დებაბდჷ ჩრდილოეთ მექსიკაშ ქალაქ სიუდად-ობრეგონს. ბრუო და დო ჯიმაშე მა მახუთა ვორდჷ. ჩქი ქალაქიშ გოხოლუას სქვამ დო წყნარ ადგილს ფცხოვრენდით; მუაჩქიმს თექ ჭიჭე ფერმა უღუდ. მშვიდას ფცხოვრენდით დო ბედნერეფ ვორდით. მუჟამსით 5 წანერ ვორდჷ, ჩქინ ქალაქის ქარბორიაქ გინულუ დო ჩქინ ფერმა დიხას გასწორ, ათეშენ შხვა ქალაქშა მაჸუეს გინაულარქ.

 მუაჩქიმქ თექ ჯგირო გეიონწყუ საქმე, მარა დრო-ხანიშ უკულ შუმა ქიდიჭყჷ. თექ გლახათ იმოქმედ, მუჭოთ ჩქიმ მშობლეფიშ ქორწინებაშა, თეშ ჩქინწკუმა ხოლო. მა დო ჩქიმ ჯიმალეფ მუაჩქიმს პაპიროსის მივოხირანდით დო ტყობაშე ფშუნდით. დიო ხოლო 6 წანერ ვორდჷ, მუჟამსით პირველო იფშუმ. ჭიჭე ხანიშ უკულ ჩქინ მშობლეფქ ართიანს ჩეთხის დო მა ხოლო ბრელ გლახა საქმეს ქუვაკათ.

 დიაჩქიმქ შხვა კოჩწკუმა ქიდიჭყჷ ცხოვრება დო ჩქი ხოლო მიდამიჸონეს. თი კოჩ ფარას ვა მარზენდეს დო დიდაშ ხელფასით დუდიშ ეჯუმალა მიჭირდეს. ათეშენ ბაღანეფქ მუშება ქიდიბჭყით; ვორთუდით ირფელს, მუთ შემლებდეს, მარა იშენით მანგარო მიჭირდეს. მინშა მადვალარიშ მაწიმინდალო მუფშენდჷ, მინშა ქობალს, გაზეთეფს, კევას დო შხვა ბრელ მუდგარენს გიმოფჩანდჷ. თეწკუმა ართო, გილეფშჷ დო ფარამ კათაშ ჸუდეეფწკუმა გვამიშ ჭკუდეფს ოჭკუმალს ბგორუნდჷ.

 10 წანერ ვორდინ, ართ კოჩიქ მიწუ, ნამდა თი ადგილს დუმოჭყაფუანდჷ მუშებას, სოდეთ ქალაქიშ არძა გვამს გიორღვანდეს. სკოლა მივოტე, ჸუდეშე ხოლო მიდაფრთჷ დო თექ ქიდიბჭყჷ მუშება. დღაშ ნამუშერშე ართ დოლარშე ნაკლების მარზენდეს დო გვამშე გიშაღალირ ოჭკუმალს ფჩანდეს. მა ჩქიმ ხეთ აშენებულ კარაიას ფცხოვრენდჷ. დღაშდოსერით ჩქიმ გოხოლუას უზნეო ხალხ რდუ დო ოჭმარეშე ონჯუაშა ლანძღუა დო გორაფაშ მეტ მუთუნ ვა მარჩქილედ. თინეფიშ უმენტაშ ნარკომან დო შუმილია რდუ. თენა ჩქიმ ცხოვრებას არძაშ უმოს გლახა პერიოდ რდუ; ირ სერს იმგარდჷ დო შიშით ბკანკალანდჷ. ონჯღორე მიჩქუდ, ნამდა თეცალ გაუნათლებელ დო ღარიბ ვორდჷ. თი ადგილს სოდგარენ სუმ წანას ფცხოვრენდჷ. უკულ მექსიკაშ შხვა შტატშა გეგნოფრთჷ, სოდეთ მინდორიას მუფშენდჷ; თექ ბამბეს დო ყვავილეფს ბწილუნდჷ, შანქარიშ ლერწამს ფშაყარანდჷ დო კარტოფილს ეთმოფჭოფუნდჷ.

 ოთხ წანაშ უკულ სიუდად-ობრეგონშა დიფრთჷ დო ჩქიმ მამიშ ჸუდეს ართ ჭიჭე ოთახის ფცხოვრენდჷ. ჩქიმ მამი ექიმბაშ რდუ. თი პერიოდის სერით გლახა სიზმარეფს ვორწყედ; თიცალ დეპრესიაქ ქუდმაჭყჷ, დუდიშ ჸვილუაშე ხოლო ქიდიბჭყჷ ფიქრი. ართ სერს იბლოც დო ღორონთის ფთხი: „ღორონთ, ნამდვილო ქოარსებენქ-და, ქიმმეხვარ გაიჩინებაფუე დო პირობას გარზენქ, ირიათო გემსახურებუქ. ქიმმეხვარ, დობგორე ჭეშმარიტ რელიგია“.

 მა ირო მოკოდ, უმოს მეტ გამგებუდკო ღორონთიშ გურშენ. ბაღანობაშე შხვადოშხვა ეკლესიეფშა გილეფშჷ, მარა მუდგას ბგორუნდინ, თიშა იშენით ვემმაგორუ. ნამთინ რელიგია ვაგურუანდჷ ბიბლიას დო ვართ ჩქიმ სულიერ მოთხოვნილებეფს აკმაყოფილენდჷ. ნამთინე ეკლესიას ფარაშ მეტ მუთუნ ვაინტერესუდეს დო ნამთინე რელიგიაშ მიმაჸუნალეფ უზნეო ცხოვრებას მეჸუნდეს.

 19 წანერ ვორდინ, ჩქიმ სინჯაქ მიწუ, ნამდა იეჰოვაშ მოწმეეფქ ოძირეს, მუს იჩიებ ბიბლია ხატეფიშ დო კერპეფიშ გურშენ . თიქ გამოსვლაშ 20:4 დო  5 წამკითხჷ, სოდეთ ჭარ: „ვეკეთა ვართ ქანდაკება დო ვართ თიცალ მუთუნ, მუთ ჟი ცას, თუდო დიხას დო მუთ წყარს რე, დიხაშ თუდო. თაყვან ვაცა დო ვემსახურა თინეფს, მუშენდა მა, იეჰოვა, სქან ღორონთ, განსაკუთრებულ ართგურობას იფთხინქ“. უკულ ჩქიმ სინჯაქ ბკითხჷ: „ღორონთ სასწაულეფს ხატეფიშ დო კერპეფიშ საშვალებათ ქართჷ დო ოკო, ნამდა თინეფ თაყვანიშმცემლობაშ დროს ხოლო გეგმიბრინუათ-და, მუშენ მიკრძალენა თეშ კეთებას?“. თექ მანგარო დუმაფიქრჷ. თეშ უკულ მა დო ჩქიმ სინჯაქ მუსხირენშა იფჩით ბიბლიურ საკითხეფიშ გურშენ. თე საკითხეფშენ ჩიება თეშ მოსიამოვნუდ, ნამდა დროშ მიკულას ვა ბგინაფლენდჷ.

 უმოს გვიანო, თიქ იეჰოვაშ მოწმეეფიშ შეხვალამაშა მიდამიჸონ. თექ მუნარჩქილებუქ დო ნაძირებუქ ჩქიმწკუმა მანგარო იმოქმედ. პროგრამას მონაწილებას ახალგაზრდეფ ხოლო ღებულენდეს; თინეფ თავისფალო იჩიებდეს სცენაშე. გურს იფიფქრჷ, მუ ჯგირ განათლებას ღებულენს თაქ ხალხი! თიშ უმკუჯინუო, ნამდა გინძე თუმა მიღუდ დო სუფთას ვამკმოქუნდჷ, იეჰოვაშ მოწმეეფქ მთელ გურით მემღეს. შეხვალამაშ უკულ ართ ოჯახიქ მუნეფიშ ჸუდეშა დუმაპატიჟ.

 იეჰოვაშ მოწმეეფწკუმა ბიბლიაშ გურაფაშ დროს ქიგებგჷ, ნამდა იეჰოვა ღორონთ რე მოჸოროფე მუმა, ნამუთ ზრუნენს ჩქინდე თიშ უმკუჯინუო, მუნერ შემოსავალ, სოციალურ მდგომარეობა, წარმომავლობა დო განათლება მიღნა. თინა მიკერძოებულ ვა რე (საქმეები 10:34, 35). საბოლათ, ქიმვოგორე თის, მუდგას ბგორუნდჷ. ასე ვა ბგინაფლენქ შინაგან სიცარიელეს.

 ჩქიმ ცხოვრებაქ ირფელამო დითირ. მივოტე შუმა, გლახა სიტყვეფიშ რაგად დო პაპიროს. გურჭუაქ დო გლახა სიზმარეფქ, ნამუთ ბაღანობაშე ბტანჯენდჷ ულირს ქაჸუნ. მა გივორჯგინ უღირსობაშ გრძნობას, ნამდგაქ ბაღანობას გინოღალირ გლახა სიტუაციეფიშ დო თიშ გურშენ გომრჩქინდჷ, ნამდა სკოლას განათლებაქ ხოლო ვემმაღინ.

 ამდღა დაოჯახებულ ვორექ დო პჸუნს ძვირფას მეუღლე, ნამდგას მანგარო უჸორს იეჰოვა; თინა ირნერო ხუც ელამრე. ასე რაიონულ ზედამხედველო ვმსახურენქ დო იბძირუანქ იეჰოვაშ მოწმეეფიშ კრებეფს, ჩქიმ სულიერ და დო ჯიმალეფს გურშა ელუკინანქ დო ვოგურუანქ. ბიბლიაშე არაჩვეულებრივ განათლება მიბღჷ, მუდგაქ მიმეხვარ, გივორჯგინკო უღირსობაშ გრძნობას დო ემოციურ გურჭუას, ნამუთ წანეფიშ დინახალე მიღუდ.