Kubalisa uYohane 11:1-57
11 Kwakukho indoda eyayigula. Le ndoda yayinguLazaro waseBhethani, ilali yakuloMariya nodadewabo uMarta.+
2 Lo Mariya ngulo wathambisa iinyawo zeNkosi ngeoli enuka kamnandi, waza wazisula ngeenwele zakhe.+ YayinguLazaro umntakwabo lo wayegula.
3 Ngoko oodadewabo bathumela umyalezo othi: “Nkosi, umhlobo wakho omthanda kakhulu uyagula.”
4 Emva kokuba uYesu eve loo nto, wathi: “Esi sigulo asizukuphelela ekufeni kwakhe, kodwa uThixo+ noNyana wakhe baza kuzukiswa ngenxa yaso.”
5 UYesu wayemthanda uMarta nodadewabo noLazaro.
6 Kodwa wahlala iintsuku ezimbini kwindawo awayekuyo emva kokuva ukuba uLazaro uyagula.
7 Emva koko wathi kubafundi bakhe: “Masibuyeleni kwaYuda.”
8 Abafundi bakhe bathi kuye: “Mfundisi,*+ usafuna ukuphindela pha, ngoku amaYuda ebefuna ukukubetha ngamatye?”+
9 UYesu wathi: “Andithi imini ineeyure eziyi-12?+ Ukuba umntu uhamba emini, akangqubeki ntweni, kuba uyakubona ukukhanya kweli hlabathi.
10 Kodwa ukuba umntu uhamba ebusuku, uyangqubeka, kuba ukukhanya akukho kuye.”
11 Emva kokuba etshilo, wathi kubo: “ULazaro umhlobo wethu ulele,+ kodwa ndiyokumvusa apho akhoyo.”
12 Abafundi bakhe bathi: “Nkosi, ukuba ulele uza kuphila.”
13 UYesu wayethetha ngokufa kwakhe, kodwa bona babecinga ukuba uthetha ukuba ulele ubuthongo.
14 Emva koko uYesu wayenza yacaca ngokuthi: “ULazaro ufile,+
15 ibe ndiyayivuyela into yokuba bendingekho apho, kuba le nto ndiza kuyenza iza kulomeleza ukholo lwenu. Masiyeni kuye.”
16 Ngoko uTomas, owayebizwa ngokuba nguWele, wathi kwabanye abafundi: “Nathi masihambeni, ukuze sife naye.”+
17 Wathi xa uYesu efika, wafumanisa ukuba uLazaro wayesele eneentsuku ezine engcwatyiwe.*
18 IBhethani yayimalunga neekhilomitha ezintathu* ukusuka eYerusalem.
19 Kwakukho amaYuda amaninzi awayezokuthuthuzela uMarta noMariya emva kokuswelekelwa ngumntakwabo.
20 Wathi akuva uMarta ukuba uYesu uyeza, wamhlangabeza; kodwa uMariya+ washiyeka endlini.
21 UMarta wathi kuYesu: “Nkosi, ukuba ubulapha umntakwethu ngengafanga.
22 Kodwa ndiyazi ukuba uThixo uza kukunika nantoni na oyicelayo.”
23 UYesu wathi: “Umntakwenu uza kuvuka.”
24 UMarta wathi: “Ndiyazi ukuba uza kuvuka xa kuvuswa+ abantu ngomhla wokugqibela.”
25 UYesu wathi: “Ndim uvuko nobomi.+ Lowo uzikholelwayo izinto endizifundisayo aze azenze, nokuba angafa uza kuphinda avuke;
26 ibe wonke umntu ophilayo, ozikholelwayo izinto endizifundisayo aze azenze akasoze afe.+ Uyayikholelwa le nto?”
27 Wathi: “Ewe, Nkosi; ndiyakholwa ukuba unguye uKristu uNyana kaThixo, lowo umele eze emhlabeni.”
28 Emva kokuba etshilo, wahamba wayokuthetha nodadewabo uMariya ecaleni, wathi kuye: “Ufikile uMfundisi,+ ibe uyakubiza.”
29 Wathi akuyiva loo nto, wakhawuleza waphakama, waya kuye.
30 UYesu wayengekangeni elalini, esekulaa ndawo wayedibene kuyo noMarta.
31 Xa amaYuda awayethuthuzela uMariya endlini, ambona ephakama ngokukhawuleza ehamba, amlandela ecinga ukuba uyokulila engcwabeni.*+
32 UMariya waya kulaa ndawo wayekuyo uYesu, wafika waziphosa ezinyaweni zakhe, wathi: “Nkosi, ukuba ubulapha, umntakwethu ngengafanga.”
33 Wathi uYesu akubona uMariya namaYuda awayekunye naye elila, intliziyo yakhe yabuhlungu, wakhathazeka kakhulu.
34 Wathi: “Nimbeke phi?” Bathi kuye: “Nkosi, yiza sikubonise.”
35 Zehla iinyembezi kuYesu.+
36 Wathi akukhala, amaYuda athi: “Jongani indlela ebemthanda ngayo!”
37 Kodwa amanye kuwo athi: “Wawavula nje amehlo omntu ongaboniyo,+ ebengenako ke ukwenza noLazaro angafi?”
38 Intliziyo kaYesu yaphinda yabuhlungu kakhulu, emva koko wasondela engcwabeni.* Elo ngcwaba lalingumqolomba, livalwe ngelitye.
39 UYesu wathi: “Susani eli litye.” UMarta, udadebomfi, wathi: “Nkosi, umele ukuba uyanuka ngoku, kuba sele kudlule iintsuku ezine eswelekile.”
40 UYesu wathi: “Bendingatshongo na kuwe ukuba uza kulubona uzuko lukaThixo ukuba uyakholwa?”+
41 Ngoko ke balisusa ilitye. Emva koko, uYesu wajonga ezulwini,+ wathi: “Tata, ndiyakubulela ngokuba undivile.
42 Kona kona, ndiyayazi ukuba uhlala undiva; kodwa ndiyithetha le nto ukuze aba bantu bandingqongileyo bandive, baze bakholwe ukuba ndithunywe nguwe.”+
43 Emva kokuba etshilo, wakhwaza kakhulu, wathi: “Lazaro, phuma!”+
44 Yaphuma le ndoda yayifile, ibotshwe izandla neenyawo ngamalaphu, nobuso busongelwe. UYesu wathi kubo: “Mkhululeni, nimyeke ahambe.”
45 Amaninzi kula maYuda awayeze kuMariya ayibona le nto, aza akholwa kuye,+
46 kodwa amanye aya kubaFarisi, abaxelela into eyenziwe nguYesu.
47 Ngoko ababingeleli abaziintloko nabaFarisi badibana kwiNkundla Ephakamileyo YamaYuda,* bathi: “Siza kuthini ngoku, kuba lo mntu wenza imimangaliso emininzi?+
48 Ukuba siyamyeka, abantu abaninzi baza kumlandela, aze amaRoma athathe indawo* yethu nohlanga lwethu.”
49 Kodwa omnye wabo, uKayafa,+ owayengumbingeleli omkhulu ngaloo nyaka, wathi kubo: “Nina aniyiqondi kakuhle le nto!
50 Aniboni na ukuba kungcono kufe umntu omnye, kunokuba kutshatyalaliswe uhlanga lonke?”
51 Le nto wayeyithetha yayingasuki kuye, kodwa kuba wayengumbingeleli omkhulu ngaloo nyaka, waprofeta ukuba uYesu wayeza kufela olu hlanga,
52 phofu engazukufela lona lodwa, kodwa eza kuqokelela ndawonye nabantwana bakaThixo abasasazekileyo.
53 Ukususela ngaloo mini, baceba indlela yokumbulala.
54 Ngoko ke, uYesu wayeka ukuhamba ekuhleni phakathi kwamaYuda. Wemka waya kummandla ongasentlango, kwisixeko ekuthiwa yiEfrayim,+ waza wahlala apho nabafundi bakhe.
55 Ngoku iPasika+ yamaYuda yayisondela, ibe abantu abaninzi basezilalini babesiya eYerusalem ngaphambi kokuba iqalise ukuze bazicoce.
56 Bamkhangela uYesu, baza bakudibana etempileni bathi: “Khawutsho, ucinga ukuba uza kuza kweli theko?”
57 Ababingeleli abaziintloko nabaFarisi babekhuphe umyalelo wokuba nabani na owaziyo ukuba uphi, umele atsho, ukuze bambambe.
Umbhalo osemazantsi
^ Okanye “Rabhi.”
^ Okanye “ekwingcwaba lenkumbulo.”
^ Ngokoqobo, “namabala emidlalo aseRoma ayi-15.” Funda Isihlomelo B14.
^ Okanye “kwingcwaba lenkumbulo.”
^ Okanye “kwingcwaba lenkumbulo.”
^ Okanye “kwiSanhedrin.”
^ Oko kukuthi, itempile.
