ამაზონიშ ტროპიკულ ტყაშ შკაგურს იეჰოვაშ მოწმეეფიშ ახალ საკონგრესო დარბაზი აშენეს, ნამუთ ირ კოჩის თოლშა მოუოლუ. თინა ბრაზილიაშ ქალაქ მანაუშე ჩრდილოეთით რე დო 52 ჰექტარშე მეტ ტერიტორია უკინებ. თაქ ირფელ ამწვანებულ რე; ვებერთელა ტროპიკულ ჯალეფიშ კუპუაკუშ, ანგელოზიშ გურიშ დო ცაშა ონჭუნ ფერ ბრაზილიურ ნეძიშ წვანდშე ჩიტეფიშ ღურჭულ ირჩქილე — ართიანს უძახნა ჭკარჭკუნტია ბურდღამ თუთიყუშეფი მაკაო დო ტუკანი. მუშენ იჸუ საჭიროქ საკონგრესო დარბაზიშ გედგუმაქ ამაზონიშ შკაგურს?

ქალაქ მანაუსის 2 მილიონშახ კოჩი ცხოვრენს, თინა მალწყარ ამაზონშე 1 450 კილომეტრით რე შორს. ახალ დარბაზი გიმადირთუ მანაუს, თიშ გოხოლუას დო მალწყარ ამაზონიშ წყარპიჯის ცხოვრენან ფერ სოდგარენ 7 000 იეჰოვაშ მოწმეს. არძაშ უშორაშ ადგილი, სან-გაბრიელ-და-კაშუეირა მანაუშ დასავლეთით, სოდგარენ 800 კილომეტრით რე. საკონგრესო დარბაზშა ქიმერთანინ თიშენ, ნამთინე იეჰოვაშ მოწმეს ნავით 3 დღას აფუ ოულარ.

ამაზონიშ შკაგურს საკონგრესო დარბაზიშ გედგუმა გვალო ეფი საქმე ვა რდუ. საჭირო რდუ ოშენებელ მასალათ ხარგელ სოდგარენ 13 კონტეინერიშ გემით გინოღალა საპორტო ქალაქ სანტუსშე (სან-პაულუ) თი ადგილშა, სოდეთ საკონგრესო დარბაზი იშენებუდ. ათეშგურშენ მოწმეეფს დიო ბრაზილიაშ წყარპიჯიშ მანგო ოკო უნჩურდესკო დო უკულ მალწყარ ამაზონით ულინდესკო.

თე ახალ დარბაზი 27-ა საკონგრესო დარბაზი რე ბრაზილიას. 2014 წანაშ 4 მესის, ჟეშხას თე დარბაზიშ მეძღვინუაშ პროგრამაშ მარჩქილაფშა 1 956 კოჩიქ მორთუ. ბრელშო თენა მანგარ სახიოლო დღა რდუ, მუშენდა პირველო დესწრეს შაყარუას საკონგრესო დარბაზის.

თაქ შაყარელ ხალხის პროგრამაშ მორჩქილაფათ შეულებუდ დო თემათ გიშმაულარიშ ძირაფათ. და დო ჯიმალეფს დასურო გეურთეს ნანატრიქ, მუშენდა თინეფს წანეფიშ დინახალე თიცალ ადგილს უღდეს კონგრესეფი, სოვრეშეთ ბრელ ვართ სცენას ორწყედ დო ვართ თემათ გიშმაულარს. ართ იეჰოვაშ მოწმექ თქუ: „წანეფი რე, კონგრესეფს ვოსწრუქ, მარა ბიბლიურ დრამა დღას ვა მაფუ ნაძირეფუ; ასეშახ ხვალე დრამაშ მორჩქილაფა შემლებუდუ“. ახალ საკონგრესო დარბაზიშ ჭყოლოფუათ ამდღა სცენას არძა ორწყე!