Provébiu 2:1-22
2 Ĩꞌra, wa hã te aima ꞌre iroti mono zé hã awaihuꞌu mono. Duré aipẽꞌẽ ꞌremhã asima tété.
2 Maꞌãpé rowaihuꞌu wẽ ꞌwa norĩ hã ꞌre wapari pese zaꞌra mono. Te te ãma ꞌre irowasuꞌu zaꞌra mono zé ꞌre waihuꞌu mono da asima sô ꞌre airĩtĩ mono.
3 Ĩhe, rowaihu iwẽ si asima ꞌre waptẽrẽ mono. Duré saꞌẽtẽ aimreme ꞌrãihâ na aiꞌrã nhimizaꞌresezé hã ꞌre waptẽrẽ mono.
4 Maꞌãpé ẽtẽ waipo prã prata zô, niha wamhã, marĩ waꞌâbâ zaꞌẽne simaꞌuri pese na ꞌre isimiꞌwara mono zô ꞌre idarĩtĩ zaꞌra mono ne, te za ãhã zô si asima ꞌre airĩtĩ mo.
5 Ãne hã ꞌre ꞌmanharĩ mono wamhã, te za Danhibꞌapito ꞌRe ihâimana uꞌâsi mono wazébzé hã iwaihu. Te za duré iꞌazaꞌrese mo, rowaihuꞌu wẽ zé hã.
6 Uburé Danhibꞌapito si rowaihuꞌu wẽ nhomriꞌwa hã. Ta hawip si te duré daꞌrã nhimizaꞌre hã we ꞌre ne.
7 Te duré sena na ꞌre ihâimana zaꞌra mono hã te te ꞌre apawapto. Te isiꞌuwazi ꞌmanharĩ dasiꞌwawi ꞌre idasimapa zaꞌra mono zém ne hã te te ꞌre ꞌmadâꞌâ zaꞌra.
8 Niꞌwam norĩ hã iꞌuwaibaba si te te ꞌre idaꞌapawapto mono norĩ ꞌwawimhã te ꞌre simapa. Imreme te te ꞌre iwapari pese zaꞌra mono norĩ hã te duré te te ꞌre aꞌmadâꞌâ pese.
9 A hã ĩwapari wamhã, marĩ iꞌuwaibaba na si, duré sena na ꞌre dahâimana zaꞌra mono wa, da te ꞌre iꞌmanharĩ zaꞌra mono zé hã te za iꞌawaihuꞌu mo.
10 Ãne wamhã, aiꞌrãi waihuꞌu wẽ na te za sena na ꞌre aihâimana mo. Tawamhã te za asimizaꞌrese wẽ zém na hã aipẽꞌẽ ꞌremhã asima irowẽ waze.
11 Asimirowaihu iwẽ hã te za aiꞌwawimhã ꞌre simapa.
12 Te za marĩ te te ꞌre iꞌmanharĩ wasété zaꞌra mono norĩ hâimanazé wi hã te te ꞌre asõꞌreptu, sadawanhipese na te te dama ꞌre irowasuꞌu wasété zaꞌra mono norĩ wi hã,
13 aꞌuwẽ tihâimanazé iwẽ te te ꞌre rẽme zaꞌra mono wa, robra na oto ꞌre ihâimana zaꞌra mono norĩ wi hã,
14 marĩ iwasédé te te ꞌre iꞌmanharĩ ze zaꞌra mono wi hã,
15 sena na ꞌre ihâimana zaꞌra mono õ norĩ, da te ꞌre iꞌumnhasi waihuꞌu zaꞌra mono õ norĩ wi hã.
16 Ãne wamhã, piꞌõ iwasédé timreme nhipese na te te ꞌre aipibui mono wamhã, te za asimirowaihu iwẽ hã te te ꞌre aipawapto, imreme na ãma ꞌre aiꞌuté mono da,
17 préduptéb ré ꞌRe ihâimana uꞌâsi mono nhoꞌa timro ma te te iropisutu wẽ zém na poꞌre siꞌâri wa, timro te te irẽme hã.
18 Isõrõwa u aimorĩ wamhã, te za bâdâdi ꞌre idadâꞌâ zaꞌra mono zép te u hã aimo. Õwa niꞌwa morĩ wamhã, te za ꞌre idadâꞌâ zaꞌra mono zép ꞌrata ꞌrâwi tihâiba.
19 Ã hã piꞌõ tẽme aibâ morĩ wamhã, apâ bâdâdi iwẽ na ꞌre ihâimana mono zéb u te te sina siri waihuꞌu õ di za.
20 Tahawa sena na, duré iꞌuwaibaba na si ꞌre ihâimana zaꞌra mono norĩ nhirã na si ꞌre aihâimana mono.
21 E marĩ wa. Wẽ na iꞌuwaibaba na si ꞌre ihâimana zaꞌra mono norĩ si te za wanhiptiꞌai ꞌremhã ꞌre hâimana zaꞌra.
22 Tane nherẽ, ꞌRe ihâimana uꞌâsi mono hã te za iwasété norĩ na te te ꞌre awamro. Tiwasédé te te ꞌre iꞌmanharĩ zaꞌra mono norĩ hã te za te te ꞌre azani, robꞌre hã tiꞌai hawi, da te ꞌre isaꞌoꞌo zaꞌra mono ne.
