Kubalisa uYohane 10:1-42
10 “Ndiyaniqinisekisa ukuba, umntu ongangeni ngomnyango kwisibaya seegusha, osuka atsibe angene ngenye indlela, ulisela.+
2 Kodwa lowo ungena ngegeyithi, ngumalusi weegusha.+
3 Unogada wasemnyango uyamvulela lowo,+ neegusha ziyalimamela ilizwi lakhe.+ Uzibiza ngamagama iigusha zakhe, ziphume esibayeni zimlandele.
4 Xa zonke ziphumile, uhamba phambi kwazo, zize zona zimlandele, kuba ziyalazi ilizwi lakhe.
5 Soze zimlandele umntu ezingamaziyo, kodwa ziza kumbaleka, kuba azilazi ilizwi lakhe.”
6 UYesu wabenzela lo mzekelo, kodwa bona babengaqondi ukuba uthetha ukuthini.
7 UYesu waphinda wathi: “Ndiyaniqinisekisa ukuba, ndim igeyithi ezingena kuyo iigusha.*+
8 Bonke abo baye bazenza abalusi, bangamasela; kodwa iigusha khange zibamamele.
9 Ndim igeyithi; nabani na ongena ngam uza kusindiswa, ibe uza kungena ephuma aze afumane idlelo.+
10 Isela lizele kuphela ukuba libe, libulale, litshabalalise.+ Mna ndizele ukuba zibe nobomi obude.
11 Ndingumalusi olungileyo;+ umalusi olungileyo uncama ubomi bakhe, ebuncamela iigusha zakhe.+
12 Xa umntu oqeshiweyo, owalusa iigusha ezingezozakhe, ebona ingcuka isiza, ubaleka azishiye apho ezo gusha, ifike ingcuka izithi nqaku, zize ezinye zithi saa,
13 kuba uqeshiwe, ibe akanaxesha lazo.
14 Ndingumalusi olungileyo. Ndiyazazi izimvu* zam, nazo ziyandazi,+
15 kanye njengokuba uTata endazi,+ nam ndimazi; ndincama ubomi bam, ndibuncamela izimvu* zam.+
16 “Ndinazo nezinye izimvu,* ezingezizo ezesi sibaya;+ nazo ndimele ndize nazo, ibe ziza kumamela ilizwi lam, zize zibe ngumhlambi omnye, zibe nomalusi omnye.+
17 UTata uyandithanda,+ kuba ndincama ubomi bam,+ ukuze ndiphinde ndibufumane kwakhona.
18 Akukho mntu ubuthathayo kum, kodwa ndibunikezela ngokwam. Ndinegunya lokubunikezela, ndikwanalo negunya lokuphinda ndibufumane.+ Ibe ndilifumene kuTata.”
19 AmaYuda aphinda akavana+ ngenxa yezi zinto zazithethwa nguYesu.
20 Amaninzi kuwo ayesithi: “Unedemon ibe ushiywa ziingqondo. Kutheni nimmamela nje?”
21 Abanye babesithi: “La ayingomazwi omntu ophethwe yidemon. Idemon ingawavula njani amehlo omntu ongaboniyo?”
22 Ngelo xesha kwakukho itheko lokukhumbula umhla wokunikezelwa kwetempile eYerusalem. Kwakusebusika,
23 uYesu esetempileni kwiveranda kaSolomon.+
24 Ngoko amaYuda amngqonga aza athi kuye: “Kunini silindile! Ukuba unguye nyhani uKristu, sixelele.”
25 UYesu wathi kuwo: “Ndinixelele, kodwa anindikholelwa. Ndingqinelwa nayimimangaliso endiyenza egameni likaTata.+
26 Kodwa anindikholelwa, kuba anizizo izimvu* zam.+
27 Izimvu* zam ziyalimamela ilizwi lam; ndiyazazi ibe ziyandilandela.+
28 Ndizinika ubomi obungunaphakade.+ Soze zitshabalale, ibe akukho mntu unokuzihlutha kum.+
29 Izimvu* uTata andinike zona zibaluleke ngaphezu kwayo yonke enye into, ibe akukho mntu unokuzoxutha kuye.+
30 Mna noTata sibanye.”*+
31 Aphinda amaYuda achola amatye, efuna ukumbetha ngawo.
32 UYesu wathi kuwo: “Ndenze imimangaliso emininzi evela kuTata. Nindibethela owuphi?”
33 AmaYuda athi: “Asikubetheli mimangaliso, kodwa sikubethela ukudelela uThixo,+ kuba nangona ungumntu, uzenza uthixo.”
34 UYesu wathi kuwo: “Akubhalwanga na eMthethweni wenu kwathiwa, ‘Ndathi: “Ningoothixo”’?*+
35 Aninakuyijika into esezibhalweni.+ Ngoko ukuba wababiza ngokuba ‘ngoothixo’ abo libagwebayo ilizwi likaThixo,
36 nitsho njani ukuba ‘ndidelela uThixo,’ kuba ndithe ‘ndinguNyana kaThixo,’+ ekubeni inguye owandingcwalisayo waza wandithuma ehlabathini?
37 Ukuba andenzi kuthanda kukaTata, sanukundikholelwa.
38 Kodwa ukuba ndenza kona, yikholelweni ke imimangaliso endiyenzayo,+ nokuba anindikholelwa mna, ukuze nazi yaye nihlale nisazi ukuba uTata umanyene nam, nam ndimanyene noTata.”+
39 Ngoko amaYuda aphinda azama ukumbamba, kodwa wawaphepha wemka.
40 Waphinda waya phesheya kweYordan, apho uYohane wayebhaptiza khona kuqala,+ wahlala apho.
41 Abantu abaninzi beza kuye, besithi: “Akukho nomnye ummangaliso owenziwa nguYohane, kodwa zonke izinto awazithetha ngalo mntu ziyinyani.”+
42 Abantu abaninzi ababelapho bakholwa kuye.
Umbhalo osemazantsi
^ Okanye “izimvu.”
^ Okanye “iigusha.”
^ Okanye “iigusha.”
^ Okanye “iigusha.”
^ Okanye “iigusha.”
^ Okanye “Iigusha.”
^ Okanye “Iigusha.”
^ Okanye “simanyene.”
^ Okanye “NinjengoThixo.”
