მოციქულეფიშ საქმეეფ 18:1-28
18 თეშ უკულ პავლექ ათენშე კორინთშა მიდართჷ.
2 თექ ქეშეხვად ართ იუდეველს, აკვილას, ნამუთ პონტოშე რდჷ; თინა მუშ ოსურ პრისკილაწკუმა ართო ახალ მუნაულა რდჷ იტალიაშე, მუშენდა კლავდიუსიქ არძა იუდეველს რომიშ დოტება უზოჯ. პავლექ თინეფშა ქიმერთჷ
3 დო, რახანს ართ ხელობა უღუდეს, თინეფიშ ჸუდეს ქუდოსქიდ; ართო მუშენდეს დო გიმაჩამალო კარავეფს ჭანდეს.
4 პავლე ირ საბატონს სიტყვათ გიშეშ სინაგოგას დო იუდეველეფს დო ბერძენეფს არწმუნენდჷ, ნამდა სიმართლეს იჩიებუდ.
5 მუჟამსით სილა დო ტიმოთექ მაკედონიაშე ქუმორთეს, პავლექ მთლიანო ღორონთიშ სიტყვაშ ქადაგებაშა გინილ. იუდეველეფს ურაგადუდ დო უმოწმენდჷ, ნამდა იესო რე ქრისტე.
6 მარა თინეფ ოწინააღმდეგუდეს დო ლანძღუნდეს. ათეშენ თიქ ბარგ გიფართხჷ* დო თინეფს უწუ: „თქვან კისერს ქორდას თქვან ზისხირ. მა სუფთა ვორექ. ანწ შხვა რჯულიშ ხალხშა მიდურქ“.
7 თაშ ნამდა, თევრეშე მიდართჷ დო ართ ღორონთიშმოშიშ კოჩიშ, ტიციუს იუსტუსიშ, ჸუდეშა ქიმერთჷ; თე ჸუდე სინაგოგაშა რდჷ მიკოშენებულ.
8 სინაგოგაშ წინამძღოლქ, კრისპუსიქ, დო თიშ არძა ჸუდეშარქ ირწმუნეს უფალ. ბრელ კორინთელქ ხოლო მირჩქილუ სახიოლო ამბე, ირწმუნ დო დინათ.
9 სერით პავლეს ხილუას უფალქ უწუ: „ვა გაშქურინას, ირიათო იქადაგ, ვემიოტუა ჩიება,
10 მუშენდა სქანწკუმა ვორექ დო მითინს მუთუნ ვა დაშებე სქანდა; თე ქალაქის ბრელ მირწმუნენს“.
11 თაშ ნამდა, პავლექ წარმოწანა დო ამშვ თუთას ქუდოსქიდ თექ დო თექიანეფს ღორონთიშ სიტყვას ოგურუანდჷ.
12 თიმწკუმა, მუჟამსით აქაიაშ პროკონსულ გალიონ რდჷ, იუდეველეფქ პავლეშ წინააღმდეგ ებუნტეს დო თინა სასამართლო ტახტშა ქიმიჸუნეს.
13 თინეფ იჩიებუდეს: „თე კოჩ ხალხის ურაგად, თაქიან კანონს ვემურენ თეშ ცანჷ ღორონთის თაყვან“.
14 პავლეს მუდგარენიშ რაგად ულამუდუნ თეშ, გალიონქ იუდეველეფს უწუ: „იუდეველეფ, თე კოჩის სერიოზულ მუდგარენ ქაფჷ დაშებულ დო გლახას ქართუნ-და, მთელ ყურადღებათ ქოირჩქილედით,
15 მარა სიტყვეფშე, სახელეფშე დო თქვან კანონეფშე ქონირზენთ-და, იმწკუმა თე საქმეს თქვანით ქიმკაჯინით. ვა მოკო, თეცალ საქმეეფიშ მოსამართლე ვორდე“.
16 თენა ქოთქუ დო ქუდატებაფუ თი ადგილ, სოდეთ სასამართლო ტახტ რდჷ.
17 თინეფქ სინაგოგაშ წინამძღოლ სოსთენე ოჭოფეს დო სასამართლო ტახტიშ წოხოლე ლახუა ქუდუჭყეს, მარა გალიონქ ვემშართჷ თე საქმეშა.
18 პავლექ იშენით გვარიან ხანს ქუდოსქიდ თექ. უკულ ჯიმალეფს ჯგირობუა ქუდუჩინ დო პრისკილა დო აკვილაწკუმა ართო სირიაჸურე ზღვათ მიდართჷ. თიქ კენქრეს თუმა კუნტათ დიჭკირ, მუშენდა აღთქმა აფუდ დოდვალირ.
19 ეფესოშა გენორთესინ, პავლექ თინეფ ქალაქის ქიდიტუ, მუქ სინაგოგაშა მიდართჷ დო იუდეველეფს წმინდა წერილეფშე ოგურუანდჷ.
20 თინეფ ოხვეწუდეს, ნამდა უმოს ხანს ქუდოსქიდუკო თექ, მარა პავლექ ვა დოსქიდ;
21 თიქ ჯგირობუა ქუდუჩინ თინეფს დო უწუ: „იეჰოვაშ ნებაქ ქიჸუ-და, დიბრთუქ თქვანდა“. უკულ ეფესოშე ზღვათ მიდართჷ
22 დო კესარეაშა გენორთჷ. თევრეშე იერუსალიმშა გეკორთჷ დო კრება ქიძირუ; უკულ ანტიოქიაშა გენორთჷ.
23 თექ მუსხირენ ხანს ქუდოსქიდ, უკულ გალატიაშა დო ფრიგიაშა მიდართჷ. თექ შხვადოშხვა ადგილეფშა გილეშ დო მოწაფეეფს ამანგარენდჷ.
24 თიმ დროს ეფესოშა გენორთჷ ალექსანდრიას დუნაბად ართ იუდეველქ, ნამდგას აპოლოს ჯოხოდ. თინა ჯგირ მორაგადე რდჷ დო წმინდა წერილეფ ხოლო ჯგირო უჩქუდ.
25 თიშა ნაგურეფ აფუდეს იეჰოვაშ შარა დო ღორონთიშ შურით მთელ მონდომათ* სწორას იჩიებუდ დო ოგურუანდჷ იესოშენ, მარა ხვალე თი ნათუაშ გურშენ უჩქუდ, ნამდგას იოანე ქადაგენდჷ.
26 აპოლოსიქ გაბედულო ქიდიჭყჷ ქადაგება სინაგოგას. პრისკილაქ დო აკვილაქ თის მურჩქილუესინ, მიდეჸუნეს დო უმოს სწორას გეუნწყეს ღორონთიშ შარა.
27 ხვალე თენა ვარინ, თის აქაიაშა ოკოდ ულა, ათეშენ ჯიმალეფქ მოწაფეეფს წერილ ქიმეჭარეს დო თხუეს, ნამდა მთელ გურით მიღესკო თინა. აპოლოსიქ თექ გენორთუნ, მანგარო მეხვარ თინეფს, მიდგაქ ღორონთიშ გიმორჩქინელ ჭყოლოფათ ირწმუნ.
28 თინა სახალხოთ გურგედვალირო უმტკიცენდჷ იუდეველეფს, ნამდა ჩირთუდეს დო წმინდა წერილეფშე ოძირანდჷ, ნამდა იესო რდჷ ქრისტე.
