საჭირო რე ძალიერ სურვილ

„სიგარეტშა დუდიშ დანებებაშო მნიშვნელოვან რე, პიროვნებას უღდას ძალიერ მოტივაცია“, — რაგადებულ რე ართ-ართ წიგნის (Stop Smoking Now!).

სიგარეტშა დუდიშ დანებებელო მნიშვნელოვან რე ძალიერ სურვილ. მუჭო შეილებნა გემანგარათ თეშ კეთებაშ სურვილ? პირველ რიგის, დეფიქრით, მუ ჯგირობუას მოიღანა სიგარეტშა დუდიშ დანებება.

გაკეთენთ ფარაშ ეკონომიას. ირდღას ართ კოლოფ სიგარეტიშ შუმაშ შემთხვევას წარმოწანაშ დინახალე ანთასობით დოლარ დეგეხარჯებნა. „დღას ვამფიქრებ, მუსხი ფარას მიკვახარჯენდჷ სიგარეტის“ (გიანუ, ნეპალ).

გაღვენუნა უმოს ხიოლ ცხოვრებას. „თიშ უკულ, მუთ სიგარეტიშ შუმა მივოტე, დუდის თეშ ბგინაფლენქ ითამ დუდშე დიბჭყჷ ცხოვრება დო თინა ირდღას იუჯგუშებ“ (რეჯინა, სამხრეთ აფრიკა). თი კათას, მით დუდის ანებენს სიგარეტიშ შუმას, ეუჯგუშებ გემოშ დო სუნთქვაშ შეგრძნება. თეს გეძინელ, თინეფს ენერგია აძინუნა დო ფიზიკურო ხოლო ჯგირო რენა.

გეუჯგუშებ თქვან ჯამრთელობა. „სიგარეტშა დუდიშ დანებებაშ უკულ, ნებისმიერ ასაკიშ კოჩ იჸუაფ თენა დოვარ ოსურ, უჯგუშო გინაფლენს დუდის“ (დაავადებეფიშ კონტროლიშ დო პროფილაქტიკაშ ცენტრეფ, აშშ.).

გაღვენუნა თქვან დუდიშ რწმენა. „სიგარეტ თიშენ მივოტე, ნამდა ვა მოკოდ, თიშ მონა ვორდიკო. მოკოდ, ჩქიმ დუდიშ უნჩაშ მა პჸოფედკო“ (ჰენინგ, დანია).

თენა ჯგირობუას მოუღანს თქვან ოჯახის დო მეგობრეფს. „სიგარეტიშ შუმა ... ოცილ თინეფიშ ჯამრთელობას ხოლო, მით თქვანწკუმა რე ... გამოკვლევეფქ ოძირუ, ნამდა ირ წანას ანთასობით ადამიან, მით სიგარეტის ვა შუნს დო უბრალოთ თიშ ფურკის სუნთქენს, ფილტვიშ კიბოთ დო გურიშ ლახალათ ღურუ“ (კიბოწკუმა ბრძოლაშ ამერიკულ საზოგადოება).

გურს გუხარენთ ღორონთის. „ძვირფასეფ ... გეფსუფთათ თი ირფელშე, მუთ გილმალუანს სხეულს“ (2 კორინთელები 7:1). „მეუძღვინით თის თქვან სხეულ ... წმინდა, თიშო მოსაწონ მსხვერპლო“ (რომაელები 12:1).

„ართ დღას ქიმეფხვად, ნამდა ღორონთ ვეწონუანს თიცალ მუდგარენს, მუთ სხეულს ზიანს მიორინუანს. ათეშენ, გეგნობჭყვიდ, მივოტეკო სიგარეტიშ შუმა“ (სილვია, ესპანეთ).

ხშირ შემთხვევას სიგარეტშა დუდიშ დანებებელო ხვალე სურვილ ვა რე დასაბაღ. შილებე დემესაჭირან შხვეფიშ მოხვარაქ, თინეფ შქას ოჯახიშ წევრეფ დო ნათესეეფიშ. მუშ კეთება შეულებნა თინეფს?