Romhutu na marĩ “rowaꞌuꞌu dzaꞌẽtẽ” ne hã te dza wadzô tiwatobro dzaꞌra. Jesus ma tô watsuꞌu tahã ‘robdzépada hã ĩtsaꞌẽnẽ’. (Mateus 24:21) Tsadai õ di dza taha ĩwatobrodzé wi watsimani dzaꞌra da. Tane nherẽ, marĩ wa te ꞌmanharĩ waihuꞌu petse dzaꞌra di watsiꞌwawi ꞌre watsimapa dzaꞌra mono da. E marĩ.

Jesus ma tô dama rowahutu ãne: ‘Tahawa, uburé marĩ nhipai u atsima tsõré waꞌaba, ꞌRe ĩhöimana uꞌötsi mono [nhimirobꞌrudzé hã] duré uburé marĩ ꞌRe ĩhöimana uꞌötsi mono te te tsima ꞌre ĩwẽ mono dzé hã.’ (Mateus 6:33) E niha tahã wa dza ꞌmanharĩ dzaꞌra ni.

Ropotoꞌwa nhimirobꞌrudzéb dzô ĩmorĩꞌrata na ꞌre atsõpré mono. Tahã te watsuꞌu Ropotoꞌwa nhimirobꞌrudzé ĩhöimana da tsi marĩ danhipai u ĩpire na wahöimanadzém na. (Mateus 6:25, 32, 33) E marĩ wa, ĩmorĩꞌrata na wa dza wanhopré dzaꞌra ni Ropotoꞌwa nhimirobꞌrudzéb dzô. Dama ĩpire norĩ danhimirobꞌrudzéb ꞌremhã, ropire Tiꞌai ãma niwa te te uprotsi waihuꞌu dzaꞌra õ wa. Ropotoꞌwa nhimirobꞌrudzép tsi tahã te dza ãma uwaimra.

Ropotoꞌwai ma ĩbö dzô ꞌre atsõpré mono. Wa dza watsiwatsutu dzaꞌra ni Ropotoꞌwa nhimiroti dzarina ꞌre wahöimana dzaꞌra mono da. Watsiꞌuihö na wa te watsima pitsutu dzaꞌra wamhã marĩ ĩbö dzô, marĩ watsédé te natsi watobro. (Provérbios 16:25) Tadzahã, Ropotoꞌwa wa te wapari dzaꞌra wamhã, wa dza tãma rowẽ dzaꞌra ni duré wa dza watsima rowẽ dzaꞌra ni. — Isaías 48:17, 18.

Te dza atsima ꞌre atsõpré uꞌötsi. Ĩmorĩꞌrata na Ropotoꞌwa nhimirobꞌrudzéb dzô duré tãma ĩbö dzô. Jesus te te ĩwatsuꞌu tsirõmo dzéb dzarina, niꞌwam norĩ te te ꞌre tsawi dzaꞌra tinhimarĩ norĩ duré te rotsaꞌrata dzaꞌra robꞌuipradzé ahö wamhã ĩtsitsõꞌreptu dzaꞌra na dza. Ĩhöiba amo norĩ te tihötöꞌö petse dzaꞌra tiwi tsô ĩrowaptöꞌö dzaꞌra dzém na hã. Taha wa, õ norĩ hã bödö te te tsima pitsutu waihuꞌu õ di Ropotoꞌwa nhimirobꞌrudzéb dzô ꞌre tsõpré dzaꞌra mono da. — Mateus 6:19-21, 25-32.

 Tadzahã, Ropotoꞌwa nhimirobꞌrudzé te te ꞌre ĩꞌupari dzaꞌra mono norĩ ma hã, Jesus ma tô ropitsutu marĩ dzô dza tiwi ĩrowaptöꞌö dzaꞌra õ na ꞌre dahöimana dzaꞌra mono da. Duré ma tô tãma ropitsutu dzaꞌra Ropotoꞌwa dza tãma ĩtsõprub dzaꞌra na hã aptoꞌoré. — Mateus 6:33.

Jesus tsiré ꞌre ĩnomro mono norĩ hã ma tô tinhopré dzaꞌra Ropotoꞌwa nhimirobꞌrudzéb dzô duré tãma ĩbö dzô. Tadzahã, ꞌre höimana dzaꞌra mono ré hã, te te ꞌmadöꞌö dzaꞌra õ di ropire duré robdzépata tsiꞌutõrĩdzé. Tane nherẽ, ma tô ĩꞌwawi tatsimapa dzaꞌra ni. E niha.

Ropotoꞌwa nhimiroti dzarina ꞌre höimana dzaꞌra mono wa, robdzépata wi duré roꞌwaꞌréi wi Ropotoꞌwa nhimiroti te te ĩwapari dzaꞌra õ norĩ dzô ĩwatobro hã, Jesus tsiré ꞌre ĩnomro mono norĩ ma tô ꞌre tsipibui wẽ dzaꞌra. Ma tô tsimidzadze petse dzaꞌra Ropotoꞌwa nhimirobꞌrudzé wei watẽme ĩmorĩdzém na hã. Tahã ma tô pawaptob dzaꞌra ropire dzaꞌẽtẽ norĩ te te ꞌre ꞌwapé dzaꞌra mono da. Duré Ropotoꞌwa ma tô tãma tsõmri dzaꞌra danhiptede danhipai u ĩtsaꞌẽne hã ropire norĩ te te ꞌwapé waihuꞌu petse dzaꞌra da. — 2 Coríntios 4:7-9.

Jesus dzadawa dzamarĩꞌwa ꞌrata norĩ ma tô tinhopré dzaꞌra ĩmorĩꞌrata na Ropotoꞌwa nhimirobꞌrudzéb dzô. Ma tô dama roꞌmahörö dzaꞌra roꞌmahörö norĩ Ropotoꞌwa nhimirobꞌrudzém na tsiwaꞌru ꞌre ĩdahöimana dzaꞌra mono dzéb ãma. (Colossenses 1:23) Ã bötö na hã, e te tihöiba niꞌwa ãne ꞌre ĩhöimana mono hã.

Ĩhe! Jeová Watsuꞌuꞌwa norĩ ma, tãma waihuꞌu petse dzaꞌra di romhutu na Ropotoꞌwa nhimirobꞌrudzé dza te te ĩꞌuprotsi na ãhã romhöimanadzé ĩwatsédé. Taha wa, õ norĩ hã, te tsiwatsutu dzaꞌra ãhã Jesus mreme te te wapari dzaꞌra da: ‘ꞌRe ĩhöimana uꞌötsi mono [nhimirobꞌrudzé] watsuꞌu ĩwẽ uptabi hã, te dza ĩ̱dzadzeiꞌwa norĩ hã daro mono bö te te dama ꞌre watsuꞌu dzaꞌra, dawamri mono bö, da te oto wapari dzaꞌra da. Tawap tsi te dza oto tirobꞌrãtsutu.’ — Mateus 24:14.

E marĩ te dza ĩꞌmanha roꞌmahörö Ropotoꞌwa nhimirobꞌrudzém na wapari parimhã. Tsidzutsi duréihã Bereia ãma ꞌre ĩdahöimana dzaꞌra mono norĩ hã. Apóstolo Paulo te te tãma roꞌmahörö dzaꞌra wamhã roꞌmahörö Ropotoꞌwa nhimirobꞌrudzém na, ma tô tsadze dzaꞌra duré ‘ma tô wapari petse dzaꞌra’. Tawamhã, ‘ma tô ꞌRe ĩhöimana uꞌötsi mono mreme na Ĩbaihö ĩwadzé petse na robꞌuiꞌéré hã natsi tsõré dzaꞌra, Pauluhu nhimirowatsuꞌu hã tô tsena dzô.’ Taha parimhã, ma tô ꞌre höimana dzaꞌra te te ĩwaihuꞌu dzaꞌra dzéb dzarina. — Atos 17:11, 12.

A hã duré aiwa ꞌmanharĩ waihuꞌu petse di. Ĩmorĩꞌrata na Ropotoꞌwa nhimirobꞌrudzéb dzô duré tãma ĩbö dzô atsõpré wamhã, te dza ĩtsõpẽ ãhãna hã “daro ĩpipa nhiti”, duré te dza ꞌre aihöimana mo aptoꞌoré rowẽ ĩꞌuptabi na ĩpipa nhiti.