YOOSOMA YA MWAHA 43
NCIPO 90 Nilipihaneke Mukina ni Mukhwaawe
Moopora Woomaliha Itthu Nnaakanyera Nnyu
“Nvarerye itthu sotheene.”—1 ATES. 5:21.
ETTHU NIN’YA NHU OHUDHA
Nin’ya woona moopora nikhanle nhu omaliha itthu ninaakanyera nhu dheidho ikhanle ovukula nteko nininvarela nhu Yehova.
1-2. (a) Itthu seeni ikhanle owiiriha arumeyi a Yehova opacera waakanyera? (b) Eseeni nin’ya nhu othokorerya yoosoma ela?
OOTHEENE nhu vooxihikha akhala wiira nanamwane aahiidho na atthu uulupale, ivaara dhikina dhookhala itthu ninaakanyera nhu. a Mwa ntakihero, mmuupuwele mwali mmodha ori namalaleerya oohipatisiwa yoowo onaakanyera akhala wiira Yehova onnicali. Ndho elo pooti omwiiriha woovelela opatisiwa. Aahiidho mmuupuwele munna mmodha othanlale okhuma erapasi-ye okhalihera Omwene wa Muluku ohiya ovara nteko wa nlaponi onlinvwa nsurukhu wawaatta. Ndho noomala othela omphwanya nsurukhu vakhaani wiira akhapelele ettheko-ye, woonawene owo pooti opacera waakanyera akhala wiira okathi aariiye rapasi aahipaka yoothanla yooreera. Nitho mmuupuwele nrokora mmodha awuuluvala ohiniiwerya-werya owo pooti oriipiwa nrima mwaha wa ohiwerya opaka itthu aapaka iye khalai. Niire nyuwo mwaataka wiipakela makoho nkhama ala: ‘Kiire Yehova onnikivaha efaita? Kiire koopaka yoothanla yooreera kihiyaka itthu dhikina wiira kinrumeele saana Yehova? Kiire nlelo kookhalana efaita vamaithoni va Yehova?’
2 Akhala wiira ninoohiya waakanyera iwo wunnuwaka, vakhaani-vakhaani pooti ovukula waamini wihu ni oniiriha ohiya onrumeela Yehova. Yoosoma ela nin’ya woona malakihero a mBiibiliyani akhanle onikhalihera akhala wiira nnoopacera waakanyera (1) wiira Yehova onninoonela vatthu, (2) wiira noopaka dhoothanla dhooreera khalai, ni (3) akhala wiira Yehova nleelo onninivaha efaita.
MOOPORA WOOMALIHA ITTHU NNAAKANYERA NNYU
3. Nin’ya owerya dhai omaliha itthu ninaakanyera nhu?
3 Wiira niwerye omaliha itthu ninaakanyera nhu, nihaana orumeela Nuulumo na Muluku wiira niphwanye waakhuliwa wa makoho nhu. Ndho napaka elo, enoonikhalihera olipiha waataana wihu ni Yehova ni oniiriha ohihiya olipiha waamini wihu —1 aKor. 16:13.
4. Nin’ya owerya dhai ‘ovaarerya itthu dhootheene’? (1 aTesaloonika 5:21)
4 Munsome 1 aTesaloonika 5:21. Nkhama nimanle nhu osoma, Biibiliya onninitumererya wiira ‘nivarerye itthu dhootheene’. Nin’ya owerya dhai opaka elo? Ninoowerya opaka elo nivareryaka itthu ninkhupali nhu, wiira noone akhala wiira dhinnivarihana ni ele Biibiliya onlotta iye. Mwa ntakihero mmuupuwele rapasi mmodha oniikoha akhala wiira Muluku onninvaha efaita. Niire owo ohaana okhupali muupuwelo owo? Naari, owo ohaana ovarerya itthu idho dhootheene, wiira adhuwele moopora Yehova onoonela iye mwaha owo.
5. Eseeni ninreerela nhu opaka wiira nimwiiwe Yehova aakhulaka mavekelo nhu?
5 Vaavo ninsoma nhu Nuulumo na Muluku ninnimwiiwa Yehova alottaka ni hiyo, masi wiira nidhuwele moonelo wa Yehova voohima dha mwaha mmodha ninaakanyera nhu nihaana othokodha. Etthu yoopacera nihaana osoma miyaha dha mBiibiliyani dhinvarihana ni mwaha ninaakanyera nhu. Ninoowerya opaka elo nirumeelaka ikaruma dhoovirikana ntthenkeso wa Yehova onnivaha awa wiira nithokodhe mwaha owo. (Mir. 2:3-6) Masi nihinatthi opaka elo, nihaana onvekela Yehova wiira anikhalihere odhuwela moonelo-ye voohima dha mwaha onnixankiha. Moottharelana, nihaana waadhya malakihero a mBiibiliyani ni matakihero a khalai a atthu yaatanke oviriha nxankiho mmodharu. Nitho osoma dhawiiraneya dha arumeyi a khalai anromoliwa mBiibiliyani yaatanke okhalana miyuupuwelo ni miyoonelo nrinhuna pooti onikhalihera vawaatta.
6. Orowela mithukumano on’ya onikhalihera dhai omaliha itthu ninaakanyera nhu?
6 Nitho ninnimwiiwa Yehova alottaka ni hiyo orweela wa mithukumano. Ndho vaavo nihinttompela nhu aahiidho olova mithukumano dhootheene, ninniwerya owiriyana miyaha ni ikomentaariyu dha anna ni arokora dheidho dhikhanle onikhalihera omaliha itthu ninaakanyera nhu. (Mir. 27:17) Vano nrowe noone itthu nikhanle nhu opaka akhala wiira dhookhala itthu dhikina ninaakanyera nhu.
WAAKANYERA AKHALA WIIRA YEHOVA ONNIWOONELANI VATTHU
7. Nikoho seeni woonawene atthu akina ampaka awa?
7 Niire mwaataka wiikoha wiira: ‘Kiire Yehova onnikoonela vatthu?’ Vaavo ntthu onoona iye wiira khiwaana efaita, pooti opacera wuupuwelela wiira khonweryaneya okhala nxirikha a Muluku. Woonawene Mwene Davidi aataka wuupuwelela dhiidho. Masi noomala odhuwela wiira Yehova onnaathokorerya apinaatamu aahinkoha Yehova wiira: “Khoo Yehova, pinaatamu ti pani wiira mmuthokoreryeke, nave mwaana a mutthu ti pani wiira mmuthokoreryeke?” (Esal. 144:3) Mun’ya ophwanya vaayi waakhuliwa wa nikoho aapanke Davidi?
8. Moovarihana ni 1 Samuweli 16:6, 7, 10-12, eseeni Yehova onoona iye wa atthu?
8 Biibiliya onninoonihera wiira Yehova onnaavaha efaita atthu ahinooneliwa vatthu. Mwa ntakihero Yehova aahinruma Samuweele wiira arowe ettheko ya Yese anthanle mwane mmodha yoowo an’ya okhala mwene a wiisarayeeli nhoolo. Noomala Samuweele ophiya, Yese aahiwiitthana ane 7 ohihela mpuwa mwane aari etthaako b yoowo aitthaniwa Davidi. Masi ohiya Yehova waathanla ale 7, owo anthanlale Davidi. (Munsome 1 Samuweli 16:6, 7, 10-12.) Yehova aahinthanla Davidi okhala wiira aahoona wiira aari rapasi aampheta vawaatta.
9. Eseeni enoonihera wiira Yehova onniwoonelani vatthu? (Moone-tho efootu.)
9 Moone moopora Yehova onoonihera iye wiira onniwoonelani vatthu. Owo onnoovahani miruku dhinvarihana ni makhalelo nnyu. (Esal. 32:8) Ndho elo enoonihera wiira Yehova onnoodhuwelani saana ni onnidhuwela itthu munramela nnyu. (Esal. 139:1) Vaavo munvarihela nnyu nteko miruku Yehova onoovahaiyeni ni woona moopora inookhaliherawani, munookhupali wiira mweekhweeli Yehova onnoovahani efaita. (1 Wah. 28:9; Miteko 17:26, 27) Yehova onnoona wiilipihera winyu wiira munrumeele. Owo onnoona mikhalelo dhinyu dhooreera ni onniwookolelani ntata wiira mwaataane nuuwo. (Yer. 17:10) Ndho Yehova ontthuna wiira mwaakhulele okhala nxirikha-ye.—1 Yohani 4:19.
‘Akhala wiira nnoomwaadhya Yehova, owo onawoohiya wiira mumphwanye.’ —1 Wah. 28:9 (Moone ettima 9) c
OKATHI NNAAKANYERA NNYU AKHALA WIIRA KHALAI MWAAHIPAKA DHOOTHANLA MWA MIRUKU
10. Vaavo nnuupuwela nhu dhoothanla nipanke nhu khalai makoho seeni woonawene akhanle okhumelela?
10 Ivaara dhikina atthu atanke opaka dhoothanla khalai, pooti opacera wiikoha akhala wiira yaahipaka dhoothanla dhooreera. Mwa ntakihero akina aahiya nteko waaphwanyiha nsurukhu wawaatta aahiidho nakoso wiira ewerye onrumeela saana Yehova. Woonawene noovira iyaakha vakhaani aahiidho okathi wawaatta awo pooti owoona atthu anaadhuwela awa eri oothaciri ni ekhalaka saana. Ndho elo pooti owiiriha wiikoha wiira: ‘Niire koopaka yoothanla yooreera kihiyaka itthu dhikina wiira kiwerye onrumeela saana Yehova? Niire yoothala kipankaka khekiirinhe oyelela okathi aka mahala, kayaka ovara itthu dhikina wiira kikhalena makhalelo ooreera?’
11. Eseeni yaanxankiha nlipa aatinkhe Esalimo 73?
11 Akhala wiira munniipakela makoho nkhama ala, muupuwele moopora oonenla iye nlipa aatinkhe Esalimo 73. Owo aahoona wiira atthu yahaanrumeela Yehova yaari oothaciri yahikhalana ekumi yooreera ni khiyaarina mixankiho. (Esal. 73:3-5, 12) Owo aaniwoona atthu awo ekhumelaka saana, ndho elo yaahimwiiriha woona wiira wiilipihera-we wiira anrumeele Yehova khiwaarina efaita. Owo aanixanka khuta nihiku mwaha wa muupuwelo owo waankhulumula. (Esal. 73:13, 14) Ndho eseeni aapanke iye wiira amalihe muupuwelo owo woohiloka?
12. Moovarihana ni Esalimo 73:16-18, nasaalimu aamalinhe dhai itthu dhanxankiha?
12 Nsome Esalimo 73:16-18. Nasaalimu ola aahivolowa nipuro nawaarya na empa ya Muluku. Ari opuro ole owo aahuupuwela saana mwaha owo, ndho aahoona wiira hata atthu awo yaakhala saana, mireerelo yaarawana dhari dha okathi vakhaani ni khiyaarina nlipelelo. Noomala wiiwasasa elo, aahiphwanya nrettele ni aahoona wiira aahipaka yoothanla yooreera, apwehaka nipuro noopacera yootthuna ya Yehova. Ndho elo, yaahilipiha yoolakela-ye ya ohihiya onrumeela Yehova.—Esal. 73:23-28.
13. Mun’ya owerya dhai ophwanya nrettele akhala wiira munnaakanyera wiira dhoothanla mwaapanke nnyu khalai dhaari dhooreera? (Moone-tho efootu.)
13 Akhala wiira nrina nxankiho mmodharu, nkhaliheriwaka ni Biibiliya nnoowerya ophwanya nrettele. Muupuwele mireerelo nrinnyuna ohela mpuwa waataana nrinnyuna ni Yehova. Mireerelo amphwanya awa atthu ahininrumeela Yehova, itthu olumwinku ola dhinaavaha awa. Atthu awo annivaha efaita okhulupale araawana ni mihakhu okhala wiira khaana nlipelelo na nhoolo. Moovirikana ni awo, Yehova khanlaihera wooreelihani nenna-va pahi, masi-tho onnilaihera woovahani mareeliho awaatta nhoolo nhinuupuwela nnyu. (Esal. 145:16) Ohiya-vo, muupuwele ela: Niire munnuupuwela moopora ekumi nnyu yaaya awa okhala vaakhanle wiira moopaka yoothanla yoovirikana ni ele mpanke nnyu? Masi nkhupali wiira ole ompaka dhoothanla mwaha wa ompheta Yehova ni atthu akina, onookhalana itthu onramela iye ni onoophwanya oohakalala.
Muupuwele mareeliho Yehova on’ya iye woovahani nhoolo (Moone ettima 13) d
OKATHI NNAAKANYERA NNYU WIIRA MOOKHALANA EFAITA WA YEHOVA
14. Mixankiho seeni arumeyi akina anviriha awa, ni nikoho seeni woonawene akhanla awa wiipakela?
14 Arumeyi akina a Yehova khanwerya opaka itthu dhikina nkhama khalai mwaha wa wuuluvala, owereiwa, aahiidho orakala. Ndho mwaha wa elo arumeyi akina pooti opacera waakanyera akhala wiira aakhalana efaita vamaithoni va Yehova. Woonawene awo pooti opacera wiikoha wiira: ‘Kiire miyo kookhalana efaita vamaithoni va Yehova?’
15. Eseeni aakhupali iye nlipa aatinkhe Esalimo 71?
15 Nlipa aatinkhe Esalimo 71 aahikhalana nxankiho mmodharu. Ndho elo yaahimwiiriha onvekela Yehova airaka: ‘Nhikinyanyale okathi ikuru dhaka dhin’ya awa okimalela’ (Esal. 71:9, 18) Hata nasaalimu aarina nxankiho owo, aanikhupali wiira akhala wiira khaahiya onrumeela Yehova moororomeleya, Yehova khaakhala-khala annyanyalaka ni ohiya onkhalihera. Ndho nasaalimu aahihudha wiira Yehova onnihakalala ni itthu ninwerya nhu opaka wiira ninrumeele, hata noonaka okhala vakhaani.—Esal. 37:23-25.
16. Eseeni enoonihera wiira atthu a wuuluvala akhalana efaita wa Yehova? (Esalimo 92:12-15)
16 Anna a wuuluvala muupuwele moopora Yehova onoonela iye nxankiho nnyu. Hata nhiiwerya-weryaka, Yehova onawookhaliherani okhala oolipa nkhalelo wa omunepani. (Nsome Esalimo 92:12-15.) Ndho nhuumelele wuupuwelela itthu nhinwerya nnyu opaka, masi muupuwelele idhe munwerya nnyu opaka. Mwa ntakihero nyuwo pooti waalipiha anna ni arokora mwaavahaka ntakihero nooreera ni waathokorerya saana. Nyuwo pooti opaka elo, mwaaleelaka moopora Yehova ookhalihenraiyeni khalai ni etthu enwiirihani okhupali wiira dhoolaihera dha Yehova dhiinawaakhwanela nhoolo. Ohiya-vo, nhiliyale wiira mavekelo nnyu pooti waakhalihera anna ni arokora.(1 Ped. 3:12) Ndho moohixikha makhalelo nhu, ootheene nhu nnoowerya onvaha etthu Yehova ni waakhalihera atthu akina.
17. Seeni ninreerela nhu oxaka yoolema ya wiilikanyiha ni atthu akina?
17 Akhala wiira munniriipiwa nrima mwaha wa ohiwerya waacerera nteko nninvarela nnyu Yehova, nkhupali wiira Yehova onnivaha efaita ele munwerya nnyu opaka. Nxake olikanyiha itthu mumpaka nnyu ni itthu ampaka awa atthu akina. Mwaha wa seeni? Okhala wiira Yehova khannilikanyiha ni atthu akina. (aGa. 6:4) Mwa ntakihero, Mariya aahinvaha Yeesu makhura a wunkhela ni awaatta nsurukhu. (Yohani 12:3-5) Moovirikana ni elo, naankhweli oohaawa aahivaha nsurukhu miili mutempulu yoowo waarina efaita vakhaani. (Luka 21:1-4) Masi ohiya Yeesu olikanyinha itthu yaapanke awa, owo ahoona itthu yaapanke awa athiyana ele aili nkhama enamuna ya woonihera waamini-wa. Mwa enamuna emodharu, Yehova onnivaha efaita itthu dhootheene munpaka nnyu wiira moonihere ompheta ni omwaamini, hata moonaka okhala itthu vakhaani.
18. Eseeni en’ya onikhalihera omaliha itthu ninaakanyera nhu? (Moone-tho ekwaaturu eni: “ Nuulumo na Yehova Nnawookhaliherani Omaliha Itthu Nnaakanyera Nnyu.”)
18 Ootheene nhu ivaara dhikina dhookhala itthu ninaakanyera nhu. Masi nkhama noonne nhu Nuulumo na Muluku, ninoowerya onikhalihera omaliha itthu ninaakanyera nhu. Ndho akhala wiira noopacera waakhanyera etthu emodha nipake itthu dhootheene ninwerya nhu wiira nimalihe itthu dhinnixankiha. Moohakanyera Yehova onnoocali. Nitho onnivaha efaita wiilipihera winyu wiira mpwehe nipuro noopacera Omwene ni onnilaihera wootthuvelani nhoolo. Tivondho nkhupali wiira Yehova onnoona okhala etthu yootthuneya waapheta ni waakhapelela arumeyi-ye.
NCIPO 111 Itthu Sinniiriha Ohakalala
a OTTHOKIHERIWA WA NUULUMO: Yoosoma ela, enlotta voohima dha itthu ninaakanyera nhu dheidho ikhanle oniiriha wiipakela makoho nkhama, akhala wiira nookhalana efaita wa Yehova ni akhala wiira dhoothanla nipanke nhu khalai dhaari dha miruku. Biibiliya khanoonihera wiira ntthu ompaka makoho awo, khanoonihera omwaamini Yehova vamodha ni dhoolaihera-dhe.
b Nnaamwi Biibiliya ahilottaka iyaakha aariyeena Davidi okathi Yehova anthanlale iye, woonawene Yehova aanthanlale Davidi ari rapasi—Mmoone A Sentinela a 1 a Setembro a 2011, epaaxi. 29, etti. 2.
