ქუნორღვენანო თიცალ სიტუაცია, ნამდა გოკოდეს ბიბლიაშ კითხირ, მარა ჟიშე მოშინაფილ მიზეზეფიშ გურშენ გინოიფიქრებნა? ბრელს მიორჩქჷ, ნამდა ბიბლიაშ კითხირ ვა რე ადვილ. მარა, მუჭო მიქციებუთ, მუჟამსით ქიგეგენთ, ნამდა ბიბლიაშ კითხირს შეულებ ბედნერობა დო კმაყოფილებათ ეფშა ცხოვრება მოიღან? ვარდა, მუჭო მიქციებუთ, მუჟამსით ქიგეგენთ, ნამდა შეილებნა ბიბლიაშ კითხირ საინტერესოთ გინაშქვათ? ქუგაკორინედესო, თქვან თოლით ქოძირითკო, მუს რთავაზენა თე წიგნ?

მორთ ქობძირათ, მუს იჩიებნა თინეფ, მიდგაქ მუნეფიშ დუდშა გეგმოცადეს, ნამდა ბიბლიაშ კითხირს ჯგირობუა მოუღ.

ეზეკიელ, ნამუთ 25 წანერ რე, იჩიებ: „ულირს, თიცალ შოფერცალ ვორდჷ, მიდგას ვა უჩქჷ სო მეურსინ თეშ გილურს. მარა ბიბლიაშ კითხირქ მიმეხვარ აზრიან ცხოვრება მიღუდკო. თექ მოჩამილ რე ბრელ პრაქტიკულ რჩევა, ნამდგაშ გიმორნაფა ირდღაშიან ცხოვრებას შემლებ“.

ფრიდა, ნამუთ 25 წანერ რე, იჩიებ: „ფიცხ ხასიათიშ ვორდჷ, მარა ბიბლიაშ კითხირიშ უკულ ჩქიმ ემოციეფიშ კონტროლ ქიდიბგურე. ჩქიმო ასე უმოს ადვილ რე შხვეფწკუმა ურთიერთობა დო ასე უმოს მეტ მეგობარ პჸუნს“.

50 წანას გინოჩილათირ ევნიკე იჩიებ: „ბიბლიაშ კითხირქ მიმეხვარ, უმოს ჯგირ პიროვნებათ გინიფრთკო დო ჩეფთხინეკო გლახა ჩვევეფ“.

თე პიროვნებეფ დო შხვა მკითხველეფცალო, თქვა ხოლო დერწმუნებუთ, ნამდა ღორონთიშ სიტყვას მართალო შეულებ თქვან ცხოვრება უმოს აზრიანო გინაშქვას (ესაია 48:17, 18). შხვა ირფელწკუმა ართო, ბიბლიაშ კითხირ მიგეხვარებნა 1) მიღათ გონივრულ გადაწყვეტილებეფ, 2) დოგორათ ჯგირ მეგობრეფ, 3) მერუათ რთულ სიტუაციეფს დო 4) მუთ არძაშ უმოს მნიშვნელოვან რე, ქიგეგათ ჭეშმარიტება ღორონთიშ გურშენ. ბიბლიას ინოჭარილ რჩევეფ ღორონთშე მოურს, ათეშენ თინეფიშ გიმორნაფა ჯგირობუას მოიღანა, მუშენდა ღორონთიშ რჩევეფშა მუთუნ კილ ვეგორე.

მნიშვნელოვან რე, გეგნოდგათ ნაბიჯ დო ქიდიჭყათ ბიბლიაშ კითხირ. ნამ პრაქტიკულ რჩევეფიშ გიმორნაფათ შეილებნა ბიბლიაშ კითხირ უმოს ადვილ დო სასიამოვნო პროცესო გინაშქვათ?