Mateus 1:1-25
1 Ã hã Zezu Cristuhu hiꞌrata norĩ zaꞌratazém na robꞌuiꞌéré. Ta hã Davihi nhihudu. Davi hã, Abraꞌãhã nhihudu.
2 Abraꞌã hã Izaquihi mama. Izaqui hã Zacoho mama. Zaco hã Zudaha mama duré isisãnawã norĩ mama.
3 Zuda hã Perizihi mama, duré Zeraha mama. Ina zahuré hã Tama na isisi hã. Periz hã Esrõhõ mama. Ta hã Esrõ hã Arãhã mama.
4 Arã hã Aminadabihi mama. Aminadabi hã Nasõhõ mama. Ta hã Nasõ hã Salmohõ mama.
5 Salmo hã Boazihi mama. Boazihi na hã Raabi na isisi hã. Boazi hã Obedihi mama. Obedihi na nhisi hã, Ruti na isisi. Ta hã Obedi hã Zéséhé mama.
6 Zésé hã apito Davihi mama. Davi hã Salomahã mama. Salomahã na hã Uriasihi mro aré.
7 Saloma hã Robuãhã mama. Robuã hã Abiasihi mama. Ta hã Abias hã Azaha mama.
8 Aza hã Zozafaha mama. Zozafa hã Zurãhã mama. Ta hã Zurã hã Uziasihi mama.
9 Uzias hã Zotãhã mama. Zotã hã Acasihi mama. Ta hã Acasi hã Ezequiaha mama.
10 Ezequia hã Manaséhé mama. Manasé hã Amosihi mama. Ta hã Amosi hã Zoziaha mama.
11 Zozia hã Zeconiaha mama duré isisãnawã norĩ mama, Izaraéu nhihudu norĩ ãma da te aiꞌuté zaꞌra wa, pawasisi ré, Babilonia u da te isimroi mono wahub ꞌremhã.
12 Izaraéu nhihudu norĩ hã, Babilonia u da te simroi mono parimhã, Zeconia hã ma tô tisipodo hã time, Salatiéu hã. Ta hã Salatiéu hã Zorobabéhé mama.
13 Zorobabéu hã Abiudihi mama. Abiudi hã Eliaquĩhĩ mama. Ta hã Eliaquĩ hã Azoho mama.
14 Azo hã Sadoquihi mama. Sadoqui hã Aquĩhĩ mama. Ta hã Aquĩ hã Eliudihi mama.
15 Eliudi hã Eliazaha mama. Eliaza hã Matãhã mama. Ta hã Matã hã Zacoho mama.
16 Zaco hã Zuzéhé mama. Zuzé hã Mariaha mro. Ta hawi Zezusi hã ma tô podo, Cristu* na da te ꞌre isisi zaꞌra mono hã.
17 Ãne ma tô tihâiba dapodo hã 14 na, Abraꞌãhã hawimhã Davihi u hã. Duré Davihi hawimhã ma tô tihâiba dapodo hã 14 na, Izaraéu nhihudu norĩ, Babilonia u da te isimroi mono zéb u hã. Ta hawimhã Cristu ipotozéb u hã ma tô duré tihâiba, dapodo hã 14 na.
Zezu Cristu hã ipotozé
18 Tawamhã Zezu Cristu ipotozé hã, ãne: Maria ina hã, Zuzéhé ãma mro da, ma tô ropisudu hã ãma tihâiba. Tane nherẽ, sina mro zahuré wana ré, ma tô tiwasã, ꞌRe ihâimana uꞌâsi mono Pẽꞌẽzani na.
19 Tawamhã Zuzé hã Maria ãma imro da hã, aibâ marĩ iꞌuwaibaba si te te ꞌre abꞌmanharĩ mono wa, te te sima wẽ õ di, Mariaha ãma danhoꞌa iwasédé te te ihiri da hã, aibâ na simisaihuri wa iwasã na hã, tãma rowazép tõ da. Tahawa ma tô sima rowairébé, ropisudu hã za ãma imrozém na hã* piꞌuriwi te te pari da, niꞌwa hã te te waihuꞌu ãna.
20 Ãne na Zuzé hã te te sima rosaꞌrata ré, Uburé Danhibꞌapito ma hâiwa hawi romhuriꞌwa hã ma tô tãma sihâiꞌré, isõtõ ꞌrowi. Ãne te tãma tinha:
— Zuzé, Davihi nhihudu, aipahi tõ, Maria za asima iꞌâri na hã ãma aimro da. Ta hã ma tô tiwasã, ꞌRe ihâimana uꞌâsi mono Pẽꞌẽzani na.
21 Taha ma, te za iꞌra hã ꞌwatébrémi na tãma podo. Poto wamhã, Zezusi* na te za isisi. E marĩ wa. Ta hã te za tinhibꞌaꞌuwẽ norĩ hã te te ꞌre anhoꞌreptu, tiwasédé te te ꞌre iꞌmanharĩ zaꞌra mono wi.
22 Tawamhã ãne hã ma tô uburé tiromhâiba, te te sina uwaimrami da, Uburé Danhibꞌapito te te iwaihuꞌuzéb zarina, tizadawa ꞌmahârâꞌwai ma, ãne:
23 “Piꞌõ iꞌubuni hã te za tiwasã. Taha ma, te za iꞌra hã ꞌwatébrémi na tãma podo.Taha nhisi hã za, Emanuéu na.”
(Emanuéu hã te wasuꞌu, “ꞌRe ihâimana uꞌâsi mono, wasiré uꞌâ”.)
24 Tawamhã Zuzé hã utu wamhã, ma tô ꞌmanha, hâiwa hawi Uburé Danhibꞌapito ma romhuriꞌwa hã te te tãma iꞌruzéb zarina. Ma tô oto ãma timro, Mariaha ãma.
25 Tane nherẽ, Zuzé hã te te nasi upi õ di, aiꞌuté ipotozéb u hã. Tawamhã ꞌwatébrémi hã poto wamhã, ma tô sisi, Zezusi na.
Ĩwaꞌõtõ piꞌreba watsuꞌu mono
^ 1:16 Cristu hã, Danhoꞌreptuiꞌwa da, ꞌRe ihâimana uꞌâsi mono te te ipisudu, te wasuꞌu.
^ 1:21 Zezusihi nhisi hã “Uburé Danhibꞌapito, ꞌre daꞌanhoꞌreptui mono ꞌwa” te wasuꞌu. Zezusihi nhisi hã gregu mreme na hã. Zozué hã hebraicu mreme na hã tô Zezusihi nhisi.
^ 1:19 Taha bâtâ mono na hã Zudeu norĩ hâimanazé hã, niꞌwam norĩ sina mro zahuré da wamhã, te za ropisutu zahi hã sima ꞌmanharĩ zahuré, tinhimiꞌmadâꞌâ na sima ꞌre hâimana zahuré mono da. Ta hã siꞌutõrĩ waihuꞌu pese di, sina mro zahuré pari, sirẽme zahuré wap si.
