეფ, მუნერით რე დამნაშავეობა, ნარკოტიკეფიშ გიმორნაფა დო გარემოშ დაბინძურება. მაგალთო, ამერიკას ვორდინ, მაფრთხილენდეს, ნამდა ნამთინე ქალაქიშ კონკრეტულ უბანშა ვამლინდესკო, მუშენდა თექ ხშირას რდუ დამნაშავეობა. თე ირფელ სიმშვიდეს მიდინუანდჷ. მართალ რე, მთელ ჩქიმ დროს მიჸორდუნ ფერ საქმეს ვუთმენდჷ, მარა დღაშ ბოლოს იშენით შინაგან სიცარიელეს ბგინაფლენდჷ.

 ჩქიმ მეგობარ ძღაბიქ, სანაქ, იეჰოვაშ მოწმეეფწკუმა ბიბლიაშ გურაფა ქიდიჭყჷ. გამკვირდჷ, რელიგიათ დეინტერესუნ, მარა თიშა ხე ვეშემშალებ. 1990 წანას დებქორწინით დო ართ წანაშა სანაქ დინათ. მუჭოთ თაშინ, მა ბჯერდჷ, ნამდა ღორონთ არსებენდჷ, მარა რელიგიურ პიროვნება ვა ვორდჷ. ფშუ, ბაღანობას, გერმანიას ბებწკუმა ვორდინ, თინა ხშირას კითხულენდჷ ბიბლიას დო დუმოგურუ, მუჭო იბლოცკო.

 ართშა მა დო სანაქ იეჰოვაშ მოწმე ჩილ დო ქომონჯშა სტუმარო ქიმეფრთით. ქომონჯიქ, ნამდგას კარი ჯოხოდ, ბიბლიაშე ქუმოძირუ წინასწარმეტყველება „ბოლო დღალეფიშ“ გურშენ (2 ტიმოთე 3:1—5). თექ მანგარო იმოქმედ ჩქიმწკუმა დო ქიმეფხვად, მუშენ რდუ მსოფლიოს თესხი უბედრობა. თი დღას რელიგიაშ გურშენ მეტ ვამჩიებინნა. მარა თეშ უკულ, მა დო კარი ხშირას იფჩიებუდით ბიბლიურ საკითხეფშე დო მუდგას ბგურაფლენდჷ, ირფელს ჭიჭე-ჭიჭეთ ინვანჭუდ. გადატვირთულ გრაფიკ მიღუდ დო შხვადოშხვა ქიანეფშა ხშირას გილაფუბრინუნდინ თიშენ, მა დო კარი რეგულარულო ვეშმეფხვადუდით ართიანს; მარა კარის გურ ველაფ თე ირფელშა. თინა წერილეფიშ საშვალებათ მარზენდჷ თი კითხვეფშე პასუხის, ნამდგას ბიბლიაშ გურაფაშ დროს ვოკითხუდ. ბიბლია ლოგიკურო პასუხენს არძა მნიშვნელოვან კითხვას, ათეშენ ჭიჭე-ჭიჭეთ ქინვანჭ, მუ რდუ ბიბლიაშ მთავარ თემა, ნამდა მალას ღორონთიშ სამეფო შეასრულენს ღორონთიშ განზრახვას. ღორონთიშ სახელიშ გაგებაქ დო თიქ, მუ აკეთ ღორონთიქ ჩქინო, მანგარო შეხუ ჩქიმ გურს (ფსალმუნი 83:18). არძაშ უმოსო, მუდგაქ ჩქიმწკუმა იმოქმედ, თინა რდუ, ნამდა ღორონთიქ მუშ სქუა შეწირ ჩქინ გიშაჸიდირალო; იეჰოვას თენა უბრალოთ ფორმალურო ვა უკეთებ, თეთ უდიდაშ ჸოროფა გიმირჩქინ (იოანე 3:16). თეს გეძინელ, თინა ხოლო ქიგებგჷ, ნამდა შემლებ გინიფრთე ღორონთიშ მეგობარო დო მარადიულო იფცხოვრე სამოთხეთ გინორთელ დედამიწას (იაკობი 4:8). ჩქიმ დუც ვოკითხუდ: „მა მუჭო შემლებ გიმოფხანტე მარდულობა თე ირფელიშ გურშენ?“.

 ჩქიმ ცხოვრებაშე დეფიფქრჷ. ბიბლიაშე ბგურაფლენდჷ, ნამდა არძაშ უმოს ბედნერობა შხვეფშა ჯგირიშ კეთებას მოუღჷ დო მოკოდ, შხვეფს ხოლო ქივეჩიკო ჩქიმ რწმენაშ გურშენ (საქმეები 20:35). მუჭოთ პროფესიონალ სპორტსმენ, ხშირას ბღებულენდჷ შეჯიბრებეფს მონაწილებას, ათეშენ, წარმოწანაშე 200 დღას ჸუდეს ვა ვორდჷ. ჩქინ ოჯახის მთელ ყურადღება ჩქიმდა რდუ გინოღალირ; თინეფიშ მთავარ ოფიქრებელ ჩქიმ ვარჯიშ, კარიერა დო გეგმეფ რდუ. ქიმეფხვად, ჩქიმ ცხოვრებას მუდგარენ ოკო დოფთირეკო.

 შილებე ბრელქ ვეგეგკო, მუშენ ფთქვი რელიგიაშ გურშენ ვარია წარმატებულ კარიერაშე. მარა იეჰოვაშ გაჩინებაფა დო მარადიულო ცხოვრებაშ შესაძლებლობა ჩქიმო თიცალ ძვირფას რდუ, ნამუთ ჩოგბურთიშ ლაჸაფიშ დროს მოგებულ ნამთინ ჯილდოშა ვეშიდარებედ; თაშ ნამდა, გადაწყვეტილებაშ მეღება ჩქიმო რთულ ვა ჸოფე. გინობჭყვიდ, ყურადღება ვემვაქციკო, მუს თქუანდჷ ხალხ. თენა ჩქიმ გინაჭყვიდირალ რდუ. თე დროს გურშა მანგარო ელამკინ ფსალმუნიშ 118:6-ის ინოჭარილ სიტყვეფქ: „იეჰოვა ელამრე, ვა მაშკურნე. მუ აღოლნე კოც ჩქიმდა?“.

 თე პერიოდის მუსხირენ სპონსორქ მომგებიან გარიგება შემოფთავაზ, მუთ საშვალებას ქომჩანდჷ მუსხირენ წანაშ განმავლობას პროფესიონალურ ჩოგბურთ მილაჸაფინუდკო. მარა, მა უკვე მეღებულ მაფუდ გადაწყვეტილება; თაშ ნამდა, ვარია ქოფთქვი თე შემოთავაზებეფშე დო ქიდიპტე პროფესიონალ ჩოგბურთელეფიშ ასოციაცია. გუვაგრძელ ბიბლიაშ გურაფა დო 1994 წანაშ 2 კვირკვეს დიბნათ.

 ჩქიმ ცხოვრებას თიცალ უბედრობა ვა მოხვალამე, მუთ ღორონთშე ფიქრის დუმოჭყაფუანდჷ. ვართ თიცალ პიროვნება ვორდჷ, ჭეშმარიტებაშ გორუა დომჭყაფუდკო. ჯგირ ცხოვრება მიღუდ დო ვართ მოკოდ თეშე უმოს. მარა, მუჭოთ იძირე, ბიბლიურ ჭეშმარიტება ნობლებუე; ქიმვოგორე, მუ რე ცხოვრებაშ აზრი დო ჩქიმ ცხოვრებაქ თიშე ბრელით უჯგუშო გინირთჷ, ვინემ წერმიბდგინენდჷ! ასე ჩქინ ოჯახ უმოს ძლიერ რე დო მეტ ართობა მიღნა. გურს მიხარენს თიშ ძირაფა, ნამდა ჩქინ სუმხოლო ქომოლსქუა ჩქიმ შარას გეჸუნს, მარა მუჭოთ სპორტსმენიშ თეშ ვარინ — მუჭოთ ქრისტიანიშ!

 ჩოგბურთის ასე ხოლო ბლაჸაფენქ. წანეფ რე, მუთ თე პროფესიათ ეიბჯუმუანქ ოჯახის. მაგალთო, ჩოგბურთიშ ცენტრის, მინშა მწვრთნელ ვარდა მენეჯერ ვორდჷ. მარა ჩქიმ ცხოვრებას სპორტ უკვე ვეგერე პირველ ადგილს. ულირს, საათობით ვაბრჯიშენდჷ, ჩოგბურთიშ ჩემპიონ პჸოფედკო. მარა ასე სრულ დროთ ვმსახურენქ დო ბედნერ ვორექ, ნამდა დიდ დროს ვუთმენქ ქადაგებას დო შხვეფშა თი ბიბლიურ პრინციპეფიშ გურაფას, ნამდგაქ ჩქიმ ცხოვრება უჯგუშობაშა დოთირუ. ჩქიმ ცხოვრებას პირველ ადგილ იეჰოვაწკუმა ურთიერთობას დო სახიოლო ამბეშ ქადაგებას უკინებ. თეს ჩქიმდა ნინათ ვერაგადენ ფერ ხიოლ მოუღჷ (1 ტიმოთე 6:19).