ეფესოელეფ 2:1-22
2 ღორონთიქ გუგათელეს, ვარინ ღურელეფ რდითჷ თქვან დუნაშებუშ დო ცოდეფიშ გურშენ,
2 ნამდგას თიმწკუმა ორთუდით, მუჟამსით თეშ ცხოვრენდით, მუჭოთ თე უბადო ქიანა* ცხოვრენს, თი ჰაერიშ, შხვა სიტყვეფით ქოფთქუათინ, აზროვნებაშ* მმართველიშ ძალაუფლებაშ თუდო, ნამუთ ასე უდუჯერებუეფ შქას მოქმედენს.
3 თინეფწკუმა ართო ჩქი ხოლო ჩქინ ცოდამ სხეულიშ ჭკუაშა გილეფშით. ჩქინ ცოდამ სხეულს დო აზროვნებას ვორდით ეჸუნელ დო დაბადებაშე ღორონთიშ რისხუა ფხვადუდეს,
4 მარა ღორონთიქ, ნამუთ სარკოთ მოჭყოლოფე რე, უზომეთ ქომიჸოროფუეს, ათეშენ
5 გუმათელეს დო ქრისტეწკუმა ართობა ქომუჩეს, მუჟამსით ჩქინ დუნაშებუშ გურშენ ღურელეფ ვორდით. თაშ რე, თიშ ჭყოლოფათ რეთჷ რსხებულ.
6 ხვალე თენა ვარინ, ღორონთიქ გუმათელეს დო, რახანს ქრისტე იესოწკუმა მიღუნა ართობა, ზეცას ქუდმოხუნუეს ჩქინ-ჩქინ ადგილს,
7 მუშენდა ახალ ქიანას, ნამუთ ანწ იჸუაფ, ღორონთიქ მუშ გურხვეობათ უზომეთ ქომჭყოლოფუან ჩქი, მით ქრისტე იესოწკუმა ვორეთ ართობას.
8 თე ჭყოლოფათ გინოსქიდით, მუშენდა რწმენა გიღუნა. თე რსხება თქვან მონდომაშ შედეგ ვარინ, ღორონთიშ ძღვინ რე.
9 თაშ რე, თენა საქმეეფიშ შედეგ ვა რე, მუშენდა მითინს ვა უღუდას ოცქვაფალ.
10 ჩქი ღორონთიშ ნახელუან ვორეთ, ქრისტე იესოწკუმა ართობას გოჭყაფილ, თი ჯგირ საქმეეფიშ ოკეთებელო, ნამუთ ღორონთის აფუდ წინასწარ გინოჭყვიდილ.
11 ათეშენ, თქვა, მით ებრაელეფ ვა რეთჷ, რშუდან, ნამდა ართ დროს წინადაუცვეთელეფს გიძახუდეს თინეფ, მიდგას წინადაცვეთილეფ ჯოხოდეს; თინეფ კოჩშე რდესჷ წინადაცვეთილეფ.
12 თიმ დროს თქვა ქრისტეს ვეჩინენდით, მუთუნნერ კავშირ ვაიღუდეს ისრაელ ხალხწკუმა დო ვართ ღორონთიშ დუნაპირებშა გერსხილ შეთანხმებეფ რდჷ თქვანწკუმა დოდვალირ, უიმენდოთ დო უღორონთეთ რდითჷ.
13 თქვა, მით ქრისტე იესოწკუმა ართობას რეთჷ, ღორონთშე შორს რდითჷ, მარა ასე ქრისტეშ ზისხირიშ ჭყოლოფათ თიშ ხოლოშა ქიმერთით.
14 თიქ მომღეს მშვიდობა, ჟირ ჯგუფ ართ ჯგუფო გინაშქვჷ დო აკარღვჷ კიდალა, ნამუთ თინეფ შქას რდჷ.
15 მუშ სხეულიშ შეწირუათ, თიქ გაუქმჷ თი კანონეფ დო მითითებეფ, ნამუთ მოსეშ კანონს ინოჭარუდ დო ნამუთ თე ჟირ ჯგუფ შქას ნტერალაშ მიზეზ რდჷ. შედეგო თე ჯგუფეფშე, მით თიწკუმა ართობას რენა, ახალ ჯგუფ გაკანწყუ დო ართიან შქას მშვიდობა ქიმეჩ.
16 ართ სხეულო გინორთელ თე ჟირ ჯგუფ წამებაშ ძელს ღურათ ღორონთწკუმა გაკარიგ, მუშენდა მუშ ღურათ მოსპჷ ნტერალა.
17 თიქ ქუმორთჷ დო მშვიდობაშ გურშენ სახიოლო ამბე გაიცხადეს ქოთ თქვა, მით ღორონთშე შორს რდითჷ, დო ქოთ თინეფს, მით თიწკუმა ხოლოს რდესჷ.
18 თიშ საშვალებათ ჩქი, ჟირხოლო ჯგუფის, თავისფალო შემლებუნა ჩქინ ზეციერ მუმას დურაგადუათ ლოცვათ, ჩქი ხომ არძა ართ წმინდა შურს* ბღებულენთ.
19 თაშ ნამდა, თქვა მეტო ვა რეთჷ უჩინებუეფ დო შხვა ქიანაშ მოქალაქეეფ, თქვა წმინდეფიშ* თანამოქალაქეეფ დო ღორონთიშ ოჯახიშ წევრეფ რეთჷ,
20 მოციქულეფიშ დო წინასწარმეტყველეფიშ ოსხირშა გეშენებულ. თე ოსხირიშ მთავარ ქუა ქრისტე იესო რე.
21 თე შენობა, ნამუთ ქრისტეწკუმა ართობას რე დო ნამდგაშ ნაწილეფ ართიანს ჯგირო რე მენწყილ, წმინდა ტაძარო იშენებ იეჰოვაშო*.
22 ქრისტეწკუმა ართობას თქვა ხოლო იშენებუთ ადგილს, სოდეთ ღორონთ მუშ წმინდა შურით კვირდენს.
სქოლიოეფი
^ ბერძნ. „ეონ“. ქოძირით „ქიანა“ („ბიბლიურ სიტყვეფიშ ენწყუმა“).
^ ბერძნ. „პნევმა“. ქოძირით „შურ“ („ბიბლიურ სიტყვეფიშ ენწყუმა“).
^ ქოძირით „ბიბლიურ სიტყვეფიშ ენწყუმა“.
^ ქოძირით „ბიბლიურ სიტყვეფიშ ენწყუმა“.
^ ქოძირით „ბიბლიურ სიტყვეფიშ ენწყუმა“.
