Mateus 7:1-29
7 — Dawasédé hã daꞌãma ꞌre saꞌra zaꞌra waꞌaba mono tõ, ꞌRe ihâimana uꞌâsi mono hã aiwasédé te te aiꞌãma ꞌre saꞌra zaꞌra waꞌaba mono tõ da.
2 E marĩ wa. ꞌRe ihâimana mono te za aiwasédé hã te te aiꞌãma ꞌre saꞌra zaꞌra waꞌwa, dawasédé hã daꞌãma ꞌre isaꞌra zaꞌra waꞌaba mono zéb zarina, duré dahâimanazé dawi ꞌre ipibu zaꞌra waꞌaba mono zéb zarina.
3 E marĩ da, te wede zapru hã asisãnawã tõmo ꞌre ihâimana hã tiwi ꞌre iꞌmadâꞌâ mo. E ꞌmadâꞌâ ã bâ, wede waꞌõno atõmo ꞌre ihâimana hã.
4 E niha te za tane nherẽ inha, asisãnawãi ma, ãne: “Atõmo ꞌremhã wede zapru te aima wazere da”, wede waꞌõno hã atõmo ꞌremhã aima hâimana nherẽ.
5 Aihâimana siꞌamoi pese na ꞌre iꞌaihâimana mono! Maꞌãpé wazere imorĩꞌrata na, wede waꞌõno atõmo ꞌremhã. Taha parip si te za iꞌmadâꞌâ wẽ, wede zapru hã asisãnawã tõmo hawi iwazere da hã.
6 — Marĩ hã wazé pese na ꞌre ihâimana zaꞌra mono hã, wapsã ma ꞌre sõmri zaꞌra waꞌaba mono tõ. E marĩ wa. Ta norĩ hã te za asada ꞌre hâimana zaꞌra waꞌwa, te te ꞌre aihâzu waꞌaba mono da. Duré perola na ẽtẽ waipo iwaꞌâbâ zaꞌẽtẽ nhisi hã ꞌre sãmra aba mono tõ, uhâbâi ma. E marĩ wa. Ta norĩ hã te za taré te te ꞌre watiꞌi zaꞌra.
ꞌRe ihâimana uꞌâsi mono wi, da te ꞌre irowaptẽrẽ uꞌâsi zaꞌra mono zé
7 — ꞌRe ihâimana uꞌâsi mono wi, marĩ ꞌre waptẽrẽ zaꞌra waꞌaba mono. Tawamhã te za te te aima ꞌre anhomri ꞌwa. Sô ꞌre airĩtĩ zaꞌra waꞌaba mono. Tawamhã te za ꞌre isõpẽtẽ zaꞌra waꞌaba mo. ꞌRe ꞌridawa taꞌa zaꞌra waꞌaba mono. Tawamhã te za te te aima ꞌre aꞌridawa waꞌwa, ꞌRe ihâimana uꞌâsi mono hã.
8 E marĩ wa. Niꞌwam norĩ hã marĩ te te ꞌre iwaptẽrẽ zaꞌra mono hã, te za te te ꞌre waibu. Duré marĩ zô ꞌre irĩtĩ zaꞌra mono norĩ hã te za te te ꞌre sõpẽtẽ zaꞌra. Duré ꞌridawa hã te za tãma ꞌre siꞌridawa zaꞌra, te te ꞌre iꞌridawa taꞌa zaꞌra mono norĩ ma hã.
9 Damama na iꞌaihâimana zaꞌra waꞌwa hã, aiꞌra, iꞌuꞌẽtẽ wapu te te aiwi ꞌmaiwaptẽrẽ aba wamhã, e ẽne hã te za tãma isõmri ꞌwa.
10 Duré, tebe te te aiwi ꞌmaiwaptẽrẽ aba wamhã, e wahi tãma ꞌmanhomri aba da bâ.
11 A norĩ waꞌwa hã ꞌre anomro wasété aba mono nherẽ, marĩ iwẽ aiꞌra ma hã, ꞌre sõmri waihuꞌu pese zaꞌra waꞌaba mono di. Tane Aimama ꞌwa hâiwa ãma ꞌre isãmra mono hã asipai u waꞌaba te za marĩ iwẽ hã te te ꞌre anhomri, te te tiwi ꞌre iwaptẽrẽ zaꞌra mono norĩ ma hã.
12 — Marĩ hã dama ꞌre ꞌmanharĩ zaꞌra waꞌaba mono, da te aima ꞌre ꞌmanharĩ zaꞌra waꞌaba mono da, asima ꞌre iwẽ zaꞌra waꞌaba mono hã. Ã norĩ na te rowasuꞌu zaꞌra, ꞌRe ihâimana uꞌâsi mono nhimiroti zahi na Mozési te te ãma irobꞌuiꞌérézé hã duré isadawa ꞌmahârâꞌwa norĩ nhimiꞌuiꞌéré zama.
Maparane ꞌridawa
13 — Maꞌãpé, ꞌridawa ꞌre suꞌure na si, ꞌre asisisi aba mono. E marĩ wa. Ropipa u hã, ꞌridawa hã ꞌre zaꞌẽtẽ di. Duré ropipa u bâdâdi hã wapu di, ãma ꞌre idanomro mono da hã. Taha ꞌridawa ꞌre zaꞌẽtẽ na hã, te daꞌahâ na, ꞌre danhisisi.
14 Tane nherẽ, dahâimanazé isiꞌutõrĩꞌõ u ꞌridawa hã ꞌre suꞌure di! Duré tamomo bâdâdi hã pire di, ãma ꞌre idanomro mono da hã. Tahawa te daꞌumro na si, da te ꞌre sõpẽtẽ zaꞌra.
Senaiꞌõ na ꞌRe ihâimana uꞌâsi mono zadawa ꞌmahârâꞌwa norĩ
15 — Niꞌãpé, ꞌre asipibui pese zaꞌra waꞌaba mono, senaiꞌõ na ꞌRe ihâimana uꞌâsi mono zadawa ꞌmahârâꞌwa norĩ wi hã. Ta norĩ hã poneꞌẽrebâ newa te za atẽme tiwisi ꞌwa. Tane nherẽ, ipẽꞌẽ ꞌremhã abaze zahi ne hã.
16 A norĩ waꞌwa hã te za ꞌre iwaihuꞌu zaꞌra waꞌaba mo, ihâimanazém na. ꞌWabzéré hã ꞌrãi waihuꞌu õ di, uva na iꞌrã na hã. Tane duré robꞌrã figu na iꞌrã na hã ꞌrãi waihuꞌu õ di, ꞌwabzéré hã.
17 Tane, rowede norĩ iwede wẽ hã, ꞌrãi wẽ na te za ꞌre ꞌrã zaꞌra. Tazahã, rowede norĩ wede wasété wamhã, ꞌrãi wasété na si te za tô ꞌre ꞌrã zaꞌra.
18 Rowede hã wede wẽ wamhã, ꞌrãi wasété na hã ꞌrãi waihuꞌu õ di. Tane duré rowede hã wede wasété wamhã, ꞌrãi wẽ na hã ꞌrãi waihuꞌu õ di.
19 Uburé rowede hã ꞌrãi wẽ na ꞌre ꞌrã zaꞌra mono õ wamhã, te za da te ꞌre sihâri zaꞌra. Taha parimhã, unhama u te za da te ꞌre sãmra.
20 Tane, ꞌRe ihâimana uꞌâsi mono zadawa ꞌmahârâꞌwa norĩ senaiꞌõ hã te za ꞌre iwaihuꞌu zaꞌra waꞌaba mo, marĩ te te ꞌre iꞌmanharĩ zaꞌra mono zém na.
E ꞌwa hã te za ãzé, hâiwa ãma ꞌRe ihâimana uꞌâsi mono daꞌãma isibꞌaꞌuwẽ mono zéb u hã
21 — Niꞌwam norĩ hã te te ĩꞌmahârâ zaꞌra nherẽ, ãne: “Ĩnhibꞌapito, Ĩnhibꞌapito” uburé sisisi õ di za ta norĩ hã, Hâiwa ãma ꞌre Isãmra mono, daꞌãma ꞌre isibꞌaꞌuwẽ mono zéb u hã. Ĩmama hâiwa ãma ꞌre isãmra mono, te te sima ꞌre iwẽ mono zéb uwaibaba si, te te ꞌre iꞌmanharĩ zaꞌra mono norĩ si, te za asisi.
22 Tawamhã daꞌahâ na te za taha bâtâ ãma* hã ĩꞌmahârâ zaꞌra ni, ãne: “Ĩnhibꞌapito, Ĩnhibꞌapito, e asisi na wa te dama ꞌre asadawa wasuꞌu zaꞌra mono ã bâ. E asisi na waꞌuburé ma, wa te ꞌre robꞌru zaꞌra mono ã bâ. E duré asisi na marĩ dama iꞌmanharĩ waihuꞌuꞌõ hã ahâ na wa te ꞌre ꞌmanharĩ zaꞌra mono ã bâ.”
23 Tane nherẽ, wa za wa hã, ta norĩ ma sõꞌawi tãma nharĩ zaꞌra, ãne: “Niwa te aiwaihuꞌu zaꞌra waꞌaba õ di. Mo oto ĩnhiti aiꞌabaꞌréi waꞌaba! A norĩ waꞌwa hã marĩ iwasété si te ꞌre iꞌmanharĩ zaꞌra waꞌaba mo.”
Maparane ꞌri naꞌrata nhanaꞌrata norĩ wasuꞌu
24 — Niꞌwa hã ã hã ĩnhimiroti te te ꞌre iꞌawapari mono hã duré ta norĩ zarina ꞌre hâimana mono wamhã, ta hã aibâ rosaꞌrata waihuꞌu pese ꞌwa, tinhorõwa te te iꞌri ne, ẽtẽ tobꞌrã nhisiwi.
25 Tawamhã nimahã na hã tã taꞌa wamhã, ma tô tiꞌâ pré. Rowaꞌu hã saꞌẽtẽ ma tô rowapõ, ꞌri nhoꞌõmoi baba. Tane nherẽ, ꞌri hã simei õ di. E marĩ wa. ꞌRi naꞌrata nhanaꞌrada hã ẽtẽ tobꞌrã nhisiwi wa.
26 — Niꞌwa hã ã hã ĩnhimiroti tipoꞌre na te te ꞌre awapari mono nherẽ, ta norĩ zarina ꞌre hâimana mono õ wamhã, ta hã aibâ isimirosaꞌrata waihuꞌuꞌõ, tinhorõwa te te iꞌri ne supara nhisiwi.
27 Tawamhã nimahã na hã tã taꞌa wamhã, ma tô tiꞌâ pré. Rowaꞌu hã ma tô saꞌẽtẽ rowapõ, ꞌri nhoꞌõmoi baba. Tawamhã ꞌri hã ma tô waptãrã. Ma tô aipru pese.
28 Tawamhã Zezusi hã ãne na te te dama rowasuꞌu parimhã, daꞌahâ na da te iwapari zaꞌra norĩ hã ma tô ãma tatobꞌuzu zaꞌra ni, isimirowahutu na hã,
29 simiroti pire na te te ꞌre rowahutu mono wa, ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ nhimirowasuꞌu nei õ wa.
Ĩwaꞌõtõ piꞌreba watsuꞌu mono
^ 7:22 taha bâtâ ãma ꞌRe ihâimana uꞌâsi mono te te daꞌãma iꞌarowairébézé, robꞌrãsutuzéb ãma
