1, 2. ა) მუშენ თქუ მოციქულ პავლექ, ნამდა ჸოროფა „არძაშ უდიდაშ რე“? ბ) ნამ კითხვეფს გუვარჩიენთ?

 ᲛᲣᲟᲐᲛᲡᲘᲗ პავლე მოციქულქ კორინთელეფშა მეჭარილ წერილს რწმენაშე, იმენდშე დო ჸოროფაშე იჩუ, თქუ, ნამდა თენეფშე „არძაშ უდიდაშ ჸოროფა რე“ (1 კორ. 13:13). საინტერესო რე, მუშენ? რწმენა დო იმენდ ამდღა მოსაჭირნა, ონდო ახალ ქვეყნიერებას ველუთ, მარა მომავალს, მუჟამსით თე დრო ქუდოდირთუ დო ღორონთიშ არძა დუნაპირებ შისრულებ, თინეფ მეტო ვედმესაჭირებუნა. მუშ რაგად შილებე ჸოროფაშე? რწმენაშ დო იმენდიშ გინაწონს, ჸოროფაშ გიმორჩქინა ადამიანეფიშ დო იეჰოვაშ მიმართ მთელ მარადიულობას დემესაჭირებუნა. ზუსტას ათეშენ თქუ პავლექ, ნამდა „ჸოროფა უდიდაშ რე“.

² თე სტატიას გუვარჩიენთ სუმ კითხვას: პირველ, მუშენ ოკო გიმიფრჩქინათ ჸოროფა ართიანიშ მიმართ? მაჟია, მუჭო შემლებნა გიმიფრჩქინათ ჸოროფა ართიანიშ მიმართ? დო მასმა, მუჭო შემლებნა ჸოროფაშ გამანგარება?

3. მუშენ ოკო მიჸორდან ართიან?

³ მუშენ რე მნიშვნელოვან ჸოროფაშ გიმორჩქინა? თეშ ბრელ მიზეზ არსებენს. მაგალთო, ართ-ართ თინა რე, ნამდა ჸოროფათ შხვეფშე გიშებგორუთ დო თიშ გიმორჩქინათ ვოძირანთ, ნამდა ჭეშმარიტ ქრისტიანეფ ვორეთ. იესოქ მუშ მოწაფეეფს უწუ: „ართიან შქას ჸოროფა ქუგაღვენუნან-და, თეთ ქიგეგენა, ნამდა ჩქიმ მოწაფეეფ რეთ“ (იოან. 13:35). თეს გეძინელ, ჸოროფა მოხვარნა, უმოს ართობა მიღდან ართიან შქას. პავლე მოციქულქ ჸოროფაშ გურშენ თქუ, ნამდა „სრულყოფილ კავშირ რე, ნამუთ ართობას უნწყუნს ხეს“ (კოლ. 3:14). მოციქულ იოანეშ  სიტყვეფშე ბგებულენთ ხოლო ართ მნიშვნელოვან მიზეზის თიწკუმა დაკავშირებით, მუშენ ოკო მიჸორდან ართიან. თიქ თანაქრისტიანეფს მეჭარ: „მიდგას ღორონთ უჸორს, მუშ ჯიმა ხოლო ოკო უჸორდას“ (1 იოან. 4:21). თაშ ნამდა, მუჟამსით გიმიფრჩქინანთ ჸოროფას ართიანიშ მიმართ, თეშნერო ვოძირანთ, ნამდა მიჸორა ღორონთ.

4, 5. მუჭო რე ართიანწკუმა დაკავშირებულ და დო ჯიმალეფიშ დო ღორონთიშ ჸოროფა? ქიმიჸუნით მაგალით.

⁴ მუჭო რე დაკავშირებულ ართიანწკუმა და დო ჯიმალეფიშ დო ღორონთიშ ჸოროფა? თეშ ინონჭაფაქ უმოს ადვილქ მაჸუანინ, დეფიფქრათ, მუჭო რე ართიანწკუმა დაკავშირებულ ჩქინ გურ დო სხეულიშ შხვა ნაწილეფ. მაგალთო, მუჟამსით ექიმ მაჯას ჩქინ პულსაციას ამოწმენს დო ოკვირ, ძალიერ რე თინა დოვარ სუსტ, თეშნერო გებულენს ჩქინ გურიშ მდგომარეობას. მუჭო შემლებნა თე მაგალით ჸოროფას დუკავშირათ?

⁵ მუჭოთ ექიმ პულსიშ სინჯებათ გებულენს გურიშ მდგომარეობას, თეშ ჩქი ხოლო თიშე დაფიქრებათ, მუსხით ძალიერ რე შხვეფიშ მიმართ ჩქინ ჸოროფა, შემლებნა გებგათ, მუსხით მანგარო მიჸორა იეჰოვა. ჩქინ დუდიშ გიმორკვიებაშ დროს ქობძირით, ნამდა და დო ჯიმალეფიშ მიმართ მიღდესინ თიცალ ძალიერ ჸოროფა ვა მიღნან-და, თენა შილებე თის ნიშნენდას, ნამდა ღორონთიშ მიმართ ჩქინ ჸოროფა ხოლო ისუსტებ. მარა თეშ გინაწონს, თანაქრისტიანეფიშ მიმართ ძალიერ ჸოროფას ირიათო გიმიფრჩქინანთ-და, გიშურს, ნამდა ღორონთ ხოლო მანგარო მიჸორა.

6. და დო ჯიმალეფიშ მიმართ ჩქინ ჸოროფა ქისუსტებ-და, მუშენ ოკო მივაქცუათ ყურადღება? (1 იოან. 4:7—9, 11).

⁶ და დო ჯიმალეფიშ მიმართ ჩქინ ჸოროფა დროშ მიკულაწკუმა ართო უმოსო დო უმოსო ისუსტებ დო ისხით ძალიერ ვა რენ-და, თე ფაქტ უყურადღებოთ ოკო ვედიბტუათ. მუშენდა თენა შილებე ნიშნენდას, ნამდა საფრთხეშ თუდო ვორეთ, შხვა სიტყვეფით ქოფთქუათინ, იეჰოვაწკუმა ჩქინ ურთიერთობა გილმელებ. თეს მოციქულ იოანე ხოლო აარგამენს, მუჟამსით გუმოშინანა: „მიდგას მუშ ჯიმა ვა უჸორს, ნამდგას ორწყე, ვეშიალებე უჸორდას ღორონთ, ნამდგას ვარწყე“ (1 იოან. 4:20). მუს ბგურაფლენთ თავრეშე? იეჰოვაშო მოსაწონეფ ხვალე თიმწკუმა იპჸუაფუთ, მუჟამსით ართიანიშ მიმართ ჸოროფა მაღვენუნა (წეკითხით 1 იოანეშ 4:7—9, 11).

7, 8. ნამ საშვალებეფით შემლებნა გიმიფრჩქინათ ართიანიშ ჸოროფა?

⁷ ღორონთიშ სიტყვას ბრელ დიხას შეფხვადუთ მითითებას თიწკუმა დაკავშირებით, ნამდა მიჸორდან ართიან (იოან. 15:12, 17; რომ. 13:8; 1 თეს. 4:9; 1 პეტ. 1:22; 1 იოან. 4:11). თე ძვირფას თვისება გურშე მოურს, მარა ჩქინ გურს ადამიანეფ ვარწყენა. მუ ოკო ვაკეთათ, ნამდა და დო ჯიმალეფს ჸოროფა ქუვოძირათ? სიტყვეფით დო საქმეეფით ოკო ვოძირათ, ნამდა მიჸორა თინეფ.

⁸ და დო ჯიმალეფიშ მიმართ ჸოროფაშ გიმოხანტუა შხვადოშხვა საშვალებათ შემლებნა. ბიბლიას თეწკუმა დაკავშირებით ბრელ რჩევა რე მოჩამილ. მაგალთო, თექ ბკითხულენთ: „სიმართლე ეჩით ართიანს“ (ზაქ. 8:16). „ვადინუათ ართიან შქას მშვიდობა“ (მარ. 9:50). „პატიცემა ართიანს ქუჭიშეთ“ (რომ. 12:10). „მთელ გურით მიღით ართიან“ (რომ. 15:7). „ქაპატით ართიანს“ (კოლ. 3:13). „გილეღით ართიანიშ ოღალ“ (გალ. 6:2). „გურშა ეუქექეთ ართიანს“ (1 თეს. 4:18). „გამანგარით ართიან“ (1 თეს. 5:11). „ილოცით ართიანშო“ (იაკ. 5:16).

9. მუშენ რე გურიშექექაფა ჸოროფაშ გიმოხანტუაშ ართ-ართ მნიშვნელოვან საშვალება? (ქოძირით სურათ).

⁹ მორთ ასე გუვარჩუათ ჟინ აბზაცის მოშინაფილ საშვალებეფშე ართ-ართ, მუდგათ შემლებნა შხვეფს ჸოროფა ვოძირათ. თენა რე პავლე მოციქულიშ სიტყვეფ: „გურშა ეუქექეთ ართიანს“. შხვეფშა გურიშექექაფა ჸოროფაშ  გიმოხანტუაშ ართ-ართ მნიშვნელოვან საშვალება რე. მუშენ? ართ ბიბლიურ ნაშრომიშ თანახმას, სიტყვა „გურიშექექაფა“, ნამუთ პავლე მოციქულქ გიმირინუ, ნიშნენს „მიდგაინიშ ხასლას ელარნას, მუჟამსით თინა მანგარ რთულ სიტუაციას რე“. თაშ ნამდა, მუჟამსით თანაქრისტიანს, მიდგას სერიოზულ პრობლემეფ უღჷ, გურშა ეუქექუანთ, თეშნერო ვოხვარუთ, გამწოდირთას დო გაგრძელას სიცოცხლეშ შარას ულა. ხვალე თენა ვარინ, ირო, მუჟამსით ჩქინ დას ვარდა ჯიმას გურშა ეუქექუანთ დო ვარზენთ საშვალებას, თავისფალო გეგმოხანტას მუშ გრძნობეფ, ვოძირანთ, ნამდა მანგარო მიჸორა თინა (2 კორ. 7:6, 7, 13).

10. მუჭო რე ართიანწკუმა დაკავშირებულ შხვეფიშ გაჭირებაშ გურშა მეღალა დო გურიშექექაფა?

¹⁰ შხვეფიშ გაჭირებაშ გურშა მეღალა მანგარ ხოლოს რე შხვაშა გურიშ ექექაფაწკუმა. მუშენ იფჩიებუთ თეს? მუჟამსით პიროვნებას გურშა მეუღ თი ადამიანიშ გაჭირება, მით იტანჯებ, სურვილ ურჩქინდუ, გურშა ეუქექუას თის დო მუთ შეულებ ირნერო ქიმეხვარას. თაშ ნამდა, დიო გურშა მემღუნა შხვაშ გაჭირება დო უკულ მირჩქინდუნა სურვილ, ეუქექუათ თის. ყურადღება ქიმიაქცით, ნამდა პავლე მოციქულ იეჰოვას ეჭარუნს მუჭოთ, „Შხვეფიშ გაჭირებაშ გურშა მიმაღალარ მუმას დო ირნერო გურიშ ემაქექაფალ ღორონთის“ (2 კორ. 1:3). თე სიტყვეფ ზუსტას ეჭარუნს იეჰოვაშ პიროვნებას, მუშენდა თის გურს უჭუანს ადამიანეფიშ მდგომარეობა, მუთ აღძრენს „ირნერ გაჭირებას“ ემქექუან გურშა (2 კორ. 1:4). მუჭოთ წყურგილეშ წყარ ძალეფით ეიოფშანს მოჸუმენაფილ კოჩის, თეშ იეჰოვა ხოლო გურშა ეუქექუანს დო ამანგარენს თი პიროვნებას, მიდგას ოწუხებელ უღჷ. მუჭო შემლებნა მივაჸუნათ იეჰოვაშ მაგალითის? ართ-ართ საშვალება, მუდგათ შემლებნა გურშა მიბღათ შხვეფიშ გაჭირება დო ეუქექუათ თინეფს, თინა რე, ნამდა გუვავითარათ თვისებეფ, ნამუთ მანგარ ხოლოს რე გურიშ ექექაფაწკუმა. მორთ ასე ქიფჩუათ ნამთინე თე თვისებაშენ.

11. მუჭოთ კოლოსელეფიშ 3:12-შე დო 1 პეტრეშ 3:8-შე იძირე, ხოლო ნამ თვისებეფ ოკო გუვავითარათ, ნამდა ჸოროფათ გურშა ეუქექუათ შხვეფს?

¹¹ მუ მიმეხვარებნა, ირდღას ჸოროფათ ეუქექუათ გურშა შხვეფს? თეშო საჭირო რე, გუვავითარათ თიცალ ძვირფას თვისებეფ, მუნერით რე ჯიმალურ ჸოროფა დო სიკეთე (წეკითხით კოლოსელეფიშ 3:12; 1 პეტრეშ 3:8). მუჭო მიმეხვარებნა თე თვისებეფ? მუჟამსით შხვეფიშ გაჭირებაშ გურშა მეღალა დო თიწკუმა დაკავშირებულ თვისებეფ ჩქინ პიროვნებაშ ნაწილო გინმირთუ, ძალიერ სურვილ მიღნა, ირნერო ქიმვეხვარათ დო ქელუდირთათ თინეფს, მით იტანჯებნა. მუჭოთ იესოქ თქუ: „ჯგირ კოჩ ჯგირს იჩიებ, მუშენდა თიშ გურ ჯგირით რე ეფშა, მარა გლახა კოჩ გლახას იჩიებ, მუშენდა თიშ გურ გლახათ რე ეფშა“ (მათ. 12:34, 35). თაშ ნამდა, საჭირო დროს და დო ჯიმალეფშა გურიშექექაფა ჸოროფაშ გიმოხანტუაშ ართ-ართ მნიშვნელოვან საშვალება რე.

12. ა) მუშენ ოკო ვორდათ ფრთხილას? ბ) ნამ კითხვას მეფჩანთ პასუხის?

¹² ჩქი მთელ გურით მოკონა, ირიათო „მიჸორდან ართიან“ (1 იოან. 4:7). მარა მნიშვნელოვან რე, ფშუდან მუ გაფრთხილება მუჩეს იესოქ. თიქ თქუ, ნამდა ხალხიშ უმენტაშის ჸოროფა მეუდინუდ (მათ. 24:12). მუშო ოკო რაგად, იესოს თაქ ვა უგულისხმებ, ნამდა თენა მუშ მიმაჸუნალეფიშ უმენტაშის აღოლედ. მარა თე სიტყვეფ ოკო გეფთვალისწინათ, მუშენდა ფცხოვრენთ თიცალ ქვეყნიერებას, სოდეთ ხალხ ნაკლებო გიმირჩქინანს ჸოროფას ართიანიშ მიმართ. ათეშენ, ფრთხილას ოკო ვორდათ, ნამდა ვა ვაგურათ თინეფს. მორთ ასე პასუხ ქიმეფჩათ ართ მნიშვნელოვან კითხვას: მუ მიმეხვარებნა თიშ გაგებას, მუსხით ძალიერ რე და დო ჯიმალეფიშ მიმართ ჩქინ ჸოროფა?

13. მუ მიმეხვარებნა თიშ ძირაფას, მუსხით ძალიერ რე და დო ჯიმალეფიშ მიმართ ჩქინ ჸოროფა?

¹³ შხვადოშხვა სიტუაციას ჩქინ რეაქცია მიმეხვარებნა თიშ ძირაფას, მუსხით ძალიერ რე  და დო ჯიმალეფიშ მიმართ ჩქინ ჸოროფა (2 კორ. 8:8). მაგალთო, ართ თეცალ სიტუაციაშე პეტრე მოციქულქ ხოლო იჩუ. თიქ თქუ: „მუთ მთავარ რე, მთელ გურით გიჸორდან ართიან, მუშენდა ჸოროფა ბრელ ცოდას გინოფორუნს“ (1 პეტ. 4:8). თაშ ნამდა, მუჭოთ იძირე, მუჟამსით თანაქრისტიანეფიშ არასრულყოფილება დო სისუსტეეფ დუდის ქირჩქინანს, თექ შილებე ქუმოძირან, მუსხით ძალიერ რე თინეფიშ მიმართ ჩქინ ჸოროფა.

14. 1 პეტრეშ 4:8-შ თანახმას, მუნერ ჸოროფა ოკო გიმიფრჩქინათ? ქიმიჸუნით მაგალით.

¹⁴ მორთ, ასე ყურადღებათ ქიდვეკვირათ პეტრეშ სიტყვეფს. მაბრუო მუხლიშ პირველ ნაწილს თინა მირაგადნა, ნამდა „მთელ გურით“ ოკო მიჸორდან ართიან. პეტრეშ გიმორნაფილ ბერძნულ სიტყვა, ნამუთ თარგმნილ რე, მუჭოთ „მთელ გურით“, პირდაპირ გაგებათ ნიშნენს „გოფაჩილს“. მუხლიშ მაჟია ნაწილს ეჭარილ რე, მუ შედეგის მომღანა მთელ გურით ჸოროფაშ გიმორჩქინა. მუჭოთ თევრეშე ბგებულენთ, თეცალ ჸოროფა და დო ჯიმალეფიშ ცოდეფს გინოფორუნს. თეს უჯგუშო ქინვანჭათინ, მორთ დეფიფქრათ თეცალ სიტუაციაშე. წერმიდგინით, ნამდა თქვან სტოლს ბრელ კილ უღჷ, ნამთინე დიხას გონწკირილ რე, ნამთინეს — გოცხაბარელ. მარა შეილებნა თის სტოლსაფინ ქიგნარჩათ, ნამუთ სტოლიშ ხვალე ართ დო ჟირ კილს ვარინ, მუთ ქოუღუნ  არძას დოფორუნს. თეშნერო და დო ჯიმალეფიშ მიმართ მთელ გურით ჸოროფა მიმეხვარებნა, დოფობრათ, თაშ ქოფთქუათინ, ქუვაპატუათ ხვალე ართ დო ჟირ შეცდომა ვარინ, „ბრელ ცოდა“.

15. მუშ კეთება შემალებენა და დო ჯიმალეფიშ მიმართ ძალიერ ჸოროფა ქუმაღვენუნან-და? (კოლ. 3:13).

¹⁵ და დო ჯიმალეფიშ მიმართ ჩქინ ჸოროფა თიცალ ძალიერ ოკო რდას, ნამდა შემლებდან ირიათო ვაპატუათ თინეფს, თიმწკუმა ხოლო, მუჟამსით თეშ კეთება მანგარ რთულ რე (წეკითხით კოლოსელეფიშ 3:13). მუჟამსით შხვეფს ვაპატიენთ, თინეფიშ მიმართ ძალიერ ჸოროფას გიმიფრჩქინანთ დო მუთ არძაშ უმოს მნიშვნელოვან რე, თეშნერ მოქმედებათ ვოძირანთ, ნამდა მოკონა, გურ გუხარათ იეჰოვას. ხოლო მუ მიმეხვარებნა, ვაპატუათ და დო ჯიმალეფს დო თეს გეძინელ, ადვილო ვეგებღიზიანათ თინეფიშ მოქმედებეფით?

16, 17. ხოლო მუ მიმეხვარებნა, გიბჭყოლიდუათ და დო ჯიმალეფიშ აკაბცხა შეცდომეფ? ქიმიჸუნით მაგალით (ქოძირით სურათ).

¹⁶ ყურადღება და დო ჯიმალეფიშ დადებით მხარეეფშა გეგნიღით დო ვართ ხოლო უარყოფითშა. ქიმიპჸუნათ თეცალ შედარება: წერმიდგინით, ნამდა თანაქრისტიანეფ სოდგარენ ართო რდით აკოშაყარელ. დრო სასიამოვნოთ გატარით დო ბოლოს გეგნოჭყვიდით, ართო გეგნიღითკო სურათ. პირველ სურათიქ გლახაქ გიშართჷ, ათეშენ ხოლო ჟირ სურათ გეგნიღით. ასე გვალო სუმ სურათ გიღნა. თე სურათეფიშ გოჯინაშ დროს ქოძირით, ნამდა ართ-ართ სურათის ართ ჯიმა ვეძიცანს. მუს ღოლანთ თე  სურათის? მუშო ოკო რაგად დოლასუნთ, მუშენდა ხოლო ჟირ სურათ გიღნა, სოდეთ არძა იძიცანს, თინეფ შქას თი ჯიმა ხოლო.

¹⁷ მორთ ასე თე სურათეფ თი მოგონებეფს შეუდარათ, ნამუთ მიღნა. ჩქი და დო ჯიმალეფწკუმა ართო ბრელ სასიამოვნო მოგონება მიღნა, მარა მინშა ნამთინე დაქ ვარდა ჯიმაქ შილებე თიცალ მუდგარენ მიწუან ვარდა გაკეთას, მუდგათ გურს ქელმოჭუანა. მუჭო ოკო მიფქცუათ თეცალ დროს? ირნერო ოკო ვეცადათ, თეცალ მოგონება ჩქინ გონებაშე გეშაბლასათ, მუჭოთ გლახა სურათის ბლასუნდით (იგავ. 19:11; ეფეს. 4:32). მონდომა ოკო ვადვარკათ, ნამდა გიბჭყოლიდუათ თანაქრისტიანიშ აკაბცხა შეცდომა ხოლო, მუშენდა თიწკუმა ბრელით უმოს ჯგირ, სასიამოვნო მოგონებეფ მაკავშირენა, ნამუთ ჯგირ სურათცალო ოკო დოფჩუათ დო ვეგიბჭყოლიდუათ.

18. მუ გებგით თე სტატიაშე ჸოროფაწკუმა დაკავშირებით?

¹⁸ თე სტატიაშე ჸოროფაწკუმა დაკავშირებით ბრელ მუდგარენ გებგით. მაგალთო, ქობძირით, მუჟამსით მიჸორა და დო ჯიმალეფ თეშნერო ვოძირანთ, ნამდა მიჸორა იეჰოვა. ათეშენ მოკონა, გუვამანგარათ ართიანიშ მიმართ ჸოროფა. თეს გეძინელ, ქიგებგით, მუჭო შემლებნა და დო ჯიმალეფს ვოძირათ, ნამდა მიჸორა თინეფ. თეშ ართ-ართ საშვალება თინეფშა გურიშექექაფა რე, მუდგაშ კეთება თიმწკუმა შემალებენა, მუჟამსით გურშა მიბღანთ თინეფიშ გაჭირებას. დობოლოს, თე სტატიაშე თინა ხოლო ქიგებგით, მუჭო გუვამანგარათ ჸოროფა ართიანიშ მიმართ. თეშ კეთებას მიმეხვარებნა თანაქრისტიანეფშა დაშებულიშ პატიება თიმწკუმა ხოლო, მუჟამსით თეშ კეთება ვა რე ადვილ.

19. მუშენ რე ართიანიშ მიმართ ჸოროფაშ გიმორჩქინა განსაკუთრებულო მნიშვნელოვან ამდღა?

¹⁹ მუშენ რე ართიანიშ მიმართ ჸოროფაშ გიმორჩქინა განსაკუთრებულო მნიშვნელოვან ამდღა? თე კითხვაშ პასუხის მოციქულ პეტრე მოგებაფუანა. თიქ თქუ: „მონჭაფილ რე ირფელიშ ბოლო. ათეშენ მთელ გურით გიჸორდან ართიან“ (1 პეტ. 4:7, 8). თე უბადო ქვეყნიერებაშ განადგურება მონჭაფილ რე დო ველუთ, ნამდა შისრულებ იესოშ სიტყვეფ, ნამუთ მუშ მიმაჸუნალეფწკუმა დაკავშირებით იწინასწარმეტყველ: „არძა ხალხ გოიჯოგუანა ჩქიმ სახელიშ გურშენ“ (მათ. 24:9). თე გოჯოგაფას გივორჯგინათ დო იეჰოვაშ ართგურობა ვა ვოდინუათინ, თანაქრისტიანეფწკუმა ართობა ოკო მიღდან. მუჟამსით თაშ ქიმიფქციებუთ, სატანას დღას ვეშიალებე აკარღვას ჩქინ ართობა, მუშენდა მიღნა ჸოროფა — „სრულყოფილ კავშირ, ნამუთ ართობას უნწყუნს ხეს“ (კოლ. 3:14; ფილ. 2:1, 2).