Salmu 112:1-10
112 Uburé Danhibꞌapito ãma ꞌre wawata uꞌâsi zaꞌra waꞌaba mono!Niꞌwa, Uburé Danhibꞌapito wazép sina ꞌre isãmra mono hã, duré isimiroti te te ꞌre iwapari zei uꞌâsi mono hã te za to sina ꞌre hâimana.
2 Taha nhihudu norĩ hã te za tiꞌa na ropisutu téb ãma siptete na ꞌre hâimana zaꞌra.Te za duré rowẽ na si ꞌre hâimana zaꞌra, ta norĩ hã.
3 Isõrõwa ãma hã simarĩ ahâ uptabi di.Duré õhõ ma, te za ꞌre ihâimana wẽ mono zé waꞌrãmimhã iwẽ na si marĩ hã tãma ꞌre pusi.
4 Sena na ꞌre inomro mono norĩ ma, te robꞌuiwẽzé robra na hã te te tãma ꞌre rowaꞌa zaꞌra, wẽ na te te dama ꞌre iꞌmanharĩ zaꞌra mono norĩ ma, duré daꞌãma ꞌre isiwamri wẽ zaꞌra mono norĩ ma, duré iꞌuwaibaba na si ꞌre inomro mono norĩ ma.
5 Niꞌwa hã, marĩ da te tiwi waptẽrẽ wa, sõprum na aꞌâ iwaꞌrãmib zô te te dama isõmri hã te za toi uꞌâsi ꞌre sãmra.Sena na tinhimarĩ na te te ãma ꞌre iromhuri mono hã te za duré toi uꞌâsi ꞌre sãmra.
6 Niꞌwa iꞌuwaibaba na si marĩ te te ꞌre iꞌaꞌmanharĩ mono hã, niwa sihâimanazé wamnarĩ õ di za. Õne uꞌâ te za duré ãma ꞌre dapoꞌre puꞌu uꞌâsi zaꞌra.
7 Romreme iwasété ma hã, tãma ꞌre pahi mono õ di za.Pẽꞌẽ nhiptete na te za ꞌre hâimana uꞌâsi, Uburé Danhibꞌapito si te te sina ꞌre umnhasi mono wa.
8 Õ hã te za hâtâꞌâ ãna ꞌre hâimana, ꞌre pahi mono ãna.Tahawa, te za tinhitobꞌru norĩ ãma aiꞌutézé hã waihuꞌu siro, sena na.
9 Isimarĩꞌõ norĩ ma, te za duré sõprum na tinhimarĩ hã te te ꞌre anhomri. Õne uꞌâ te za duré isimizawizé hã daꞌãma ꞌre hâimana.Ta hã dama pire di, duré dama iwazéb zaꞌẽne.
10 Iwasété norĩ, ãne na isimiꞌmanharĩzé te te siwi ꞌre ꞌmadâꞌâ mono wamhã, te za sada ꞌre sitiꞌru zaꞌra. Te za duré ꞌre ꞌwasitete zaꞌra. Te za duré ꞌre sihâimanazé uprosi zaꞌra.Duré marĩ zô te te sima ꞌre irobꞌruiwapari zaꞌra mono zé hã, marĩ dai õ di, tarére.
