Salmu 94:1-23
94 Uburé Danhibꞌapito, a hã ꞌRe ihâimana uꞌâsi mono, dama ꞌre iꞌarobꞌmanharĩ mono ꞌwa na ꞌre iꞌaihâimana mono!Maꞌãpé ꞌre iꞌasimiꞌruiwaꞌâbâ mono zém na hã asihâiꞌré na.
2 A hã te uburé tiꞌai ãma daꞌãma rowairébéꞌwa na ꞌre aihâimana mo.Tahawa, maꞌãpé ꞌre isiꞌmadâꞌâ ze zaꞌra mono norĩ ma, niha na tãma robꞌmanharĩ zaꞌra na, tô ibâ na marĩ te te ꞌre iꞌmanharĩ zaꞌra mono zéb zarina.
3 E momo te za wasété na ꞌre inomro mono norĩ, te te sima ꞌre iromhuꞌu zaꞌra mono zé hã tiꞌrãsutu. Uburé Danhibꞌapito, e momo te za tô ãne hã ꞌrãsutu zaꞌra.
4 E niwa te za ꞌrâwi ꞌre isiꞌmadâꞌâ ze zaꞌra mono zéb zarina, timreme na dama ꞌre isiwasuꞌu zaꞌra mono zé hã tiꞌrãsutu.E niwa te za duré marĩ te te ꞌre iꞌmanharĩ wasété zaꞌra mono na ꞌre isiꞌuze zaꞌra mono zé hã tiꞌrãsutu.
5 Uburé Danhibꞌapito, õ norĩ hã te asibꞌaꞌuwẽ hã te te ꞌre wati uꞌâsi zaꞌra.Te duré aima ꞌre ihâimana zaꞌra mono norĩ te te ꞌre robzépata zaꞌra mono da hã te te tãma ꞌre robꞌmanharĩ wasété zaꞌra.
6 Ta norĩ hã te duré imrotõ piꞌõ norĩ, duré imamaꞌõ norĩ te te siwi ꞌre simro.Wanhiptiꞌai ꞌre wasiré aꞌuwẽꞌõ ꞌre isiꞌubumroi mono norĩ hã te duré te te siwi ꞌre simro.
7 Tahawa, te ãne te te sima ꞌre nharĩ zaꞌra: “Uburé Danhibꞌapito hã te te ãma ꞌre waꞌmadâꞌâ zaꞌra mono õ di.Izaraéu nhihudu norĩ te, ꞌRe ihâimana uꞌâsi mono hã, ãne na hã te te ꞌre iwaihuꞌu mono da hã mare di.”
8 Isimizaꞌreseꞌõ norĩ, asima sô asõpré waꞌaba, marĩ waihuꞌu zaꞌra waꞌaba da hã!E niwa te za asimizaꞌrese na ꞌre iꞌaihâimana zaꞌra waꞌaba mono zéb da hã asima iwaihuꞌu zaꞌra waꞌwa.
9 E dapoꞌre ꞌmanharĩꞌwa hã ꞌre simipari mono õ di bété. Te ꞌre simipari!E datõmo ꞌmanharĩꞌwa hã marĩ te te ꞌre aꞌmadâꞌâ mono õ di bété. Te te ꞌre aꞌmadâꞌâ tô!
10 E daro mono bâ aꞌuwẽ te te ꞌre iꞌahâ zaꞌra mono ꞌwa hã te za tinhimihâzém na hã te te dama ꞌre abaꞌa.Duré uburé dama rowaihuꞌu wẽ nhomriꞌwa hã e te ꞌrãnhimizaꞌrese ãna ꞌre hâimana bété. Mare di.
11 Danhimirosaꞌrada hã, Uburé Danhibꞌapito ma, waihuꞌu pese di.Duré tarére na da te ꞌre irosaꞌrata zaꞌra mono zé, tãma hã waihuꞌu pese di.
12 Uburé Danhibꞌapito, ꞌre iꞌahâ zaꞌra mono norĩ si te za rowẽ na to sina ꞌre nomro, asimiroti na ãma tãma ꞌre irowasuꞌu zaꞌra mono norĩ hã.
13 Bâdâ iwasédé, sô ꞌre isihutu mono ꞌremhã te za rowẽ na to sina ꞌre inomro mono da hã tãma ꞌre iꞌabaꞌa mo.Tane nherẽ, iwasété norĩ zô hã te za abꞌre norĩ, sô ꞌre siꞌridawa zaꞌra.
14 Uburé Danhibꞌapito hã tinhibꞌaꞌuwẽ te te ꞌre arẽme mono õ di za.Tãma ꞌre ihâimana zaꞌra mono norĩ hã te te ꞌre aꞌmadâꞌâ rẽme mono õ di za.
15 Ãne wamhã, te za dama rowairébézé sena na ꞌre hâimana.Tahawa, uburé sena na ꞌre ihâimana zaꞌra mono norĩ hã te za dama rowairébé wẽ zé hã te te sina ꞌre wẽsãmri zaꞌra.
16 E ꞌwa hã sirési bâ, iwasété norĩ zada, ĩꞌãma isiꞌmadâꞌâ para ĩꞌupana sab da hã.Duré e ꞌwa ma tô ĩzababamhã tihâiba, iwasédé te te ꞌre iꞌmanharĩ zaꞌra mono norĩ zada, hâimana da hã.
17 Uburé Danhibꞌapito te te ĩpawaptob õ ꞌwaꞌâhã, wa aré tiꞌa ꞌrowi ariꞌiwi pese ꞌre idanhimiꞌwara mono zéb ãma hã ꞌre ĩzaꞌwari.
18 Uburé Danhibꞌapito, ĩsiꞌmarõwĩrĩ da, ĩzai praba ne, oto ĩdâꞌâ da, ĩsiwaihuꞌu wamhã, asimizawizé hã ma tô ĩꞌupa.
19 Ĩpẽꞌẽ ꞌre ĩhâtâꞌâ zaꞌẽtẽ na ꞌre ĩhâimana mono wamhã, te a hã ꞌre ĩpẽꞌẽ tété uꞌâsi mo. Te duré saꞌẽtẽ na ĩpẽꞌẽ to ĩma ꞌre isõmri mo, ĩpẽꞌẽ ꞌremhã.
20 A hã, senaiꞌõ na daꞌãma rowairébéꞌwa norĩ hã ꞌre awẽsãmri mono õ di.Ta norĩ hã te senaiꞌõ na roti zarina te te dawi ꞌre rowamnarĩ zaꞌra ãma.
21 Sena na ꞌre ihâimana zaꞌra mono norĩ zada, te ta norĩ hã tinhimirowaꞌõno te te sima ꞌre ꞌmanharĩ zaꞌra.Te duré iharé na si ꞌre ihâimana zaꞌra mono norĩ ma, te te tãma ꞌre rowairébé zaꞌra, ꞌre dâꞌâ zaꞌra mono da hã, ibâi õ nherẽ.
22 Tane nherẽ, Uburé Danhibꞌapito te ꞌri ꞌrãihâ isiptete ne, ĩma ꞌre hâimana.Ta hã te ẽtẽ tõmo wawẽ ne ĩma ꞌre hâimana, ĩꞌwawi ꞌre isimapa mono ꞌwa na hã.
23 Tawamhã ꞌRe ihâimana uꞌâsi mono te za ã hã daꞌãma rowairébéꞌwa norĩ nhisiwi iwasété ꞌmanharĩ zaꞌra zé waptãꞌã da hã tãma pisutu zaꞌra.Uburé Danhibꞌapito, wate ꞌRe ihâimana uꞌâsi mono hã te za uprosi, isimiꞌmanharĩ wasété zaꞌra uꞌâbâmhã.
