Apocalipsi 17:1-18
17 Tawamhã 7 na hâiwa ãma romhuriꞌwa norĩ siré hã ma tô we ĩtẽme ꞌmaimo, uꞌawi ré ihâimana zaꞌra norĩ siré hã. Tawamhã te ĩzatõ, ãne:
— We ĩsiré aimorĩ, Babilonia na ꞌri nhoꞌõmo zaꞌẽtẽ nhisi ãma ꞌre idahâimana wasété zaꞌra mono norĩ ma, ꞌRe ihâimana uꞌâsi mono te te irobꞌmanharĩ pipa zé hã sabu da. Panhoꞌõmo siꞌrutu ꞌrata, te ꞌri nhoꞌõmo zaꞌẽne hã ꞌre hâimana. Piꞌõi wasédé siwaꞌâbâ zô ꞌre isisõmri mono ne, te Babilonia ãma hã ꞌre dahâimana wasété uptabi zaꞌra.
2 Aibâ hã piꞌõi hâimana wasété na ꞌre ihâimana wasété mono ne, ma tô daro mono bâ danhibꞌapito norĩ dama ipire zaꞌra hã Babilonia ãma ꞌre idahâimana wasété zaꞌra mono norĩ siré ꞌre wasété uptabi zaꞌra. Âzé nhipãrĩ para daꞌuihâ idiꞌiti zarina, da te ꞌre irobzanhamri zaꞌra mono ne, ma tô daro mono bâ Babilonia ãma ꞌre idahâimana wasété zaꞌra mono norĩ siré, ꞌre dahâimana to zaꞌra, dawasété na hã.
Piꞌõ iwasédé hã timro upana aibâ aimawi zô si, te te ꞌre irowasutu mono hã, Babilonia ãma ꞌre idahâimana zaꞌra mono norĩ marĩ iwasété zô si da te dasima ꞌre irobꞌruiwapari zaꞌra mono, te wasuꞌu.
3 Tawamhã ꞌRe ihâimana uꞌâsi mono Pẽꞌẽzani hã ma tô duré ĩꞌuihâ piꞌra. Te te ĩꞌuihâ piꞌrai wa, wa tô duré aimawi ĩhâiba. Tawamhã hâiwa ãma romhuriꞌwa hã ma tô ĩzaprõ, aꞌubuni u, suparaꞌré u. Tame piꞌõ hã wa tô ꞌmadâꞌâ, ropoto siwamnarĩ ipré nhisiwi, isãmra hã. Ropoto siwamnarĩ hâiba hã ma te robꞌuiꞌéré hã hâibaꞌutõ. Aiwa ꞌRe ihâimana uꞌâsi mono wamri sine na, isiwaptẽrẽ uiꞌéré wasédé hã. Duré 7 na iꞌrã hã, ta hã. Duré iꞌu hã 10 na. Taha hâiba nhisiwi, te piꞌõ hã nhamra.
4 Piꞌõi uza hã ihâpré warõ tâꞌâ na, duré ihâpré pese na iꞌuza hã, duré uburé daꞌuza wamri nhipai u, iwaꞌâbâ zaꞌẽne ta hã. Uburé marĩ hã tisipesezé hã iwaꞌâbâ zaꞌẽtẽ mono bâ te te siꞌãma iꞌazaꞌra mono ré, te nhamra, ẽtẽ waipo pré oru ꞌmanharĩ ré, duré ẽtẽꞌubuzi ꞌmanharĩ ré, duré aꞌé tõmo wawẽ ne itobꞌa ꞌmanharĩ ré, iwaꞌâbâ zaꞌẽtẽ ré. Hâsizé hã oru ꞌmanharĩ na iꞌmanharĩ hã te duré ꞌre tiꞌâ tinhibꞌrata, uva ꞌrãi waꞌu isé pire ré hã. Uva ꞌrãi waꞌu isé hã piꞌõ ipoꞌreꞌõ siwamnarĩ hâimanazé, te wasuꞌu. Aibâ na ꞌre ihâimana siwamnarĩ uꞌâsi mono zé, te duré wasuꞌu ta hã.
5 Duré piꞌõi uihâ na robꞌuiꞌéré hã dama iwaihuꞌuꞌõ na, ãma isimiréꞌézém na hã iwamri. Ãne iwamrizé, imorĩꞌrada hã: Babilonia na ꞌri nhoꞌõmo zaꞌẽtẽ na. Duré daro mono bâ dawasété ꞌru naꞌrata ꞌwa na, iwamrizéb amo hã. Duré iwamrizéb amo hã, piꞌõ siwaꞌâbâ zô ꞌre isisõmri zaꞌra mono norĩ na na, iwamrizéb amo hã, isine aibâ na ꞌre hâimana wasété zaꞌra mono da, piꞌõ norĩ te te ꞌre wadaꞌuri zaꞌra mono wa, ta hã.
6 Tawamhã ã piꞌõ hã wa duré ꞌmadâ, apâ. Daꞌuihâ idiꞌiti wa, dato sina da te ꞌre irobzanhamri zaꞌra mono ne, te piꞌõ hã robzanha. ꞌRe ihâimana uꞌâsi mono nhibꞌaꞌuwẽ, isadawa para, da te ꞌre simroi mono wẽ te, te ꞌre to, piꞌõ hã. Duré Zezusihi zazeiꞌwa norĩ sipizari ãna, Zezusi te te ꞌre sazei pese zaꞌra mono ꞌru te, da te ꞌre simroi mono wẽ te, te piꞌõ hã ꞌre to.
Tawamhã piꞌõ hã te ꞌmadâꞌâ wamhã, wa ãma ĩtobꞌuzu, ĩma saꞌrese õ wa.
7 Tawamhã hâiwa ãma ꞌRe ihâimana uꞌâsi mono ma romhuriꞌwa hã te ĩzadanha, ãne:
— E marĩ da, ma tô ãma atobꞌuzu. E waihuꞌu ã bâ. Waihuꞌu õ wa, wa za tô oto aima hâiꞌré, piꞌõi hâimanazé hã dama isaꞌreseꞌõ hã. Duré â hawi ropoto siwamnarĩ hâimanazé hã wa za duré aima hâiꞌré, isisiwi piꞌõ isãmra hâimanazé hã, 7 na iꞌrã hã, duré 10 na iꞌu hã.
8 Ã hã â hawi ropoto siwamnarĩ iꞌmadâ hã ihâiba ré hã aré. Tane nherẽ, ãhã na hâiba ré, hâimana õ di aꞌâ. Tane nherẽ, te za romhutu na hâiba ré watobro, abꞌre ꞌrehâ hawi. Watobro wamhã, niwapsi te za ꞌRe ihâimana uꞌâsi mono hã uprosi. Taha õ ré hã, aré dâꞌâ nherẽ, hâiba ré abꞌre ꞌrehâ hawi watobro wa, te za da te ꞌmadâꞌâ zaꞌra sina ãma tatobꞌuzu zaꞌra ni, tiꞌai ãma daro mono bâ ꞌre idahâimana zaꞌra mono hã. Ropoto naꞌrata hawimhã, ma tô ꞌRe ihâimana uꞌâsi mono hã danhisi hã aꞌuiꞌéré ibaihâ na, za iꞌrata rowẽ na ꞌre idahâimana uꞌâsi zaꞌra mono norĩ nhisi hã. Tawamhã ibaihâ na isisi uiꞌéré ihâimana zaꞌra õ norĩ hã te za ãma tatobꞌuzu zaꞌra ni, ropoto siwamnarĩ ãma hã.
9 — Ã hã te aima ihâiꞌré hã niꞌwa hã tinhimirosaꞌrata na te te ãma romhõsi wapsi hã, te za waihuꞌu. Ã hã 7 na iꞌrã zaꞌra hã 7 na ẽtẽ ꞌrãihâ mono hã te wasuꞌu, piꞌõ, ihâiba nhisiwi isãmra zaꞌra hã. Duré 7 na dama rotiꞌwa norĩ hã te wasuꞌu zaꞌra.
10 7 na ihâiba zaꞌra hã ma tô imrotõ na siparabâsi nasi aiꞌré zaꞌra, daꞌmadâꞌâ hawi. Ta norĩ zaꞌu hã te oto misi te te ꞌre daꞌaꞌmadâꞌâ. Duré ihâiba amo, daꞌrãsutuꞌwa hã zahadu sébré õ di, daꞌmadâꞌâꞌwa da hã. Sébré wamhã, tô sena te za te te ꞌre daꞌaꞌmadâꞌâ hutu.
11 Daꞌmadâꞌâꞌwa norĩ hã uburé sisarina wairébé parip si, te za ropoto siwamnarĩ â hawi iwatobro hã ãzé, te te ꞌre daꞌmadâꞌâ mono da, aré hâiba ré nherẽ, idâ hã. 8 ãma te za ãzé dazaꞌu, te te ꞌre daꞌmadâꞌâ mono da. Ta hã te za niwapsi ꞌRe ihâimana uꞌâsi mono hã uprosi.
12 — Tawamhã duré â hawi ropoto siwamnarĩ u hã 10 na iꞌmadâꞌâ zaꞌra hã, 10 na dama ipire zaꞌra norĩ te wasuꞌu, daꞌmadâꞌâꞌwa na zahadu te te ãma isãnaꞌrata zaꞌra õ hã. Niwapsi te za tãma waprosi zaꞌra ni, â hawi ropoto siwamnarĩ siré te te ꞌre daꞌmadâꞌâ hutu zaꞌra mono da.
13 Ã norĩ hã misi haré simisutu isimiroti zaꞌra hã za, marĩ ꞌmanharĩ wasété da hã. Tahawa, te za simisutu tãma sisõmri zaꞌra, â hawi ropoto siwamnarĩ ma hã, isadawa para te te ꞌre daꞌmadâꞌâ zaꞌra mono da, duré tinhiptetezém na te te ꞌre pawaptob zaꞌra mono da.
14 Te za duré ropoto siwamnarĩ siré siwi ꞌwapé, Poneꞌẽrebâ hã. Tane nherẽ, te za Poneꞌẽrebâ hã ãma aiꞌuté zaꞌra. Ta hã Poneꞌẽrebâ danhipai u Uburé Danhibꞌapito na ꞌre hâimana mono wa, duré danhipai u dama pire na ꞌre hâimana mono wa, te za ãma aiꞌuté zaꞌra. Niꞌwam norĩ hã isirã zarina si ꞌre nomro mono da, Poneꞌẽrebâ te te ꞌre iꞌapisutu mono norĩ hã, duré simiꞌẽ na õhõ ãma si ꞌre inomro mono norĩ hã, te za Poneꞌẽrebâ siré ãma aiꞌuté zaꞌra, ropoto siwamnarĩ norĩ ãma hã.
15 Tawamhã hâiwa ãma romhuriꞌwa hã te duré ĩma tinha, ãne:
— Ã pa nhoꞌõmo siꞌrudu hã iꞌmadâ hã piꞌõi wasédé siwaꞌâbâ zô ꞌre isisõmri mono isisiwi isãmra hã, daro mono bâ damreme sipoꞌo mono bâ ꞌre idahâimana zaꞌra mono, te wasuꞌu, ã pa nhoꞌu hã.
16 17:16-17 ꞌRe ihâimana uꞌâsi mono hã te za pisutu zaꞌra, 10 na dama ipire zaꞌra norĩ hã, ꞌRe ihâimana uꞌâsi mono te te sima ipisutuzéb zarina, misi haré simisutu te te ꞌre rosaꞌrata zaꞌra mono da, duré ropoto siwamnarĩ ma sisõmri zaꞌra wa, isapari te te ꞌre romhuri zaꞌra mono da, tinhiptetezém na te te ꞌre pawaptob zaꞌra mono da. ꞌRe ihâimana uꞌâsi mono hã tinhimiropisudu hã romnhowa te te iꞌazaꞌra mono hã za te te ãma iꞌaꞌuwaimrami mono zéb u, te za ropoto siwamnarĩ zapari te te ꞌre daꞌmadâꞌâ ꞌrãsutu zaꞌra.
Tahawa, ropoto siwamnarĩ iꞌmadâ hã iꞌõmo norĩ me hã te za ã piꞌõi wasédé hã siwi ꞌruiwapa, siwaꞌâbâ zô ꞌre isisõmri mono hã. Tawamhã piꞌõi wi, te za robꞌubumro zaꞌra, aiꞌuréiwi hâimana da. Te za duré inhi hã siwi tiꞌrẽ. Te za duré siwi uprosi, unhama na. Ãne te za Babilonia ãma hã dasiꞌutõrĩ.
17 ꞌMadâꞌâ 17:16
18 — Duré ã piꞌõ iꞌmadâ hã ã ꞌri nhoꞌõmo zaꞌẽne hã te wasuꞌu, dama isaꞌrese zaꞌẽne hã. Ã ꞌri nhoꞌõmo ãma danhibꞌapito hã dama ipire hã, daro mono bâ dama ipire norĩ nhipai u ꞌre ihâimana mono. Õ norĩ hã te te ꞌre iꞌawadaꞌuri mono.
