Niꞌwai me ꞌre aimorĩ wamhã, te dza ĩwaihuꞌu pe ĩhöimanadzé. Ãne atsiwaihuꞌudzé õhõ ãma te dza tinhiptete. Ãne duré, Jeová me ꞌre aimorĩ wamhã te dza ĩwaihuꞌu pe ĩhöimanadzé duré atsiwaihuꞌudzé õhõ ãma te dza tinhiptete. Ropotoꞌwa höimanadzé ĩwẽ ahö di. Ta norĩ ꞌremhã maparane tsiꞌuiwana, danhipai u ĩpire: tsiptete di, tsimidzaꞌretse di, ĩbö na te ꞌre höimana duré tsimidzawi petse di.

‘Duréihã ĩtsãnaꞌrata hawimhã, ꞌRe ĩhöimana uꞌötsi mono, ma tô te te roꞌapoto, tiwaihuꞌu petse na.’ — ROMANOS 1:20.

Ropotoꞌwa nhimiropodo te höiꞌré ĩtsiptetedzé ĩtsaꞌẽtẽ uptabi na. Ãma ĩtsimiré atsõrõwa rowimhã atsãmra wamhã, e ma hawimhã rowaꞌrodzé. Bötö hawimhã. Jeová bötö potoꞌwa, tawamhã ꞌmadöꞌö waihuꞌu petse di Jeová nhiptetedzé bötö poto na hã. E niha ĩtsiptede bödö hã. Taré waihuꞌu da, ãma rotsaꞌrata pidza ö ĩtsidotodo ré hã. Waꞌro uptabi di. Bötö ꞌremhã waꞌro uptabi di taha nhipai u. Duré mitsi segundo na bödö hã te tsani tinhiptetedzé aiwa wanoꞌõ tsipo ahö uptabi ne.

Tane nherẽ wate bödö tsuru di watsi ahö uptabi dzaꞌra ma hã. Ãma ĩtsimiré, watsi UY Scuti tsaꞌẽtẽ uptabi di. Romnhoré petse ꞌwa norĩ ma tô waihuꞌu dzaꞌra tahã 1.700 na wate bötö nhipai u ĩtsaꞌẽtẽ na. Waihuꞌu da ãhã watsi ĩtsaꞌẽtẽdzé, ãhã höimana ꞌwaꞌöhã wate bötö upana, Tiꞌa hã, Marte duré Júpiter te aré tihöimana dzaꞌra ĩꞌremhã. Taha dzarina, wa te tsadaihuꞌu wapu di Ropotoꞌwai mreme te te ĩnharĩdzé, Ropotoꞌwa Jeová tinhiptetedzé ĩtsaꞌẽtẽ na hã, te te ĩpoto na hã höiwa, Tiꞌa duré uburé ĩhöimana hã.

E niha Ropotoꞌwa nhiptetedzé wapawaptobdzé. Wahöimanadzéb da hã ĩré da tsi Ropotoꞌwa nhimiropodo, ãma ĩtsimiré bödö duré marĩ ĩwẽ uptabi Tiꞌai ꞌremhã ĩhöimana dzaꞌra. Duré, tinhiptetedzém na Ropotoꞌwa te dapawapto dahöiba mono bö. E niha. Jesus Tiꞌai ãma ꞌre morĩ ré, Ropotoꞌwa ma tãma titsõ tinhiptetedzé marĩ dama ĩꞌmanharĩ waihuꞌuꞌõ te te ꞌmanharĩ da. Ropotoꞌwai mreme te tinha: ‘Ĩtobꞌa norĩ hã ma tô tito petse dzaꞌra. Ĩmorĩꞌõ norĩ hã ma tô tiwahutu dzaꞌra. Ĩꞌwaꞌre ré norĩ hã ma tô tihöiba petse  dzaꞌra. Ĩpoꞌreptõ norĩ hã ma tô tipoꞌre petse dzaꞌra. Ĩdöꞌö norĩ hã apö te ꞌre höiwaꞌutu dzaꞌra.’ (Mateus 11:5) E marĩ bété Ropotoꞌwa te wama ꞌmanharĩ dzaꞌra ã bötö na. Ropotoꞌwai mreme te höiꞌré te te ĩtsiptete na hã ĩwatsudu hã. Te duré tinha : ‘Uburé marĩ hã te ꞌre abꞌmanharĩ waihuꞌu petse mono di, ꞌre ĩ̱nhiptete mono ꞌwa hã te te ꞌre ĩ̱nhiptete mono wa.’ (Filipenses 4:13) Taha nhipai u Ropotoꞌwa te te wama tsõmri waihuꞌu petse di ‘ĩwaihuꞌu pe hã’ ropire wa te ꞌwapé dzaꞌra da. (2 Coríntios 4:7) Duré aima wẽ di atsiwaihuꞌu da Ropotoꞌwa tinhimidzawi na tinhiptetedzé ĩtsaꞌẽtẽ uptabi na te te ĩwapawaptob dzaꞌra ãma.

‘Uburé Danhibꞌapito, a hã ma tô marĩ ahö uptabi na ĩꞌaꞌmanharĩ mo! Atsimirowaihuꞌu dzaꞌẽtẽ na ma tô uburé marĩ hã ĩꞌapoto mo.’ — SALMO 104:24.

Ropotoꞌwa nhimiropoto na wa te romnhoré dzaꞌra wamhã, wa ãma watobꞌudzu dzaꞌra ni ĩtsimidzaꞌretsedzém na. Romnhoré petse ꞌwa norĩ te romnhoré dzaꞌra Jeová nhimiropoto na te te tsidzutsi dzaꞌra da tinhimiromhuri na marĩ ĩwapu daꞌudza tsitétédzém ne duré marĩ ĩtsaꞌẽne höiwi ne.

Wa ãma watobꞌudzu dzaꞌra ni Ropotoꞌwa nhimidzaꞌretsedzém na dahöiba ꞌmanharĩdzém na. Rotsaꞌrata aꞌö aiꞌuté prédubdzém na. Piꞌõ watsã wamhã mitsi dahöibarére te dza tsiꞌmanha dawatsã na. Ãhã dahöibarére ꞌremhã ĩré hã uburé rowaihuꞌudzé dahöiba tsiꞌmanharĩdzéb da hã. Ãhã dahöibarére te dza tsina ꞌre höꞌö. Ãne wamhã dahöibarére norĩ te tsihöiba dzama dzaꞌra. Tadzahã bödö ĩbö ãma dahöibarére norĩ te dza tsitsaprĩ dzaꞌra aimawi na dahöiba waꞌõtõ dzarina. Ãma ĩtsimiré dawapru ꞌmanharĩdzéb da, daꞌrãihiwanhana ꞌmanharĩdzéb da, dahi ꞌmanharĩdzéb da. Nimahã bötö pari, dahöiba waꞌõno te dza tsiwi tsiꞌmanha duré te dza romhuri dzaꞌra. Tawamhã 9 aꞌamoi ꞌre, õhõ dahöibarére ĩmorĩꞌrada te dza tsiꞌmanha aiꞌuté na ĩꞌmanharĩ hã dahöibarére ahö uptabi na. Danhimidzaꞌretsedzé ĩhöimana dzarina ãhã watobro da, daꞌahö na te tsadze dzaꞌra ni Bíblia nhihötöꞌwa te te ĩnharĩdzém na: “Wa aiꞌãma ĩ̱wata wẽ uptabi na, datobꞌudzudzém na, ĩ̱poto wa. Atsimiromhuri mono hã wẽ uptabi di, Ĩ̱ma waihuꞌu petse di.” — Salmo 139:14 TNM.

E niha Ropotoꞌwa nhimidzaꞌretsedzé wapawaptobdzé. Wapotoꞌwai ma waihuꞌu petse di wawi tsô ĩrowaptöꞌödzé wama robdze dzaꞌra da. Tinhimidzaꞌretse dzaꞌẽtẽ na duré tinhimirowaihuꞌu na te wama roti dzaꞌra timreme hawi, Bíblia hawi. Ãma ĩtsimiré, Bíblia te wama roti dzaꞌra: ‘Marĩ na atsina ꞌre upa dzaꞌra waꞌaba mono wamhã, atsiꞌãma ꞌre ꞌmadöꞌö dzaꞌra waꞌaba mono tõ.’ (Colossenses 3:13) E ãhã roti ĩwẽ. Tô tsena! Romnhoré te höiꞌré dzaꞌra daꞌruiwapariꞌõ danhotõ wẽ dzé, dawapru wati wẽ dzé duré robdzeiꞌõdzé ĩtsaꞌẽtẽ wi datsiꞌmadöꞌödzé, duré te pawapto marĩ ĩhöiba amo norĩ na. Ropotoꞌwa watsiwaihu ĩtsimidzaꞌretse na te waꞌãma rotsaꞌrata dzaꞌra duré te wama roti wẽ dzaꞌra. (2 Timóteo 3:16, 17) E aima wẽ di ãma atsiwaihuꞌu da.

‘Uburé Danhibꞌapito, ĩꞌuwaibaba na tsi te te dama ꞌre ĩrowairébé mono dzé hã.’ — SALMO 119:75.

Ropotoꞌwa ĩbö tsi te te ꞌre ꞌmanharĩ mono. Bíblia te tinha Jeová ãma: ‘A hã uburé petse daꞌãma ꞌre ĩrowairébé mono ꞌwa te ꞌre aihöimana mo. Taha wa te dza ĩꞌuwaibaba na tsi niha na dama ꞌre ĩꞌabꞌmanharĩ mo.’ (Gênesis 18:25) Jeová nhimirowairébédzé  mono ĩbö tsi. Taha wa Bíblia te duré ãma tinha: “Marĩ na upai ãna te ĩꞌuwaibaba tsi dama ꞌre ĩꞌarowairébé mo, tsena na.” (Apocalipse 16:7) Wapẽꞌẽ ꞌre te te ꞌre ꞌmadöꞌö waihuꞌu petse mono wa, wahöimanadzé Jeová wi wa te udö waihuꞌu õ di. (1 Samuel 16:7) Tô tsena hã tãma waihuꞌu petse uptabi di, taha wa ĩbö na te te ꞌre rowairébé uꞌötsi. Taha nhipai u, Ropotoꞌwa te te ꞌmadöꞌö waihuꞌu petse di uburé rowatsédé duré marĩ ĩböiꞌõ dama ĩꞌmanharĩ hã, duré te ropitsutu romhutu na ĩwatsété norĩ te te uprotsi da. — Provérbios 2:22.

Tadzahã, Ropotoꞌwa Jeová rowairébéꞌwa tsahi õ di taré te te ĩwahö dze. Tsada wamhã, dawatsédé te te daꞌãma ꞌmadöꞌö õ di. Bíblia te tinha Jeová ‘ĩwẽ tsi te te dama ꞌre ĩꞌabꞌmanharĩ uꞌötsi mono na hã duré da ãma ꞌre ĩtsiwamri uꞌötsi mono na hã’ ĩwatsété norĩ ma nherẽ tsiꞌruiwapari dzaꞌra wamhã. E te ãma ĩtsadze tô tsena tahã dahöimanadzé ĩbö na tsi. — Salmo 103:8; 2 Pedro 3:9.

E niha Ropotoꞌwa höimanadzé ĩbö wapawaptobdzé. Ropotoꞌwa aiwaptsi te te ꞌre abꞌmadöꞌö mono. Taha wa, te wapawaptob dzaꞌra ni ĩhöimanadzé ĩbö na. Apóstolo Pedro te tinha: ‘ꞌRe ĩhöimana uꞌötsi mono hã aiwaptsi te te ꞌre ĩdaꞌaꞌmadöꞌö mono na hã. Uburé dapoto mono bö te te ꞌre awaibui wẽ, niꞌwam norĩ te te ꞌre ĩwadzé petse dzaꞌra mono norĩ hã duré marĩ ĩꞌuwaibaba tsi te te ꞌre ĩꞌmanharĩ dzaꞌra mono norĩ hã.’ (Atos 10:34, 35) Tawamhã tsada hã aihĩni norĩ ma, dapoto mono bö, daro mono bö, te te ĩromnhoré dzaꞌra norĩ te te ĩromnhoré dzaꞌra õ norĩ, ĩtsimarĩꞌõ norĩ, ĩtsibꞌro petse norĩ, Ropotoꞌwai ãma tsiwaihuꞌu dzaꞌra da duré te te tãma romhuri dzaꞌra da.

Ropotoꞌwa te tsima wẽ wahöiba mono bö wa te tsadaihuꞌu dzaꞌra da e niha ĩbö na te ꞌre höimana duré ãhã tihöimanadzé ĩwẽ na te te wapawaptob dzaꞌra da. Taha wa watsitsãmridzé ma wama tsõmri dzaꞌra. Ropotoꞌwai mreme te ãma tsimiréꞌé datsitsãmridzé roti dapẽꞌẽ ꞌrem ne ꞌre watsitsãmri dzaꞌra mono da wahöimanadzém na ĩwẽ dzô duré ĩwatsété dzô. (Romanos 2:15) E niha tahã te wapawaptob dzaꞌra. Watsitsãmridzé ĩwẽ na watsitsanho dzaꞌra wamhã te dza wapawaptob dzaꞌra marĩ duré dahöimanadzé ĩwatsédé wa te wẽꞌõ dzaꞌra da. Duré marĩ na wa te upa dzaꞌra wamhã te dza warétsi dzaꞌra watsiꞌruiwapari dzaꞌra da duré wawatsété wi watsipidzari dzaꞌra da. Tô tsena Ropotoꞌwa höimanadzé ĩbö wa te waihuꞌu dzaꞌra wamhã tahã te dza wapawaptob dzaꞌra duré ĩtẽme wa dza watsina rotété dzaꞌra ni!

‘Ropotoꞌwa tsimidzawi petse di.’ — 1 JOÃO 4:8.

Ropotoꞌwa te höiꞌré tinhiptetedzé, tinhimidzaꞌretsedzé duré tihöimanadzé ĩbö ĩtsaꞌẽtẽ na, tadzahã Ropotoꞌwai mreme te tinha dadzawi ĩhöimanadzé danhipai u ĩpire na hã. E marĩ wa. Ropotoꞌwa te te romhuri waihuꞌu petse di tinhiptetedzéb uꞌöbö; ĩhöimanadzé ĩbö duré ĩtsimidzaꞌretsedzé te tsaprõ te te ꞌre ĩꞌmanharĩ mono dzé; tadzahã Jeová nhimidzawidzé te rétsi te te ꞌre ĩꞌmanharĩ mono dzé. ꞌMadöꞌö e niha Ropotoꞌwa te höiꞌré tinhimidzawidzé hã uburé te te ꞌre ĩꞌmanharĩ mono dzém na hã.

Marĩ tiwi tsô rowaptöꞌö õ nherẽ tinhimidzawidzéb dzarina Jeová ma poto dahöiba rowaihuꞌu ré tiꞌai ãma duré höiwa ãma. Ta norĩ te tsima wẽ dzaꞌra ĩtsimidzawidzém na duré ĩtsimiꞌmadöꞌödzém na. Tinhimidzawidzéb dzarina ma tô duré ꞌmanha tiꞌa hã ĩwẽ uptabi ãma ꞌre ĩdahöimana dzaꞌra mono dzéb da hã. Danhipai u Ropotoꞌwa dzahadu te te ꞌre höiꞌré tinhimidzawidzé aihĩni dama. Ropotoꞌwai mreme te tinha: ‘Tahã bödö hã te te ꞌre robꞌuiwẽ mono da, te te ꞌre ꞌmanharĩ mono wa, ĩwẽ norĩ ma, duré ĩwatsété norĩ ma dzama. Tahã te duré tãi ma te te ꞌre robꞌru, te te ꞌre robdiꞌi mono da, marĩ ĩwẽ te te ꞌre ĩꞌmanharĩ dzaꞌra mono norĩ ma hã, duré marĩ ĩwatsédé te te ꞌre ĩꞌmanharĩ dzaꞌra mono norĩ ma dzama.’ — Mateus 5:45.

Jeová duré ‘daꞌãma ꞌre pẽꞌẽdzé petse mono di duré daꞌãma tsiba petse di.’ (Tiago 5:11) Tãma tsawi di aihĩni ĩtsiwatsutu dzaꞌra norĩ te te ĩwaihuꞌu dzaꞌra da duré ĩtẽme te te tsina rotété dzaꞌra da. Ropotoꞌwa te daꞌãma rotsaꞌrata dahöiba mono bö. Tô tsena õ hã ‘te te ꞌre aiꞌmadöꞌö uꞌötsi’. — 1 Pedro 5:7.

E niha Ropotoꞌwa nhimidzawidzé wapawaptobdzé. Wa robꞌmadöꞌö dze dzaꞌra ni bötö dzébrédzé. Wa duré watsima robdze dzaꞌra ni aiꞌuté tsihö wamhã. Duré wama rowẽ dzaꞌra di watsitsãnawã norĩ ma wadzawi dzaꞌra wamhã. Tsada hã ꞌre wahöimana dzaꞌra mono da ta norĩ ãna. Tane nherẽ, ãhã danhibdzari norĩ ré Ropotoꞌwai hawi wahöimanadzém na wama danhipai u rowẽ di.

Ropotoꞌwa te duré wama tinhoprub dzaꞌra tinhimidzawidzéb dzarina marĩ ĩhöiba amo na: rowaptẽrẽ. Ropotoꞌwai mreme te tinha: ‘Marĩ na ꞌre aihötöꞌö dzaꞌra waꞌaba mono tsina ꞌre anomro aba mono tõ. Tadzahã, ꞌRe ĩhöimana uꞌötsi mono wi tsi ꞌre rowaptẽrẽ dzaꞌra waꞌaba mono, tsipuꞌu petse na marĩ aiꞌãma ꞌre ĩhöimana dzaꞌra waꞌaba mono na hã. Ãne hã ꞌre ꞌmanharĩ dzaꞌra waꞌaba mono, ãma ꞌre aiwata dzaꞌra waꞌaba mono tsina.’ Ropotoꞌwa damama tsimidzawi petse di. Õ hã te tsima wẽ ĩtsimipawaptob dzéb dzô ꞌre warĩtĩ dzaꞌra mono da ꞌröwi wapẽꞌẽ na wahötöꞌö dzaꞌra mono wamhã. Ãne wa te ꞌmanharĩ dzaꞌra mono wamhã, Jeová tinhimidzawi dzaꞌẽtẽ na te dza wama tsõmri dzaꞌra ĩte rowẽ uꞌö ‘niꞌwa te te ĩtsadaihuꞌu õ.’ — Filipenses 4:6, 7.

E ãhã ãma ĩrowatsuꞌudzé ĩꞌrudu Ropotoꞌwa höimanadzém na — ĩtsiptetedzém na, ĩtsimidzaꞌretsedzém na, ĩhöimanadzé ĩbö na duré ĩtsimidzawidzém na — ma tô aipawapto waihuꞌu petse da e niha Ropotoꞌwa. Tawamhã Ropotoꞌwa waihuꞌu petse da, wa atsô wahörö dzaꞌra ni uptsibi me da Ropotoꞌwa oto te te aima ĩꞌmanharĩdzé duré dzahadu dza te te aima ĩꞌmanharĩdzé aptoꞌoré.