პირველ თესალონიკელეფ 4:1-18
4 ჯიმალეფ, თქვა თეშ ცხოვრენთ, მუჭოთ ღორონთის მოწონს დო მუჭოთ ჩქი დუგოგურეთ, მარა ასე უფალ იესოშ სახელით რთხინთჷ დო გოხვეწუთ, თენა ხოლო უმოს მონდომათ გაკეთათ.
2 თქვა გიჩქუნა თი მითითებეფ, ნამუთ ჩქი უფალ იესოშე გინორჩით.
3 ღორონთიშ ნება რე, რდათჷ წმინდეფ დო ვემკანჭათ უზნეობას*.
4 არძას გიჩქუდან, მუჭო აწიჭოფათ თქვან სხეულეფ სიწმინდეთ დო ღირსუანო;
5 ვაგურათ თი ხალხეფს, მით ვეჩინენა ღორონთის დო ურძღაფელო ეჸუნა დუდუშუკებ სურვილეფს*.
6 მითინქ ვეგნაბიჯგუას ზნეობრივ სიწმინდეს დო ჭუა ვემიორინუას ჯიმას, მუშენდა იეჰოვა თე ირფელიშ გურშენ აუცილებერო დასაჯენს კოჩის, მუთ თეიშახ ხოლო გიწით დო ჯგირო ეინწყით.
7 ღორონთიქ უწმინდურ ცხოვრებაშო ვარინ, წმინდეფ* ვორდათინ თიშო გიშაბგორეს.
8 მით თე მითითებეფს ვა ღებულენს, კოჩის ვარინ, ღორონთის ვა ღებულენს, მით მუშ წმინდა შურს* გარზენა.
9 ჯიმალურ ჸოროფაშენ თქვანდა მუთუნ ვა რე მიოჭარალ, მუშენდა ღორონთ გოგურუანა ართიანიშ ჸოროფას.
10 ჯიმალეფ, თქვა გიჸორა მაკედონელ ქრისტიანეფ, მარა ელაიჩანთ, ნამდა თქვან გურქ ხოლო უმოსო ეიფშას ჸოროფათ.
11 მიაჸუნით თის, მუთ დუგოგურეთ დო ირნერო ეცადით, იცხოვრათ მშვიდას, ვემშართათ შხვაშ საქმეშა დო თქვან ხეთ ეიჯუმუათ დუდ.
12 თაშ ქიმიქციებუთ-და, მუთუნ ვემგოკორდუნა დო ხალხიშ თოლს ხოლო პატიცემა გაღვენუნა.
13 თეს გეძინელ, ჯიმალეფ, მოკონა, გიჩქუდან, მუ ელუნა თინეფს, მიდგაქ ღურაშ ლურით დირულუეს, მუშენდა წუხებას ვეგნაჸუნათ შხვეფცალო, მიდგას იმენდ ვა უღუნა.
14 იესოშ ღურაშ დო გათელებაშ ქოპწანან-და, იმწკუმა თინა ხოლო ოკო პწანდან, ნამდა ღორონთ თინეფს ხოლო გათელენს, მიდგაქ იესოშ ართგურეფო ღურეს დო თიწკუმა აკოშაყარანს.
15 თეს იეჰოვაშ სიტყვაშე გირაგადუთ: ჩქი, მით უფალიშ მოულაშ* დროს ცოცხალეფ იპჸუაფუთ, ღურაშ ლურით დორულაფირეფშე ადრე მუთუნით ვა ურთჷ ზეცაშა,
16 მუშენდა უფალ გიმილენს ზეცაშე; თინა მთავარანგელოზიშ ხონარით დო ღორონთიშ საყვირით ზოჯუნს, დო პირველეფ თინეფ გეთელებუნა, მიდგაქ ქრისტეწკუმა ართობას რდესინ თეშ ღურეს.
17 უკულ ჩქი, მით თი დროს ცოცხალეფ იპჸუაფუთ, მუნაფეფშა გეშამიჸუნანა, ნამდა ვორდათ თინეფწკუმა ართო დო ჟი ქეშეფხვადათ უფალს. თეშ უკულ ირიათო უფალწკუმა იპჸუაფუთ.
18 თაშ ნამდა, გურშა ეუქექეთ ართიანს თე იმენდით!
სქოლიოეფი
^ ბერძნ. „პორნია“. ქოძირით „სექსუალურ უზნეობა“ („ბიბლიურ სიტყვეფიშ ენწყუმა“).
^ იგულისხმებ სექსუალურ სურვილეფ.
^ ქოძირით „ბიბლიურ სიტყვეფიშ ენწყუმა“.
^ ქოძირით „ბიბლიურ სიტყვეფიშ ენწყუმა“.
^ ბერძნ. „პარუსია“. ქოძირით „ქრისტეშ მოულა“ („ბიბლიურ სიტყვეფიშ ენწყუმა“).
