ბრელს თე კითხვეფ თიშენ ურჩქინდუ, ნამდა მუშ დუდშა გიმოცად ჰოლოკოსტიშ საშინელ შედეგეფ. თინეფს ხვალე კითხვეფშე პასუხეფ ვარინ, გურიშელაკინა ოსაჭირნა. შხვეფ ჰოლოკოსტის აფასენა, მუჭოთ არძაშ უმოს უდუნდებელ საქციელს, ნამუთ ადამიანს დღას უკეთებ. თენა ბრელს ოფიქრებაფუანს, ნამდა ღორონთ ვა არსებენს.

 მუჭო ფიქრენს ნამთინე: ოკო ვებკითხათ, მუშენ დუშვჷ ღორონთიქ ჰოლოკოსტ.

 მუ რე სინამდვილე: ძალიერ რწმენა უღუდუნ ფერ ხალხ ხოლო ოკითხუდ ღორონთის, მუშენ უშვენდჷ უბადობას. მაგალთო, წინასწარმეტყველ აბაკუმქ ღორონთის კითხჷ: „მუშენ მოჯინუანქ გლახაშა დო მუშენ უშვენქ უბადობას?! მუშენ ხვადუ ხირუა დო ძალადობა ჩქიმ თოლიშ წოხოლე?!“ (აბაკუმი 1:3). ღორონთის ვა გუდღანებ აბაკუმშა. თეშ მანგიორო, თიქ ქუპასუხ აბაკუმიშ კითხვეფს დო თე პასუხეფ ბიბლიაშა ქინაჭარაფუ, ნამდა არძაქ წეკითხკო.

 მუჭო ფიქრენს ნამთინე: ღორონთის ვაინტერეს ადამიანეფიშ ტანჯება.

 მუ რე სინამდვილე: ღორონთის ვაძირუაფ უბადობა, ნამუთ კოჩიშ ტანჯებაშ მიზეზ რე (იგავები 6:16—19). მუჟამსით ნოეშ დროს დედამიწას უბადობაქ გემრავლჷ, ღორონთის „გურქ დოჭყორდჷ“ (დაბადება 6:5, 6). არგამა რე, ნამდა ღორონთ ნინათ ვეიჭარენ ფერ ჭუას გინაფლენდჷ, მუჟამსით ჰოლოკოსტიშ დროს ებრაელეფს ჭყვიდუნდეს (მალაქია 3:6).

 მუს ფიქრენს ნამთინე: ჰოლოკოსტით ღორონთიქ ებრაელეფ დასაჯ.

 მუ რე სინამდვილე: ღორონთიქ დუშვჷ, ნამდა პირველ საუკუნეს რომაელეფქ განადგურესკო იერუსალიმ (მათე 23:37—24:2). თიშ უკულ ღორონთის ნამთინ ეთნიკურ ჯგუფ ვეგშუგორ დო ვართ ნამთინ ერ დუსაჯებ. ღორონთშო „ვა რე განსხვავება იუდეველ დო წარმართ შქას“ (რომაელები 10:12, ზ. კიკნაძეშ დო მ. სონღულაშვილიშ თარგმან [ქორთ.]).

 მუს ფიქრენს ნამთინე: მოჸოროფე დო ირფელიშშემალებე ღორონთ ქოარსებენდასინ, ვა დუშვენდ ჰოლოკოსტის.

 მუ რე სინამდვილე: თიშ უმკუჯინუო, ნამდა ღორონთ დღას ვა რე უბადობაშ მიზეზ, მინშა თინა ჭიჭე ხანით უშვენს თის (იაკობი 1:13; 5:11).

 ღორონთიქ იგივე მიზეზით დუშვჷ ჰოლოკოსტ, მუდგაშ გურშენ შხვა ბრელ უბედრობას ხოლო უშვენს ამდღარ დღაშახ — ოკო გინოჭყორდას საკამათო საკითხეფქ, ნამდგაქ ბრელ ხანიშ წოხოლე წიმიჭკირ. ბიბლიაშე არგამათ ვორწყეთ, ნამდა ამდღა ქიანას სატანა მართუნს დო ვართ ხოლო ღორონთ (ლუკა 4:1, 2, 6; იოანე 12:31). გუვარჩუათ ჟირ საკითხ, ნამუთ მიმეხვარებნა თიშ ენწყუმას, მუშენ დუშვჷ ღორონთიქ ჰოლოკოსტ.

1.   ღორონთიქ ადამიანეფ ნებაშ თავისუფლებათ გაჭყჷ. ღორონთიქ პირველ ადამიანეფს, ადამ დო ევას, უწუ, მუ მეთხიებდეს თინეფს, მარა ვა დუნძალებ მორჩილება. თინეფქ ისხუნეს, მუნეფიშით გინოჭყვიდესკო ჯგირ დო ფურ. პირველ წყვილიშ არასწორ არჩევანქ დო ადამიანეფიშ მეღებულ შხვა ბრელ არასწორ გადაწყვეტილებაქ, მთელ კაცობრიობას ტანჯება მოუღ (დაბადება 2:17; 3:6; რომაელები 5:12). ართ წიგნის ჭარჷ: „მსოფლიოს მოხვალამირ უბედრობეფიშ მიზეზ ხშირას ღორონთიშ ძღვინიშ, ნებაშ თავისუფლებაშ, არასწორო გიმორნაფა რე“ (Statement of Principles of Conservative Judaism). თიშ მანგიორო, ნამდა ნებაშ თავისუფლება მიდუღკო, ღორონთიქ ქიმეჩ ადამიანეფს დრო, ნამდა მუნეფიშით მაგვარან პრობლემეფ.

2.   ღორონთის შეულებ დო ქოთ მანგარო ოკო, ბოლო მუღას ჰოლოკოსტიშ გლახა შედეგეფს. ღორონთ მოპირნა, ნამდა სიცოცხლეს დურთინუანს მილიონობით ადამიანს, თინეფ შქას ჰოლოკოსტიშ დროს ღურელეფს. თინა სამუდამოთ გაჭყოლიდუანს არძანერ ჭუას თინეფს, მიდგაქ ჰოლოკოსტიშ დროს გინასქიდ დო ამდღარშახ უღჷ მეხსიერებას საშინელ მოგონებეფ (ესაია 65:17; საქმეები 24:15). ღორონთის მანგარო უჸორს მთელ კაცობრიობა. ზუსტას თენა რე გარანტია, ნამდა აუცილებერო შეასრულენს მუშ სიტყვას (იოანე 3:16).

 ბრელს, მიდგაქ ჰოლოკოსტიშ დროს გინასქიდ, ვა უდინუაფ რწმენა დო ქიმიოგორუ სიცოცხლეშ აზრის, მუშენდა ქიგეგეს, მუშენ უშვენს ღორონთ უბადობას დო მუჭო ულამ, ართ დო სამუდამოთ ბოლო მუღას თის.