Salmu 8:1-9
Davihi nhoꞌre
8 Uburé Danhibꞌapito, Wanhibꞌapito zaꞌra, daro mono bâ ma tô asisi zaꞌẽtẽ na hã da te ꞌre aiwaihuꞌu zaꞌra.Duré aiꞌãma ꞌre idawata zaꞌra mono zé hã te hâiwa u ꞌre zasi.
2 Aiꞌuté norĩ, duré dapam norĩ zama te tizaihâ na asisi zaꞌẽtẽ na hã ꞌre wata zaꞌra.A hã ma tô ꞌri isiptede hã asima iꞌmanha, asitobꞌru norĩ wi asiꞌwawi ꞌre aimapa mono da hã, uburé asada ꞌre ihâimana zaꞌra mono norĩ hã ꞌre aꞌuprosi mono da.
3 Wa hã hâiwa u te aꞌmadâꞌâ wamhã, asimipoto norĩ hã, aꞌamo hã, duré wasi norĩ, tite mono bâ ꞌre isimasa mono iꞌazaꞌra hã,
4 wa ꞌre ĩnhinharĩ ãne: E niha te aꞌuwẽ norĩ ãma aima tarére nherẽ, ãma ꞌre iꞌarosaꞌrata zawi uꞌâsi mo.E niha te duré tane nherẽ, ãma ꞌre aihâtâꞌâ zaꞌra mo, ꞌre pawaptob zaꞌra mono da hã.
5 A hã, aꞌuwẽ asahâpâp si pire prã na ꞌre hâimana zaꞌra mono da hã, ma tô iꞌaꞌmanha.Duré marĩ ma, pire na siptete na sidanhibꞌihâꞌa zaꞌra da hã, ma tô tãma isõmri zaꞌra.
6 Uburé asimipoto norĩ ma, siptete na ꞌre hâimana zaꞌra mono da hã, ma tô iꞌapisu.Ma tô duré uburé marĩ hã ipara ꞌrowib zaꞌra iꞌanhoré mo,
7 poneꞌẽrebâ norĩ hã, powawẽ norĩ hã, duré uburé rom na abaze norĩ hã,
8 si norĩ hã, tepe norĩ hã, duré uburé â ꞌrowi ꞌre inomro mono norĩ hã.
9 Uburé Danhibꞌapito, Wanhibꞌapito zaꞌra, daro mono bâ ma tô asisi zaꞌẽtẽ na hã da te ꞌre aiwaihuꞌu zaꞌra.
